Matiyu 20

Kɔndalakɛbhaa mín núu bháalakɛla lɛ́zɛnnvyɛ ó lɔ

1«Ala yɛ́ Mansaya óo tɛ́nmɛn, o lée nín: Sɛɛntii o wɛ́ɛ bhɔ́ sɔɔjonan o mán kó a káa kɔndalakɛbhaa lu tá kɛ táa bháala kɛ́ a yɛ lɛ́zɛnnvyɛ ó lɔ. 2Ale ní olu bhyɛ kó o bháala o kákan kɛ bhyɛ wɛ́ɛgbannan ngée ne mán, tó aa i látaa bháalakɛlaa ó lɔ́ a yɛ lɛ́zɛnnvyɛ ó lɔ. 3Aa wɛɛ kɛ bhɔ́ kokwaakɛ siinndee wáati o lɔ. Aa kɔndalakɛbhaa gbɛ́ɛlu yé bhálo kɛ bháalaɲiimaa olu síilaa ó lɔ, la tɛ́ tɛ́ olu mán. 4Aa fɔ i yɛ kó: ‹Ále a táa bháala kɛ́ ɲɛ́n lɛ́zɛnnvyɛ ó lɔ́ íkwɔ, á kákan ni saa mín né, ɲáan o dí á man.› 5Ii táa. Teelatee ŋó fɛ́, sɛɛntii oo bhɔ́ íkwɔ, óni teefaan ŋwáati o lɔ kɛ kɔndalakɛbhaa gbɛ́ɛlu látaa a yɛ lɛ́zɛnnvyɛ ó lɔ́ o ɲán kée ŋó mán. 6Teebe ŋó fɛ, aa bhɔ́ kɛ kɔndalakɛbhaa gbɛ́ɛlu yé bhálo kɛ íkwɔ. Aa i manɲaankɛ kó: ‹Mínnɛɛn le kósɔn áa tee ó bɛ́ kɛla yánun lakɛbhɛɛya lɔ?› 7Ii a yawi kó: ‹Mɔɔn lé mánsɔɔ bhá kɛ kɔndala di án man.› Aa fɔ i yɛ kó: ‹Ále a táa bháala kɛ́ ɲɛ́n lɛ́zɛnnvyɛ ó lɔ́ íkwɔ.›

8Ywáa o la, lɛ́zɛnnvyɛtii oo a yɛ bháalakunndii ó kíi kɛ fɔ a yɛ kó: ‹Bháalakɛdhye ŋolu kíi kɛ i bɛ́ ta saa lo i bhóo. Mín núu bháala o lámyaan bɛ́ kwɔ, aa lamyaan olu mán kɛ a lafaa mɔɔn jónan ólu mán.› 9Mín núu bháala o lámyaan teebe ŋó fɛ́, olu nan i ta bháalakɛsaa ó myáan o lé lɔ: Bɛ́ ta wɛ́ɛgbannan kée ngée. 10Tó mín núu kɛ́ bháalakɛdhye jónan olu lé lɛ́zɛnnvyɛ ó lɔ, aa sé olu mán mínngɛ, a tɛɛ kɛ́la olu kɔ́ɔnnɔn kó ilee tá wɛ́ɛ o káa sháaya bɛ́ tá le. Wáa i bɛ́ bɛ́ é wɛ́ɛ lákee ŋo lé sɔ́ɔ: Bɛ́ ta wɛ́ɛgbannan kée ngée. 11Wɛ́ɛ o myáansan o lɔ́ íkwɔ, ii kóman sɛɛntii o mán 12tá kó: ‹Kɔndalakɛbhaa mín núu bháala o lámyaan bɛ́ kwɔ, olu lɛ́ɛlɛ kéembe lé kɛ́ bháala o la, aa kɛ́ díi tó íi olu ní án née saa o kéeɲan, án née mín núu tee kée ŋó bɛ́ kɛ́ bháala lá teegban ó kɔɔ.› 13Sɛɛntii oo fɔ a mɔɔn o kée ɲɛn kó: ‹Ndwáanva, mán í tɔ́nɲɔɔn lɛ́. Ɲɔ́ɔn ngo an ni bhyɛ ne kó ní í sála wɛ́ɛgbannan ngée nán tee ó kɔɔnnɔn lé? 14Oo lɔ mínngɛ, í saa o tá kɛ bhɔ́ ná la. Kɔndaladhye mín ŋé bháala o lámyaan kwɔ́ o la, ngáa saa kée ŋó lé dí íle ní o mán. 15Nzáo lé tɛ́ ɲɛ́ɛla wɛ́ɛ o lɔ a. Bháa móolafwee nin ɲé mínngɛ, O lé ɲánngboya é í lɔ́ a?› » 16Ó bhóo óle mán tó: «Mɔɔn mín núu kwɔ́, olu yáa bhyáa ɲɛ́n tó mín núu ɲɛ́n, olu yáa bhyáa kwɔ́.»

Ɛnza ŋé a sayakɛko óni a kuunngo o fɔ́ ko sawaɲɔn o kɛla

Maki 10.32-34; Luka 18.31-34

17I táatɔ ó lé Yeluzalɛmu, Ɛnza ŋé a yɛ kaamɔɔndhye ndá ni fyáa ó kíi í kéenan ké ii táala, kɛ fɔ i yɛ kó: 18«Áa í tóomanlɔ. Án ni táala Yeluzalɛmu lé wé, mɔɔn Dhyénjɛ o káa ló faanlɛɛɲansebhaa olu kúnndii ólu ní sɛliya kaamɔɔn ólu bhóo yénɔn lé ké olu a kíti bé a ka kó kɛ a fáa. 19O kwɔ, i yáa a lábhyaa káafii olu la tó olu yɛ́ɛ bhɔ́ a lɔ kɛ a gbasi gbɛ́nɲɛn la tó kɛ a gbáan yíi o mán. A tee sawaɲɔɔnlo ŋo a saya ó kwɔ, a yáa kúun kɛ bhɔ́ su ólu cɛ́man.»

Zaki ní Yaya lú wóobhaa é ɲaanli kɛla olu tá fa nvɛ́

Maki 10.35-45

20Oo bhɔ́ í lá mínngɛ, Zebede muso é í mángbaa ni a dhyénjɛ fyáa ólu lé Ɛnza nan. Aa í kúnmɛɛn nɔ́kɛɛ Ɛnza ɲɛn kó o a ɲan a man. 21Ɛnza ngó a yɛ kó: «Íi mínnɛɛn lé kwɔ?» Aa Ɛnza ɲawi kó: «Ní fɛ́ ngó ni í kɛ́ í síi í yɛ́ mansaya ó lɔ, nyénjɛ míin ngée ŋan í síi í bhóobhɛɛkɔɔ ké a kée ŋan í síi í bhóonwaan ngɔɔ.» 22Ɛnza ŋé fɔ a kó: «Áa fé mín ɲiinnan, a mán o lɔ. Né káa tɔ́lɔya súu mín myaan, ále yáa sé o lɔ́kunnan ŋan?» Ii a yawi kó: «Án ɲáan sé!» 23Ɛnza ngó i yɛ kó: «Ale lée wé, né káa tɔ́lɔya mín myaan, a yáa o tɔ́lɔya súu o myáan, wáa a síi ó né bhóobhɛɛkɔɔ óni móonwaanngɔɔ, o látɛɛbhaa o tɛ́ né le. Nvá é o síilaa ólu lɔ́bhyɛ mɔɔn mínnu yɛ, a káa a dí o léelu mán.»

24Kaamɔɔndhye ndá ŋo tɔ ólu o myɛ́n mínngɛ, ii mwɛ́nnɛn bhádhyenjɛman nvyáa ólu mán. 25Kó ólu kɛ́ɲan o man cé, Ɛnza ŋé i bɛ́ kíi tó kɛ fɔ i yɛ kó: «Áa lɔ ŋóo síya gbɛ́ɛ olu tá kunndii ólu kunndiiyafaan lála olu ka. Mɔɔn mín núu i yɛ yamaan o lɔ, ii nɔn lála olu ka. 26Wáa a táa kɛ́ cé álee lú cɛ́man. Ní mɔɔn mín ŋé fɛ́ kɛ kɛ́ mɔɔnba lé a cɛ́man, fɔ́ o tíi ó a kɛ́ bɛ́ tá bháalakɛdhye ne; 27Tó ní mɔɔn oo mɔɔn é fɛ́ kɛ bhyáa bɛ́ ɲɛn, o tíi o kákan né kɛ kɛ́ a yɛ́ yɔ né le. 28Ó ɲán kée ŋó mán, mɔɔn Dhyénjɛ o mán nan ké lɔ́ a kɛ́ a yɛ bháalakɛdhye ne, wáa aa nan lé kɛ bháalakɛ mɔɔn olu yɛ́, óni kɛ a yɛ́ɛ ní o dí mɔɔn shɛ́ɛman ngunmanka le.»

Ɛnza ŋé fyóonjɛ fyáa ɲán lakala

Maki 10.46-52; Luka 18.35-43

29Ii bhɔ́ Zeliko mínngɛ, yamanba é bhyáa Ɛnza ngwɔ. 30Fyóondɔ fyáa lɔ́ síininndɛ́ɛ sháa o gboo nvɛ́, olu Ɛnza ndínmin ngo o myɛ́n mínngɛ, ii gbáa ngbáa ni fɔ le kó: «Mantii ó, Laula Bhɔ́nzɔ manɲwaan án nan!» 31Yaman o yámanngɛ i man kó ii í lúmandhye, wáa i tɛ́ɛ gbáanan í fáan lá o bɛ́ kwɔ kɛ fɔ kó: «Mantii ó! Laula Bhɔ́nzɔ, manɲwaan án nan!» 32Ɛnza ŋé í lɔ́ kɛ fyóondɔ ólu kíi tó kɛ i manɲaankɛ kó: «Aa fɛ́ ké ní mínnɛɛn lé kɛ́ a yɛ́?» 33Ii a yawi kó: «Mantii ó, a kɛ ké án ni ywáa yé.» 34I mánɲwaan é lo Ɛnza nɔn, aa í bhóo túu i ɲán ólu la tó íi ywáa yé í kɔ́lɔ téeman, tó ii bhyáa Ɛnza ngwɔ.

目前选定：

Matiyu 20: MXX

高亮显示

复制