Matiye 4
4
Yiezu Kirisa hàanírɔ́ bòo
Mar 1.12-13; Lik 4.1-13
1Ɛ́ lé Mɛkɛ̃n-Sãanu ɛ́ khie fɔ́ Yiezu ɛ́ dàa van lè ńɲiherà hũn nɛ a Sitũanɛ ɛ̀ vɛ hàaní-ɛ. 2Á van wɔ́ wihĩ́ dɛ̀wɛ́ (40) àá súnúhṹn dɛ̀wɛ́ (40) kɛ́ á yí dí bòo dɔ̀ wɛ̀. Ɛ́ hɔ́ hĩni ɛ́ wo yòó ɔ̀ ɓé. 3Ɛ́ Sitũanɛ lɛ iè ɔ̀ hàanírɔ, ɛ́ van ɓɛrɛ ɛ́ ɓen yú ó à bie lɛ́ à ǹ nɛ làa: «Kɔ́ ɓen iè Dɔfĩn Zuú àá bɔ̀bín, ɛ̀ kɔ̀ bie nɛ hɔ sɛ̃̀nlɛ̀a lɛ ɛ̀ zɛ̀ní wé búrú ɛ̀ kɔ̀ lɛ̀.» 4Ɛ́ Yiezu zɔn kɔ̃́niɛ ɔ̀ nɛ làa: «Hɔ̀ ɛ́ wɛ̃́ lé Dɔfĩn bienù vɛ̃hṹ hũn ɛ́ nɛ làa: Hɔ̀ yí díe mí dòonún ɛ́ nìnbírɔ wóò dí ɛ̀ dàá yìe wé wɛ̀; kɛ́ hɔ́ iè hɔ̀ biehĩ́ lɛ wóò lé àá Dɔfĩn ɲunù ɛ́ temu wóò lɛ́ ɛ̀ nìnbírɔ dàá yìe wé.»
5Á Sitũanɛ ɛ́ khie ɛ́ fɔ́ á ɛ́ dàa van hɔ̀ Zerizalɛɛmu, à van dĩ̀niɛ ɔ̀ lè Dɔfĩn zũ-bɛhɔ́ lɔ̀n, 6à bie lɛ́ à ǹ nɛ làa: «Kɔ́ ɓen iè Dɔfĩn Zuú àá bɔ̀bín ɛ̀ kɔ̀ cáa vɛ síɛ; iè hɔ̀ lɛ ɛ́ hɔ́ wɛ̃́ lé Dɔfĩn bienù vɛ̃hṹ hũn nɛ làa:
“Dɔfĩn ɛ́ ɓén bie ɛ́ lɛ́ mí mɛlɛkɛɓɛ kɔ̀ bòo hũn,
Ɛ́ ɓɛ́ ɛ́ zɛ̃nkɛ kɔ ǹ ɓɛ́ níhĩ́ hũn,
Bòo lɛ ɛ́ wé ɛ̀ kɔ̀ zeǹ ɛ̀ bí hén sɛ̃̀nlè wɛ̀.”»
7Ɛ́ Yiezu ɛ́ zɔn kɔ̃́niɛ ɔ̀ nɛ làa: «Ɛ̀ hɔ̀ lò ɓiɛ̀ wɛ̃́ le Dɔfĩn bienù vɛ̃hṹ hũn nɛ: “Bí hàaní kɔ́ Ɲunsɔ lɛ iè kɔ̀ Dɔfĩn wɛ̀.”»
8Á Sitũanɛ ɛ́ sĩ̀n khie fɔ́ á ɛ́ dàa van yòó lé ɓúekìe dɛ̀bɛhɔ́ dɔ̀ lɔ̀n, ɛ́ yòó zɛ̃́niɛ lè dímíɲɛ́ bɛ́záahĩ́ míkùi àá mí sãarɔ́ ɔ̀ ǹ, 9à zɔn bie ɛ́ lɛ́ à ǹ nɛ làa: «Kɛ́ kɔ́ síɛ hùerɛ̀sí kɔ́ nunkɛ́yìe lɔ̀n ɛ̀ kɔ̀ ɛ́ ɓàaniɛ mi ǹ, ɛ́ hɔpe lɛ ɛ́ kɔ́ loo míkùi ɛ́ nín lɛ́ kɔ ǹ.» 10Ɛ́ Yiezu zɔǹ ɛ́ bie lɛ́ à ǹ nɛ làa: «Sitũanɛ, khíi lé yán! Hɔ̀ ɛ́ wɛ̃́ nɛ: “Kɔ̀ Ɲunsɔ Dɔfĩn mí dòonún iè pe ɛ́ kɔ́ ɓàanínin, àpe mí dòonún tɔnlɔ́ iè pe ɛ́ kɔ́ tɛ́.”»
11Á Sitũanɛ ɛ́ den wo fùɛrɛ̀sí Yiezu ǹ, ɛ́ ɓɛ́ mɛlɛkɛɓɛ dɔ̀ ɛ́ ɓɛrɛ lúwiniɛ ɔ̀ ǹ ɛ̀ ɓɛ̀ ɛ́ piè bòo ɛ̀ húi.
Yiezu ɛ́ ɓɛ́ mí tɔnlɔ́ fìi hɔ̀ Kalile pɛ̃̀hɛ̃ hũn
Mar 1.15; Lik 4.14-15
12Ɛ́ Yiezu ɛ́ ɲɛ́ ɛ̀ ɓɛ̀ nɛ Zãn ɛ́ ɓɛ́ ɓaa ɛ́ dɔ́ lé kɛ̀sí hũn, ɛ́ hɔ lɛ á ɲɛ́ hɔ́, á hĩ́nà cɔ́ van hɔ̀ Kalile pɛ̃̀hɛ̃ hũn. 13Á pɛ̃́ Nazarɛɛte lóo, à van kɛsí àá Kapɛrɛnayiimu hũn, lè lóo lɛ van wi hɔ Kalile ɲun-bɛhɔ́ ɲunù, Zabulɔn àá Nɛfitalii pɛ̃̀hɛ̃ hũn. 14Hɔ̀ wɔ́ kɛ̀amu ɛ́ Dɔfĩn bɔ̀háanírɔ Ezayi biehĩ́ lɛ á hàarí bie ɛ́ dàa ɲunù tú. À hàarí ɛ́ nɛ làa:
15 «Mìpe Zabulɔn àá Nɛfitalii pɛ̃̀hɛ̃ nìɛ,
Mìpe nìɛ lɛ ɛ́ wi hɔ lóoniɛ̀ lɛ wi hɔ ɲun-bɛhɔ́ ɲunù,
Àá Mípe lɛ ɛ́ cánkɛa van lɔ́ wi le Zurudɛ̃n vṹn máahṹ,
Mìpe Kalile nìɛ lɛ ɛ́ ɓɛ́ nìnbirìe lɛ yí ɓɛ́ Zuifuɓɛ ɛ́ wi tĩ́ihṹ!
16 Ɓɛ̀pe nìɛ lɛ ɛ́ kɛsí hɔ́ síbínú hũn,
Ɛ́ mɔn hɔ̀ ńpiemu bɔ̀bɛhɔ́,
Ɛ̀ ɓɛ̀pe lɛ ɛ́ wi hɔ húmú síbínú hũn,
Ɛ́ hɔ́ ńpiemu ɛ́ ɓɛrɛ lɔ̀n.»
17Ɛ́ pehɔ̀ yìi hũn, ɛ́ Yiezu ɛ́ wo ɓɛ́ hɔ́ fìi ɛ́ lè Bentĩnu ɛ̀ buie ɛ́ nɛ làa: «Mì zɛ̀ní mí tĩɛ̀ ɛ̀ mì fùansí hɔ́ bɔ̀koohɛ̃ wénlɔ̀ ǹ, iè hɔ̀ lɛ ɛ́ Dɔfĩn bɛ́záanú ɛ́ ɓɛrɛ lúwi.»
Yiezu hán kɛ̀ránzɛ̀ɓɛ̀ venlɔ́
Mar 1.16-20; Lik 5.1-11
18Ɛ́ Yiezu ɛ́ van ɛ́ khíi hɔ́ Kalile ɲun-bɛhɔ́ ɲunù, á mɔn zɛ̀ɓɛ̀ bìɛ ɲu dɔ̀ lɛ iè Simɔn lɛ ɓɛ́ wóo nɛ Piɛre, àá ɓá zuú Andere kɛ́ ɓɛ́ ɛ́ ɓɛ́ tàarí ɛ̀ dé hɔ ɲumu hũn, iè hɔ̀ lɛ ɛ́ ɓɛ́ iè cipɛriè. 19Ɛ́ Yiezu ɛ́ zɔn bie ɛ́ lɛ́ ɓà ǹ nɛ làa: «Mì ɓen bè niǹ máahṹ, ɛ́ nín wé miɛ àá nìnbí-cɛ̀riè, kɛ̀a bòo lɛ ɛ́ mí dàa wóò pɛ ɓɛ ciè bòo sí.» 20Ɛ́ mí laà hũn, ɛ́ ɓɛ́ fùɛrɛ̀sí ɓɛ́ tàaríe ǹ, ɛ̀ ɓɛ̀ khie bɔ̀ piè máahṹ. 21Á mii khíi khɛ̃̀ún vɛ, á bĩniɛ mɔn zɛ̀ɓɛ̀ bìɛ ɲu dɔ̀ lɛ iè Zaake àá Zãn, à Zebede nìɛ. Ɓɛ̀ hṹn wi le ɲumu wiè hũn àá ɓá yàá Zebede, ɛ́ ɓɛ́ tàaríe ɛ̀ wóokɛ. Ɛ́ Yiezu ɛ́ vɔn ɓɛ̀. 22Ɛ́ mí laà hũn, ɛ́ ɓɛ́ fùɛrɛ̀sí lé wiè àá ɓá yàá, ɛ̀ ɓɛ̀ khie bɔ̀ piè máahṹ.
Yiezu ɛ́ ɓɛ̀ nìnbirìe ɛ̀ kɛ̀rán kɛ́ á ɓɛ̀ dɔriè ɛ̀ wiɛní
Lik 6.17-19
23Ɛ́ Yiezu ɛ́ hàarí wóò bè hɔ̀ Kalile pɛ̃̀hɛ̃ míkùi ǹ, ɛ̀ kɛ̀rán ɓɛ́ nìnbirìe ɓɛ̀ Zuifuɓɛ ńkóoɓánlɔ̀n zĩhĩ́ɛ hũn, kɛ́ á ɛ́ Dɔfĩn bɛ́záanú Bentĩnu bòo ɛ̀ buie. À lò hàarí wóò wiɛní ɓɛ́ nìnbirìe duò míkùi àá ɓɛ́lɛ tɛkɛ̀a lɛ̀ ɓɛ́kùi. 24Ɛ́ piè yèrè wo lɔ́ lɔ́ fúu ɛ́ van dɛ̃un hɔ̀ Siiri cɛ̃̀mɛ̀nɛ́ míkùi. Ɛ́ ɓɛ́ wóò vɛ dàá ɓɛ́ nìnbirìe lɛ ɛ́ hɔ́ duò àá mí ɲúuhɛ̃ ɲúuhɛ̃ ɛ́ wi nin, àá ɓɛ́lɛ ɛ́ kɛ́bí hɔ́ lɔ̀nbuò bɔ̀kùi hũn, àá ɓɛ́lɛ ɛ́ ɓɛ́ ńɲíkĩ́nìɛ ɛ́ lɔ̀n ɛ̀ biení, àá ɓɛ́lɛ ɛ́ lé dàndɛ̀híirɛ́ duiè ɛ́ wi nin, àá ɓɛ́ mùamúaɓɛ́ ɛ̀ dàá ɓen Yiezu viì, ɛ̀ Yiezu ɛ̀ wiɛní ɓɛ́ ɓɛ́kùi. 25Ɛ́ nìnbí-dũmu ɛ́ hàarí bɔ̀ piè máahṹ, ɓɛ̀dɔ̀ ɛ́ lɔ́ àá hɔ́ Kalile, ɛ̀ ɓɛ̀dɔ̀ ɛ́ lɔ́ àá hɔ́ pɛ̃hɛ̃ lɛ ɛ́ ɓɛ́ wóo ve nɛ lóoniɛ̀ pírú, ɛ̀ ɓɛ̀dɔ̀ ɛ́ lɔ́ àá Zerizalɛɛmu àá hɔ́ Zudee pɛ̃̀hɛ̃ àá hɔ́ vuò lɛ van lɔ́ wi le Zurudɛ̃n máahṹ.
© 2023 L’Association Nationale pour la Traduction de la Bible et l’Alphabétisation