Hawaareta 9
9
Saa7oli Kiristoosa Ammanis
(Hawa 22:6-16; 26:12-18)
1He wode Saa7oli Godaa kaalleyisata wodhanaw mandidi kahine halaqaako bis. 2Godaa ogiya kaalliya addenne macca demmiko, qachishe Yerusalaame ehanaw, Damasqon de7iya ayhude woosa keethatas dabdaabe baw xaafana mela woossis.
3I bidi, Damasqo katama gakanaw matishin, qoponna salope wolqaama poo7oy iya yuushon poo7is. 4I sa7an kundidashin, “Saa7ola, Saa7ola, ayis tana goodday?” giya qaala si7is.
5Saa7oli, “Godaw, neeni oonee?” yaagidi oychis.
“Taani, neeni gooddiya Yesuusa” yaagis.
6Shin Saa7oli kokorishenne malaaletishe, “Godaw, taani ay oothana mela koyay?” yaagis.
Goday iyako, “Dendada katamaa gela; neeni oothanaw bessiyabay yan new odetana” yaagis.
7Saa7olara oge biya asati aykoka odetonna eqi attidosona. Qaala si7oosona, shin oonaka be7ibookona. 8Saa7oli kundida bessaafe dendidi xeelliya wode iya ayfey demmonna ixis. Hessa gisho, enti iya kushiya oykidi kaalethidi Damasqo gelsidosona. 9Heedzu gallas gakanaw I xeellanaw danda7ibeenna; aykoka mibeenna; uybeenna.
10Damasqon issi Hananiya geetetiya Yesuusa tamaarey de7ees. Goday qoncethan, “Hananiya” yaagidi xeegis.
Hanaani zaaridi, “Ta Godaw, haysan de7ayis” yaagis.
11Goday iyako, “Dendada Suure geetetiya ogiya bada, Yihuda son Saa7ola geetetiya Tarsesape yida uraa koya; Saa7oli woossees. 12Qassi Hananiya geetetiya addey gelidi, Saa7oli nam7antho xeellana mela ba kushiya iya bolla wothishin qoncethan be7is” yaagis.
13Hanaani zaaridi, “Godaw, Yerusalaamen ne geeshsha asaa bolla he uray ay mela iitabaa oothidaako taani daro asaape si7as. 14Qassi Damasqon ne sunthaa xeegeyisata ubba qachanaw, kahine halaqati iyaw maata immidosona” yaagis.
15Shin Goday iyako, “Saa7oli Ayhude gidonna asaa sinthan, kawota sinthaninne Isra7eele asaa sinthan, ta sunthaa erisanawunne taw oothanaw dooretida miishe gidiya gisho neeni iyako ba. 16Ayis giiko, ta sunthaa gisho, I ay mela waaye ekanaw bessiyako taani iya bessaana” yaagis.
17Hanaani bidi, soo gelidi, ba kushiya Saa7ola bolla wothidi, “Ta ishaa Saa7ola, neeni yaa ogiyan new bentida Yesuusi, neeni xeellana melanne Geeshsha Ayyaanan kumana mela Goday tana kiittis” yaagis. 18Ellesidi, Saa7ola ayfepe issi poqo melabay wodhin, Saa7oli nam7antho xeellis. Qassi dendidi xammaqetis. 19Kathi midi xaalidi, Damasqon de7iya ammaneysatara guutha gallas gam7is.
20Ellesidi Saa7oli, “Yesuusi Xoossaa Na7a” yaagidi Damasqon de7iya ayhude woosa keethatan qaala tamaarsis.
21Hessa si7ida ubbay malaaletidi, “Haysi Yerusalaamen Yesuusa sunthaa xeegeyisata qacheysa gidenneyee? Qassi haa yiday enta qachidi, kahine halaqata sinthe efanaasa gidennee?” yaagidosona.
22Shin Saa7oli qaala odon minni minnidi bis. Yesuusi, I Kiristoosa gideysa qoncisidi odida gisho Damasqon de7iya Ayhudeti iyaw zaariyaba dhaydosona.
23Daro gallasape guye, Ayhudeti shiiqidi, Saa7ola wodhanaw zoretidosona.#2 Qoro 11:32-33. 24Shin Ayhudeti bana wodhanaw qopidaysa Saa7oli si7is. Enti iya wodhanaw qammanne gallas katama pengen naagoosona. 25Shin iya tamaareti iya qamma efidi, gimbe dirsa maskootera daachora wodhisidosona.
26Saa7oli Yerusalaame gakida wode ammaneysatara gahetanaw koyis. Shin I Kiristoosa ammanidaysi entaw tuma daanonna ixin iyaw yayyidosona. 27Shin Barnabaasi Saa7ola hawaaretako efis. Ogen Goday waanidi qoncidaakonne odisidaako, qassi Saa7oli Damasqon Yesuusa sunthan yayyonna waatidi qaala odidaako entaw geeshshidi odis. 28Saa7oli Yerusalaamen yuuyidi Godaa sunthan yayyonna qaala odishe, hawaaretara issife de7is. 29Qassi Saa7oli Girike doonan haasaya Ayhudetara odetishe palamees. Shin enti iya wodhanaw koydosona. 30Ammaniya asati hessa si7idi, Saa7oli Qisaare efidi Tarsesa yeddidosona.
31Yihudan, Galilaninne Samaare ubban de7iya woosa keethati sarotethan de7idosona. Qassi minnidosona; Godaas yayyishe Geeshsha Ayyaana minthethon dari daridi bidosona.
Phexroosi Liideninne Yoophen
32Phexroosi biitta ubba yuuyishe Liiden de7iya ammaniya asatako gakis. 33Yan hospun laythi kumethi gundidi arsan zin7idi de7iya Eniya geetetiya addiya demmis. 34Phexroosi, “Eniya, Yesuus Kiristoosi nena pathana; dendada ne hiixa dentha” yaagis. Ika ellesidi dendi eqis. 35Liideninne Saaronan de7iya asa ubbay Eniya be7idi, Godaako simmidosona.
36Yoophe kataman issi Xaabito geetetiya ammaniyara de7awusu. I sunthay Aramike doonan, “Xaabito”; Girike doonan, “Dorqa”; he nam7u suntha birshethay “gen7e” guussu. Iya ba de7ida wode ubban lo77oba oothashenne manqota maaddashe de7asu. 37He wode iya hargada hayqin, asay I aha meeccidi, pooqe bolla kessidi zin7isidosona. 38Liidey Yoophes mata. Ammaneysati Phexroosi Liiden de7eysa si7idi, “Hayyana nuuko ellesada ya” yaagidi nam7u asata iyako kiittidosona.
39Hessa gisho, Phexroosi dendidi, entara bis. Yaa gakin, pooqe bolla de7iya kifile iya gelsidosona. Am7eti Phexroosa yuushon eqidi yeekishe Dorqa entara paxa de7ashe oothida qamisetanne afilata ubbaa Phexroosa bessidosona. 40Phexroosi enta ubbaa kare kessidi, gulbatidi woossis. Qassi ahaako simmidi, “Xaabite, denda” yaagis. Xaabita ba ayfiya dooyada Phexroosa be7ada, denda uttasu. 41Phexroosi iyo ba kushen maaddidi denthidi essis. Hessafe guye, ammaneysatanne am7eta xeegidi, dendidaro enta sinthe shiishis.
42Ha oday, Yoophe katama ubbaa gakis; daro asay Godaa ammanidosona. 43Phexroosi Yoophen Simoona geetetiya galba haasheysa son daro gallas gam7is.
The Word for the World International and The Word for the World Ethiopia
Hawaareta 9
9
Saa7oli Kiristoosa Ammanis
(Hawa 22:6-16; 26:12-18)
1He wode Saa7oli Godaa kaalleyisata wodhanaw mandidi kahine halaqaako bis. 2Godaa ogiya kaalliya addenne macca demmiko, qachishe Yerusalaame ehanaw, Damasqon de7iya ayhude woosa keethatas dabdaabe baw xaafana mela woossis.
3I bidi, Damasqo katama gakanaw matishin, qoponna salope wolqaama poo7oy iya yuushon poo7is. 4I sa7an kundidashin, “Saa7ola, Saa7ola, ayis tana goodday?” giya qaala si7is.
5Saa7oli, “Godaw, neeni oonee?” yaagidi oychis.
“Taani, neeni gooddiya Yesuusa” yaagis.
6Shin Saa7oli kokorishenne malaaletishe, “Godaw, taani ay oothana mela koyay?” yaagis.
Goday iyako, “Dendada katamaa gela; neeni oothanaw bessiyabay yan new odetana” yaagis.
7Saa7olara oge biya asati aykoka odetonna eqi attidosona. Qaala si7oosona, shin oonaka be7ibookona. 8Saa7oli kundida bessaafe dendidi xeelliya wode iya ayfey demmonna ixis. Hessa gisho, enti iya kushiya oykidi kaalethidi Damasqo gelsidosona. 9Heedzu gallas gakanaw I xeellanaw danda7ibeenna; aykoka mibeenna; uybeenna.
10Damasqon issi Hananiya geetetiya Yesuusa tamaarey de7ees. Goday qoncethan, “Hananiya” yaagidi xeegis.
Hanaani zaaridi, “Ta Godaw, haysan de7ayis” yaagis.
11Goday iyako, “Dendada Suure geetetiya ogiya bada, Yihuda son Saa7ola geetetiya Tarsesape yida uraa koya; Saa7oli woossees. 12Qassi Hananiya geetetiya addey gelidi, Saa7oli nam7antho xeellana mela ba kushiya iya bolla wothishin qoncethan be7is” yaagis.
13Hanaani zaaridi, “Godaw, Yerusalaamen ne geeshsha asaa bolla he uray ay mela iitabaa oothidaako taani daro asaape si7as. 14Qassi Damasqon ne sunthaa xeegeyisata ubba qachanaw, kahine halaqati iyaw maata immidosona” yaagis.
15Shin Goday iyako, “Saa7oli Ayhude gidonna asaa sinthan, kawota sinthaninne Isra7eele asaa sinthan, ta sunthaa erisanawunne taw oothanaw dooretida miishe gidiya gisho neeni iyako ba. 16Ayis giiko, ta sunthaa gisho, I ay mela waaye ekanaw bessiyako taani iya bessaana” yaagis.
17Hanaani bidi, soo gelidi, ba kushiya Saa7ola bolla wothidi, “Ta ishaa Saa7ola, neeni yaa ogiyan new bentida Yesuusi, neeni xeellana melanne Geeshsha Ayyaanan kumana mela Goday tana kiittis” yaagis. 18Ellesidi, Saa7ola ayfepe issi poqo melabay wodhin, Saa7oli nam7antho xeellis. Qassi dendidi xammaqetis. 19Kathi midi xaalidi, Damasqon de7iya ammaneysatara guutha gallas gam7is.
20Ellesidi Saa7oli, “Yesuusi Xoossaa Na7a” yaagidi Damasqon de7iya ayhude woosa keethatan qaala tamaarsis.
21Hessa si7ida ubbay malaaletidi, “Haysi Yerusalaamen Yesuusa sunthaa xeegeyisata qacheysa gidenneyee? Qassi haa yiday enta qachidi, kahine halaqata sinthe efanaasa gidennee?” yaagidosona.
22Shin Saa7oli qaala odon minni minnidi bis. Yesuusi, I Kiristoosa gideysa qoncisidi odida gisho Damasqon de7iya Ayhudeti iyaw zaariyaba dhaydosona.
23Daro gallasape guye, Ayhudeti shiiqidi, Saa7ola wodhanaw zoretidosona.#2 Qoro 11:32-33. 24Shin Ayhudeti bana wodhanaw qopidaysa Saa7oli si7is. Enti iya wodhanaw qammanne gallas katama pengen naagoosona. 25Shin iya tamaareti iya qamma efidi, gimbe dirsa maskootera daachora wodhisidosona.
26Saa7oli Yerusalaame gakida wode ammaneysatara gahetanaw koyis. Shin I Kiristoosa ammanidaysi entaw tuma daanonna ixin iyaw yayyidosona. 27Shin Barnabaasi Saa7ola hawaaretako efis. Ogen Goday waanidi qoncidaakonne odisidaako, qassi Saa7oli Damasqon Yesuusa sunthan yayyonna waatidi qaala odidaako entaw geeshshidi odis. 28Saa7oli Yerusalaamen yuuyidi Godaa sunthan yayyonna qaala odishe, hawaaretara issife de7is. 29Qassi Saa7oli Girike doonan haasaya Ayhudetara odetishe palamees. Shin enti iya wodhanaw koydosona. 30Ammaniya asati hessa si7idi, Saa7oli Qisaare efidi Tarsesa yeddidosona.
31Yihudan, Galilaninne Samaare ubban de7iya woosa keethati sarotethan de7idosona. Qassi minnidosona; Godaas yayyishe Geeshsha Ayyaana minthethon dari daridi bidosona.
Phexroosi Liideninne Yoophen
32Phexroosi biitta ubba yuuyishe Liiden de7iya ammaniya asatako gakis. 33Yan hospun laythi kumethi gundidi arsan zin7idi de7iya Eniya geetetiya addiya demmis. 34Phexroosi, “Eniya, Yesuus Kiristoosi nena pathana; dendada ne hiixa dentha” yaagis. Ika ellesidi dendi eqis. 35Liideninne Saaronan de7iya asa ubbay Eniya be7idi, Godaako simmidosona.
36Yoophe kataman issi Xaabito geetetiya ammaniyara de7awusu. I sunthay Aramike doonan, “Xaabito”; Girike doonan, “Dorqa”; he nam7u suntha birshethay “gen7e” guussu. Iya ba de7ida wode ubban lo77oba oothashenne manqota maaddashe de7asu. 37He wode iya hargada hayqin, asay I aha meeccidi, pooqe bolla kessidi zin7isidosona. 38Liidey Yoophes mata. Ammaneysati Phexroosi Liiden de7eysa si7idi, “Hayyana nuuko ellesada ya” yaagidi nam7u asata iyako kiittidosona.
39Hessa gisho, Phexroosi dendidi, entara bis. Yaa gakin, pooqe bolla de7iya kifile iya gelsidosona. Am7eti Phexroosa yuushon eqidi yeekishe Dorqa entara paxa de7ashe oothida qamisetanne afilata ubbaa Phexroosa bessidosona. 40Phexroosi enta ubbaa kare kessidi, gulbatidi woossis. Qassi ahaako simmidi, “Xaabite, denda” yaagis. Xaabita ba ayfiya dooyada Phexroosa be7ada, denda uttasu. 41Phexroosi iyo ba kushen maaddidi denthidi essis. Hessafe guye, ammaneysatanne am7eta xeegidi, dendidaro enta sinthe shiishis.
42Ha oday, Yoophe katama ubbaa gakis; daro asay Godaa ammanidosona. 43Phexroosi Yoophen Simoona geetetiya galba haasheysa son daro gallas gam7is.
The Word for the World International and The Word for the World Ethiopia