Luka 24
24
Iesu opi ata itoipe
(Mataio 28:1–10; Mareko 16:1–8; Ioane 20:1–10)
1Soka hebedoma ve omopa sare ve mea ōpōpe soa voa, ere everori kekese leipe muramura muforoe la ovi tapu oti voa kei forerōpe. 2Foreri ere tapu sasaukōpe fave la aroruka maria voa eaeiape la eavōpe. 3A—, ere oropōpe lea mea ere Iesu ve maea la eavai kao. 4Ere lea vei haikakapu kakapu leiape lea mea, heavita orakoria maea puta sosorusosoru ita ereve maea maria voa soi pepeiape. 5Ere tore lei, soso mea voa hiopōpe lea mea, ereuka erero mō ōpe, E makuri vita la opaita karu voa elipeta ipi levea? 6Are mōvoa kao, are itoi. Are Galilea voa meiape soa ve o la haikaeaia;#Mat 16:21; 17:22–23; 20:18–19; Mak 8:31; 9:31; 10:33–34; Luk 9:22; 18:31–33 7are mōfeare moiape, Karu ve Atute la iri kaiae karu ve mai voa miōri, satauro voa paea opi, oroisori sare voa ata itoi roi. 8Soka ere areve o lōri haikaea, 9tapu oti kiripi itipe, aea lea etau foromai vei eleven karu aea karu haria foromai ita la o moiape. 10Lea uamori meha; Magadala ua Maria, aea Ioana, aea Iakobo ve lou Maria, aea ereve maeapavora uamori ita. Ere lea leipe etau ve fari aposetolo karu la moipe. 11A—, aposetolo karu fari la seseōvi are usoso eite auke fari feare o a’, aea ere erero sukaerereai kasirau. 12A—, Petero itei tapu oti voa soea kei forerōpe. Foreri are hiopi iri voa kaiopi fofoisa, are fasōpe puta la haria ofae eavōpe; lea mea are lea leipe etau vei horahora lei, elore voa kerori itipe.
Emausa otiharo voa
(Mareko 16:12–13)
13Lea sare kofa voa ereve karu orakoria karikara seika rare Emausa voa maea lei isaipe, Ierusalema ve ára maili seven feare reha. 14Otiharo aru voa ereuka lea leipe etau foromai vei laua sukōvō vovo isaipe. 15Ereuka laua sukōva sukōva ape lea mea Iesu kofa haekao lei, ereuka ita farehoria isaipe. 16A—, ereuka arero ofae eavaiape, eite ereuka arero ore leiti kasirau. 17Soka are ereukaro mō ōpe, Euka otiharo voa mea sukōva sukōva aipeta laua ipi levea? Ereuka soso auka paroro a’ sukatei pavōpe. 18Soka ereuka farakeka rare Kleopasi arero lalasi mō leipe, Ierusalema voa au pepeita sariva karu voa a haria mea soa voa lōvoa leitia etau ore leiti kao ei? 19Are ereukaro mō ōpe, Larelekōru? Aea ereuka arero mō ōpe, Iesu Nasareta karu vei lea fari. Are peroveta vita Ualare ve soso voa aea karu foromai ve omopa voa areve leita mai areve o ita siahu ia. 20A—, elave maso harofave karu aea karikara harofave karu ita arero Roma karu la miōri arero paea opai tava vei, aea arero satauro voa paeaia reha. 21A—, elave haiiri are sa Israela la fareōvi lei makuri leiti vita leiti roi. Etau aeata meha, lea etau la leitia sare oroisoria meha. 22A—, elave uamori hea sa elaro lei haihava loi. Ere mea ōpai soa tapu oti voa terai, 23a—, areve maea la eavai kao; a—, ere elaro tai koti mō auai, ere aneru oraka la eovi, aea ereuka are makuri o erero moi. 24Elave karu hea ta tapu voa kei uamori sa moita o lōfeare ta eavai, a—, ere arero ofae ruri kasirau.
25Soka are ereukaro mō ōpe, Haiiri auke karu e, e haihaveva lei peroveta karu sa moiape o foromai la sukaerereai kasirau. 26Haikaeaita mai meha, Keriso lea haisora foromai lei, areve sosorusosoru soa voa lōri oropai vei. 27Soa Mose ve buka voa tetetete peroveta karu ve buka foromai voa, are vei uka siseiape o foromai ve eite are ereukaro satiriaraiape.
28Soka ere ereuka isaiape lea karikara ve haekao voa forerōpe soa, Iesu are au isai feare leipe. 29Lei, ereuka arero taupi mō ōpe, Elaka ita fareho pavaia ipi mea aeai, sare sukopai vei la roi. Soka are ereuka ita pavai vei uvi voa oropōpe. 30Are ereuka ita larietau posa voa avi, are faloa la ovi, Ualare la maeati roroka lei, fofi ereukaro miarōpe. 31Miōri, ereukave ofae fapi, ereuka arero ore leipe reha; a—, are ereukave ofae ita veverapōpe. 32Soka ereuka elore elore mō ōpe, Are elakaro otiharo voa laua sukōva sukōva oita, Safu Karoro ve eite ta elakaro muiaita lea mea, elakave haiiri siahu lea vei ovaita meha ei?
33Soka ereuka lea ora kofa voa itei maea lei Ierusalema voa ata kerori pataipe. Lōvoa ereuka eleven karu ereve maeapavora karu ita kokorukōpe la sukaeōpe. 34Ere ereukaro mō ōpe, Okofa Papuvita itei la mea, aea are ta Simona tai forerai. 35Soka ereuka ta otiharo voa leipe lea etau ta o moiape, aeata ereuka are faloa la fofōpe lea soa voa arero ore leipe reha.
Iesu areve satiriaraita karu tai forerōpe
(Mataio 28:16–20; Mareko 16:14–18; Ioane 20:19–23; Aposetolo 1:6–8)
36Soka ereuka lea laua la sukavaiape soa, Iesu ereve aru voa forera pavaita reha. Are erero mō ōpe, E tairu ovaia. 37A—, ere itakaeri a’ tore leipe, ipi ereve haiiri ere eavōpe soa are karisu. 38A—, are erero mō ōpe, E levei haitutu a’, eve haiiri voa levei horahora aipea ei? 39Arave mai oraka arave mora oraka ita la ofae eavaia; ara eite meha. Araro mai sa mopi aea e ofae eavai roi, ara maeasarōva uti ita ia; karisu mōfeare kao. 40Are lea o mei, areve mai oraka areve mora oraka ita la erero muiōpe reha. 41A—, ere haihava ita hailareva foromai lei, ere sukaerereai ore auke feare leipe. Soka are erero mō ōpe, E mōvoa larietau ia? 42Lō mei ere a ea eaeiape ekaka itua arero miarōpe. 43Miōri, are ovi ereve omopa voa au lōpe.
44Soka are erero mō ōpe, Ara ero moia o meha, ara e ita fareho peia lea soa voa, Mose ve aea peroveta karu ve Safu Buka voa aeata Salamo voa ara vei uka siseita o foromai la lei o kofa ita kekese leiti roi. 45Lea soa are Safu Buka ve eite erero satiriōri satiriōri, ereve haiiri ta fapi ore leipe reha. 46Are erero ta mō ōpe, O mō uka laisisea, Keriso hehea rovaea lei, opi oroisori sare voa ata itoi roi; 47lea mea areve rare voa haiiri kerori aea iri kaiae la felaukea mutapaita o omopa Ierusalema voa itoro a’, aea aite toruipi‐ipi karu foromai voa ta itoro a’ fafarapai vei. 48Lea etau la ore lei o kofa moita karu e reha. 49A—, ara Oa sa moita lea otoare etau la ero tai itapai roi; lea vei Ierusalema voa pavaia, pepepe e arori voa faukaita siahu la ovai ao.#Apos 1:4
Iesu kauri voa fareōvi pataipe
(Mareko 16:19–20; Aposetolo 1:9–11)
50Lea mea are erero maria voa lariōvi te Betania haekao lei, are areve mai oraka moravi erero o sa lei lareva leipe.#Apos 1:9–11 51Are erero lei lareva leiape soa kofa voa, are erero kiripi, kauri voa fareōvi pataipe. 52Ere arero maso toa, aea aite hailareva rovaea ita Ierusalema voa ata keroripe. 53Ere soa foromai voa Maso Uvi voa Ualare la maeati vovo roroaiape.
Published by the Bible Society of Papua New Guinea in 1983.