ወንጌል ዘማቴዎስ 13
13
ምዕራፍ 13
በእንተ ምሳሌ ዘርዕ ወዘራዒ
1ወበይእቲ ዕለት ወፂኦ እግዚእ ኢየሱስ እምቤት ነበረ መንገለ ሐይቀ ባሕር። 2ወተጋብኡ ኀቤሁ ሰብእ ብዙኃን እስከ ሶበ የዐርግ ውስተ ሐመር ወይነብር ወኵሉ ሰብእ ውስተ ሐይቅ ይቀውሙ። 3#ማር. 4፥2-20፤ ሉቃ. 8፥4-15። ወነገሮሙ ብዙኀ በምሳሌ እንዘ ይብል ናሁ ወፅአ ዘራዒ ከመ ይዝራዕ። 4ወእንዘ ይዘርዕ ቦ ዘወድቀ ውስተ ፍኖት ወመጽኡ አዕዋፈ ሰማይ ወበልዕዎ። 5ወቦ ዘወድቀ ዲበ ኰኵሕ ኀበ አልቦ መሬት ብዙኅ ወውእተ ጊዜ ሠረጸ እስመ አልቦ ዕመቅ ለመሬቱ። 6ወሶበ ሠረቀ ፀሐይ መጽለወ ወየብሰ እስመ አልቦ ሥርው። 7#ኤር. 4፥3። ወቦ ዘወድቀ ውስተ ሦክ ወበቍሎ ጠበቆ ሦክ ወኀነቆ። 8ወቦ ዘወድቀ ውስተ ምድር ሠናይት ወወሀበ ፍሬ ቦ ዘምእት ወቦ ዘስሳ ወቦ ዘሠላሳ። 9#ማር. 7፥16-17፤ ራእ. 2፥6። ዘቦ እዝን ሰሚዐ ለይስማዕ። 10ወቀሪቦሙ አርዳኢሁ ይቤልዎ በእንተ ምንት በአምሳል ትትናገሮሙ። 11ወአውሥአ እግዚእ ኢየሱስ ወይቤሎሙ እስመ ለክሙ ተውህበ አእምሮ ምሥጢራቲሃ ለመንግሥተ ሰማያት ወሎሙሰ ኢተውህቦሙ። 12እስመ ለዘቦ ይሁብዎ ወይዌስክዎ ወለዘሰ አልቦ እለሂ ቦ የሀይድዎ። 13#ዘዳ. 29፥4። ወበእንተ ዝንቱ በአምሳል እትናገሮሙ እስመ እንዘ ይሬእዩ ኢይሬእዩ ወእንዘ ይሰምዑ ኢይሰምዑ ወኢይሌብዉ። 14ከመ ይትፈጸም ላዕሌሆሙ ትንቢተ ኢሳይያስ ዘይቤ «ሰሚዐ ትሰምዑ ወኢትሌብዉ ወነጽሮ ትኔጽሩ ወኢትሬእዩ። 15#ኢሳ. 6፥9፤ ማር. 4፥12፤ ሉቃ. 8፥10፤ ዮሐ. 12፥40፤ ግብረ ሐዋ. 28፥26-27። እስመ ገዝፈ ልቡ ለዝ ሕዝብ ወእዘኒሆሙ ደንቀወ እምሰሚዕ ወከደኑ አዕይንቲሆሙ ከመ ኢይርአዩ በአዕይንቲሆሙ ወበእዘኒሆሙ ኢይስምዑ ወበልቦሙ ኢይለብዉ ወኢይትመየጡ ኀቤየ ወኢይሣሀሎሙ።» 16ወለክሙሰ ብፁዓት አዕይንቲክሙ እስመ ይሬእያ ወእዘኒክሙ እስመ ይሰምዓ። 17#ሉቃ. 10፥23-24። አማን እብለክሙ ከመ ብዙኃን ነቢያት ወጻድቃን ፈተዉ ይርአዩ አንትሙ ዘትሬእዩ ወኢርእዩ ወፈተዉ ይስምዑ አንትሙ ዘትሰምዑ ወኢሰምዑ። 18አንትሙኬ ስምዑ ምሳሌሁ ለዘይዘርዕ። 19ኵሉ ዘይሰምዕ ነገረ መንግሥተ ሰማያት ወኢይሌቡ ይመጽእ እኩይ ወይመሥጥ ቃለ ዘተዘርዐ ውስተ ልቡ ውእቱኬ ዘተዘርዐ ውስተ ፍኖት። 20ወዘሰ ውስተ ኰኵሕ ተዘርዐ ውእቱ ዝ ዘነገረ ይሰምዕ ወሶቤሃ በፍሥሓ ይትዌከፎ። 21#ራእ. 16፥8-10። ወባሕቱ አልቦ ሥርው ላዕሌሁ ለጊዜሃ ዳእሙ ውእቱ ወከዊኖሰ ምንዳቤ ወስደት በእንተዝ ነገር በጊዜሃ የዐሉ። 22#1ጢሞ. 6፥9። ወዘሰ ውስተ ሦክ ተዘርዐ ዝ ውእቱ ዘነገረ ይሰምዕ ወትካዘ ዝ ዓለም ወስፍጠተ ብዕል ተኀንቆ ለነገር ወዘእንበለ ፍሬ ይከውን። 23ወዘሰ ተዘርዐ ውስተ ምድር ሠናይት ዝ ውእቱ ዘነገረ ይሰምዕ ወይሌቡ ወይፈሪ ወይገብር ቦ ዘምእት ወቦ ዘስሳ ወቦ ዘሠላሳ።
በእንተ ምሳሌ ሥርናይ ወክርዳድ
24ካልእተ ምሳሌ አምጽአ ሎሙ እንዘ ይብል ትመስል መንግሥተ ሰማያት ብእሴ ዘዘርዐ ሠናየ ዘርዐ ውስተ ገራህቱ። 25ወእንዘ ይነውሙ ሰብኡ መጽአ ጸላኢሁ ወዘርዐ ክርዳደ ማእከለ ሥርናይ ወኀለፈ። 26ወሶበ በቈለ ሥርናይ ወፈረየ ፍሬ አሜሃ አስተርአየ ክርዳድኒ። 27ወመጺኦሙ አግብርቲሁ ለበዐለ ገራህት ይቤልዎ እግዚኦ አኮሁ ሠናየ ዘርዐ ዘራዕከ ውስተ ገራህትከ እምአይቴ እንከ ሎቱ ክርዳድ። 28ወይቤሎሙ ብእሲ ፀራዊ ገብረ ዘንተ ወአግብርቲሁሰ ይቤልዎ ትፈቅድኑ እንከ ንሑር ወንጻሕይዮ። 29#ኢሳ. 65፥8። ወይቤሎሙ አልቦ ከመ እንዘ ትጸሐይዩ ክርዳደ ኢትምሐዉ ምስሌሁ ሥርናየኒ። 30#3፥12። ኅድግዎሙ ይልሀቁ ኅቡረ እስከ ጊዜ ማእረር ወበጊዜ ማእረር እብሎሙ ለእለ የዐጽዱ እርዩ ቅድመ ክርዳደ ወእስርዎ በበከላስስቲሁ ወአውዕይዎ በእሳት ወሥርናዮሰ አስተጋብኡ ውስተ መዛግብትየ።
በእንተ ምሳሌ ኅጠተ ሰናፔ
31ካልእተ ምሳሌ አምጽአ ሎሙ እንዘ ይብል ትመስል መንግሥተ ሰማያት ኅጠተ ሰናፔ እንተ ነሥኣ ብእሲ ወዘርዓ ውስተ ገራህቱ። 32#ሉቃ. 13፥18-19። ወይእቲ ትንእስ እምኵሉ አዝርዕት ወሶበ ልህቀት ተዐቢ እምኵሎን አሕማላት ወትከውን ዕፀ ዐባየ እስከ ይመጽኡ አዕዋፈ ሰማይ ወያጸልሉ ታሕተ አዕፁቂሃ።
በእንተ ምሳሌ ዘብኁእ
33 #
ሉቃ. 13፥20-21። ካልእተ ምሳሌ አምጽአ ሎሙ ወይቤሎሙ ትመስል መንግሥተ ሰማያት ብኁአ ዘነሥአት ብእሲት ወአብኅአቶ ውስተ ሠለስቱ መስፈርተ ሐሪጽ ወአብኅአ ኵሎ። 34#ማር. 4፥33-34። ዘንተ ኵሎ ተናገረ እግዚእ ኢየሱስ በምሳሌ ለአሕዛብ ወዘእንበለ ምሳሌሰ ኢተናገሮሙ። 35#መዝ. 77፥2። ከመ ይትፈጸም ዘተብህለ በነቢይ እንዘ ይብል «እከሥት በምሳሌ አፉየ ወእነግር አምሳለ#ቦ ዘይቤ «ኅቡአተ» ዘእምትካት።»
በእንተ ፍካሬ ክርዳድ ወሥርናይ ወገራህት
36ወእምዝ ኀደጎሙ ለአሕዛብ ወቦአ ውስተ ቤት ወቀርቡ ኀቤሁ አርዳኢሁ ወይቤልዎ ፈክር ለነ ምሳሌ ዘክርዳድ ወዘሥርናይ ወዘገራህት። 37ወአውሥአ ወይቤሎሙ ዘይዘርዕሰ ሠናየ ዘርዐ ወልደ ዕጓለ እመሕያው ውእቱ። 38ወገራህቱኒ ዓለም ውእቱ ወሠናይኒ ዘርዕ ውሉደ መንግሥት እሙንቱ ወክርዳድኒ ውሉዱ ለእኩይ። 39ወፀራዊኒ ዘዘርዖ ዲያብሎስ ውእቱ ወማእረሩኒ ኅልቀተ ዓለም ውእቱ ወዐጸዱኒ መላእክት እሙንቱ። 40ከመኬ የአርይዎ ለክርዳድ ቅድመ ወበእሳት ያውዕይዎ ከማሁ ይከውን በኅልቀተ ዝንቱ ዓለም። 41ወይፌንዎሙ ወልደ ዕጓለ እመሕያው ለመላእክቲሁ ወየአርዩ እመንግሥቱ ኵሎ ዐላውያነ ወእለ ይገብሩ አበሳ። 42#8፥12። ወይወድይዎሙ ውስተ እቶነ እሳት ወበህየ ይከውን ብካይ ወሐቅየ ስነን። 43አሜሃ ይበርሁ ጻድቃን ምስብዒተ እደ እምብርሃነ ፀሐይ#ቦ ዘይቤ «... ይበርሁ ጻድቃን ከመ ፀሐይ ...» በመንግሥተ አቡሆሙ ዘበሰማያት ዘቦ እዝን ሰሚዐ ለይስማዕ።
በእንተ ምሳሌ መድፍን ወባሕርይ ወገሪፍ
44 #
19፥29። ካዕበ ትመስል መንግሥተ ሰማያት መድፍነ ዘኅቡእ ውስተ ገራህት ወረኪቦ ብእሲ ኀብኣ ወእምፍሥሓሁ ሖረ ወሤጠ ኵሎ ዘቦ ወተሣየጣ ለይእቲ ገራህት። 45ካዕበ ትመስል መንግሥተ ሰማያት ብእሴ ሠያጤ ዘየኀሥሥ ባሕርየ ሠናየ። 46#ምሳ. 8፥10-11። ወረኪቦ አሐተ ባሕርየ እንተ ብዙኅ ሤጣ ሖረ ወሤጠ ኵሎ ዘቦ ወተሣየጣ። 47#22፥9-10። ካዕበ ትመስል መንግሥተ ሰማያት ገሪፈ እንተ ተወድየት ውስተ ባሕር ወአስተጋብአት ኵሎ ዘመደ ዓሣት። 48ወሶበ መልአት አዕረግዋ ውስተ ሐይቅ ወነቢሮሙ አረዩ ሠናዮ ውስተ ሙዳዮሙ ወእኩዮሰ ገደፍዎ አፍኣ። 49#25፥32። ከማሁ ይከውን በኅልቀተ ዓለም ይመጽኡ መላእክት ወይፈልጡ እኩያነ እማእከሎሙ ለጻድቃን። 50ወይወድይዎሙ ውስተ እቶነ እሳት ኀበ ሀሎ ብካይ ወሐቅየ ስነን። 51ወይቤሎሙ እግዚእ ኢየሱስ ለበውክሙኑ እንከ ዘንተ ኵሎ ወይቤልዎ እወ እግዚኦ። 52#መሓ. 7፥13። ወይቤሎሙ በእንተ ዝንቱ ኵሉ ጸሓፊ ዘይጸመድ ለመንግሥተ ሰማያት ይመስል ብእሴ በዓለ ቤት ዘያወፅእ እመዝገቡ ሐዲሰ ወብሉየ። 53#ሉቃ. 4፥15-30። ወፈጺሞ እግዚእ ኢየሱስ እሎንተ ምሳሌያተ ተንሥአ እምህየ። 54#ማር. 6፥1-7። ወሖረ ሀገሮ ወመሀሮሙ በምኵራቦሙ እስከ ሶበ ይዴመሙ ወይብሉ እምአይቴ እንከ ሎቱ ዝንቱ ኵሉ ጥበብ ወኀይል። 55#12፥46-47። አኮኑ ዝንቱ ውእቱ ወልዱ ለጸራቢ ወስማ ለእሙ ማርያም ወአኀዊሁ ያዕቆብ ወዮሳ ወስምዖን ወይሁዳ። 56#ዮሐ. 7፥15። ወአኃቲሁ ኵሎን ኀቤነ ሀለዋ እምአይቴ እንከ ሎቱ ዝንቱ ኵሉ ጥበብ ወኀይል ወአኀዙ ያንጐርጕሩ በእንቲኣሁ። 57#ዮሐ. 4፥44። ወይቤሎሙ እግዚእ ኢየሱስ አልቦ በኀበ ኢይከብር ነቢይ ዘእንበለ በሀገሩ ወበቤቱ። 58ወኢገብረ በህየ ኀይለ ብዙኀ በእንተ ኢአሚኖቶሙ።
