Gênesis 29
29
Jacó, Raquel Hyoptoxyawaka Piranapni
1Waneya Jacó yatnaka, hyakananumta haté Mesopotâmia tshinikowaka rapoka.
2Waneya reknojtamta retlu hakopha campo hwatshri waneyakni retlu mapa ptohi pratshine carneiro-ne hakopha-stsi hikoluhatshine klu tshinanu wale hakophakni rurjetna carneiro-ne. Seyni satu tsru sotlu rupleta hakopha.
3Wane rapatjexyatkana pratshine carneiro-ne ptohikaka. Waneya sotlu hakopha hichyatatshri hkotpukatkana carneiro-ne hislahatshine. Waneya honha rutakyehitkana carneiro-ne waneya sotlu rutakatnakna hakopha ruchyatatnakna.
4Waneya Jacó wla tshinatkana:
— Nomolene, hanu hajenhihe?
Waneya ruhitluna, wla htshinruna:
— Hixni Harã tshinikowaka hajenwu.
5Waneya Jacó hepomhatkana, wla htshinatkana:
— Hixaklahe hetjejetlu Labão tshinkaluru, Naor whene?
Waneya wla htshinatkaluna:
— Hehe, wetjejetlu.
6Waneya wla htshinatkana:
— Pomtalhe?
Waneya ruhitluna wla htshinruna:
— Hehe, pomtalu seyni petanu tojrapatkani wale hchitsho Raquel tshinkaluro pratshine carneiro-ne tanikamta.
7Waneya wla htshinatka Jacó:
— Hetanu hanikaj-hohnekowani hiyáhoni hi rapokpapkolutawa pratshine hapatjexikowak-papko. Hiyáhoni honha hitajinna pratshine carneiro-ne waneya hohlutapana.
8Seyni ruhitluna, wla htshinruna:
— Hma mapatjetkanu pchinikna pratshine hiyrun-koxa sotlu hakopha hichiyale hma kotpukkonuklunu hi wumukata. Halikaka hkotpukkoklunupa tsonu honha wumukata hitletanna pratshine.
9Waneya wannayma riynumsakakakanatawa Raquel hapokatka turu prane carneiro-ne yma. Wala honukla pratshine suslahaklero.
10Rexinixkalo Raquel, Labão tshinkaluru, runro mole whene hinamtatshro pratshine carneiro-ne Labão prane yma, wala yehi hyatka Jacó. Sotlu rerutatka hakopha hichyale waneya honha rutajyana Labão, runro mole prane.
11Waneya Jacó hamlutatkalo Raquel, htshiyahatatka Jacó.
12Waneya Jacó hinkakatkalo turu mole whene rixyawaka, Rebeca tshinkaluro whenni. Waneyakni tasukamtatka, xye pirana tunkakatkalu turu.
13Waneya hjeminixka Labão, himole suxo whene hapojyawaka pirana rasukamtatka hyoptoxyawakaplu. Hsapriklu, ramlutlu waneya ranikatkalu hipji nwaka. Waneya Jacó hinkakatkalu Labão xye pirana ptowruka.
14Waneya Labão wla tshinru:
— Halikakni pixa nomolyi nohapu, nohityi. Waneya Labão yma rutukatka pa ksuru pchinika.
Jacó Hanunrowaxyawaka Piranapni
15Waneya Labão wla tshinru Jacó:
— Nomole pixyawaka tshinanu hi pumukata kamrurewlechaxini hike mkayatkatukyi. Hiyáhoni punkakanno hi psohe palukanu?
16Labão hepi whenru suxone. Tsrojro hiwaka Lia, hepúrotshi hiwaka Raquel.
17Lia tshinkaluro kihle swahayhalerni seyni Raquel kihle manero, kihle hojiro potuko.
18Jacó hamotpotutatkalo Raquel. Hiyáhoni Jacó wla tshina:
— Nkamrurewatanu sete mhale pejnu Raquel, piwhene hepúrotshi tshinanu.
19Waneya Labão wla tshinru:
— Kihlepot-hetkolu wala nenejyawakapyi pixa hi satuko yineru nenekanro. Hiyáhoni hitayma putukanu.
20Hiyáhoni Jacó kamrurewatatka sete mhale pejnu Raquel tshinanu. Seyni waleho ho hepi ho mapa hohne pejnu tsonu hkamrurewata wala tshinanu klu tshinanu ramotpotutatkalo.
21Waneya Jacó wla tshinru Labão:
— Penekanno nhanunro numumjiywakaplo klu tshinanu nali kamrurewletatka wala tshinanu.
22Waneya Labão hapatjetatkana wane hajene jejine ptowruneka waneya tsru niklu hkamhatka.
23Seyni wale yetshno hiwhene tsrojro rawpatka Jacó nwaka ranikatkalo waneya Jacó himumkatkalo.
24Hiyrun-koxa Labão heneklo hiwhene Lia, htowrero Zilpa tshinkaluro ttowrero tixyawakapa.
25Seyni rumrerejinixka tkatshi Lia-ktani. Hiyáhoni Jacó hepomhatkalu Labão, wla htshinru:
— Kluhe pixno? Hi he nkamrurewatatka Raquel tshinanu? Hiyáhoni xawakni kluner-tshinanhe pyokwijetatkano?
26Waneya Labão hihitlu, wla htshinru:
— Seyni wale hi hixa wixannu hewi wtshijneya. Hepúrotshi hi himukata hnuruwlehapkata.
27Hiyáhoni xawakni xye semana hapkatshi pnikatanu phanunro phanunroxinritka tshinanu waneya satoko wenekanutnakyi nkamrure pkamhinixnakno sete mhale pejnu wala tshinanpatnaka.
28Waneya wane rixatka Jacó. Wale semana ruknokakatka Lia hhanunroxyawaka tshinanu. Waneya Labão henekatnaklu richitsho Raquel hhanunroxyawak-koxa Jacó.
29Waneya Labão heneklo richitsho Raquel, htowrero Bila tshinkaluro ttowrero tixyawakapa.
30Hiyáhoni Raquel koxa rimumkatka Jacó. Raquel ramotatka Lia ramoxyawaka pnute. Waneya hiyrunu sete mhale pejnu hkamrurewatatka Labão yehiya.
Jacó Whenene Piranapni
31Waneya Tsru Hixikatshriwa Hoyakalu hetlu tkamnitkatka Lia, hmatuwhenekakatkalo seyni Raquel mwuhenewaklétoni.
32Hiyáhoni tmichiwata Lia, mturu jeji tmatkaka. Thiwakatlu Rúben klu tshinanu wala wla tshina: Halikakni Tsru Hixikatshriwa Hoyakalu hetlu nsalewnale hiyáhoni xawakni nhanuru hamothetkotanno.
33Waneya tmatuwhenetatnaka, jejikotnakni. Waneya wla ttshina:
— Tsru Hixikatshriwa Hoyakalu hetlu tshijicha nutajikolu hiyáhoni xye mturu koxa renekno. Waneya thiwakatlu Simeão.
34Waneya tmichiwatatnaka, jeji tmatkakakotnaka. Waneya wla ttshinatnaka:
— Xawakni hetko hita hijhakalurotkano nhanuru hetanuya klu tshinanu mapa whene jejine nmatkajyatkalu. Wale tshinanu thiwakatlu Levi.
35Waneya tmichiwatatnaka, mturu jeji tmatkakatnaka. Tsru Hixikatshriwa Hoyakalu nimalwutanu xawakni. Hiyáhoni Judá tutakhiwakatlu. Waneya tutuka wuhenewletatka.
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
Gênesis 29
29
Jacó, Raquel Hyoptoxyawaka Piranapni
1Waneya Jacó yatnaka, hyakananumta haté Mesopotâmia tshinikowaka rapoka.
2Waneya reknojtamta retlu hakopha campo hwatshri waneyakni retlu mapa ptohi pratshine carneiro-ne hakopha-stsi hikoluhatshine klu tshinanu wale hakophakni rurjetna carneiro-ne. Seyni satu tsru sotlu rupleta hakopha.
3Wane rapatjexyatkana pratshine carneiro-ne ptohikaka. Waneya sotlu hakopha hichyatatshri hkotpukatkana carneiro-ne hislahatshine. Waneya honha rutakyehitkana carneiro-ne waneya sotlu rutakatnakna hakopha ruchyatatnakna.
4Waneya Jacó wla tshinatkana:
— Nomolene, hanu hajenhihe?
Waneya ruhitluna, wla htshinruna:
— Hixni Harã tshinikowaka hajenwu.
5Waneya Jacó hepomhatkana, wla htshinatkana:
— Hixaklahe hetjejetlu Labão tshinkaluru, Naor whene?
Waneya wla htshinatkaluna:
— Hehe, wetjejetlu.
6Waneya wla htshinatkana:
— Pomtalhe?
Waneya ruhitluna wla htshinruna:
— Hehe, pomtalu seyni petanu tojrapatkani wale hchitsho Raquel tshinkaluro pratshine carneiro-ne tanikamta.
7Waneya wla htshinatka Jacó:
— Hetanu hanikaj-hohnekowani hiyáhoni hi rapokpapkolutawa pratshine hapatjexikowak-papko. Hiyáhoni honha hitajinna pratshine carneiro-ne waneya hohlutapana.
8Seyni ruhitluna, wla htshinruna:
— Hma mapatjetkanu pchinikna pratshine hiyrun-koxa sotlu hakopha hichiyale hma kotpukkonuklunu hi wumukata. Halikaka hkotpukkoklunupa tsonu honha wumukata hitletanna pratshine.
9Waneya wannayma riynumsakakakanatawa Raquel hapokatka turu prane carneiro-ne yma. Wala honukla pratshine suslahaklero.
10Rexinixkalo Raquel, Labão tshinkaluru, runro mole whene hinamtatshro pratshine carneiro-ne Labão prane yma, wala yehi hyatka Jacó. Sotlu rerutatka hakopha hichyale waneya honha rutajyana Labão, runro mole prane.
11Waneya Jacó hamlutatkalo Raquel, htshiyahatatka Jacó.
12Waneya Jacó hinkakatkalo turu mole whene rixyawaka, Rebeca tshinkaluro whenni. Waneyakni tasukamtatka, xye pirana tunkakatkalu turu.
13Waneya hjeminixka Labão, himole suxo whene hapojyawaka pirana rasukamtatka hyoptoxyawakaplu. Hsapriklu, ramlutlu waneya ranikatkalu hipji nwaka. Waneya Jacó hinkakatkalu Labão xye pirana ptowruka.
14Waneya Labão wla tshinru:
— Halikakni pixa nomolyi nohapu, nohityi. Waneya Labão yma rutukatka pa ksuru pchinika.
Jacó Hanunrowaxyawaka Piranapni
15Waneya Labão wla tshinru Jacó:
— Nomole pixyawaka tshinanu hi pumukata kamrurewlechaxini hike mkayatkatukyi. Hiyáhoni punkakanno hi psohe palukanu?
16Labão hepi whenru suxone. Tsrojro hiwaka Lia, hepúrotshi hiwaka Raquel.
17Lia tshinkaluro kihle swahayhalerni seyni Raquel kihle manero, kihle hojiro potuko.
18Jacó hamotpotutatkalo Raquel. Hiyáhoni Jacó wla tshina:
— Nkamrurewatanu sete mhale pejnu Raquel, piwhene hepúrotshi tshinanu.
19Waneya Labão wla tshinru:
— Kihlepot-hetkolu wala nenejyawakapyi pixa hi satuko yineru nenekanro. Hiyáhoni hitayma putukanu.
20Hiyáhoni Jacó kamrurewatatka sete mhale pejnu Raquel tshinanu. Seyni waleho ho hepi ho mapa hohne pejnu tsonu hkamrurewata wala tshinanu klu tshinanu ramotpotutatkalo.
21Waneya Jacó wla tshinru Labão:
— Penekanno nhanunro numumjiywakaplo klu tshinanu nali kamrurewletatka wala tshinanu.
22Waneya Labão hapatjetatkana wane hajene jejine ptowruneka waneya tsru niklu hkamhatka.
23Seyni wale yetshno hiwhene tsrojro rawpatka Jacó nwaka ranikatkalo waneya Jacó himumkatkalo.
24Hiyrun-koxa Labão heneklo hiwhene Lia, htowrero Zilpa tshinkaluro ttowrero tixyawakapa.
25Seyni rumrerejinixka tkatshi Lia-ktani. Hiyáhoni Jacó hepomhatkalu Labão, wla htshinru:
— Kluhe pixno? Hi he nkamrurewatatka Raquel tshinanu? Hiyáhoni xawakni kluner-tshinanhe pyokwijetatkano?
26Waneya Labão hihitlu, wla htshinru:
— Seyni wale hi hixa wixannu hewi wtshijneya. Hepúrotshi hi himukata hnuruwlehapkata.
27Hiyáhoni xawakni xye semana hapkatshi pnikatanu phanunro phanunroxinritka tshinanu waneya satoko wenekanutnakyi nkamrure pkamhinixnakno sete mhale pejnu wala tshinanpatnaka.
28Waneya wane rixatka Jacó. Wale semana ruknokakatka Lia hhanunroxyawaka tshinanu. Waneya Labão henekatnaklu richitsho Raquel hhanunroxyawak-koxa Jacó.
29Waneya Labão heneklo richitsho Raquel, htowrero Bila tshinkaluro ttowrero tixyawakapa.
30Hiyáhoni Raquel koxa rimumkatka Jacó. Raquel ramotatka Lia ramoxyawaka pnute. Waneya hiyrunu sete mhale pejnu hkamrurewatatka Labão yehiya.
Jacó Whenene Piranapni
31Waneya Tsru Hixikatshriwa Hoyakalu hetlu tkamnitkatka Lia, hmatuwhenekakatkalo seyni Raquel mwuhenewaklétoni.
32Hiyáhoni tmichiwata Lia, mturu jeji tmatkaka. Thiwakatlu Rúben klu tshinanu wala wla tshina: Halikakni Tsru Hixikatshriwa Hoyakalu hetlu nsalewnale hiyáhoni xawakni nhanuru hamothetkotanno.
33Waneya tmatuwhenetatnaka, jejikotnakni. Waneya wla ttshina:
— Tsru Hixikatshriwa Hoyakalu hetlu tshijicha nutajikolu hiyáhoni xye mturu koxa renekno. Waneya thiwakatlu Simeão.
34Waneya tmichiwatatnaka, jeji tmatkakakotnaka. Waneya wla ttshinatnaka:
— Xawakni hetko hita hijhakalurotkano nhanuru hetanuya klu tshinanu mapa whene jejine nmatkajyatkalu. Wale tshinanu thiwakatlu Levi.
35Waneya tmichiwatatnaka, mturu jeji tmatkakatnaka. Tsru Hixikatshriwa Hoyakalu nimalwutanu xawakni. Hiyáhoni Judá tutakhiwakatlu. Waneya tutuka wuhenewletatka.
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil