LUKAX 9
9
Ploi Kawncau Kao Ra Kaux
(Mat 10:5-15; Mak 6:7-13)
1Yesux kok kawncau Nawh kao ra kaux khrawm paox tix mai tawx sibrawm ka kix pa pex piang phicaox khawmuik sonsang pon ti cox jhawm saux moi heue. 2Yesux ploi kix hu sidiex gau grawng Meung Siyiex mai sonsang cox pui pa koe jhawm saux moi heue. 3Yesux ah nin ka kix, “Paw viex tidtix hu, son yam hu pex daux krax, paw viex khaox gix, bau, blah, mau, sibex kawx paw viex ra pheen heue. 4Pex laig ka daux nyiex mawx ang ah, ot tan tom lih hu pex awx. 5Pui miex ding ang ah, pa ang rieb ti teei pex, yam lih hu pex khaing veng an, khuah phawng tiex khaing caong pex, sonsang mawh mhai ruk piang kix heue.” 6Kix lih hu lai ling daux yaong daux veng khankix, sidiex gau lox bwan gaux rhawm mai cox jhawm saux moi ku dah dee heue.
Grawng Yum Yohan
(Mat 14:1-12; Mak 6:14-29)
7Yam mhong simiang Herut grawng ceu pa hoik mawh khawmuik, nawh keud ang doh, daox kah, mawh kheu pui tix blah ah Yohan hoik deeh kaoh im khaing krax yum. 8Tiblah ah Eliyax hoik lih hoek mai tang kaux khankix ah, cao jhai phao ka didix hoik deeh kaoh tix kaux kaux heue. 9Viang mawh nan Herut ah nin, “Aux hoik kid kaing Yohan, viang mawh nan, kaw pa mhong aux grawng ceu in khankix mawh mawx?” Nawh sawg sonsang pon ti yaox Yesux heue.
Tawx Pui Phuan Rheng Ih
(Mat 14:13-21; Mak 6:30-44; Yo 6:1-14)
10Yam deeh hoek, kawncau khankix, kix krai grawng ceu pa hoik yuh kix ka Yesux. Yesux viex kix lih ka veng tix veng, pa kok mawh Biesedax heue. 11Viang mawh nan cub pui hun khankix, tawng grawng an mai hawt Yesux, Yesux rieb kix mai krai kix mhong grawng Meung Siyiex, Nawh cox pa koe jhawm saux kix moi heue. 12Yam dex sang faik praix plak bo, kawncau Nawh kao ra kaux hoek mai ah nin ka Yesux, “Ploi cub pui hun khankix hu heue, sonsang hu laig kix ka daux yaong khankix pa koe sivie siveng tin, sonsang pon kix pa ih tix mai dee it tum, mawh kheu ot ex daux tiag heue.” 13Viang mawh nan Yesux ah nin ka kix, “Pex tawx pa ih son kix awx.” Kix deeh ah nin, “Lheu khaing blah phwan lon mai kax ra mu ngie phan ex ang hu liag ex ang koe pa ih son pui in kix khawmuik. 14Kheu kix simex dex koe phwan rheng kaux heue.” Yesux ah nin ka kawncau Nawh khankix, “Kieh kix ngawm tix cub, koe been tixphwan kaux tix cub heue.” 15Kix yuh awm hoik nhie kix mai kieh pui khawmuik ngawm heue. 16Nawh Cao teei blah phwan lon mai kax ra mu an mai maong ka raoma mai Nawh nawb bwan ka ankix mai sivit ti tawx ka kawncau Nawh khankix, sonsang viex kix ti tawx ka pui khankix heue. 17Kix ih sak khawmuik. Mai deeh pon ti khrawm pa lheu khaix ih kix, pa max pa phawng koe kao ra phliex heue.
Yesux Mawh Cao Khrit
(Mat 16:13-19; Mak 8:27-29)
18Yam ot tau mai kawncau tix khankix Nawh Cao rawg bwan nong nong, Nawh chawk kix ah nin, “Cub pui hun khankix ah Aux mawh mawx?” 19Kix deeh ah nin tix blah ah, “Mawh Yohan cao cubcom, viang mawh nan tang kaux tix blah ah, mawh Eliyax mai tang kaux tix blah baox ah, mawh cao jhai phao ka didix, hoik deeh kaoh tix kaux kaux heue.” 20Yesux baox chawk kix, “Pex kawx ah Aux mawh mawx lie?” Petrux deeh pawk ah nin, “Maix mawh Khrit cie Siyiex heue.”
Pa Yum Mai Pa Deeh Kaoh Im
(Mat 16:20-28; Mak 8:30—9:1)
21Viang mawh nan Yesux jawg ti sidiex gau ka kix mai tawm lox ang cu kix krai ka pui tix kaux kawx heue. 22Nawh Cao ah nin, “Kawn kawn pui tak sang kham geu tom nie ceu, ka daux tawm taix kuad song mai cao giex kaing li pa ting mai pui tiiem lai khankix mai tak sang kham geu pa teei yum mai tak sang deeh kaoh im khaix an daux loe singaix heue.” 23Nawh Cao ah nin ka pui khawmuik, “Phan pui tix kaux kaux simie ti hawt khaix Aux, kieh nawh thiang ti tik tokaux tix mai klawm khaox lhak tix ku ngaix mai hawt Aux heue. 24Mawh kheu pui mawx ang ah, pa simie ti taoh ju tokaux tix, tak sang som ju heue. Viang mawh nan, pui mawx ang ah pa som ju son Aux, nawh tak pon ti taoh ju heue. 25Grawh grawng nawh, phan pui tix kaux kaux pon haktiex khawmuik mai som tokaux tix, sang koe bwanson yuh ka mawx? 26Mawh kheu pui mawx ang ah, pa kaig kheu Aux mai gumlox Aux, Kawn kawn pui kawx, tak sang kaig kheu nawh, yam Nawh viex min plakngai cie tix mai min plakngai Keeing tix, hoek tau mai kawncau Siyiex pa singax singeh khankix heue. 27Aux krai lox pa mawh meh ka pex, pui pa cung tin tix blah, tak ang cim krax yum, tom kix yaox Meung Siyiex heue.
Yesux Tieh Loh Tokaux Tix
(Mat 17:1-8; Mak 9:2-8)
28Khaix hoik ah Nawh Cao lox ceu in khankix, yam dex hoek daix ngaix, Nawh Cao teei Petrux, Yohan mai Yakop, haok ka gawng sonsang rawg bwan heue. 29Yam rawg Nawh Cao bwan, pakngai Nawh tieh loh mai kraung ceep Nawh lih paing cawk tom lih riang heue. 30Jhak heue, pui ra kaux sikah mai Nawh Cao, pa mawh Mose mai Eliyax, 31Pa lih hoek ka daux min plakngai mai kum grawng pa dex sang yum Nawh Cao ka daux veng Yerusaliem heue. 32Petrux mai pa ot tau mai nawh, sang it nie mai gaing heue. Viang mawh nan yam hoik siduad kix mhawm mhawm, kix yaox min plakngai Nawh Cao mai pui ra kaux pa cung tau mai Nawh heue. 33Yam gwieh kiex ti hu khaing Nawh Cao, Petrux ah nin ka Yesux, “Simiang eue, ex ot tin mhawm son ex heue, kieh ex yuh nyiex bang loe lhang. Son Maix tix lhang mai son Mose tix lhang mai son Eliyax tix lhang,” Nawh ang tawng ceu pa ah tix, tom ah nan heue. 34Yam kawn ah nawh ceu in khankix, paiawm hoek ti kheem veei kix mai kix lhat ka yam laig kix ka daux paiawm heue. 35Lox lih khaing daux pai awm an, ah nin, “In mawh Kawn Aux, pa laug Aux, pex cu nghiet ka Nawh awx.” 36Yam lih hoek lox an, yaox ngie Yesux ot nong nong tix kaux khaing. Kix ang nye, ang krai grawng ceu pa hoik yaox kix khankix ka pui tix kaux kawx ka daux bawg yam ngaix an heue.
Yesux Grheu Phicaox Lih
(Mat 17:14-18; Mak 9:14-27)
37Khaix an tix singaix, yam hoik lih hoek kix khaing gawng, cub pui pa kied hun hoek ti rieb Nawh Cao. 38Jhak heue, ka daux cub pui hun, pui tix kaux kok yo ah nin, “Sara Cao Gau eue, aux khyox khaw ka Maix, hoek ti jhak ka kawn simex aux liak. Kheu nawh mawh kawn pa koe aux tix kaux ngie khaing heue. 39Phi giex nawh mai nawh riag dom mawx dom an mai kieh nawh rak rawn, tom lih bai jheeh heue. Dex ang yawn khaing nawh, yuh nawh tom kreuk heue. 40Aux khyox khaw ka kawncau Maix khankix nhie kix grheu phicaox an lih kawx, kix ang pon ti grheu heue.” 41Yesux deeh ah nin, “pui pa ang koe krax yum rhawm mai pa nu ti sidiex eue, Aux kawn tak sang ot mai pex miex grheung? Aux kawn tak sang gun yeung pex miex grheung? Viex kawn simex maix hoek heue.” 42Yam kawn tak hoek nawh, phicaox an biak nawh goh mai kieh nawh rak rawn tix sigrien sigre. Viang mawh nan Yesux ah ka phi pa seeing brai an mai kieh kawn simex an moi mai deeh tawx nawh ka keeing nawh heue. 43Pui khawmuik daox deng ka sibrawm pa ting lhaong Siyiex heue. Viang mawh nan yam kawn daox deng kix ku kaux ka ceu pa yuh Yesux khankix, Nawh Cao ah nin ka kawncau Nawh khankix.
Yesux Baox Krai
(Mat 17:22-23; Mak 9:30-32)
44“Kieh gumlox in khankix laig ka daux yhaok pex, kheu tak sang tawx Kawn kawn pui ka daux tawm taix kawn pui khankix heue.” 45Viang mawh nan kix ang tawng dee bleeh lox in mai hoik mox khaing kix, yuh ka mawx son ang kix sang tawng mai kix lhat chawk Yesux ka grawng lox in heue.
Pui Mawx Pa Blon Ting?
(Mat 18:1-5; Mak 9:33-37)
46Kix thung thiang paox tix, ka grawng daux kix mawh pui mawx pa tak sang nie lheu ting khaing paox tix. 47Viang mawh nan yam yaox Yesux pa keud pa sawn kix ka daux rhawm tix, Nawh Cao teei kawn nyawm iak tix kaux deuh ka liep tix, 48mai ah nin ka kix, “Pui mawx ang ah, pa rieb ti teei kawn nyawm iak in ka daux ceu kaux Aux, rieb ti teei ka Aux heue. Pui mawx ang ah, pa rieb ti teei Aux, rieb ti teei ka kaw pa ploi Aux hoek heue. Mawh kheu pui pa iak khaing paox tix ka daux pex khawmuik, kaw an tak sang ting heue.”
Pui Ang Koeng, Ot Plak Pex
(Mak 9:38-40)
49Yohan ah nin ka Nawh Cao, Simiang eue, ex yaox pui tix kaux pa grheu phicaox lih ka daux ceu kaux Maix mai ex kieh nawh, kheu ang nawh hawt tau mai ex heue.” 50Viang mawh nan Yesux ah nin ka nawh, “Paw kieh nawh, mawh kheu pui pa ang ot plak pui koeng ka pex, ot plak pex heue.”
Pui Samarix Ang Rieb Yesux
51Yam an dex sang hoek bawg yam singaix, pa sang rieb ti teei Nawh haok ka piang dee long, Nawh Cao jawg veeh pakngai tix, sonsang hu ka veng Yerusaliem. 52Nawh ploi kawncau tix hu plak sivoe ngai Nawh Cao mai kix hu laig ka daux yaong pui Samarix tix yaong, sonsang cox khre son Nawh Cao heue. 53Pui yaong an ang rieb ti teei ka Nawh Cao, kheu Nawh veeh pakngai tix, sang hu ka veng Yerusaliem heue. 54Yam yaox kawncau Nawh Yakop mai Yohan grawng in, kiex ah nin, “Simiang eue, Maix koe rhawm ti kieh yiex, nhie ngu lih khaing raoma mai gleeing kix, awm pa hoik yuh Eliyax lie?” 55Viang mawh nan Yesux deeh veeh mai ah ka kiex. 56Kix hu ka tang yaong heue.
Pui Khaw Tiyuh Kawncau
(Mat 8:19-22)
57Yam kawn hu kix krax, pui tix kaux ah nin ka Nawh Cao, “Aux sang hawt Maix ka dee sang hu Maix kudah kudee heue.” 58Yesux ah nin ka nawh, “Sox praix khankix koe daux mai sim pa po piang raoma khankix koe mheem, viang mawh nan, Kawn kawn pui ang koe dee deuh kaing tix heue.” 59Nawh Cao ah nin ka pui tang kaux tix kaux, “Hawt khaix Aux heue,” viang mawh nan kaw an ah nin, “Simiang eue, kieh aux hu sipaung keeing aux ka ha.” 60Yesux baox ah nin ka kaw an, “Kieh pui yum sipaung pui yum cie kix heue. Maix hu mai krai grawng meung Siyiex heue.” 61Tang kaux tix kaux kawx ah nin, “Simiang eue, aux sang hawt khaix Maix heue, viang mawh nan, kieh aux hu sikah lox gwieh ka pui pa ot ka daux nyiex aux ka ha. ” 62Yesux baox ah nin ka nawh, “Kaux pui mawx ang ah, pa hoik giex krong thai mai pa deeh gi plak khaix, ang keung khaw son meung Siyiex heue.”
Wa Common Language Bible © Bible Society of Myanmar, 2012