Mattayo 1
1
1Kitabu kya uhogosi wa Yesu Kristo, mwana wa Daudi, mwana wa Ibrahimu.
2Ibrahimu akamhogwili Isaak; nu Isaak akamhogwili Yakobo; nu Yakobo akamhogwili Yuda na wa nung’una mundu; 3nu Yuda akawahogwili Perez na Zera wa Tamar; nu Perez akamhogwili Hezron; nu Hezron akamhogwili Aram; 4nu Aram akamhogwili Aminadab; nu Aminadab akamhogwili Nahashon; nu Nahashon akamhogwili Salmon; 5nu Salmon akamhogwili Boaz wa Rahab; nu Boaz akamhogwili Obed wa Ruth; nu Obed akamhogwili Yesse; 6nu Yesse akamhogwili Daudi mutwa.
7Nu Daudi akamhogwili Solomon wa yula wa Uria; nu Solomon akamhogwili Rehoboam; nu Rehoboam akamhogwili Abia; 8nu Abia akamhogwili Asa; nu Asa akamhogwili Yehoshafat; nu Yehoshafat akamhogwili Yoram; nu Yoram akamhogwili Uzia; 9nu Uzia akamhogwili Yotham; nu Yotham akamhogwili Ahaz; nu Ahaz akamhogwili Hezekia; 10nu Hezekia akamhogwili Manasse; nu Manasse akamhogwili Amon; 11nu Amon akamhogwili Yosia; nu Yosia akamhogwili Yekonia na wa nung’una mundu, pa lukumbi lwakutoleka ku Babel.
12Na panyuma pa kutoleka ku Babel, Yekonia akamhogwili Salathiel; 13nu Salathiel akamhogwili Zerubbabel; nu Zerubbabel akamhogwili Abiud; nu Abiud akamhogwili Eliakim; 14nu Eliakim akamhogwili Azor; nu Azor akamhogwili Sadok; nu Sadok akamhogwili Akim; nu Akim akamhogwili Eliud; 15nu Eliud akamhogwili Eleazar; nu Eleazar akamhogwili Mattan; nu Mattan akamhogwili Yakobo; 16nu Yakobo akamhogwili Yosefu, ngwana mundu Mariamu, wa yula akahogoliki Yesu, wakukemeleka Kristo.
17Mumu fihogosi fyoha kitumbulile Ibrahimu mpaka Daudi fiyii fihogosi kumi na ncheche; na kitumbulile Daudi mpaka kutoleka kula ku Babel fihogosi kumi na ncheche; na kitumbulile kutoleka kula ku Babel mpaka Kristo fihogosi kumi na ncheche.
18Kuhogoleka kwake Yesu Kristo kukayili wila: Mariamu nyongolo pakahongiki nu Yosefu, wakona nukuwandamana pamonga, akawoniki ayii nu luleme lwa Roho Mbalafu. 19Leka Yosefu ngwana mundu, pakuya mundu ngolofu, nukugana lepa kunkitila ndingo pa chengo kya wandu, akaholiti kunsula pa mweya. 20Leka bahapa akaholiti ifi, lola malaika wa Bambo akambonakili pa kulota, kujowa, Yosefu, mwana wa Daudi, usiyogopa kwitolela Mariamu mhanuwo: pakuya iki ayima luleme nakyo kiyii kya Roho Mbalafu. 21Leka yahogole mwana ngosi; na yaunkemele lihina lyake YESU; pakuya yuyu yayokole nsafi wake pa sambi syawe. 22Leka iki kya mfilimila kikapatiti kuya, nausi limemasike lila Bambo akalijowiti pa ndomo pa wakulweta, kujowa,
23Lolaye, bikira yayime luleme, na yahogole mwana,
Na yawankemele lihina lyake Emmanueli;
lili kokokoseka, Mulungu pamonga nu tenga. 24Leka Yosefu akayimwiki pa lugono lwake, na akakiti umu malaika wa Bambo akantaukili, nakitolili mhanu mundu; 25na akammanyiti lepa mpaka apa akamhogwili mwana ngosi: leka akankemili lihina lyake YESU.
First published by the British and Foreign Bible Society in 1937.