MWANDUSO 2
2
1Avo ulanga na isi na vinhu vose vili mgati yake vimambukizwa kulumbigwa. 2Na mdizua da saba Mulungu kakala yamambukize sang'hano yake iyakalile yoisang'hana, na mdizua hijo kahumula. 3Avo Mulungu kadimoteza zua da saba na kaditenda diwe zua ding'alile, kwavija mdizua hijo Mulungu kakala yamambukize sang'hano yake ya kulumba, na kahumula. 4Avo vino vivo ulanga na isi vuvilumbigwe.
Mbuli Ziyagwe Zisimulila Uumbi
MNDEWA Mulungu viyalumbile ulanga na isi, 5hakukalile na mche muna iisi na hakukalile na mbeyu zotile, kwavija MNDEWA Mulungu kakala hanaitenda mvula itoe, na hakukalile na munhu yoyose yailimile iisi. 6Ila nzokwe za mazi zilawa hasi na kuitapagiza isi yose.
7Abaho MNDEWA Mulungu kamulumba munhu kulawa mditimbwisi da isi, na kumuhumulila mmhula yake mhumuzi igela ugima, na ija imunhu kawa na ugima.
8Abaho MNDEWA Mulungu kahanda kihati ng'ambu ya ulawilo wa zua, hanhu hokemigwa Edeni. Na himo kamwika ija imunhu iyamulumbile. 9Na MNDEWA Mulungu kaitenda mibiki ya namna zose ikule kulawa muisi, mibiki inogeza meso na inogile sama ya mandia. Hagatigati ya ikihati kukala na m'biki ulava ugima na m'biki uwatenda wanhu wagatange ganogile na gehile.
10Lwanda lukuluma kulawa Edeni, lukitapagiza ikihati, abaho lukiigola mianza mine. 11Lwanda lwa ichanduso lokemigwa Pishoni, alo lukuluma muisi yose ya Havila, ako kuli na zahabu. 12Na zahabu ya isi ija ing'ala. Ako vivija kukalile na mavuta ga kunung'hila na namna za mabwe gokemigwa shohamu. 13Lwanda lwa ikabili lokemigwa Gihoni, alo lukuluma muisi yose ya Kushi. 14Lwanda lwa ikadatu lokemigwa Tigilisi, alo lukuluma mwambu wa ulawilo wa zua wa wambo da Ashulu. Na lwanda lwa ikane lokemigwa Yuflati.
15MNDEWA Mulungu kamwika ija imunhu mgati ya kija Ikihati cha Edeni yakihalile na kukilola goya. 16Na MNDEWA Mulungu kamulongela ija imunhu, “Dia mujo kulawa mum'biki wowose uli mkihati, 17ila mujo wa m'biki uwatenda wanhu wagatange ganogile na gehile sambiuje, kwavija kipigiti vondauje mujo hiwo, kodanganhika.”
18Abaho MNDEWA Mulungu kalonga, “Havilumbile munhu ino kukala yeiyeka. Nomtendela wa kumtaza yalumbile kumwake heyo.” 19Avo MNDEWA Mulungu kasola ulongo kulawa muisi na kawatenda wang'onyo wose na ndege wose. Abaho kawagala ha ija imunhu giladi yawagwelele matwaga. Twaga jojose ija imunhu diyamgwelele kila mwene ugima dikala dijo twaga jake. 20Avo ija imunhu kawagwelela matwaga ndege wose na wang'onyo wose. Ila hakukalile na wa kumtaza yalumbile kumwake heyo.
21Abaho MNDEWA Mulungu kamtenda ija imunhu yakuluze, na kipigiti viyakalile yokuluza, kalubabazula lubavu lumwe lwa ija imunhu na kuhagubika hanhu haja na nyama. 22Abaho MNDEWA Mulungu kamtenda mtwanzi kulawa mulubavu luja na kumgala ha ija imunhu. 23Na ija imunhu kalonga,
“Ino iyo zege mmizege yangu
na lukuli mulukuli lwangu.
Avo kokemigwa mtwanzi kwavija kababazuligwa kulawa mwa mbigalo.”
24Sama ya kilamso kino mbigalo kowaleka tataake na mamaake na kuilumba na mtwanzi wake, na hewo wowa lukuli lumwe.
25Ija imbigalo na mtwanzi wake wose wakala mwazi, na hawonile kinyala.
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators