Chivkeeb 7
7
Dlej Nyaab Nplajteb
1Vaajtswv has rua Nau-es has tas, “Koj hab koj tsev tuabneeg ca le moog nyob huv lub nkoj. Taagnrho tej tuabneeg kws nyob huv nplajteb tam nuav, kuv pum koj tuab leeg xwb txhaj le ua lub neej ncaaj nceeg. 2Coj tej tsaj kws huv ib yaam xyaa nkawm, tabsis cov tsaj kws tsi huv, coj ib yaam ib nkawg nrug koj moog nyob huv lub nkoj. 3Dlua le ntawd, coj tej noog ib yaam xyaa nkawm moog hab. Ua le nuav kuas txhua yaam tsaj hab tej noog txhaj yuav muaj sa nyob hab fuamvaam rua huv lub nplajteb nuav dlua ntxiv. 4Xyaa nub sau nuav kuv yuav tso naag lug plaub caug nub plaub caug mo rua huv nplajteb nuav, kuas txhua yaam muaj sa kws kuv tsim tseg lawm kuas raug puamtsuaj taag huv tuabsi moog.” 5Nau-es ua txhua yaam lawv le Vaajtswv tau saamfwm rua nwg lawm.
6Thaus dlej nyaab nplajteb Nau-es noobnyoog muaj rau pua xyoo. 7Nau-es hab nwg quaspuj, nwg cov tub, hab cov nyaab puavleej moog nyob rua huv lub nkoj kuas tsi raug dlej nyaab.#Mat 24.38,39; Luk 17.27 8Txhua yaam tsaj hab noog, tej maum tej txiv, tej puj tej lauv, tsi has cov kws huv lossis tsi huv, 9puavleej nrug Nau-es moog huv tuabsi rua huv lub nkoj, lawv le Vaajtswv saamfwm lawm. 10Xyaa nub tom qaab dlej naag txawm laub quas lug lug nyaab nplajteb.
11Thaus Nau-es noobnyoog muaj rau pua xyoo, txwm nkaus rua nub kaum xyaa lub ob hlis ntuj, nub ntawd ntuj ca le tsaus dlub ncab, naag laub quas lug sau ntuj lug rua huv nplajteb, hab tej qhovdlej txhawv ntawm tej hauv haav phwj yog huv aav tuaj,#2 Pet 3.6 12hab naag lug rua huv nplajteb nuav tau plaub caug nub plaub caug mo. 13Tuab nub ntawd Nau-es hab nwg quaspuj coj obtug peb tug tub: Xees, Haas, Yafej hab peb tug nyaab nrug obtug moog nyob rua huv lub nkoj. 14Txhua yaam tsaj, tsi has tsaj nyeg hab tsaj qus, tsaj luj tsaj miv, naab, qaav, kaab, ntsaum, hab txhua yaam noog puavleej nrug puab moog rua huv lub nkoj huv tuabsi. 15Txhua tsaav yaam tsaj kws muaj sa, puavleej nrug Nau-es moog nyob huv lub nkoj, 16lawv le Vaajtswv tau saamfwm rua Nau-es lawm. Ces tug TSWV maam le kaw lub qhovrooj nkoj rua.
17Naag yeej lug tsi tu le tau plaub caug nub, hab dlej fuam sab zuj zug ua rua lub nkoj nqaa hlo ntaab yeeg lawm. 18Dlej txhaj nyaab sab heev tuaj, hab ntsawj lub nkoj ntaab yeeg sau nplaim dlej. 19Dlej nyaab sab zuj zug moog vuv taagnrho tej hauv roob sab huv tuabsi, 20hab dlej tseem nyaab dlhau tej hauv roob sab ntawd rua sau kaum tsib tshim lawm hab. 21Txhua yaam kws muaj sa nyob huv nplajteb nuav tuag taag, tsi has naag noog, kaab, ntsaum, tsaj nyeg, tsaj qus, hab tej tuabneeg yeej tsi seem hlo le. 22Txhua yaam kws txawj ua paa nyob huv nplajteb nuav tuag taag huv tuabsi. 23Tug TSWV ua rua ib puas tsaav yaam kws muaj sa nyob huv nplajteb nuav, tuabneeg, tsaj hab noog tuag tu noob nrho. Tsuas tshuav Nau-es hab cov kws nrug nwg moog nyob huv lub nkoj txhaj seem muaj sa nyob xwb. 24Dlej yeej tsi nqeg le tau ib puas tsib caug nub.
© 2000 United Bible Societies. All rights reserved.