YOHANES 3
3
Nikodemus
1 #
Yoh 7:50; 19:39 Té' ji la'ung kelunan Farisi, aran na' Nikodemus, aleng kelunan aya' daha' Yahudi. 2#Mat 22:16 Iha' tei pala Yesus malem, pelalau kuma' men Iha', “U Rabbi, kamé' jam Ika' ji la'ung guru aleng nei hu'en Allah, avin nusi' deng ji la'ung na lim tada' awi aleng Im na anih, awi Allah em té' dahin na'. 3#Mat 8:13; Lk 17:21; 1 Pet 1:23 Yesus pah nyu'ei, dahin kuma' men iha', “Dahuk lan men ika', iha' té' ji la'ung aleng em kanak nekulah, nusi' ha' deng nyineng keligem Allah. 4Lun ken Nikodemus men Iha', “Seng nuno' tuk kelunan aleng uh dekaya' en daha' nganak nekulah, du? Seng deng ha' tei alem butit hinan na' kedua' hangun, en na' nganak iha' nekulah iah?” 5#Yehez 36:25-27; Ef 5:26; Tit 3:5 Pelalau Yesus nyu'ei, “Dahuk lan men ika', iha té' ji la'ung em té kanak men ata', men Belua' lahuh, nusi' ha' deng tei halem keligem Allah. 6#Ar Kel 5:3; NDI 51:5; Yoh 1:13 Ket aleng anak batung, atih nah batung, dahin ket aleng anak Belua', atih nah Belua' lahuh. 7Meng im melak avin Akui kuma' nunih men ika', Nusi' deng ikam em kanak nekulah. 8#Pek Ur 11:5; Mk 4:41 Dih nei men ino'-ino' pah, ik'a kelenghi dahun tengut na' tua, bi nusi' ka' jam men ino' ha' ateng dahin nusi' loh kah ika' jam tei na'. Nunan kah tuk lim kelunan aleng anak Belua' atih.”
9Lun nyu'ei nah Nikodemus, dahin kuma' men Iha', “Nuno' tuk Dahum anih seng teneng lo?” 10Lun ken Yesus pah men iha', “Ika' aleng guru daha' Israel ké', beka' nusi' ka' jam alem daho' anih? 11#Yoh 7:16; 8:26,28; 12:49 Dahuk lan men ika', Kalo' bara ket aleng uh kitan Alo', Kalo' pah nira ket aleng uh en Alo' nyineng, beka' nusi' kam ala dahun Alo. 12#Lk 22:67 Iha' Akui bara men ikam marung ket ha' usun tana anih, beka' nusi pah ikam nginah, seng nuno' kam nginah iha' Akui bara marung ket aleng ha' Surga lo?
13 #
Ivun 30:4; Ef 4:9 “Ji la'ung pah em payan ma'un ha' Surga, ji Iha' dep kah aleng uh nei ngiléh men Surga, Iha' nah Anak-kelunan aleng té' halem Surga. 14#Kah d Is 21:8-9 Awi Musa meju nyipa' ha' tana henung dih, nunan pah Anak-kelunan adang en ju lahuh, 15ja hi-hi aleng nginah té' Iha' daha' seng ala urip aleng pa'en halem Na'.”
16 #
Rom 5:8; 8:32; 1 Yoh 4:9 Avin Allah kelalau nyalam kelunan té' usun tana anih, iha' nah Iha' ma'uk Anak ji Na' atih, ja hi-hi aleng nginah té' Iha', nusi' daha' tasa', bi daha' ala urip pa'en aleng sayu. 17#Lk 19:10; Yoh 5:22; 12:47; HST 17:31 Avin Allah nyihu Anak Na' nei té' usun tana anih nusi' Ha' nei atih seng mukum usun tana, bi Iha' nei ja kelunan té' usun tana anih murip kenan Na'.
18 #
Yoh 3:36; 5:24 Hi-hi aleng nginah té' Iha', nusi' daha' ga' ukum, bi kelunan aleng em nginah, kerei inih pah daha' uh ga' ukum, avin daha' em nginah té' aran Anak Allah aleng ji atih. 19#Yoh 1:5,9-11; 12:48 Avin anih nah tavit daha' ga' ukum, avin alah uh nei ateng té usun tana anih, bi kelunan kaséh lidem atih men'uh aleng malah, avin hadui daha' ji'ek. 20#Ef 5:13 Avin ha'ut la'ung aleng na hadui ji'ek, perah nah kenep na' té' alah atih, nusi' pah iha' nei pala alah atih, bahi hadui na' tula. 21Bi kelunan aleng na aleng teneng, iha' pah nei pala alah atih, ja tula nah hadui atih en na' na halem Allah.
Daho' aleng baya loh en Yohanes aleng Meduh nira marung Yesus
22 #
Yoh 4:1-2
Men'uh tuk-tuk atih, tei nah Yesus dahin dalo' anak sekulah Na' ha' tana Yudea, melo' nah Iha' dahin dalo' tinan, meduh kelunan. 23#Mat 4:12 Yohanes pah té' meduh kelunan lahuh ha' Ainon jeleng Salim, avin ngahum ata' hinan. Nei nah kelunan pelalau en na' duh nah daha', 24#Mat 14:3 avin nusi' payan daha' metei Yohanes halem jin tegu anan.
25Tegu anan balei anak sekulah Yohanes pehating dahin ji laké' Yahudi marung mayau. 26#Yoh 1:26-34 Pelalau nei nah dalo' pala Yohanes dahin kuma' men iha', “U Rabbi, té' laké' aleng peji dahim ha' dipah Yordan dih, aleng im bara dau aréh dih, té' Iha meduh kelunan, lim-lim kelunan pah tei pala Iha'.” 27#Ib 5:4 Lun ken Yohanes nyu'ei, “Ji la'ung pah em deng ala nun-nun bi ket aleng en Allah uk men iha' men Surga tua. 28#Mat 11:10; Mk 1:2; Yoh 1:20,23,27 Ikam kah aleng uh jam dahuk dau arei dih keta'. Nusi' kui Kristus, kek dih, té' pah akui anih nei una' ha' unan Na' tua hu'en Tuhan. 29#Mat 9:15; 22:2 Laké' aleng seng ngehawa', iha' aleng hipun doh na', bi bakéh na' aleng nekring kelenghi dahun na', melu lelan ha' kelenghi dahun laké' anan. Iha' nah akui atek melu lelan kerei inih. 30#2 Sam 3:1 Adang Iha' seng tei-tei bau, bi akui seng tei liva.”
Yesus aleng nei men ujung
31 #
Yoh 8:23
Iha' aleng nei men ujung, adang Iha' pah aleng hujung lim-lim. Hi-hi aleng nei nyemau men usun tana adang iha' men usun tana, tira na' pah marung usun tana. Iha' aleng nei men Surga, Iha' nah aleng hujung lim-lim. 32#Yoh 3:11 Ket aleng uh en Na' nyineng dahin ket aleng uh en Na' kelenghi, marung atih nah en Na' bara, bi nusi' té' kelunan aleng ala dahun Na'. 33Hi-hi aleng uh ala dahun Na', daha' atih uh na tada' aleng bara adang Allah teneng. 34#Yoh 1:33-34 Avin Iha' aleng nei hu'en Allah bara dahun Allah, avin Allah ma'ih Beluan Na' men Iha' dahin em petbeng na'. 35#Mat 11:27; Lk 10:22; Yoh 5:20; 17:2 Taman Na' pah halam té' Anak atih. Lim-lim ket nun-nun pah en Na' ih halem usu Na'. 36#Lk 3:7; Yoh 3:18; 1 Yoh 5:12 Hi-hi aleng nginah té' Anak atih, iha' aleng hipun urip pa'en aleng sayu, bi kelunan aleng muau Anak atih, nusi' ha' seng jam urip, bi unget Allah pa'en té' té iha'.
Bible in Today's Dahun Kayan Version © Bible Society of Malaysia, 1990.