Genèse 4
4
Cain a Abel
1A Adam a ngeda Eve a va a ngwoz, a Eve a ngu a hwaɗ, a myu Cain. A ngaɗa. Ndo nzi pèc pècèk a ntakahayè, i ngots kra ara ndo. 2Te deɓaʼa a myu Abel, kramam na. Abel, ndo nwèr skwai, Cain ndo mpizhè. 3Te deɓ kètè, Cain a mva na skwi a Ndo nzi pèc pècèk te nyi skwi gi dau na. 4Abel ba a mva na te va tsuvom rèwè skwi na, a mbezaʼa. Abel, a skwi man nengaʼa a mva na Ndo nzi pèc pècèk, ambaha. 5Aman Cain, a skwi man nengaʼa a mva na, ambaha ɓai. A ndza na a ndav Cain worworaʼa, a mburzh dai. 6A Ndo nzi pèc pècèk a ngaɗa na Cain: Ka gi ndav èhèmè, ka mberzha di èhèmè? 7Aranta: Man ka gi skwi nzuraʼa, di ngaya a ciɗ na. Aman ka gi skwi nzura azɓai, malai a pa ka va a ntamagai, a woya man a ngs ka; aman ka, sèi ka fenaʼa.
8A Cain a ngaɗa na Abel, kramam na: Ngo-do dak! Man ta zhè te dak ma, a Cain a nslambaɗa na va a Abel, a nkeɗaʼa. 9A Ndo nzi pèc pècèk a ngaɗa na Cain: Abel, kramam ngaya, tema? A Cain a ngaɗa na: I sun bai. I ndo mɓer kramam ga ɗè? 10A Ndo nzi pèc pècèk a ngaɗa: Ka ga mè? Tsenaʼa! Pombaz kramam ngaya a kuɗi a sam ga te dak. 11Anai, ka phomdaʼa; ta dzam ka auda dra a sam dak man Pombaz kramam ngaya a she a pa. 12Ka da pizhè gi dau, skwi a gi a pa azbai; ka da fi verzi a hi a sam nstaɗ azɓai; ka da hi a sam ngiɗè a sam ngiɗè a géɗ herkeda. 13A Cain a ngaɗa na Ndo nzi pèc pècèk: Skwi ambaɓiaʼa man a kalay a gèɗ haha, a fena wuɗi ga. 14Na haha a patsna ka dzamkay auda te gi dau, aman i nghaʼa a sam di ngaya. I da fi verzi a hi a sam staɗ azɓai, aman i da hi a sam ngiɗè a sam ngiɗè a géɗ herkeda. Gar haha ko wawa man nga zli gèɗ a vna, a da keɗyè. 15A Ndo nzi pèc pècèk a ngaɗa na: Az arsa Bai! Ndo nkeda Cain, a pil gèd, a gi sak tsaraɗ. A Ndo nzi pèc pècèk a nʼnga na skwi a va Cain, aman ko wawa man ta zli gèɗ a vna, ta kéɗèʼa azɓai. 16A Cain a ndo na auda a sam Ndo nzi pèc pècèk, a nʼnza tʼherkeda Nod, a tsagi Eden.
Verzi Cain
17A Cain a mʼmana a ngwoz na, a ngwoz na a ngu a hwaɗ, a myu Hénoc. A Cain a nʼnde na a ndo ncèkè kokwar mbiaʼa. A mbaha na kokwar sa Hénoc, ara nzlembaɗ kra na. 18Hénoc, bab Irad. Irad, bab Mehujael. Mehujael, bab Metushael. Metushael, bab Lémec. 19Lémec a nhul ngwozi cèw. Staɗ, nzlembaɗ na Ada, ngiɗè nzlembaɗ na Tsilla. 20Ada a myu Jabal. Nengaʼa bab ndohi man ta nzi te ndev hèshèkèɗ, a sam skwi ta. 21Nzlembaɗ kramam nengaʼa Jubal. Nengaʼa bab ndohi man ta tsi ganzavar, a ta vèɗè shing lèk. 22Tsilla, nengaʼa a myu Tubal-Cain. Nengaʼa bab ndohi man ta viɗ züdo a verzhègenè. Demam Tubal-Cain, Naama. 23Lémec a ngaɗa ta ngwozi na: Ada a Tsilla, va-tsena daʼai ga! Ngwozi Lémec, va-fu zlembaɗ a ma ga! A géɗ mblè ga, i keɗa ndo. A géɗ man ta ndahyè murmuraʼa, i keɗa gol ndo. 24A ta pil gèd Cain a gi sak tsaraɗ. A Lémec ta da pilèʼa a gi sak 77.
Seth
25Adam a mʼmana a ngwoz na zaʼa, a myu kra nguraʼa, a mbaha na Seth: Bi Zhiklè a mvay kra ngiɗè te di man a Abel, man Cain a keɗaʼa, ar na. 26A Seth ba a nʼngots kra nguraʼa, a mbaha na Enosh. A pats nasa ta hüno ntsi ri a nzlembaɗ Ndo nzi pèc pècèk.
Alliance Biblique du Cameroun 1989