मत्ती 4
4
शैतान कर द्वारा यीशु मसीह कर परीक्षा
(मरकुस 1:12-13; लूका 4:1-13)
1तब ओ समय परमेश्वर कर आत्मा हर यीशु ला जंगल मे ले गईस ताकि शैतान ले ओकर परीक्षा होए। 2ओहर चालीस दिन, अउ चालीस राएत निराहार उपवास रहिस, तब यीशु ला भूख लागिस। 3तब परखे बाला शैतान हर लिघे आए के ओकर ले कहिस, “अगर तय परमेश्वर कर बेटा हस, त कहे दे कि ये पखना हर रोटी बईन जाए।” 4यीशु हर जवाब देहिस, “लिखल आहे,
मैनसे केबल रोटी ले ही नही,
लेकिन हर एक बचन ले जेहर परमेश्वर कर मुह ले हिकलथे, जीवित रही।”
5तब शैतान हर यीशु ला मन्दिर मे ले गईस, अउ मन्दिर कर कंगूरा पर ठड़वईस, 6अउ ओकर ले कहिस, “अगर तय परमेश्वर कर बेटा हस, त अपन आप ला खाल्हे गिराए दे; काबर कि लिखल आहे, ‘ओहर तोर बिषय मे अपन स्वर्गदूत मन ला हुकूम देही, अउ ओहर तोला हाथो-हाथ उठाए लेही; कहो एसन झिन होए कि तोर गोड़ मे पखना ले चोट लगही।’” 7यीशु हर ओकर ले कहिस, “ये भी लिखल आहे, ‘तय प्रभु अपन परमेश्वर कर परीक्षा झिन कर।’”
8फिर शैतान हर ओला एक ढेरेच ऊचा पहार मे ले गईस अउ सबेच जगत कर राएज अउ ओकर बैभव ला दिखाए के 9ओकर ले कहिस, “अगर तय गिर के मोला जोहारबे, त मैहर ये सबेच ला तोला दे देहू।” 10तब यीशु हर ओकर ले कहिस, “हे शैतान दुरिहा होए जा, काबर कि लिखल आहे, ‘तय प्रभु अपन परमेश्वर ला जोहार, अउ केबल ओकरेच उपासना कर।’”
11तब शैतान हर यीशु कर लिघे ले चईल गिस, अउ देखा, स्वर्गदूत मन हर आए के यीशु कर सेवा करे लागिस।
यीशु के उपदेश कर शुरूवात
(मरकुस 1:14-15; लूका 4:14-15)
12जब यीशु हर एला सुनिस कि यूहन्ना पकड़वाल गईस है, त यीशु हर गलील कती चईल देहिस। 13अउ यीशु हर नासरत नगर ला छोएड़ के कफरनहूम नगर मे जेहर झील कर किनारे जबूलून अउ नप्ताली कर देश मे है, जाए के रहे लागिस; 14ताकि जे बचन ला यशायाह अगमजानी कर द्वारा कहल गए रहिस, ओहर पूरा होए,
15“जबूलून अउ नप्ताली कर देश,
झील कर किनारे ले यरदन नदी कर ओ पार, दूसर जाएत कर गलील परदेस
16जे लोग मन अन्धार मे बैइठे रहिन, ओमन मन बड़खा ज्योति देखिन; अउ जेमन मरे कर देश मे अउ छाए मे बैइठे रहिन, ओमन पर ज्योति चमकिस।”
17ओ समय ले यीशु हर प्रचार करे बर अउ ये कहे बर शुरू करिस, “मन फिरावा काबर कि स्वर्ग कर राएज हर लिघे अईस है।”
शुरू कर एक चेला ला बुलई
(मरकुस 1:16-20; लूका 5:1-11)
18ओहर गलील परदेस के झील कर कगरे फिरत यीशु हर दुई भाई मन ला मने कि शमौन ला जेहर पतरस कहलात रहिस, अउ ओकर भाई अन्द्रियास ला झील मे जाल फेकत देखिस; काबर कि ओमन मन हर मछुवारा रहिन। 19यीशु हर ओमन ले कहिस, “मोर पाछू मे चईल आवा, त मैहर तुमन ला मैनसे मन ला धरे बाला बनाहु।” 20ओमन तुरतेच जाल मन ला छोएड़ के यीशु कर पाछू होए लेहिन।
21अउ हुवा ले आगू बईड़ के, यीशु हर अउ दूई भाई मन ला मने कि जब्दी कर बेटा याकूब अउ ओकर भाई यूहन्ना ला देखिस। ओमन मन अपन दाऊ जब्दी कर संग डोंगा मे अपन जाल मन ला सूधारत रहिन। ओहर ओमन ला भी बुलईस। 22ओमन मन तुरतेच डोंगा अउ अपन दाऊ ला छोएड़ के ओकर पाछू होए लेहिन।
गलील मे रोगीहा मन ला चंगा करई
(लूका 6:17-19)
23यीशु सबेच गलील परदेस मे फिरत अउ ओमन कर अराधनालय मे उपदेश करत अउ राएज कर सुसमाचार प्रचार करत अउ लोग मन के सबेच नियर कर बिमारी अउ कमजोरी मन ला दुरिहा करत रहिस। 24अउ सबेच सीरिया देश मे यीशु कर चर्चा बगेर गिस, अउ लोग मन सबेच बिमारी मन ला जेमन कई मंधे कर बिमार अउ दुख मे रहिन, अउ जेमे प्रेत आत्मा रहिस, अउ मिर्गी मन अउ लकवा कर रोगी मन ला ओकर लिघे लानिन, अउ ओहर ओमन मन ला चंगा करिस। 25अउ गलील परदेस, दिकापुलिस, यरूशलेम शहर, यहूदिया परदेस अउ यरदन नदी कर पार ले भीड़ कर भीड़ यीशु कर पाछू होए लेहिन।
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.