Dibandu 14
14
Abram na bakaga na Melkisedec
1Va temu jiAmrafel, kaga jiMesopotamie na jiAriok kaga jiEllasar na jiKedor-Laomer kaga jiElam na jiTidal kaga jiGoim, 2dimalabana yiri ababa bamatoga divita na Bera kaga jiSodome na Bircha kaga jiGomorrhe na Chinab kaga jiAdma na jiChemeber kaga jiSeboim na kaga jiBela, diwendi rie: Soar. 3Jogu botsu bamabenguna va mosi o yibususu yiSiddim ayinengulungu mubu uKali va temu ejiji. 4Bamaba o tsi durumu duKedor-Laomer te na yigumi na bilima bibeji; yilima yiyigumi na murieru bamakaluga mimbini. 5Tumba mu yilima yiyigumi na bina Kedor-Laomer na bakaga abamaba nandi bamayetoyisa baRefaim o Achetarot-Camaim, na baZouzi o Ham, na baEmim o Quiriataim. 6Mbe ka baHori bamayetoga o mukongu uSeir te no miri mineni miEl-Paran, amivu bebeli na kumu. 7Mbana bamagabuga o yiari yiEn-Michpat aguvu Cades na bamatoyisa nobetsa baAmalec o bulongu buogu na baAmor abamaba o Hassasson-Tamar. 8Mbana kaga jiSodome na kaga jiGomorrhe na kaga jiAdma na kaga jiSeboim na kaga jiBela aguvu Soar bamakunsama utoga nogu o yibususu yiSiddim, 9diwendi rie: utoga na Kedor-Laomer kaga jiElam na Tidal kaga jiGoim na Amrafel kaga jiMesopotamie na Ariok kaga jiEllasar: bakaga bana bamatoga na bakaga baranu. 10Yibususu yiSiddim yimaba na puela biduna bibituma; kaga jiSodome na kaga jiGomorrhe bamarina na bamayebonduga mu bionyi; basusu bamarina o yiari yimukongu. 11Balungitsi bamakinda busina buotsu buSodome na buGomorrhe na biguji biogu na bamayenawenda. 12Lot muana katsi Abram agumatsaninanga o Sodome amabongu na biandi biotsu wandi; bamayenamubega.
13Murinitsi amayeditsingula Abram muisi Hebreu; jandi amatsaninanga va gari miri mineni miMamre, amimaba miAmor muana nguji Echekol na Aner abamavangana pangini na Abram. 14Ava Abram amagululu yiri muana katsi andi amakotusu o tsugu, amavega bitogulu ombu kama yirieru na digumi na yinana yibasalitsi bandi abamaba na tindi mangolu, abamaburulu mu ndagu andi na amabingisa bakaga beni te no Dan. 15Abram amagaba dibadi diandi makabu utumuna bakaga beni mukolu, diwendi rie: amababelisa na amababingisa te no Hoba aguvu o banda Damas. 16Amabapatula abimakindu biotsu; amabatula na muana-katsi andi Lot na biandi biotsu na bagetu na bakoli basusu. 17Abram anobelisa Kedor-Laomer na bakaga abamavangana pangini nandi; jogu na kaga jiSodome bamabenguna o yibususu yiChave, ayinengulungu yibususu yikaga va temu ejiji.
18Melkisedec kaga jiSalem amabeyisa mapa na malamu: amaba muvagulitsi upagu uNsambi Aguvu Uneni. 19Amagabila Abram miula na amavosa rie: Miula mibi na Abram: miula miNsambi Aguvu Uneni agumavaga julu nabutamba! 20Diboti ombu Nsambi Aguvu Uneni agumaguwakisa bavinitsi bagu!
Abram amamuvega yimosi mu digumi mu biotsu.
21Kaga jiSodome amatsingula Abram rie: Kabusili batu, gukabonga abimakindu.
22Abram amawagula kaga jiSodome rie: Nyilevi pesi va gusu Fumu, Nsambi Aguvu Uneni, agumasunda julu na butamba rie: 23Ngobonga ne yima yimosi mu biotsu abivu abiagu ne munsiyi ne mukudu ubapondu mu mbari gukevosa rie: Nyimavega Abram busina. 24Menu ngerondi ne yima yimosi! Yika biguji abi abami bamaji na dikabu dibabaala abamavangana pangini nami: Aner na Echekol na Mamre.
La sainte Bible en langue Yipunu © Alliance Biblique du Cameroun, 1992.