Gênesis 20
20
Abraão Gerar Tshijne Pohire Hyokwixyawaka Piranapni
1Waneya wane ruchpajya Abraão. Neguebe tshinikowaka tshijne nwaka hyatka. Cades tshinikowaka, Sur tshinikowaka hanikajite rawatka. Gerar tshinikowaka rutakpjitatka.
2Waneya Abraão wan-tshinyehitlo hhanunro Sara:
— Walani nomole suxo. Hiyáhoni Abimeleque, Gerar tshinikowaka pohire hwapjixatkalo Sara.
3Seyni Hoyakalu yanwakatlu Abimeleque rupnawleya waneya wla htshinru:
— Pixa halikaka hipnatshripyi klu tshinanu suxo pwapjixlero wala honukla khanururo.
4Seyni Abimeleque hi hapokmanetawalo wala. Waneya wla htshinru:
— Ha Tsru Hixikatshriwa Hoyakalu pnikaterhe noneru hike hektuwaka mkamhakatuko?
5Klu tshinanu hi he wale potuko wan-tshinatkano repuro tixyawaka? Hiyrun-koxa wala potuko wan-tshinno tomole rixyawaka. Xye nkamhatka seyni hi hektutu chinikantshiyma wane nixa hiyrun-koxa hi hektutu nkamhapirle tshinanu wane nixa.
6Waneya Hoyakalu wla tshinru rupnawleya:
— Hehe nimatlu pixa halikaka xye pkamha hike mixkatuyi. Seyni hit-honra himaletatkayi hektutu pma kamhiywakanupa hit-yehiya. Wale tshinanu nimaletatkayi pma yotnejyawakaplo.
7Hiyáhoni psatkakanro thanuru nwaka klu tshinanu thanuru honukla Hoyakalu tokanu hinkakletatshrini. Ranjihohneyehitanyi piwejyawakapa. Seyni pma satkakkanuklunuplo pimatanu pupnanuna pixa hiyrun-koxa ptowruneka pimwalene hipnanuna.
8Hiyáhoni yetshpotukawa ruptekatka Abimeleque. Htowrene ptowruneka repukatka. Xye pirana runkakatkana. Hpikpotutatkana.
9Waneya Abimeleque hepukatkalu Abraão. Waneya wla htshinatkalu:
— Kluhe pixannatkawu? Klunernihe numtuknu pixanwaka hapokatshri wane pa hektunu pakanhakakyehixyawakno hita, ntshijne koxa hakanhayehitatshri? Hike yineru mixlewaxyawakanu pixatkano.
10Abimeleque wla htshinkoxlu Abraão:
— Klu hikoluklu tshinanhe xye pkamhatka?
11Waneya Abraão wla tshinru:
— Halikaka nkahwakatkalu hewi hike kahwakpiraxyalu Hoyakalu hiyáhoni ruylatanona nhanunro hkonyawakapnona.
12Seyni halikakni nepuro tixyawaka klu tshinanu nurni wuhenni wala seyni hi nunro wuhenni wala. Hiyáhoni nhanunrotlo.
13Waneyakni Hoyakalu halujyawaka tshinanu nyinuwaka yanachaletatka mitshi wla ntshinatkalo: “Xye kihleru xako pkamhinno ptowru wyapawaka yehi. Wla xako ptshinjetanu, Wale yeye ntshinreru.”
14Waneya Abimeleque carneiro-ne hwapa, boi-ne rawapa, towrertshine rawapa, towretshrone rawapa waneya Abraão reneklu. Hiyrun-koxa hhanunro Sara hsatkajyatkalu.
15Waneya Abimeleque wla tshinatkalu:
— Hetanu ntshijne psoluka nitshixinyi. Hanuktako paluka hwaleta wane pwanu.
16Waneya wla htshinro Sara:
— Hetanu mil proji prata kamhikolu neneklu yeye ptshinreru. Walekni nixpiranyehixyawaka nikatatshripa pix-yehiya hiyrun-koxa pixaymalune ptowruneka tshinanupa. Hiyáhoni ptowruneruka hetanuya hike mixkanepwu.
17Waneyakni Abraão hanjitlu Hoyakalu Abimeleque tshinanu. Hiyahokni Hoyakalu hitskalakatkalu Abimeleque, hhanunro rutskalakatka hiyrun-koxa htowrerone rutskalakatka. Hiyáhoni hwuhenewatatnakna suxone.
18Klu tshinanu Hoyakalu hi wuhenewakakatkana Abimeleque-pji hajene ptowruneka Sara hikolukle tshinanu.
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil