Geenesis 3
3
Adaan Eva tojiyaquishacari Pueyaso
1Puetunu Pueyaso shipinijiosano casamijinijiniojuanaani, susanacuuri socua jiyanohua niishijia quijia. Naacuatej susanacuuri naa nequesotaquiaari maajitij:
—¿Taa Pueyaso moserucuaa niaacuaraarinij, mosaatia na sequenura niajaniya? ¿Taatenij, majaari niya puetunu nujuatujua naana jajaujiniji nia mianu quenaaja?
2Maajiiri naa na riucuareequij:
—Maja. Canaa naatacuaja puetunu niya nujuatujua naana jajaujiniji mianu. 3Saaja noo naanajiniji cutara, cuhuariquia jiuujiajinia nujuataatej, Pueyasoori cuno canaa sequerucuaa cutara maja canaa mianuranoj, maja quenaaja canaa cooniuriajuhuaj. Canaa jaara na miarenoj, canaanaari cusonuunutaniyani.
4Susanacuuri jiyacari saaja naa sequeree maajitij:
—Nia sapojiyanojuhuanajaj. Maja nia cusonu quiniutianiya. 5Pueyasocuajaari niishiya, niaa jaara cuno naana jajau miare, niaari jiyacari niishiniutianiya casaate maniniani, casaate sesani. Niaa jaara naa niishijia quiritij, niaari juhua Pueyasojua quiniutianiya.
6Jiyacaritij, maajiiri naana jajaucua mauree. Naana jajauri jaarajaaja shanohua maniniuriquia quiriquiaa nera. Miasaatiatij. Na paniniuuri noojia jiyacatojoquee jiyanohua na mianu paniniuria niishijia na quiniuria. Jiyacari cuno naana jajau cataree socuaari; na miareeri. Na nuhuaji neyaca na niquitioreejaariuhuaj. Neyacaari na miareejuhuaj. 7Jiyacaritij, nojori namijiaari juhua shusha riatequequee. Shusha niishitiuquiijaariuhuaj nojoriiri juhuasunucua quiriquiaa. Jiyacari ritia cusupuenuuree higuera jaamasuuri cunota nojori mishiquionura tama nojori catucumarajaaja.
8Pueyano necocuataja jaara Pueyaso tojitiuquiaari rucuanejiyano cuno Edeen cuhuariquiajinia, nocuaji netecuatuquiaariiri. Naana pajama jamaatiushiiri. Naa Pueyaso rucuanejosacarini, cunoori tenacari quijia shanohua paratu piyarojosacari. 9Pueyaso shaacasacari pueyano, naa na rupaa paaretareeri:
—¿Teetequia?
10Pueyanoori naa Pueyaso riucuareequij:
—Nio cuhuariquiajinia rucuanejiyano cua tojishacari quiajaniya, janiyari quia caririquiriquiaani juhuasu cua quiniuucua. Janiyari cunora quiocuaji jamaariini.
11Pueyasoori jiyacari naa pueyano nequesotareequij:
—¿Canteeri naa quia toreeniquitij quia niishiniuria quiaari juhuasu? ¿Quiaateeri noo naana jajau miareequij, cua sequesano maja quia mianuratej?
12Pueyanoori naa riucuaree Pueyasotej:
—Maajicuajani, quia niquitiosano cua cojiriquianotej, nojuajaari cua niquitioree cuno naana jajau. Janiyari na miareeni.
13Jiyacaritij, Pueyasoori maaji nequesotaree:
—¿Casaara naa quia miiriicueanij?
Maajiiri Pueyaso riucuaree:
—Susanacucuaja cua sapojoreeno. Janiyari cunora miaree cuno naana jajauni.
14Camarnu Pueyasoori saniniuujia naa sequeree susanacutej:
—Naa quia miiniuucuatej, saaja quiajaniyari socua soosano casaa quiriquiano puetunu cua shipinishano casamijinijiniojuanaa. Quiarijiniji quiaari quia jiriquiata roshiyocojojua quiriquianojuhuanajaj. Jiyojuaari quia miasano quiriquiano. 15Naajuhuaj, janiyajanaari maajitia quia jiyatenutaniya paracaatioojuarani. Maajiicuajinio supueno pueyanoori quia paracaajia quiriquianojuhuanajaj. Maajiicuajinio caneno pueyajinijinio muetariquianoori quia paracaranojuanaa cutara. Nojuajaari quia naca shiquiariquiano jacanaura. Quiaari saniniuujia na nojua sajiriquianoojua.
16Pueyasoori naa sequeree maajijuhua:
—Quiajaniya saniniuujia, janiyari quia noonu jiyacatojonutaniya socuani. Naacuatej, quiaari jiyanohua naquiya quia miiniutia quia niquiohua mueturiquiano. Quiaari quia niyaca panijia quiriquiano saaja. Quiaari na tojijia quiriquiano.
17Naajuhuaj Pueyasoori naa sequeree cayatej:
—Jaarajaaja quia niquiocua quia tojiniuucua, cua pueretasano niajaniya naana jajau quia mianuucua, quiaari sesa miiriijuhuaj. Naacuatej janiyari quiarijia jiya sesacaa quiara saniniuunijia. Cunoori jaarajaaja sesa quia miiniuucua. Naacuatej, quiaari quia miasanoocuaji nujuariquiano pueyaracaanu quiaa cuaara shaajeyarajaatijia. 18Jiohuacacaari quiocuaji moririquiano, riyocuacajaajanio. Naa quia poonijionuucuatej quiaari naa tama quia nataacuacajinijijaaja miariquiano. 19Quiaari naa tama paneequetariquianojaaja quia miasanoocuajitij, quiaa cuaara jiyocua tiuquiyarohuajaatijia teje quia cortanishaaquiaaricuajani. Quiaacuajaari jiya, quiaari jiyara jatanutaniuhuacuhua.
20Jiyacaritij, pueyanoori naa jiyaniquirii necotej, “Eva,” puetunu mijiria quijiaca pueya supuetanarano na quiniuucua. 21Pueyasoori jiyacari shoquejiniji miirii toque, pueyano cushishocoriquiano necotaja. 22Na nuhuajitij, Pueyasoori naa tama sequequiaarijiaajatej: “Quiarijianij pueyanoori juhua niquiriyatu canaajinijiniojua. Nojuajaari quiarijia niishiya casaate maniniani, casaate sesani. Pueyaracaanu rishitijia naana jajaujiniji na miasocoriquiano catareeniquijia; na miareeri. Jaara naa miiritij, pueyaracaanu rishijiara jatanutaniya socuaari.”
23Naacuatej Camarnu Pueyasoori pueyano tohuatequiaari Edeen cuhuariquiajiniji. Tamaqui nojori niojoquiaariiri tii na miasanoocuaji nojori cuhuorojonura tamajaaja. Pueyanoori naa jiya poonijiojuara quiquiaaritij, teyanojiniji na shipinishaaquiaaricuajani. 24Pueyaso tohuatenu nuhuaji pueyano Edeen cuhuariquiajiniji, nojuajaari nesuraca na seya nujuatejoree cuhuariquiajinia tiuquijia nuujiniji pananu muetasamajiiri. Nishitiuniiquia nijiniaquetucuaja mueruu jaasurujuteriquiaa tiijiuhuaj. Pueyasoori naa cojuatequiaari na cuhuariquiatej, maja pueyaracaanu rishitijia naana jajaujiniji catasaanura.
© 1986, 2008, Wycliffe Bible Translators, Inc. All rights reserved.