Salmos 17
17
1Bze̱ naga chi'a, Xran.
Ben xanne' da dxuláwizra' Lue'.
Guzí' da dxenaba' Lue', naca' du lazra'.
2Be̱nna lataj xelá'a lau' chee̱ guchi'u chia',
lawe' da dxelé'enu' xúgute̱ cáte̱ze zaj naca na.
3Lue' dxenná' xánniu' xichaj lázrdawa'
ne dxelé'enu' neda' chizrela.
Gunná' xánniu' da dxuna', na' quebe bi da cale̱la blé'enu'.
Ba nuna' quebe bi dizra' cale̱la nnia'.
4Dxuzúa' dizra' ca naca da dxennáu',
na' quebe dxuna' ca da dxelún benne' we̱n da zrinnaj ca'.
5Bxue neda' lu neza chawe' chiu',
chee̱ quebe cheajcházia' lu da cale̱la.
6Dxuláwizra' Lue', Dios, lawe' da dxennu' chi'a.
Bze̱ naga chi'a, na' bene da dxennía'.
7Ble'e ca dxexache lázrele̱'u bénneache.
Bselá benne' ca' dxuluxrén lazre̱' Lue' lu na' benne'
dxeledábague̱' le̱'.
8Bxue neda' ca dxun benne' dxuxúe̱' xiaj lawe̱'.
Gude̱zre neda' ca dxun bedxuj dxé̱zreba' zrí'ineba' zran xrílaba'
9chee̱ quebe bi xelún chia' benne' ca' dxelune̱' da cale̱la,
benne' dxeledábague̱' neda', ne dxelaca lazre̱' xelútie̱' neda'.
10Quebe dxelexache lazre̱' le sa' ljwezre̱',
na' dute̱ xel-la' dxulucá'ana szren cuine̱' dxuluchálaje̱'.
11Gátete̱ze dxedá' dxeléchaje̱' neda'.
Dxelaca lazre̱' xeline̱' neda' xu.
12Zaj naque̱' ca tu be̱zre xíxre'dau' dxaca lázreba' bi gáguba'.
Zaj naque̱' ca tu be̱zre xixre',
ba nucache cuínaba' chee̱ qué̱l-laba' béadu ca'.
13Gudá, Xran, gudábaga' benne' ca' dxelune̱' da cale̱la,
na' bchiche̱' lu xu.
Bselá neda' lu na' benne' ca' dxelune̱' da cale̱la,
guchínenu' xia chiu'.
14Bselá neda' lu na' benne' ca' nen ni'a ná'quezu', Xran.
Bselá neda' lu na' bénneache, benne' ca' zaj dxe'e̱ gunne xue
chee̱ xe̱zr la xu nigaze,
benne' ca' dxeláguqueze̱' da zácale̱'e̱ chiu'.
Da nigáqueze dxulugawe̱' zrí'ine̱' ca',
ne dxexegá'anaqueze da dxelágu zri'ine zre sue̱'.
15Le'eda' neda' lau Lue' lawe' da naca' xrlátaje.
Xezaca ba lazra' gaca' ca nácaquezu' Lue' gate xebana'.
© 1981, Wycliffe Bible Translators, Inc. All rights reserved.