လံာ်တၢ်ကဲထီၣ်အခီၣ်ထံး 6
6
ပှၤဟီၣ်ခိၣ်ဖိအတၢ်တတီတလိၤ
1ဒီးဖဲပှၤဟီၣ်ခိၣ်ဖိတဖၣ်ရၤလီၤအသးလၢဟီၣ်ခိၣ်ချၢန့ၣ်ပိာ် မုၣ်ဖိသ့ၣ်တဖၣ်အိၣ်ဖျဲၣ်ထီၣ်စ့ၢ်ကီးလံန့ၣ်လီၤ. 2ကစၢ်ယွၤအဖိခွါတနီၤထံၣ်ဝဲဒၣ်လၢဖိသၣ်မုၣ်ဖိသ့ၣ်တဖၣ်အံၤ ဃံလၤဝဲဒီးဟံးန့ၢ်ဝဲဖိသၣ်မုၣ်စုာ်စုာ်လၢအဘၣ်သူၣ်ဘၣ်သး ဝဲတဖၣ်န့ၣ်လီၤ. 3တုၤနုၤတစုယွၤစံးဝဲဒၣ်, “ယတပျဲပှၤကညီတဖၣ်ကအိၣ်မူဝဲ လီၤစိၤလီၤထီန့ၣ်ဘၣ်. အဝဲသ့ၣ်မ့ၢ်ပှၤသံသ့တဖၣ်လီၤ. စးထီၣ်ခဲကနံၣ်အံၤဒီးဆူညါအဝဲသ့ၣ်ကအိၣ်မူတအါန့ၢ်ဘၣ် အနံၣ်တကယၤခံဆံဘၣ်န့ၣ်လီၤ.” 4လၢမုၢ်နံၤတဖၣ်အပူၤန့ၣ်ဒီးဆူညါဒၣ်လဲာ်န့ၣ်, ပှၤနီၢ်ဒိၣ်ဖိတဖၣ်အိၣ်ထီၣ်လၢဟီၣ်ခိၣ်ချၢ, ပှၤလၢအဟဲလီၤစၢၤလၢပှၤကညီပိာ်မုၣ်ဒီးကစၢ်ယွၤအဖိခွါတဖၣ် န့ၣ်လီၤ. အဝဲသ့ၣ်မ့ၢ်ပှၤဒူပှၤဃိၤဖးဒိၣ်တဖၣ်ဒီးပှၤမံၤဟူသၣ်ဖျါလၢ ပျၢၤလံၤလံၤတဖၣ်န့ၣ်လီၤ.
5ဒီးတုၤယွၤထံၣ်ဝဲလၢပှၤကိးဂၤဒဲးလၢဟီၣ်ခိၣ်ချၢသ့ၣ်တဖၣ် အံၤတတီတလိၤနးမး, ဒီးအတၢ်ဆိကမိၣ်ဆိကမးလၢအသးပူၤတမံၤလၢ်လၢ်မ့ၢ်ထဲတၢ်အၢတၢ် သီန့ၣ်, 6အဝဲသးအုးလၢအတ့လီၤတ့ၢ်ဘၣ်အဝဲသ့ၣ်ဒီးပာ်အီၤလၢဟီၣ်ခိၣ် ချၢအဃိန့ၣ်လီၤ. အသးပှဲၤလုာ်ကွံာ်ဒီးတၢ်သးဘၣ်ဒိ ဘၣ်ထံးဖးဒိၣ်, 7တုၤဒၣ်လဲာ်အစံးဝဲ, “ယကတြူာ်ကွံာ်ပှၤဂီၢ်မုၢ်အံၤလၢယတ့ လီၤတ့ၢ်အီၤ, ဒီးဆၣ်ဖိကီၢ်ဖိဒီးထိၣ်ဖိလံၣ်ဖိသ့ၣ်တဖၣ်စ့ၢ်ကီးန့ၣ်လီၤ. အဂ့ၢ်ဒ်အံၤ, ယသးအုးလၢယတ့လီၤအဝဲသ့ၣ်တဂၤလၢ်လၢ်အဃိန့ၣ်လီၤ.” 8မ့မ့ၢ်ယွၤဘၣ်သူၣ်ဘၣ်သးလၢစီၤနိအၤန့ၣ်လီၤ.
စီၤနိအၤ
9အအံၤမ့ၢ်စီၤနိအၤအတၢ်အိၣ်မူအဂ့ၢ်န့ၣ်လီၤ. စီၤနိအၤမ့ၢ်ပှၤအတီအလိၤတဂၤ, ပှၤလၢတၢ်တထံၣ်န့ၢ်အတၢ်ဒဲးဘး လၢပှၤတစိၤဒၣ်အီၤအကျါန့ၣ်လီၤ. 10အဝဲမ့ၢ်ပှၤအိၣ်မူလၢတၢ်ရ့လိာ်သးဒီးကစၢ်ယွၤန့ၣ်လီၤ. ဒီးစီၤနိအၤထီၣ်ဖိအဖိခွါသၢဂၤ, စီၤၡ့ၣ်, စီၤဃၣ်ဒီးစီၤယ့ဖ့းသးန့ၣ်လီၤ. 11ဒီးကယဲၢ်ပှၤအဂၤခဲလၢာ်န့ၣ်မ့ၢ်ထဲပှၤအၢပှၤသီလၢကစၢ်ယွၤအတၢ်ထံၣ် အပူၤန့ၣ်လီၤ. ဒီးတၢ်မၤတၢ်လၢတၢ်စုဆူၣ်ခီၣ်တကးသ့ၣ်တဖၣ်ရၤလီၤအသး သကုၤဆးဒးလီၤ. 12ကစၢ်ယွၤကွၢ်လီၤဟီၣ်ခိၣ်ဒီးထံၣ်ဝဲဒၣ်လၢမ့ၢ်အအၢအသီလီၤ. အဂ့ၢ်ဒ်အံၤ, ပှၤဂီၢ်မုၢ်ခဲလၢာ်အိၣ်မူလၢတၢ်အိၣ်မူအအၢ အသီတဖၣ်အပူၤန့ၣ်လီၤ.
13ဒီးကစၢ်ယွၤစံးဘၣ်စီၤနိအၤ, “ယပာ်လီၤလံယသးလၢယကမၤဟးဂီၤ ကွံာ်ကယဲၢ်ပှၤဟီၣ်ခိၣ်ဖိခဲလၢာ်န့ၣ်လီၤ. ယကမၤဟးဂီၤကွံာ်အဝဲသ့ၣ်လၢာ်လၢာ်ဆ့ဆ့လီၤ. အဂ့ၢ်ဒ်အံၤ, ဟီၣ်ခိၣ်အံၤပှဲၤဝဲဒီးအဝဲသ့ၣ်အစုဆူၣ်ခီၣ်တကးအတၢ်မၤ တဖၣ်န့ၣ်လီၤ. 14မၤကဘီတဘ့ၣ်လၢသ့ၣ်အဂ့ၤကတၢၢ်လၢနဂီၢ်တက့ၢ်. မၤဒၢးသ့ၣ်တဖၣ်လၢအပူၤဒီးလံာ်ဘၢအီၤလၢကျဲတံးလၢအပူၤဒီး လၢအချၢန့ၣ်တက့ၢ်. 15ဒီးမၤကဘီအထီန့ၣ်အပျၢ်သၢကယၤ, အဒီၣ်ဃီၣ်န့ၣ်အပျၢ်ယဲၢ်ဆံ ဒီးအကစီၤထီၣ်န့ၣ်အပျၢ်သၢဆံန့ၣ်တက့ၢ်. 16မၤတၢ်ခိၣ်ဒုးလၢကဘီအဂီၢ်ဒီးပာ်လီၤဖျဲၣ်တၢ်လီၢ်တပျၢ်လၢတၢ်ခိၣ်ဒုး ဒီးအဂီၤပၤဝးတရံးအဘၢၣ်စၢၤန့ၣ်တက့ၢ်. မၤအဒၢးလၢအခီၣ်ထံးတဆီ, ခံဆီတဆီဒီးသၢဆီတဆီ ဒီးပာ်တြဲၤတဘ့ၣ်လၢတၢ်ကပၤတက့ၢ်. 17ယကပျဲထံလုၣ်ဘၢတၢ်လၢဟီၣ်ခိၣ်ချၢလၢတၢ်မၤဟးဂီၤကယဲၢ်တၢ်လၢ အမူခဲလၢာ်န့ၣ်လီၤ. တၢ်လၢအမူလၢဟီၣ်ခိၣ်ချၢခဲလၢာ်ကသံဝဲဒၣ်န့ၣ်လီၤ. 18ဘၣ်ဆၣ်ဒီး, ယကမၤတၢ်အၢၣ်လီၤအီလီၤတမံၤဒီးနၤလီၤ. လဲၤနုာ်ဆူကဘီပူၤဃုာ်ဒီးနမါ, နဖိခွါတဖၣ်ဒီးအမါတဖၣ် န့ၣ်တက့ၢ်. 19လဲၤစိာ်နုာ်ကယဲၢ်တၢ်လၢအမူခဲလၢာ်အကျါခံဒု, ခံဘ့ၣ်, အမိၢ်ဒီးအဖါ, ဒ်သိးကမူဃုာ်ဒီးနၤန့ၣ်တက့ၢ်. 20ထိၣ်ဖိလံာ်ဖိဒ်အကလုာ်ဒၣ်ဝဲအသိး, ဒီးဆၣ်ဖိကီၢ်ဖိဒ်အကလုာ်ဒၣ်ဝဲအသိး, ဒ်သိးဒီးအဝဲသ့ၣ်ကမူဒံးအဂီၢ်န့ၣ်တက့ၢ်. 21ဒီးစိာ်ဃုာ်ကယဲၢ်တၢ်အီၣ်ကိးမံၤကိးကလုာ်ဒဲးလၢနဂီၢ်ဒီးလၢ အဝဲသ့ၣ်အဂီၢ်န့ၣ်တက့ၢ်.” 22ဒီးစီၤနိအၤမၤဝဲတၢ်ကိးမံၤဒဲးဒ်ကစၢ်ယွၤမၤလိာ်တ့ၢ်အီၤ အသိးန့ၣ်လီၤ.
Sgaw Karen Common Bible © Bible Society of Myanmar, 1992.