Genesis 4
4
Cain-lu Abel-lu
1Adam-gum nalaqatigiŋagaa nuliani, aasii Eve siŋaiyauŋaruq. Iġñiqaŋaruq aasii uqallakłuni, “Atanġum ikayuqłuŋa iġñiqaqtitkaaŋa.” Aasii atchiŋagaa Cain-mik.#4.1 Cain-gum sivuniŋa “piññak” Hebrew-t uqaluŋanni. 2Aquvatigun iġñiqalgitchuq, Abel-mik. Abel imnaiḷiqiriġuŋaruq, aglaan Cain nunaliqirauvluni. 3Qakugulimman, kivluivik tikiḷgiñman, Cain qaġġirriŋaruq nautchiat iḷaŋiññik aasii aitchuutigivlugich Ataniġmun. 4#He 11.4.Aasiiḷi Abel qaġġirriŋaruq aŋayukłiġmik imnaiyaamik iġñimman imnaimi iḷaŋat, tuqułługu, aasii aitchuutigivlugich niqigigñiqtaŋich. Atanġum iviġaumagiŋagaa Abel aitchuutigiraŋiḷḷu, 5aglaan ayyaŋagaa Cain, aitchuutigiraŋiḷḷu. Cain qinnalipiaġataŋaruq, taluġnaqsivḷuniḷu uumitchakpaił̣ł̣uni. 6Tavraasii uqallaktuq Ataniq Cain-mun, “Summan imña qinnaliqpich? Summan taluġnaqpich? 7Nalaunŋaruamik savaŋaguvich, iglaŋaaġutiqaġayaqtutin; aglaan pigiitchuamik pikavich, piḷuun punŋayuuqtuatun utaqqiruq upkuaġni. Aŋalataġisukkaatin, aglaan akimmatiqaqtuksraurutin taaptumaŋŋa.”
8 #
Mt 23.35; Lk 11.51; 1 Jn 3.12. Tavra Cain-gum uqallautigaa nukaaluni Abel, “Avuŋa aullallagluk nunamun.” Taavuŋaanikkamik nunamun, Cain-gum piyunagutigaa nukaaluni aasii tuqułługu.
9Atanġum apiġigaa Cain, “Nauŋ imña nukaaluiñ Abel?”
Cain-gum kiugaa, “Naluruŋa. Qaunagiugaqtuksraġiraġa nukaaluga?”
10 #
He 12.24. Tavraasii Ataniq uqallaktuq, “Summan uvva innatun pigiisigiruamik pivich? Aniqarvich uvva auŋa ququularuq uvamnun nunamiñ, nipiqaqłuni akisautitquruatun. 11-12Uvva tatavsausiaksran: nautchirriigaluaġuvich, nuna nauriñiaŋitchuq sumik, tuqunŋagiñkii nukaaluiñ tavrani aasii ivsaŋaruq nuna auŋanik. Aimmiviiḷḷutin kukiḷuktuaġniaqtutin nunami.”
13Aasii Cain uqallaktuq Ataniġmun, “Taamna tatavsausiaġa siġġaġnaqpaitchuq akigaaġiniaġupku. 14Anitkigma nunaliqivimñiñ, takkuġniḷḷu. Aimmaviiḷḷuŋa kukiḷuktuaġniaqtuŋa nunami, aasii kialiqaa kasuġumiŋa tuqunniaġaaŋa.”
15Aglaan Atanġum kiugaa, “Naumi, kialiqaa tuqutpatin, tallimat malġuk iñuich tuqutauniaqtut akisautikun.” Tavraasii Atanġum nalunaiḷutchiŋagaa Cain kilgutigisaqługu kimulliqaa kasuiruamun tuqutquŋił̣ł̣ugu. 16Tavra Cain aullaŋaruq unił̣ł̣ugu Ataniq aasii iñuuniaqłuni nunami tairauruamik “Kukiḷuktuaġvik,” kivaliñġani Eden-gum.
Kiŋuvaaŋich Cain-gum
17Cain-lu tuvaaqatiniḷu iġñiqaŋaruk aasii atchiqł̣ugu Enoch-mik. Tavraasii Cain iniqpaliuŋaruq aasii atchiqł̣ugu iġñiġmi atiŋanik. 18Enoch iġñiqaŋaruq atiqaqtuamik Irad-mik, aapagiŋagaa Mehujael-gum, aasii Mehujael iġñiqaqłuni Methushael-mik, aapauruaġli Lamech-mun. 19Lamech-guuq nuliaqaqtuaq malġugnik, Adah-miglu, Zillah-miglu. 20Adah-gguuq iġñiruaq Jabal-mik, maŋŋuuruaq niġrutinik qaunaksrisuuruanun iñuuniaqtuaguvlutiglu tupiġni. 21Aniqatiqaqtuagguuq Jubal-mik, maŋŋuuruaġli atuqtuuraqtinun atuqtuuraġuuruanun nuqaqtiligniglu suvluaqtuġnaqtuaniglu. 22Zillah iġñiŋaruq Tubal Cain-mik, qanusiḷimaanik savalġutiliuġuuruaq savaanik patukpagmiḷḷu savił̣hamiḷḷu. Nayaaluqaqtuaq Tubal Cain atiqaqtuamik Naamah-mik.
23Lamech-gum uqallautigaik nuliagni kamasaaqłuni,
“Adah-lu Zillah-lu, naalaġnisiñŋa;
tuvaaqatauruasiik Lamech-mun, tusaasiñŋa:
Iñuaqtuaŋa nukatpiamik qanukkii ilaata ikiḷḷiiraani,
qanukkii nukatpiam anniaqtaani.
24Tallimat malġuktun iñugiaktigiruat tuquruksraukpata iñuaqtuamun Cain-mik,
piŋasukipiaq akimiaq malġuktun (77) iñugiaktigiruat tuqutauruksrauniaqtut iñuum tuqutuaqpaŋa.”
Seth-lu Enosh-lu
25Adam-lu Eve-lu iġñiqavsaaŋaruk allamik. Eve uqallaktuq, “God-im iġñiksritkaaŋa simmautiksraŋanik Abel-gum, Cain-gum tuquttaŋata.” Tavraasii atchiŋagaa Seth-mik.#4.25 Seth-gum sivuniŋa “iḷi.” 26Seth iġñiqaqami atchiġaa Enosh-mik. Tavrani tavra iñuich nanġaisuusiŋarut atqanun Atanġum.
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)