HINI UWASI-BIADRCIMOWA ya-sfadoci MAFIYO 8
8
1Chena ina ia huci biaci brlvcsigi ini maqvhgigi, maci mahsalagiki u nakvlrwrli. 2Chena wrpvmahku, ntvsi u bialudrgoli wasgilhvga-magilici macimi usvsilvwa-hagoli, Dabalamiwatv, qahqi si tahaivna, gah kvtvwi fvfvyrghi gelv, iwvli. 3Chena mrsi jegingalwv u laci, macimi u tah pahsanrli, Hene yasi tahaiv; fvfvyrghofulu, iwv. Macimi walanv ini u sgilhvga-magewa fvfvyrgidodali. 4Macimi, Wrpvtvnu tagi wetvmvwi ilani; wakv nhrla, wrpvtasi geiv inv mkvtaukulvia, macimi pvgfanvnu ini meliwawa da-pigamuci Mosise, wvhsi uci dabwawaniwrci nihki, u talrli Jesise.
5Chena ina ia huttvgi Gabrnivme, ntvsi u bialudrgoli kvpdenvli, u nvnvbrci-magoli, 6Dabalamiwatv, nit vlolrkv saxinwv ini wegiwrpagi vhqiluga ini nanagifewa, mvmyanrni vhqinvmwv, u tagoli. 7Macimi, Nah bir chena nah gegahv, u talrli. 8Chena inv kvpdenv rpvfsa macimi, Dabalamiwatv, mvtv ni dabelafi wvhsi gelv becfrivni sebrci nit vpvhqawa : wakv ini kvlvwewa pa’ hiulu, macimi nit vlolrkv wah gegahofu. 9Xvga nahfrpi nelv wewvsi ilani simakufewa, ni bonrki svmrkvnvki : chena Nhrla, ni talv yrmv nakuti, macimi inv nhawv; chena kutvkv, Birlu, macimi inv biawv; chena nit vlolrkv, Yomv silvwelu, macimi inv ini silvwi, isiwa. 10Chena Jesise iah notvgi ini, mvivci-taha, macimi, Tapilo gi talapwv nelv, mvtv ni ma’ mkv yone si mahsrgi dapwahsawa, mvtv, mvtv Irqv Ir Iswelv, u talvhi nihi na-nakvlakuci. 11Chena gi talapwv nelv, maci ini wa-tvhkufvgi wa huci biaki macimi ini yapvgsimugi, chena wah wetvbe-mrwrli Aplahameli, chena Visigeli, chena Jakvbeli, betiga ini wafapvh-kvmigigi ugimrwi-drmqa : 12wakv nihki ini ugimrwi-drmqa uci uqihfimrki wah si luhfa-pvgilofoki ini frgici ba-pagijrgi : ntvsi wa vhdawi ini wihfvqawa, macimi ini ya-tvlwagi wepitvli. 13Macimi, Nhrla ya-hrivni; yasi mahci dapwahsaivni, yone ini ipanvlofulu, u talrli nili kvpdenvli Jesise. Macimi inv vlolrkv gegahofu ini yrtafvgi.
14Chena ina ya-drlici Betvli wegiwv betiga ya-birci Jesise, u nawrli Betv wewvli u gali bami saxinalici vhqilugali wapigisi-fowa. 15Macimi u tah pahsi-lajanrli, macimi inv u nvkvlaku ini wapigisifowa; chena unskv, macimi u mesrmvwrli nili. 16Chena ina walrqefigi ya-biayrgi, nihki u biatvwrwrli maci la-kusgrkucki wvninahfihi : macimi inv kvlvwewa uci luhfa-pvgilvhi nihi ilafewanhi, macimi u gegahvhi jrivhki ya-vhqilugalici : 17wvhsi manvwv’ hini uqrufagi ga-kvlvwigi srpwi Visviv inv mrmosiges-qatv, Welv u mvmanv ki kvtunawananv, macimi wewvsi ki tasi lugawananv, iupi.
18Huwa ina Jesise iah nawrci maci mahsalalici gryrukv welv, meliwa tapigamowa wvhsi ini vsuwa grmagi hrgi. 19Chena ntvsi biawv yr-ivwigatv, macimi, Ga-gahgimiwa, gah nakvlala goqa-lrqv-grci yahrivni, u tagoli. 20Macimi Jesise, Nihki wrkucahfeki u bonrnrwv wrsrlvku, chena nihki ini manqvtwi uci wisgiluhfvki u bonrnrwv ufihfvnv; wakv inv u Qihfvli ilani mvtv u bonv wvhtvh sagfadoci wesi, u talrli. 21Chena kutvkv nuhgi nihki uci kvgahgimrfvki Dabalamiwatv, welrni la-lamilu wvhsi nhihtv nhriv macimi lakunvgi n’ uhfv, u talrli. 22Pvyaqv Jesise, Nakvsilu; macimi nvkvsi nihki napagiki wvhsi lakunrwrci nahvlwrkv u nabowanwrli, u talrli nili.
23Chena ina ulvga-lagi ia Ikvgi, kvgahgimrfhi u nakvola-kuhi. 24Macimi wrpvtvmuku, ntvsi pvfaqeiv msrwi mahsigikvgi ini msinapigi, waciganv’ hini ulvgasi patvkhoiv nili ba-bokvki : pvyaqv inv nabawv. 25Chena nihki u bialutvwr-wrli, macimi ut vmvcihrwrli nili, Wrpvnashiwalu, Dabalamiwatv; nit iqelafipa, iwvki. 26Macimi, Gociwa ki wesrlabwrpwv, Oh cvgi clapwah-safvki gelvwy? u talvhi. Hina uwa unskv, macimi u gilhvmrtv ini mahsigikvgi chena ini msi-napi; macimi ntvsi msi-grmah-kvwvnwi. 27Macimi nihki ilaneki mvivci-tahaki, Nahiwa si ilani yrmv, yasi weginrqi nili mahsigikvki macimi ini msi-napi pafadrkuci? iwvki.
28Chena ina ini vsuwa grmagi iah si birci bec-drmqa ini ut vsisgemwv nihki Gatalenvki, u nvxgrkuhi ntvsi neswi la-kusgrkucki wvninahfihi, nili nabowrlvku uci biaci luhfahi, vnhiwawi wivkuwahi, waciganvhi mvtv ini wvyaci si kvtvwi pamfa ilani. 29Macimi wrpvmahku, wivkvhotvmoki nihki, Nahiwa ni bonrpa wv ipanvlalrga, gelv u Qihfvli Mvnatu? hv utvhfv gitv wvhsi mvmyanrnhi-yrga wihsibur ini bialrqrmgi? iwvki. 30Huwa ntvsi paluwihi nihi uci vpiwv maci nakudwalakv kusku bami wihfanici. 31Chena u gcihkvwrwrli nili nihki wvninahfeki, Qahqi gelv luhfa-pvgisi-yrga, inv na-kudwalakv kusku laskvwi-nrga, iwvki. 32Macimi inv, Nhrkuna, u talvhi nihi. Macimi nihki biaci luhfaki, chena nihi kuskuhi si becfaki : macimi wrpvmahku, inv malsga na-kudwala-kv kusku ini sah-brmahgigi si brlvciptu laku-whvsga ini msi-napigi, macimi iqinvmwv ini napigi. 33Chena nihki ya-svmrcki nihi usimoki, macimi wapfaki ini udawa-nagi haki, macimi rcimoki jrgi wiahi, chena ini ya-sinvmalici nihi la-kusgrkulici wvninahfihi. 34Ma-cimi wrpvmahku, jrivhgi inv udawa biaci luhfa u nvxgrgoli Jesise : macimi ina nihki iah nawrwrci nili, u gcihkvwrwrli wvhsi ya-iqihsinuwrci uci srwalici.
Published for Thomas Wildcat Alford in 1929