LUK 23
23
Jisu ta Pilat Daeng khou Zay Guangmei
(Met 27.1-2,11-14; Mrk 15.1-5; Jhn 18.28-38)
1Khoutei, peimei kapwm tei thauna Jisu ta Pilat daeng thangc zay tat the. 2“Mi pu hei aniw zaat ta zay mbiangh khang swmeipu the. Kaisar khang dihkhav tii riu twna sa the khatni kamei hei guangh sw nimei Khrista the twna kamei rui sa the,” twna kakhuay nkhamlouna sa the.
3Khoutei, “Nang Jihudimei nunc tuang guangh cho?” twna Pilat rui Jisu khou thanv the.
“Ngguay, nang samei tei the,” twna Jisu rui mundaw the.
4“Mi pu tuang khuay hei ai phu tow mak ge,” twna Pilat rui amuh daihmei nunc khatni meic kangdai khou tei sa the.
5Tiki, “Kamei rui nchamloumei hei rui Judia kapwm khou meic guay ta karangh kasiclou the. Kamei Galili khou rui thauna, mi khou hei nganvna key tangc the,” twna sa ranvna sa the.
Jisu ta Herod Daeng Thangc Ndiuloumei
6Hei tei chu pwkhou, “Kamei Galilimei lana cho?” twna Pilat rui thanv the. 7Jisu hei Herod rui sin bammei ramv thangc mei de twmei thay la khou, mi ganv khou tei Herod ni Jerusalem khou bam tina, kadaeng thangc ndiulou the.
8Herod tei Jisu ta how pwkhou, mpeyna neihla the. Kalam thu kamei Jisu lam khou chu lana kata ariw niina bammei tingsaengc the. Jisu rui charynmei taanv taancloumei ta kamei how nii khwan e. 9Kamei rui Jisu khou lat mpeyna thanv khwan e; tiki kamei lat khat sini daw mak ge. 10Amuh daihmei nunc khatni Riakdanv dinhpouc nunc mi khou tei dingna, Jisu khuay sa ranvna sa the. 11Herod khatni katuang ricmei nunc rui Jisu ta sinnui the khatni malana sw the. Kumna guangh pheybaan piulouna Pilat daeng thangc ndiu guang dat the. 12Mi nungc tei Herod lev Pilat pam sw dat the. Kaney mi hu khou tei thu khat khat ta zauczih bam khwan e.
Jisu ta Swluai khang Latdanv Patmei
(Met 27.15-26; Mrk 15.6-15; Jhn 18.39—19.16)
13Khoutei Pilat rui amuh daihmei nunc, meicpy nunc khatni meic nunc ta tei kaw kaduai lana, 14kaniw khou sa the, “Nangniw rui mi pu ti hei meic nunc ta zay mbianghmeipu e twna akhou zay guang the. Zauclo, ai nangniw hu khou kakhuay phu the; tiki nangniw rui karuc khou nkham guangmei khuay hei thu kakhou ai phu tow mak ge. 15Herod rui ni kakhuay phu tow lamc makna kata aniw khou ndiu guang dat the. Zauclo, theic biuhmei khuay kamei taanclou tuang maek ge. 16Kum thena, ai rui kata tibai lana mpatlou dat ni the.” 17Kaanpatpui Ngai kathuic Pilat rui kangkai khou bammei gaanv khat ta mpatlou nimei tuang nai khwan e.#Baanhhy baibal asaekc khou thu kathaek 17 hei maek ge. 18Kaniw meic guayna khwan khatna swna, “Mi pu ti hei swluai o! Barabbas ta mpatlou o!” twna kauc the. 19(Barabbas twmeipu hei mi kaidai khou tei sucpat rihpatmei khou kazauh e khatni meicdow e twna kangkai khou lou bammeipu khwan e.)
20Jisu ta mpatlou nii lana, Pilat rui kaniw khou sa kaluaih dat re. 21Tiki, “Kata kros khou thaengcluai o! Kata kros khou thaengcluai o!” twna kaniw rui kauc bam the.
22Luan thumhmei swna, Pilat rui kaniw khou sa dat re, “Mi pu hei rui tabui simei taanclou thena cho? Kata swluai biuhmei khuay kakhou ai phu tow mak ge. Hei zaeng rui, kata tibai lana mpatlou ni the.”
23Tiki Jisu ta swluai nina de twna kauc ranv hay hayna kauc the. Kumna kaniw rui kauc ngamlou kan the. 24Kumna kaniw rui samei tei taanclou khang, Pilat rui ding keylou kan the. 25Sucpat rihpatmei khou kazauhmei khatni meicdowmei, kaniw rui neymei Barabbas ta kiuc mpatlou kan the. Kumna Jisu ta kaniw rui ningmei thei layna sw khang tii pat kan the.
Jisu ta Kros khou Thaengcluaimei
(Met 27.32-44; Mrk 15.21-32; Jhn 19.17-27)
26Kaniw Jisu ta zay pat khou, namv thangc rui guangmei Kurenimei Simon ta nymna Jisu thei khou kros tei tipuanc the. 27Meic kangdai kathei lay tat khwan e. Mi pang khou kiu Jisu khang rui kapna huayna tat bammei ntumei nunc ni nai khwan e. 28Khoutei Jisu kaniw biak thangc ziangrih patna, “Jerusalemmei aluc nuncle, nangniw akhang kap nangh e; nangniw khang khatni nangniw nac nunc khang kap bo. 29Kalam thu, ‘Nakamcpeic nunc tei kaniw sangay e dav! Kanac puanh makmei pui nunc khatni kanac pamc puanc nouh makmei pui nunc tei kaniw sangay e dav!’ twna sa nimei ganv guang the. 30Mi ganv khou kiu, chyngbut ta, ‘Aniw ta pangv binlou tho!’ twna khatni luanghbut ta, ‘Aniw ta gum binlou tho!’ twna sa puni.#Hos 10.8; Nda 6.16 31Kalam thu thing ring bang kumhmei akhou sini kaniw rui mi kumcna swlou e thei, thing thei bang kumhmei kaniw khou thu akumh puni tha?”
32Khuaydaih nkhuaimei gaanv nei ta ni swluai khang kamei lev zay tat khwan e. 33Kaniw Pyrou twna kawmei bamv khou guang tangc pwkhou, kaniw rui Jisu ta khatni mi pu nei ta tei kros khou thaengclou the. Mi pu nei ta tei katuang baanzat baandaw thangc thaengclou khwan e. 34Khoutei, “Apule, kaniw ta kuaklou tio, kalam thu kaniw tabui sw bam tu cho twmei kaniw thay lamc makna e,” twna Jisu rui sa the.#Baanhhy baibal asaekc khou thu kathaek 34 hei maek ge. #Kal 22.18
Kumna san zaucna kaniw katuang pheybaan nzanh the.
35Khoutei meic nunc tei dingna zauc bam the. Kumna Jihudimei kapy nunc rui kata sinnuina sa the, “Kamei meic baihmei ta kanlou e; kamei hei kapahloumei Ravguangc tuang Khrista kiu e thei, karana kata kan kan di tho.”#Kal 22.7
36Rihmei nunc rui ni kata sinnui the. Kaniw guangna kakhang zoukhiangc tiina,#Kal 69.21 37“Nang Jihudimei guangc e thei, nang rana nang ta kan tho,” twna sa the.
38“Mi hei Jihudimei Guangc e” twna hyna kapy ruc khou ni daanclou khwan e.
39Mi khou tei thaengclou bammei nkhuaimeipu gaanv khat tei rui Jisu ta nsicna, “Nang Khrista kiu hamh nah cho? Nang rana nang ta ni, aney ta ni kan damc bu cho!” twna sa the.
40Khoutei nkhuaimei gaanv khat pu tei rui kata luhna sa the, “Nang Ravguangc ta ping mak nah cho? Kakhou kumcna nang khou ni theihmei latzan keylou bammei tuang di the. 41Anei thu anei taanv khou rui theic biuc tina the; tiki kamei hei thu nkhuaimei taanv khat sini taanc kan mak ge.”
42Khoutei, “He Jisu, nang guangcdic khou guang pwkhou, ata ningtowlou o,” twna sa the.
43“Ai rui nang khou kaling siakna sa tuang e: Nang aseic hei paradais khou anei bam puni the,” twna Jisu rui kakhou sa the.
Jisu Theihmei
(Met 27.45-56; Mrk 15.33-41; Jhn 19.28-30)
44Neih ndyng zaengc khou rui mi kandic kapwm tei zingc khwan e, kumna ganvdak kathumh zingc khwan e. 45Kalam thu neihmik zingc kan khwan e. Khoutei Jerusalem Ravkai tuang khamvthinghphey tei kachung khou rui siat kaek the.#Tat 26.31-33 46Kumna Jisu kauc ranvna, “Apu, nang baanc khou abumaengc tiilou the,” twna kauc the. Hei tei salou lana kabuc tut kan the.#Kal 31.5
47Mi kumcna pat kanmei tei how lana, rihpypu tei Ravguangc ta thuanckuna, “Mi pu hei ravchaptatmeipu changh lana di the!” twna sa the. 48Hei tei guang zauc bammei meic kangdai tei, hei tei how lana kaniw ngaengv kazwmna hanc dat kan the. 49Kata thaymei guay, Galili thangc rui kathei lay keymei meicpui nunc tei kazauhna duh thangc dingna mi guay tei zauc bam khwan e.#Luk 8.2-3
Jisu ta Mbeihloumei
(Met 27.57-61; Mrk 15.42-47; Jhn 10.38-42)
50Peidai kumei, meicgaymei khatni ravchaptatmei kazanc Josep twna kawmeipu gaanv khat nai khwan e. 51Kamei mi peidai tuang latdyng khatni taanv khou tei nuh makmeipu khwan e. Kamei hei Judia tuang kaidai Arimathia khou rui guangmei e khatni kamei hei Ravguangc guangcdic guangmei ta nkhwan bammeipu khwan e. 52Kamei Pilat daeng thangc tatna, Jisu pumc tei ney the. 53Kamei rui hei tei laa key lana, linen phey rui kazihlouna, ntauh khou langcloumei, meic gaanv khat na ta sini mbeihlou zat makmei tarou khou mbeihlou the. 54Hei tei Sabbathneic khang chamdaanvmei tingmik khwan e.
55Galili thangc rui Jisu thei lay nganghmei nunc tei Josep thei lay tatna tarou tei khatni mi khou tei Jisu ta mbeihlou kanmei tei kaniw how khwan e. 56Khoutei kaniw tat dat lana, Jisu pumc khou teylou khang namh gaymei maruai khatni thauh chamdaanv the. Riakdanv thei layna, Sabbathneic thu kaniw nthaekc the.#Tat 20.10; Ria 5.14
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.