LUKAX 6
6
Yesux Mawh Simiang ngaix Twah
(Mat 12:1-8; Mak 2:23-28)
1Daux ngaix twah tix ngaix Nawh Cao hu preeng ka daux ma nghox ca mai kawncau Nawh khankix caik sigleem nghox ca,#Pi 23:25 mai boi ti ih daux tawm taix tix heue. 2Pharishie tix blah ah nin, “Yuh patix pex lai yuh pa ang khaw mai beenli ngaix twah?” 3Yesux pawk lox ah nin ka kix, “Ang pex sax phat grawh grawng pa yuh Davit, yam nawh mai pui pa ot tau mai nawh kied cai rhawm lie? 4Grawh grawng yam laig nawh ka daux nyiex Siyiex mai teei ti ih blah mai tawx ka khawm pui pa ot tau mai nawh,#Krub 24:9 pa ang pui khaw ti ih, lheu khaing cao giex kaing li nong nong lie,#1Sa 21:1-6?” 5Nawh Cao baox ah nin ka kix, “Kawn kawn pui mawh Simiang ngaix twah heue.”
Pai Pui Yum Taix Tix Khawn Moi
(Mat 12:9-14; Mak 3:1-6)
6Ka daux ngaix twah an tix ngaix, Nawh Cao laig ka daux nyiex sidiex mai sidiex gau heue. Dee an koe pui tix kaux pa yum taix khawn dawm. 7Pui tiiem lai mai Pharishie khankix, jhak ti yaox Nawh Cao, sang cox Nawh kaw an moi singaix twah lie, ang cox lie? Yuh ka mawx sonsang yaox dee deuh phimap ka Nawh Cao heue. 8Viang mawh nan Nawh Cao tawng ceu pa keud kix mai ah nin ka pui pa hoik yum kroh taix tix khawn, “Kaoh cung ka sinax tin heue.” nawh kaoh cung heue.” 9Yesux ah nin ka kix, “Aux sang chawk pex, khaw mai beenli yuh tix pa mhawm ngaix twah lie, phan ang mawh nan yuh tix pa laux lie? Khaw ti taoh ju lie phan ang mawh nan khaw ti phah yum lie?” 10Nawh Cao jhak vung viang ka piang kix khawmuik mai ah nin ka kaw an, “Nyeu taix maix heue.” Mai nawh yuh nan mai taix nawh deeh mhawm heue. 11Viang mawh nan kix naog krax song rhawm mai kix kum paox tix grawng sang pon yuh ka mawx ka Yesux heue.
Yesux Laug Kawncau
(Mat 10:1-4; Mak 3:13-19)
12Daux bawg yam ngaix an khankix, Nawh Cao haok ka gawng sonsang rawg bwan mai Nawh rawg bwan ka Siyiex leeing lang sawm heue. 13Yam hoik riang praix, Nawh Cao kok kawncau mau soi Nawh khankix mai Nawh laug kao ra kaux ka daux kix, pa sum Nawh ceu kaux kawncau Nawh pa ting. 14Kix mawh Simon pa sum Nawh Cao ceu kaux Petrux mai pux nawh Andare mai Yakop mai Yohan mai Philipux mai Bathawlamie. 15Mathiex mai Thomax mai Yakop kawn Alaphie mai Simon pa kok mawh Zelut. 16Yudax pux Yakop mai Yudax Isakariut pa mawh kaw pa tik pa tawx Nawh Cao heue.
Sidiex Gau Mai Cox Saux Kuceu Moi
(Mat 4:23-25)
17Nawh Cao lih khaing gawng tau mai kix mai cung dee lung mai kawncau mau soi Nawh haoh hun, pui tom nie pa kaoh khaing meung Yudax khawmuik mai veng Yerusaliem mai praok rawm sigrit sigra veng Turux mai veng Sidom, khankix hoek ti nghiet ti mhong Nawh Cao, sonsang kieh Nawh cox jhawm saux kix moi heue. 18Kix pa kham geu kheu phi pa seeing brai khankix pon tix moi nyawm ot heue. 19Cub pui hun khawmuik sawg ti teeh Nawh Cao, kheu sibrawm lih khaing Nawh mai kieh kix moi khawmuik heue.
Bwanson Mai Pa Kha Rhawm
(Mat 5:1-12)
20Nawh Cao jhak ka piang kawncau Nawh khankix, ah nin, “Pex pa hot pa sibhawm khankix koe bwanson heue, kheu Meung Siyiex mawh cie pex heue. 21Pex pa cai rhawm yam in khankix, koe bwanson heue, kheu pex tak sang sak heue. Pex pa yiiem grai yam in, koe bwanson heue, kheu pex tak nyiah. 22Yam pui koeng ka pex mai gwieh pex grheu pex khaing cub kix mai salao pex mai tik ceu kaux pex awm mawh pa caox, mawh kheu Kawn kawn pui, pex koe bwanson heue.”#1Pe 4:14 23Gaux rhawm ka daux singaix an heue, gaux rhawm mai jaloh ka heue. Mawh kheu, bwanson pex kied ting ka daux meung raoma heue. Kheu tax du kix dix, hoik yuh awm an ka cao jhai khankix heue.#2Been 36:16; Cau 7:52 24Viang mawh nan pex pa mawh cao mi, tak kha rhawm heue, kheu hoik pon pex pa nyawm rhawm cie pex heue. 25Pex pa hoik sak hoik naog yam in, tak kha rhawm heue, kheu pex tak sang cai rhawm heue. Pex pa nyiah yam in, tak kha rhawm heue, kheu pex tak sang khi rhawm mai yiiem grai heue. 26Yam pui khawmuik yaw mai ah pa mhawm mhiem grawng pex, pex tak kha rhawm heue, mawh kheu tax du kix dix, hoik yuh awm an ka cao jhai pa ang mawh ang meh khankix heue.
Moh Ka Pui Koeng Khankix
(Mat 5:38-48, 7:12)
27“Viang mawh nan Aux krai ka pex pa mhong khankix, moh ka pui pa koeng ka pex mai yuh pa mhawm son kix pa koeng ka pex heue. 28Nawb bwan ka pui pa lawg ka pex, rawg bwan, son kix pa yuh pa ang khaw ang jiet ka pex heue. 29Ka kaw pa simang sibax maix tix plak, tang plak kawx, baox tawx ti yaox heue. Kaw pa teei prux fua maix, sibex maix kawx, paw kieh thiang ti tawx kah heue. 30Tawx ka pui pa rawg ka maix ku kaux mai kaw pa teei kraung cie maix, paw lai deeh mhaing ka nawh heue. 31Awm simie pex pui yuh ka tix, pex kawx, yuh awm an ka kix heue.#2Been 36:16; Cau 7:52 32Phan pex moh ka pui pa moh ka pex khaing, pex tak koe bwanson yuh ka mawx? Mawh kheu pui tingmap khankix kawx, deeh moh ka pui pa moh ka kix heue. 33Phan pex yuh pa mhawm ka pui pa yuh pa mhawm ka pex khaing, pex tak koe bwanson yuh ka mawx? Mawh kheu pui ting map khankix kawx, yuh awm an heue. 34Phan pex tawx yaog yaing ka pui, pa keud pex ti deeh pon khaing, pex tak koe bwanson yuh ka mawx? Mawh kheu pui ting map khankix kawx, tawx yaog yaing ka paox pui ting map khankix, ti deeh pon awm pa tawx kix heue. 35Moh ka pui pa koeng ka pex mai yuh pa mhawm mai tawx yaog yaing paw keud ti deeh pon tidtix mai bwanson pex tak kied ting kied lhaong mai pex tak mawh kawn kaw pa ting lhaong khaing khawmuik heue. Mawh kheu Nawh yuh bwan son ka pui pa ang tawng bwan son mai ka pui caox khankix heue. 36Mawh kheu nan, awm Keeing pex koe krax caux rhawm, pex kawx kieh koe krax caux rhawm heue.”
Prawng Ca Pui Tang Kaux
(Mat 7:1-5)
37Paw prawng ca, yuh ka mawx son ang pex sang hoek krax prawng ca. Paw prawng phimap pui mai pex tak ang hoek krax prawng phimap heue. Pluat ploi phimap ka pui mai pex tak hoek krax pluat ploi heue. 38Tawx ka pui mai tak sang tawx ka pex pa tong pa tiag mhawm mhawm, pa hoik yeen mai pa hoik yung yiang mai pa kreh, pui tak sang tawx naok ka pex heue. Mawh kheu pex tong pex tiag ti tawx ka pui tang kaux miex ding, tak sang baox deeh tong deeh tiag ti tawx ka pex yuh nan heue. 39Nawh Cao kawx krai lox tiag pa ah nin ka kix, “Pui dug ngai chix jhi, pui pa dug ngai yaox krax lie? Kiex khawm ra tak rau daux o ang mawh lie?”#Mat 15:14 40Kawncau ang lheu ting khaing Sara cao gau tix, viang mawh nan kawncau ku kaux, yam hoik grum tawng, nawh tak awm sara cao gau tix heue.#Mat 10:24-25; Yo 13:16, 15:20 41Kheu maix jhak kuh ngai pa iak daux ngai puxaik maix mai ang keud grawh grawng nuk pa koe daux ngai tokaux tix? 42Phan ang mawh nan maix chix ah ka puxaik maix, puxaik eue, kieh aux teei ti tik kuh ngai maix, yam ang maix yaox nuk pa koe ka daux ngai tokaux tix, yuh ka mawx? Pui pie pui lhen eue, teei ti tik nuk pa koe daux ngai maix ka ha mai maix tak sang yaox mhawm mhawm, sonsang teei kuh pa koe daux ngai puxaik maix heue.
Khaox Mai Plix
(Mat 7:16-20, 12:33-35)
43Grawh grawng nawh, khaox pa mhawm pa plix plix pa ang mhawm ang koe tix khaox kawx mai khaox pa ang mhawm pa plix plix pa mhawm, ang koe tix khaox kawx heue. 44Mawh kheu chix tawng khaox ku khaox ka plix nawh heue. Grawh grawng nawh, pui ang sax pieh plix ruh khaing pang kat mai ang sax pieh plix siiet khaing katsai brex. 45Pui pa mhawm viex ceu pa mhawm lih khaing daux rhawm rhi nawh dee deuh pa mhawm mai pui pa caox viex ceu pa caox lih khaing dee deuh pa caox heue. Kheu jheeh chix krai ceu pa koe daux rhawm tom naog kreh heue.
Pui Sum Nyiex Ra Kaux
(Mat 7:24-27)
46“Pex lai kok Aux, Simiang eue, Simiang eue mai ang yuh ceu pa krai Aux khankix yuh ka mawx? 47Pui ku kaux daux pui pa hoek ka Aux, pa mhong gumlox Aux mai hawt ti yuh khankix, Aux tak jhi pex yaox nawh awm kaw pa yuh ka mawx. 48Nawh awm pui pa sum nyiex tix lhang, pa kaong tom raux mai yuh num ka piang simaox mai yam haok hwan rawm mai chun ka nyiex an, ang chix kieh nawh yung yiang, mawh kheu hoik sum nyiex an ka piang simaox heue. 49Viang mawh nan pui pa mhong lox Aux mai ang hawt ti yuh, tak awm pui pa sum nyiex nawh ka piang tiex mai ang koe num mai yam chun rawm nawh, nyiex an goh daux rawm dom mawx dom an mai pa laux pa leeing nyiex an kied ting heue.”
Wa Common Language Bible © Bible Society of Myanmar, 2012