METHIU 24
24
Jesu ing Rumniieen Maangvachii Ajeer
(Mk 13.1-2; Luk 21.5-6)
1Jesu ing rumniieen tanii hungsuwhka asirae, asebok ae ing Jesu ningna een aechu mansii nungka enchiitah nache abuumting vaksae. 2Changvakonchu Jesu ing eningna ariir, “Nenuw ing hava vakhae i nemusa, mumahchuw khang? Ki ing neningna atatak ing kariirnah, rung yngkheh taklina rung yngkheh ynthuw rudeh ing aangkheng jungchim naka kiichir vaata.”
Ijachaam Basenvachii
(Mk 13.3-13; Luk 21.7-19)
3Jesu ing Oleep Bungna aongraenche sebok aeng ynruwhjaeh ing vak aeka chong asii ae, “Keningna riirla, nang ing juwngvanachii vokhehkho laaruw paam chivachiichu utaraen vachiiva ichii buwtinniichu ynsaangkhe tavachiiva.”
4Amana Jesu ing abasang ae, “Nenuw achuw ingkho aasiirting ynruwniimah ing ynriimruw. 5Karuming nache Khrista ping ta ae naka thengvaatae amanche mee aanem aasiirting kivaatae. 6Nenuw ing laar vokhehkho laarsa yntuk chong siivanenta changvakonchu nenbarungriir manjamahruw. Hava vakhae i suwhvaata changvakonchu achiniirem chuve thengmahrinii. 7Akhaechuve jaati yngkheh ing jaati yngkheh taklina, iruwng lipah yngkheh ing iruwng lipah yngkheh taklina har ynjong vaatae. Amanache apham tanglahlah venchaam chiilaar omvaata vokhehkho linglaang thengvaata. 8Changvakonchu havana suwhvachii vakhae ichuve ijachaam abasennii vaata.
9 #
Met 10.22
“Changlaenche nenuwchu ija-chaam ipivaatae, ithehkho itheh vaatae amanche jaat vakhae inche karuming nache ibatir vaatae. 10Changlaenche nenuw aanem thacha tanii ynrichir vanenta; yngkheh re yngkheh ynrensava nenta amanche yngkheh re yngkheh yngharva nenta. 11Amanache jaephar pung achii ichummah aajaeh hungsuwh ae naka mee aanem aasiirting kivaatae. 12Ichamah ahung-bariim tahnache ningsiih aanem jungtak vaata. 13#Met 10.22Changvakonchu apha achimahri raentaang abadaarcheh meechu ikarpeeh phavaata. 14Iruwng lipah khaena isa chongchu ajaati siirnache saarkhii ipeehnii khaenache laaruw paam aangkhengna yntongchir pehvaang naka aanuwnache laaruw paam chipeh vaata.”
Ipirpak Ijachaam
(Mk 13.14-23; Luk 21.20-24)
15“Chukhaenache jaephar Deniel amanriir vaangkhe imaang ynvae yntirsuwh ing ynthiing apham nache ingiir nenuw ing muvanenta.” (achuw yngkheh aapa mee inche mang-huwrasii!) 16“Changlaenche Judia na ong nenuw bung ting taenruw. 17#Luk 17.31Een phuchung taklina ikar mee inche een sungting peehchae jungrimah rasiing. 18Amanche ruwraena ong mee inche isingfhuw peen hungrimah rasiing. 19Changvakonchu miknii aere naeri ae khaena chembe apha nache ningchuwh ningdiipnii vatapa! 20Chukhaenache havi pharbuw nakho changmahka Deennii inii nakho asuwhniimah khaena thamsaruw. 21#Aman 7.14Akhaechuve laaruw paam abasenpeh raennii ing ataraen phana isuwhmahri vokhehkho utaenkho suwhmah vachii ichiisuwh ijachaam chuvaata. 22Thangnang inche aaniichu mantommah nave achuw tikho ikarpeeh phamahnii; changvakonchu aateer vasah ae khaena chembe mantom vaata.
23“Changlaenche achuw yngkheh ing enruw, Khrista havane ongna, changmahka amanase ongna takhang ae nakho, amachu thacha madehruw. 24Akhaechuve ki Khrista ping ichii mee amanche Jaephar ping ichii ae hungsuwh vaatae; amanache aateer vasah ae rapkho aasiirting iruwnii khaena iruungpak laetho vokhehkho ingikniipak mandang vaatae. 25Rungaeruw, ki ing maen ing neningna hungsuwh vachii chaap kariir chirpa.
26 #
Luk 17.23,24 “Chukhaenache enuw ing Khrista chu lamkangna ongna takhang ae nakho nenuw jiimahdeh aeruw; changmahka enruw, ama eensung nase ongna takhang ae nakho thacha mahdeh aeruw. 27Akhaechuve inii-suwhtah tanii tenlungpa ynlehchu taetah tingkho ireng vaangkhe ichii ing Mee Sapa ajuwnglaenche amathohche aanghakjaeh vaata.
28 #
Luk 17.37
“Ithii sha aomnii nache laangta vaati ongpoh vaatae.”
Mee Sapa Jungthengvachii
(Mk 13.24-27; Luk 21.25-28)
29 #
Aman 6.12;
Aman 6.13
“Ijachaam iniichu achina, inii ing manthim vaata, tha ingkho aen mahnii, aesii ingkho thangbaen tanii jungbuk vaata, amanche thangbaenna om ruwreng chaap chukho ynnuhchir vaata. 30#Aman 1.7Changlaenche Mee Sapa buwtinniichu thangbaenna yndang vaata, amanche laaruw mee jaat vakhae ing bakhik vaatae, amanche Mee Sapa inche ruwreng vokhehkho alaar isa iruungpak thohche thangbaen ruwrduh taklina ijuwngchu muva-nenta. 31Amana avaarmee aechu tumpeeh ynring rusathoh ynruw ing laaruw paam arakiing manrii tingche jenchiir vaata, amanche enuw inche laaruw paam adongnii yngkheh na ing adongnii yngkheh ipha sungna aateer vasah mee vakhaechu mangkong vaatae.
Thachang Burna Ynghuwnii
(Mk 13.28-31; Luk 21.29-33)
32“Nenuw ing thachang thingbur na manghuwniiva nenchii yngkheh omna. Adeen hangthop naka ana hangduung nave saartha ahenphapa ichii nemang-huwnah. 33Amavaang ichii ing atae aphane isuwh vakhae nemu inge Mee Sapa ing eenkhaar aaneengpa ichiichu manghuwruw. 34Ki ing neningna atatak ing kariirnah, hava vakhae i asuwhchir mahri raentaang havana suwnthar i maangmahnii. 35Thangbaen vokhehkho laaruw paam chuve maang-vaata, changvakonchu kachongsae chuve maangmahdehnii.
Achuw ingkho Aanii vokhehkho Apha Manghuwmah
(Mk 13.32-37; Luk 17.26-30,34-36)
36“Changvakonchu aanii vokhehkho aphachu ampa ingmah naka thangbaen vaarmee aengkho, asapa ingkho manghuwmahnii. 37Mee Sapa juwngvachii iniichu Noah aaniina isuwh vaangkhe tavaata. 38Akhaechuve chii riimvachii inii aphamah rirae Noah ing ruwkuwng sungting aruwhmahri raentaang enuw ing sa aeka in aeka, rakhiinii aeka, vokhehkho rakhiikho manii aeka ong ae; 39amana chiichu riimka enuw vakhaechu ataenmahri raentaangche emanghuwmah vaangkhe, Mee Sapa juwngvachiichu amachu vaangche tavaata. 40Changlaenche ruwraena mee ynniimeh ongvaata, yngkheh chuve ruwvaata amanche yngkheh chuve mavaata. 41Rupanuw ynniimeh aeng haachang sukvaatae; yngkhehchu ruwvaata amanche yngkhehchu mavaata.
42“Chukhaenache hahjaehruw, Aafhuw juwngvachii aphachu nenuw manghuwmahchuw. 43#Luk 12.39,40Changvakonchu havi manghuwruw, amachuve een aafhuw inche ynchii aphanache lamruwchu thengva chiiva ichii manghuw nave, ama ing hahjaeh naka amanache a-eensung nache lamruw thengchehmah vachiiva. 44Chu-khaenache nenuw singsii ing ongruw, nemandenmah aphanache Mee Sapa ing juwngvaata.
Thachafhuw Meenae re Isamah Meenae
(Luk 12.41-48)
45“Achuwva thachafhuw vokhehkho ising meenaechu? Ama mee chuve aafhuw ing a-eengkuw aechu apha inae chakchak ing thaemin ipeehnii khaena amansir chuva. 46Aafhuw ing ahunganrirae changche ichii ing isapak ing nong ahentu meenaechu bor aphava! 47Ki ing neningna atatak ing kariirnah, ama ing adeen vakhae taklina aningnache mansir vaata. 48Changvakonchu ki kaafhuw thengsii mahnii tanaka isamah meenae inche abarungriirna kharnaka, 49amanche aarang meenae aechu bin naka, juw ynruw ae thohche sahak inhak nave, 50meenae inche amangaemah inii vokhehkho amanghuwmah apha nache Aafhuw inche juwngvaata. 51Amana atakchu mongnii isuwh ing tenvaata, vokhehkho isachaang atu mee ae thohche sarup manphahak vaata. Amanache ichap ichuw vokhehkho aha iriirvaata.
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.