Smnlean 2
2
1Karac ma dxeral ma, kana ani mmaanu we wada na qhdeun ba smmalu kana da. 2Tgmk7 ali, Utux Baro ge qhdeun na smmalu ka ssmalu na, kiya de msange tg7 ali, sngayun na kana ka qnpahan na. 3Heya we sbleqan na ka tgmk7 ali ma pnsnakan na mrtaso ka 1 ali nii. Ado 1 ali nii we, msange da, msange kana ssmalu na. 4Nii we kika ndaan smmalu ani mmaanu karac ma dxeral ka nii.
Ndaan Smmalu Utux Baro Dungal
Smalu karac ma dxeral ka Utux Baro Tmninun ciida, 5dxeral we uka qhuni ma uka speriq. Ckceka qnpahan we ini kheru ka sama uri. Ado Utux Baro Tmninun we ini na pqyexi nana ka dxeral ma, uka seediq qmeepah dxeral uri. 6Kiya de, niqan ka msqbqebuq mnkala peeyah dxeral ka qsiya gmhuriq kana bobo dxeral. 7Utux Baro Tmninun we dmoi bengux dxeral smmalu seediq. Yupan na hengak knuudus ka muhing na, seediq nii de muudus niqan bgihur da. 8Utux Baro Tmninun we smmalu Eden qnlangan meniq nklaan hido. Psaun na hiya ka seediq snmalu na. 9Utux Baro Tmninun we phrean na lmlamu klegan qhuni ka dxeral, tduwa so ptqaras doriq seediq ma malu ngalun uuqun. Ckceka qnlangan nii we niqan qhuni muudus ma qhuni mkela malu ma naqah.
10Niqan 1 yayung pneyah Eden, gmhuriq qnlangan nii. Peeyah hiya de wada mswaye 4 pnswayan pusu yayung: 11Tg1 we yayung Pison kesun moda mtqiri Xawilah niqan king ka hiya. 12King dxeral kiya we malu bale. Niqan malu ba skenux kerang ma btunux rako. 13Tg2 we Yayung Gixon kesun moda mtqiri Kusu. 14Tg3 we yayung Xideqel kesun moda quri nklaan hido Asur. Tg4 we yayung Euhrates.
15Utux Baro Tmninun we psaun na Eden qnlangan ka seediq kiya, pqpahun na ma pqlhangun na hiya. 16Rmengo seediq kiya ka Utux Baro Tmninun: “Ani maanu mnhei qhuni ckceka qnlangan we ani su mmhemuc mekan. 17Wano pnhei qhuni mkela malu ma naqah we iya bale uqi. Ado ali mnekan su ciida, maha su mphuqil!”
18Rmengo ka Utux Baro Tmninun: “Murux ka seediq kiya we uxe malu. Mpsmalu ku 1 mndungus mdayo heya.” 19Utux Baro Tmninun we mangal dxeral smalu lmlamu klegan camac ma qbheni skiya karac, desun na berah seediq kiya. Teta maanu ka pptngayan na. Seediq kiya we huwa mesa tnngayan na ka lmlamu klegan camac de, kiya ka ngayan na da. 20Seediq kiya we wada na tnyaanun kana ka tnbugan, qbheni skiya karac baro ma, lmlamu camac mkkesa dxeral. Ani so kiya, seediq kiya we ini na slai ka mndungus mdayo heya. 21Utux Baro Tmninun we pchngiun na ptaqi ka heya, kiya de mtaqi da. Kiya de ngalan na hiya ka 1 buuc teerang na, kiya de pstrengun na dungal ka heyi na. 22Utux Baro Tmninun we dmoi buuc teerang nangal na peeyah seediq kiya smalu 1 mqedil. Madis mqedil nii mosa berah seediq kiya. 23Rmengo ka seediq kiya:
“Nii we kiya ka buuc ckceka buuc mu,
heyi ckceka heyi mu,
maha mu kesun mqedil tmngayan ka heya.
Ado nangal peeyah heyi rseno ka heya.”
24Maanu so kiya de, asi ka mswaye peeyah tama ma bubu na ka seediq ma, msuupu mqedil na. 2 heyi we mpkingal heyi. 25Ciida, mbberas ini plukus ka mndungus rseno ma mqedil we uka kesun mqqsiqa ka lnglungan daha.
The Bible Society in Taiwan, 2020
© 台灣聖經公會版權所有，2020