Luki 24
24
Zyezu nyán-yirili kéele
(Mat 28:1-10; Mar 16:1-8; Zyan 20:1-10)
1A ki ga pye cégbooli cânzélige nyɛʔɛ nyɔ́ɔ na pɛ́ɛn pɛ́ɛn, a cébèle kári nyángi ma ní nùndaanni míige ní, gee pe da sámaga lè. 2A be sáà gi nyaa a be kàdɛnɛgi kòlogo n láʔa nyanweeli na. 3A be jée yaà, pe si ga sáà Kàfɔw Zyezu kúceri nyaa yaà í. 4A be fúnyi nyáʔami be na kéeli bee na, a be nànbēle siin foo n nyaa peyɛɛ daana woyérebéle ní ní buroviiye ní, yi maa ni fíligi kere kere. 5A cébèle fala ni fɛ̀ɛgí níì be nyúnyi jùngu. A be si be pye: «Nyàʔá na yele niweew caa kúbèle nínge ni? 6#Mat 16:21; 17:22-23; 20:18-19; Mar 8:31; 9:31; 10:33-34; Luk 9:22; 18:31-33 Wi o naa í, wi n nyán n yìri. Syɛ́ɛnree wi da joo yele ma lè n wi yaʔa Galile tári ni, ye sɔ̀ngi ye taa dee bee na. 7Wi maa ni gi nyuu níì jo: ‹Ŋàʔanaga gii fwɔɔ be Syɔɔn-pya le kapeebyebèle kɔ́yɔ ni, pe wi kóri tiiparigi na, wí si nyán bi yiri kúbèle nínge ni candaanri wógi na.› »
8A be náà wi syɛ́ɛnri sɔ̀ngi n taa. 9A be yiri nyángi ni n lúru n kári n sáà kérigèle bee myɛ joo pìitunbèle kɛɛ ní nibin ma ní wozanbèle myɛ ní. 10Cébèle bee pe da pye Marii Magidala ye wów, ní Zyani ní, n fàra Marii na wi lè Zyaki nɔ́ɔw. Poro ní be cenyɛnbèle be pye lè ní be ní, a pe myɛ kérigèle bee joo pìitunbèle ma. 11Kàjáa syɛ́ɛnri bee maa pye pìitunbèle nyɛ́nɛ na gbanzan syɛ́ɛnrɛ, pe ga tága cébèle bee na í. 12[A Pyɛri yìri n fàn n kári nyángi ma n sáà lɛ̀ɛlɛ n wéle gi ni n fànibèle yagana nyaa yaà. A wi lúru n kári wi kpaʔa ma n sa ni káama kéeli bee na li kpéʔele lè.]
Emayusi kólogi na
(Mar 16:12-13)
13Cángi bee tiimaa ni wi taʔafɔbèle pèle siin maa ni syée kègaa ma pe i gi yiri Emayusi, ki ní Zyerusalɛmi níngi i nyɛ cúlobéle kɛɛ ní nibin félege. 14Kérigèle gele ke da kpéʔele lè, a be i gele bee myɛ nyuu ní peyɛɛ ní ni syée. 15Amɛɛ be pye jooli na ní i peyɛɛ yíbe lè, a Zyezu tiimaa nùuni be na n baa pínɛ ni syée ní be ní. 16Kàjáa pe da gbàn n wi wéle n cán í. 17A wi be pye: «Syɛɛnrìí félege yele nyuu ní yeyɛɛ ní ni syée nya?» A be yére ní yɛ́ɛyi ní wodanʔaya ní. 18Pe maa ni wàa yiri Kilewopasi, a wee bee wi yari: «Mɔ nibin lé wi nyɛ wodɛ́ɛɔn ní Zyerusalɛmi ni, wee wi lè kérigèle ge kpéʔele yaà lè cányi naa ni wi ga ge cán í?» 19A wi be pye: «Nyàʔá kafelegéle gɛɛ gele bee?» A be wi yari: «Zyezu Nazarɛti ye wów kèlē gɛɛ, wi maa pye báriga kanyaajooo wi kapyegèle ní wi syɛɛnjóori ni, Kolocɔlɔɔ ní syɛ́ɛnbèle myɛ nyɛ́nɛ na. 20A sáriga-wòlobèle kàfɔɔlɔ, ní wolo yɛɛ̀kinibèle baa wi le kútiijoobèle kɔ́yɔ ni, pe wi kpóo, a be wi kóri tiipariga na. 21Wolo sɔ̀ngumi si maa tɔ̀nɔ n pye wi na n jo woro wi a Isirayɛli ye nyúnyi syɔɔ. Kàjáa gee gi níì taʔa lè, kérigèle bee kpéʔele lè, níjanʔa wi nyɛ gi canya taanri. 22Cébèle be nyɛ ní wolo ní lè, a poro pèle wɔ́ɔ̀ wolo kaan a wolo i káama, níì cán pe maa kári nyángi ma nyǐngi nyɔ́ɔ na pɛ́ɛn pɛ́ɛn, 23pe si ga sáà wi kúceri nyaa yaà í, a be wɔ́ɔ baa gi joo níì jo nyɛ̀ʔɛni tundunbèle pèle n peyɛɛ dɛ̀ɛn poro na níì jo wi i nyɛ sìi na. 24A wolo wóbèle pèle kári yaà nyángi ma n tɔ̀nɔ n sáà gi nyaa àmɛɛ cébèle da gi joo lè, kàjáa pe ga wi nyaa í.»
25Lǎli bee ni a Zyezu gi joo be ma níì jo: «Yele sícilimɛ fun syɛ̀ɛnnɛ, yele bele ye nyɛ lè yele o wári tági kanyaajoobèle syɛ́ɛnrɛ myɛ na í, 26ŋàʔanaga ban ki da pye Kirisi í wɔʔɔ kánmi bee na si jée wi nìjangbɔɔri ni ì?» 27Syɛ́ɛnree myɛ ti da sɛ́bɛ lè Kolocɔlɔɔ syɛɛnsɛbɛri ni wi kéeli na, a wi séli Mowizi wóri na ní kanyaajoobèle wóro myɛ ní n toro myɛw kɔ́rɔ tɛ̀ɛn be na.
28Kěgee má pe da ni syée lè, àmɛɛ be sa ni nùuní gi na lè, a Zyezu gi kpéʔele mɔ a jo woro a fala yɛʔɛ̀ ma. 29A be wi nyɛ́ɛri níì jo: «Mi wolo pɔʔɔ mí ba syɔ́ɔn ní wolo ní, níì cán cángi n kwɔ́ɔ, a yébiligi i caa bi wɔ́ɔ.» A wi jée bi sa syɔ́ɔn ní be ní. 30Lǎli ni wi kɔ́ɔ̀ tɛ́ɛn bàā líi ní be ní lè, a wi búruw láa, níì dùbaw taʔa wi na, níì wi kabagi n kaan be ma. 31Lǎli bee ni a be yɛ́ɛyi múgu be na, a be wi wéle n cán, níì fala n fɔ̀n wi ni. 32A be i gi nyuu peyɛɛ ma níì jo: «Lǎli ni wi da ni nyuu ní wolo ní kólogi na lè, ní i Kolocɔlɔɔ syɛɛnsɛbɛri kɔ́rɔ tèé wolo na lè, wolo fúnyi da ni tàán ni maa wolo ni ì?»
33Lǎli bee wonijanna ni a be yìri n lúru n kári Zyerusalɛmi ma n sáà kɛɛ ní nibinw nyaa wogboʔorobéle ní n fàra be pínɛnyɛnbèle na. 34A bele bee i gi nyuu níì jo: «Kányɛʔɛ gii, Kàfɔw n nyán níì wiyɛɛ dɛ̀ɛn Siimɔn na.» 35Gee poro tiimaa nyaa kólogi na lè, a be wɔ́ɔ̀ gee bee joo n tɛ̀ɛn be na, ní àmɛɛ poro wɔ́ɔ̀ wi cán búruw làrigabagila ni lè.
Zyezu n wiyɛɛ dɛ̀ɛn wi pìitamabèle na
(Mat 28:16-20; Mar 16:14-18; Zyan 20:19-23; Kap 1:6-8)
36Lǎli ni be pye ni kérigèle bee nyuu lè, a be Zyezu foo n nyaa woyéreo ní peyɛɛ níngi ni. [A wi gi joo be ma níì jo: «Kolocɔlɔɔ í fûnnyingi kaan yele ma.»] 37A fyáakpɔɔrɔ fala n be cò, a be i fɛ̀ɛgí gbanʔama, pe maa ni sɔ̀ngí pìle poro nyaa. 38A wi be pye: «Nyàʔá na yele fúnyi curugo yele na? Ba nyàʔá na kàkabalayi jée yele fúnyi ni nya? 39Ye mii kɔ́yi ní mii tɔ́lɔyi wéle, yé gi cán mii tiimaa wii. Ye tánga ye wéle mii na. Kaara ní kacere o nyɛ pìle na àmɛɛ yele di nyaa mii na lè í.»
40[Lǎli ni wi dee bee joo n kwɔ́ɔ lè, a wi wi kɔ́yi ní wi tɔ́lɔyi tɛ̀ɛn be na.] 41Amɛɛ fundaanri kpɔ́ʔɔlɔ be kaan lè pe ga sèʔê tága í, ní àmɛɛ be káama lè, a wi be yíbe níì jo: «Yaliire i naa lé yele ma mii í lìi?»
42A be fácerige láa wovwɔ́ɔgwɔʔɔ ní n kaan wi ma. 43A wi gi syɔɔ n káa pe nyɛnɛ na. 44Koro kàdoʔo ma a wi be pye: «Syɛ́ɛnree mii da joo lè yele ma lǎli ni mii sèʔê pye ní yele ní lè, toro di nyɛ dee naa, ncan mii maa yele pye dee myɛ ti da sɛ́bɛ lè mii kéeli na Mowizi làlwaw sɛ́bɛ ni, ní kanyaajoobèle syɛ́ɛnrɛ, ní ŋúnuyi sɛ́bɛ ni lè, ŋàʔanaga gii fwɔɔ dee bee myɛ í foro.»
45Lǎli bee ni a wi be fúnyi múgu be na koro ga pye pe Kolocɔlɔɔ syɛɛnsɛbɛri kɔ́rɔ cán, 46níì be pye: «Ki maa sɛ́bɛ kánmi naa na níì jo, Kirisi a ba wɔʔɔ kùu, si nyán bi yiri kúbèle nínge ni candaanri wógi na. 47Ní níì jo, pe a sa ra nyuu syɛɛnfeleyi myɛ ma woro mɛ́ɛgi na àmɛɛ gi yɛlɛ be kàdoʔo wáa pe kapeegèle ma lè, ge kùsulugi si syɔɔ, pe si a gi séli Zyerusalɛmi na. 48Yele i nyɛ kérigèle bee séerabéle. 49#Kap 1:4 Ye wéle, mii a mii Tóow joogaanna tìrige yele ma, kàjáa ki n yɛlɛ ye kòro kěgi ni bi taa fǎngi bee í yìri nyɛ̀ʔɛni na bi ba yele tɔ́n.»
Zyezu lúguli kéele nyɛ̀ʔɛni na
(Mar 16:19-20; Kap 1:9-11)
50 #
Kap 1:9-11
A wi be kɔ́ri n yiri kěgi ni ni syée ní be ní fwɔɔ n sáà nùuni Betanii na, ní sáà wi kɔ́yi yìrige níì dùbaw kpéʔele be ma. 51Lǎli ni wi pye ni dùbaw kpéʔele be ma lè, a wi yiri be níngi ni, [a Kolocɔlɔɔ wi yìrige n lúrugo nyɛ̀ʔɛni na. 52A be wi kpɔ̀ʔɔrɔ] níì lúru n kári Zyerusalɛmi ma ní fundaangbɔɔrɔ ní. 53A be sáà kòro ni Kolocɔlɔɔ kpɔ̀ʔɔrɔ́ wi kpɔ̀ʔɔrɔli kpaʔa ni làrigèle myɛ ni.
Kolocɔlɔɔ Syɛ́ɛnri © Bible Society of Côte d'Ivoire, 2008.
Luki 24
24
Zyezu nyán-yirili kéele
(Mat 28:1-10; Mar 16:1-8; Zyan 20:1-10)
1A ki ga pye cégbooli cânzélige nyɛʔɛ nyɔ́ɔ na pɛ́ɛn pɛ́ɛn, a cébèle kári nyángi ma ní nùndaanni míige ní, gee pe da sámaga lè. 2A be sáà gi nyaa a be kàdɛnɛgi kòlogo n láʔa nyanweeli na. 3A be jée yaà, pe si ga sáà Kàfɔw Zyezu kúceri nyaa yaà í. 4A be fúnyi nyáʔami be na kéeli bee na, a be nànbēle siin foo n nyaa peyɛɛ daana woyérebéle ní ní buroviiye ní, yi maa ni fíligi kere kere. 5A cébèle fala ni fɛ̀ɛgí níì be nyúnyi jùngu. A be si be pye: «Nyàʔá na yele niweew caa kúbèle nínge ni? 6#Mat 16:21; 17:22-23; 20:18-19; Mar 8:31; 9:31; 10:33-34; Luk 9:22; 18:31-33 Wi o naa í, wi n nyán n yìri. Syɛ́ɛnree wi da joo yele ma lè n wi yaʔa Galile tári ni, ye sɔ̀ngi ye taa dee bee na. 7Wi maa ni gi nyuu níì jo: ‹Ŋàʔanaga gii fwɔɔ be Syɔɔn-pya le kapeebyebèle kɔ́yɔ ni, pe wi kóri tiiparigi na, wí si nyán bi yiri kúbèle nínge ni candaanri wógi na.› »
8A be náà wi syɛ́ɛnri sɔ̀ngi n taa. 9A be yiri nyángi ni n lúru n kári n sáà kérigèle bee myɛ joo pìitunbèle kɛɛ ní nibin ma ní wozanbèle myɛ ní. 10Cébèle bee pe da pye Marii Magidala ye wów, ní Zyani ní, n fàra Marii na wi lè Zyaki nɔ́ɔw. Poro ní be cenyɛnbèle be pye lè ní be ní, a pe myɛ kérigèle bee joo pìitunbèle ma. 11Kàjáa syɛ́ɛnri bee maa pye pìitunbèle nyɛ́nɛ na gbanzan syɛ́ɛnrɛ, pe ga tága cébèle bee na í. 12[A Pyɛri yìri n fàn n kári nyángi ma n sáà lɛ̀ɛlɛ n wéle gi ni n fànibèle yagana nyaa yaà. A wi lúru n kári wi kpaʔa ma n sa ni káama kéeli bee na li kpéʔele lè.]
Emayusi kólogi na
(Mar 16:12-13)
13Cángi bee tiimaa ni wi taʔafɔbèle pèle siin maa ni syée kègaa ma pe i gi yiri Emayusi, ki ní Zyerusalɛmi níngi i nyɛ cúlobéle kɛɛ ní nibin félege. 14Kérigèle gele ke da kpéʔele lè, a be i gele bee myɛ nyuu ní peyɛɛ ní ni syée. 15Amɛɛ be pye jooli na ní i peyɛɛ yíbe lè, a Zyezu tiimaa nùuni be na n baa pínɛ ni syée ní be ní. 16Kàjáa pe da gbàn n wi wéle n cán í. 17A wi be pye: «Syɛɛnrìí félege yele nyuu ní yeyɛɛ ní ni syée nya?» A be yére ní yɛ́ɛyi ní wodanʔaya ní. 18Pe maa ni wàa yiri Kilewopasi, a wee bee wi yari: «Mɔ nibin lé wi nyɛ wodɛ́ɛɔn ní Zyerusalɛmi ni, wee wi lè kérigèle ge kpéʔele yaà lè cányi naa ni wi ga ge cán í?» 19A wi be pye: «Nyàʔá kafelegéle gɛɛ gele bee?» A be wi yari: «Zyezu Nazarɛti ye wów kèlē gɛɛ, wi maa pye báriga kanyaajooo wi kapyegèle ní wi syɛɛnjóori ni, Kolocɔlɔɔ ní syɛ́ɛnbèle myɛ nyɛ́nɛ na. 20A sáriga-wòlobèle kàfɔɔlɔ, ní wolo yɛɛ̀kinibèle baa wi le kútiijoobèle kɔ́yɔ ni, pe wi kpóo, a be wi kóri tiipariga na. 21Wolo sɔ̀ngumi si maa tɔ̀nɔ n pye wi na n jo woro wi a Isirayɛli ye nyúnyi syɔɔ. Kàjáa gee gi níì taʔa lè, kérigèle bee kpéʔele lè, níjanʔa wi nyɛ gi canya taanri. 22Cébèle be nyɛ ní wolo ní lè, a poro pèle wɔ́ɔ̀ wolo kaan a wolo i káama, níì cán pe maa kári nyángi ma nyǐngi nyɔ́ɔ na pɛ́ɛn pɛ́ɛn, 23pe si ga sáà wi kúceri nyaa yaà í, a be wɔ́ɔ baa gi joo níì jo nyɛ̀ʔɛni tundunbèle pèle n peyɛɛ dɛ̀ɛn poro na níì jo wi i nyɛ sìi na. 24A wolo wóbèle pèle kári yaà nyángi ma n tɔ̀nɔ n sáà gi nyaa àmɛɛ cébèle da gi joo lè, kàjáa pe ga wi nyaa í.»
25Lǎli bee ni a Zyezu gi joo be ma níì jo: «Yele sícilimɛ fun syɛ̀ɛnnɛ, yele bele ye nyɛ lè yele o wári tági kanyaajoobèle syɛ́ɛnrɛ myɛ na í, 26ŋàʔanaga ban ki da pye Kirisi í wɔʔɔ kánmi bee na si jée wi nìjangbɔɔri ni ì?» 27Syɛ́ɛnree myɛ ti da sɛ́bɛ lè Kolocɔlɔɔ syɛɛnsɛbɛri ni wi kéeli na, a wi séli Mowizi wóri na ní kanyaajoobèle wóro myɛ ní n toro myɛw kɔ́rɔ tɛ̀ɛn be na.
28Kěgee má pe da ni syée lè, àmɛɛ be sa ni nùuní gi na lè, a Zyezu gi kpéʔele mɔ a jo woro a fala yɛʔɛ̀ ma. 29A be wi nyɛ́ɛri níì jo: «Mi wolo pɔʔɔ mí ba syɔ́ɔn ní wolo ní, níì cán cángi n kwɔ́ɔ, a yébiligi i caa bi wɔ́ɔ.» A wi jée bi sa syɔ́ɔn ní be ní. 30Lǎli ni wi kɔ́ɔ̀ tɛ́ɛn bàā líi ní be ní lè, a wi búruw láa, níì dùbaw taʔa wi na, níì wi kabagi n kaan be ma. 31Lǎli bee ni a be yɛ́ɛyi múgu be na, a be wi wéle n cán, níì fala n fɔ̀n wi ni. 32A be i gi nyuu peyɛɛ ma níì jo: «Lǎli ni wi da ni nyuu ní wolo ní kólogi na lè, ní i Kolocɔlɔɔ syɛɛnsɛbɛri kɔ́rɔ tèé wolo na lè, wolo fúnyi da ni tàán ni maa wolo ni ì?»
33Lǎli bee wonijanna ni a be yìri n lúru n kári Zyerusalɛmi ma n sáà kɛɛ ní nibinw nyaa wogboʔorobéle ní n fàra be pínɛnyɛnbèle na. 34A bele bee i gi nyuu níì jo: «Kányɛʔɛ gii, Kàfɔw n nyán níì wiyɛɛ dɛ̀ɛn Siimɔn na.» 35Gee poro tiimaa nyaa kólogi na lè, a be wɔ́ɔ̀ gee bee joo n tɛ̀ɛn be na, ní àmɛɛ poro wɔ́ɔ̀ wi cán búruw làrigabagila ni lè.
Zyezu n wiyɛɛ dɛ̀ɛn wi pìitamabèle na
(Mat 28:16-20; Mar 16:14-18; Zyan 20:19-23; Kap 1:6-8)
36Lǎli ni be pye ni kérigèle bee nyuu lè, a be Zyezu foo n nyaa woyéreo ní peyɛɛ níngi ni. [A wi gi joo be ma níì jo: «Kolocɔlɔɔ í fûnnyingi kaan yele ma.»] 37A fyáakpɔɔrɔ fala n be cò, a be i fɛ̀ɛgí gbanʔama, pe maa ni sɔ̀ngí pìle poro nyaa. 38A wi be pye: «Nyàʔá na yele fúnyi curugo yele na? Ba nyàʔá na kàkabalayi jée yele fúnyi ni nya? 39Ye mii kɔ́yi ní mii tɔ́lɔyi wéle, yé gi cán mii tiimaa wii. Ye tánga ye wéle mii na. Kaara ní kacere o nyɛ pìle na àmɛɛ yele di nyaa mii na lè í.»
40[Lǎli ni wi dee bee joo n kwɔ́ɔ lè, a wi wi kɔ́yi ní wi tɔ́lɔyi tɛ̀ɛn be na.] 41Amɛɛ fundaanri kpɔ́ʔɔlɔ be kaan lè pe ga sèʔê tága í, ní àmɛɛ be káama lè, a wi be yíbe níì jo: «Yaliire i naa lé yele ma mii í lìi?»
42A be fácerige láa wovwɔ́ɔgwɔʔɔ ní n kaan wi ma. 43A wi gi syɔɔ n káa pe nyɛnɛ na. 44Koro kàdoʔo ma a wi be pye: «Syɛ́ɛnree mii da joo lè yele ma lǎli ni mii sèʔê pye ní yele ní lè, toro di nyɛ dee naa, ncan mii maa yele pye dee myɛ ti da sɛ́bɛ lè mii kéeli na Mowizi làlwaw sɛ́bɛ ni, ní kanyaajoobèle syɛ́ɛnrɛ, ní ŋúnuyi sɛ́bɛ ni lè, ŋàʔanaga gii fwɔɔ dee bee myɛ í foro.»
45Lǎli bee ni a wi be fúnyi múgu be na koro ga pye pe Kolocɔlɔɔ syɛɛnsɛbɛri kɔ́rɔ cán, 46níì be pye: «Ki maa sɛ́bɛ kánmi naa na níì jo, Kirisi a ba wɔʔɔ kùu, si nyán bi yiri kúbèle nínge ni candaanri wógi na. 47Ní níì jo, pe a sa ra nyuu syɛɛnfeleyi myɛ ma woro mɛ́ɛgi na àmɛɛ gi yɛlɛ be kàdoʔo wáa pe kapeegèle ma lè, ge kùsulugi si syɔɔ, pe si a gi séli Zyerusalɛmi na. 48Yele i nyɛ kérigèle bee séerabéle. 49#Kap 1:4 Ye wéle, mii a mii Tóow joogaanna tìrige yele ma, kàjáa ki n yɛlɛ ye kòro kěgi ni bi taa fǎngi bee í yìri nyɛ̀ʔɛni na bi ba yele tɔ́n.»
Zyezu lúguli kéele nyɛ̀ʔɛni na
(Mar 16:19-20; Kap 1:9-11)
50 #
Kap 1:9-11
A wi be kɔ́ri n yiri kěgi ni ni syée ní be ní fwɔɔ n sáà nùuni Betanii na, ní sáà wi kɔ́yi yìrige níì dùbaw kpéʔele be ma. 51Lǎli ni wi pye ni dùbaw kpéʔele be ma lè, a wi yiri be níngi ni, [a Kolocɔlɔɔ wi yìrige n lúrugo nyɛ̀ʔɛni na. 52A be wi kpɔ̀ʔɔrɔ] níì lúru n kári Zyerusalɛmi ma ní fundaangbɔɔrɔ ní. 53A be sáà kòro ni Kolocɔlɔɔ kpɔ̀ʔɔrɔ́ wi kpɔ̀ʔɔrɔli kpaʔa ni làrigèle myɛ ni.
Kolocɔlɔɔ Syɛ́ɛnri © Bible Society of Côte d'Ivoire, 2008.