Iranian Azeri Bible

بو آرادا مئنلرجه آدام بئر یره اله ییغیلمیشدی کی، بئربئرئنی سیخیشدیریردیلار. عئسا اوّلجه اؤز شاگئردلرئنه ددی: «فرئسئلرئن مایاسیندان کی، رئیاکارلیقدیر، اؤزونوزو اوزاق ساخلایین. اله اؤرتولو بئر شی یوخدور کی، آچیغا چیخماسین و اله گئزلی بئر شی ده یوخدور کی، بئلئنمه‌سئن. بونا گؤره، قارانلیقدا نه دانیشاسینیز، ائشیقدا اشئدئله‌جک و ائچه‌ری اوتاقلاردا قولاغا پیچیلدادیغینیز هر شی، داملاردان نئدا اولوناجاق. سئزه دیئرم دوستلاریم، اونلاردان قورخمایین کی، بدنی اؤلدوروب اوندان باشقا هچ بئر شی اتمه‌یه قادئر دیئللر. آمّا کئمدن قورخمالی اولدوغونوزو سئزه گؤرسده‌جه‌یم. اوندان قورخون کی، اؤلدوره‌ندن سونرا جهنّمه آتماغا قادئردئر. بلی، سئزه دیئرم کی، اوندان قورخون. مگر بش سرچه ائکی قارا پولا ساتیلمیر؟ و تارینین یانیندا اونلاردان هچ بئرئسی یاددان چیخماییب. سئزئن باشینیزداکی توکلرئن هامیسی دا بله ساییلیب. اودور کی، قورخمایین؛ سئز بئر چوخ سرچه‌دن افضلسئنئز. سئزه دیئرم: کئم منی ائنسانلارین حوضوروندا ائقرار اتسه، ائنسان اوغلو دا اونو تارینین ملکلری حوضوروندا ائقرار اده‌جک. لاکئن کئم منی ائنسان حوضوروندا ائنکار اتسه، تارینین ملکلری حوضوروندا ائنکار اولوناجاقدیر. و کئم ائنسان اوغلونون ضئدّئنه بئر سؤز دسه، اونا باغیشلاناجاق؛ لاکئن کئم موقدّس روحا کوفر دسه، اونا باغیشلانمایاجاقدیر. او زامان کی، سئزی کنئسه‌لره، ریئسلر و حاکئملرئن حوضورونا گتئرئرلر، نجه و نه جاواب وره‌جیئنئز و یا نه دئیه‌جیئنئز باره‌ده نئگاران اولمایین. چونکی نه دمک لازیم اولدوغونو موقدّس روح او آندا سئزه اؤیرده‌جکدئر.»

خالقین ائچئندن بئری اونا ددی: «اوستاد! قارداشیما ده کی، مئراثی منئمله بؤلسون.» عئسا اونا ددی: «آی آدام، کئم منی سئزه حَکَم و یا مئراث بؤلَن تعیئن اتدی؟!» سونرا اونلارا ددی: «دئقّتلی اولون! هر جور طاماحکارلیقدان اؤزونوزو اوزاق ساخلایین، چونکی ائنسانین حیاتی، اونون وار-دؤولتئنئن چوخلوغونا باغلی دیئل.»
و اونلارا بئر مثل ده چکئب ددی: «وارلی بئر آدامین زمئسی بول محصول وردی. او، اؤز ائچئنده دوشوندو: ”نه اِدئم؟ محصولومو اوندا ییغماغا یرئم یوخدور.“ و ددی: ”بله اِده‌رم؛ آنبارلاریمی سؤکوب، داها بؤیوکلرئنی تئکه‌رم و بوتون محصولومو و بوتون دؤولتئمی اورایا ییغارام. و جانیما دئیه‌رم: ای جانیم! اوزون ائللر اوچون ییغیلمیش چوخلو دؤولتئن وار. راحات اول. یه، ائچ، کف اله!“
آمّا تاری اونا ددی: ”عاغیلسیز آدام! سنئن جانینی اله بو آخشام آلاجاقلار؛ حاضیرلادیغین بو شیلر بس کئمه قالاجاق؟!“
بله‌دئر هر آدامین عاقئبتی کی، تارینین حوضوروندا وارلی اولماق عوضئنه، اؤزو اوچون مال-دؤولت ییغیر.»


سونرا عئسا شاگئردلرئنه ددی: «بونون اوچون سئزه دیئرم؛ جانینیز اوچون نئگاران اولمایین کی، نه یئیه‌جکسئنئز. و بدنئنئز اوچون ده فئکئرلی اولمایین کی، نه گِیه‌جکسئنئز. جان یمکدن و بدن پالتاردان داها آرتیقدیر. قارغالارا باخین: نه اَکئرلر، نه بئچئرلر، نه آنبارلاری، نه ده مخزنلری وار و تاری اونلاری یدئزدئرئر. سئز قوشلاردان نه‌قدر چوخ افضلسئنئز! سئزلردن کئم وار کی، نئگاران اولماقلا بئر ساعات عؤمرونه آرتیرا بئلسئن؟! بله‌جه، اگر لاپ کئچئک بئر شیی اِده بئلمئرسئنئز، نه اوچون قالان شیلرئن فئکرئنه قالیرسینیز؟!
زانباقلارین نجه بؤیودوکلرئنه باخین؛ نه زَحمت چکئرلر، نه ده ائپلئک اَیئرئرلر. لاکئن سئزه دیئرم کی، سولیمان دا بله، بوتون شؤوکتئنده بونلاردان بئری کئمی گیئنمه‌مئشدی. اگر تاری بو گون زمئده مؤوجود اولوب صاباح اوجاغا آتیلان اوتو بله گیئندئرئر، نه قدر آرتیق سئزی، ای آز ائمانلی‌لار! بله‌جه، سئز نه یئیه‌جه‌یئنئزئن و نه ائچه‌جه‌یئنئزئن قیدئنه قالمایین؛ اونلار اوچون نئگاران اولمایین. چونکی دونیانین خالقلاری بو شیلرئن دالینجا قاچیرلار؛ و سئزئن آتانیز بو شیلره مؤحتاج اولدوغونوزو بئلئر. آنجاق سئز تارینین پادشاهلیغی قیدئنه قالین و بونلارین هامیسی سئزه علاوه ورئله‌جک.
قورخما ای کئچئک سورو! چونکی آتانیزین ریضاسی بودور کی، پادشاهلیغی سئزه ورسئن. نه‌یئنئز وارسا، ساتین و صدقه ورئن. اؤزونوز اوچون گؤیلرده کؤهنَلمه‌ین کئسه‌لر و اَسکئلمه‌ین خزئنه‌لر حاضیرلایین. اورادا نه اوغرو اونا یاخینلاشار، نه ده گووه اونو یئیر. چونکی خزئنه‌نئز هارادا اولسا، اوره‌یئنئز ده اورادا اولاجاق.


بِلئنئز باغلانمیش و چیراقلارینیز یانار اولسون. او آداملار کئمی اولون کی، آغالارینین تویدان قاییتماسینی گؤزله‌یئردئلر. اوندان اؤتری کی، گلئب قاپینی دؤیسه، اله او آندا اونا آچسینلار. بختور او قول‌لار کی، آغا گلنده اونلاری اویاق تاپیر. دوغروسونو سئزه دیئرم؛ او، بِلئنی باغلاییب اونلاری اوتورداجاق و یانلارینا گلئب اونلارا خئدمت اده‌جک. و اگر ائکئنجی نؤوبتده، و یا اوچونجو نؤوبتده گلئب اونلاری بله تاپسا، خوش او قول‌لارین حالینا! آمّا بونو بئلئن کی، اگر اِو صاحئبی اوغرونون هانسی ساعاتدا گله‌جه‌یئنی بئلسه‌یدی، اِوئنی اوغورلاماغا قویمازدی. اونون اوچون سئز ده حاضیر اولون، چونکی ائنسان اوغلو سئزئن گومان آپارمادیغینیز ساعاتدا گله‌جک.»
پطروس اونا ددی: «یارب! بو مثلی فقط بئزه دیئرسن، یوخسا هامییا؟»
رب جاواب وردی: «کئمدئر او صادئق و عاغیلّی نؤکرباشی کی، آغاسی اونو نؤکرلری اوستونه ائختئیار صاحئبی قویور. اوندان اؤتری کی، اونلارا واختلی-واختیندا یمک پایلارینی ورسئن. بختور او قول کی، آغاسی، گلدئیی زامان، اونو بو جور ائش گؤرمکده تاپسین. دوغروسونو سئزه دیئرم؛ آغاسی بوتون وار-یوخونو اونا تاپشیراجاق. لاکئن اگر همئن قول اوره‌یئنده دسه: ”آغام گج گله‌جک.“ و باشلاییب کئشی و آرواد خئدمتچئلری دؤیسه، ییئب، ائچئب، کفلنسه، قولون آغاسی، اونون گؤزلمه‌دئیی بئر گونده و بئلمه‌دئیی بئر ساعاتدا گله‌جک، اونو ائکی شقّه ادئب ائمانسیزلارلا بئر توتاجاق.
او قول کی، آغاسینین ائسته‌یئنی بئله-بئله حاضیر اولمایا و اونون ائراده‌سئنه عمل اتمه‌یه، چوخ دؤیوله‌جک. لاکئن اگر بئلمه‌یئب، کؤته‌یه لایئق اولان ائشلر گؤرسه، آز دؤیوله‌جک. کئمه چوخ ورئلئب، اوندان چوخ طلب اولوناجاق و کئمه چوخ امانت اِدئلئب، اوندان داها چوخ ائسته‌نئله‌جک.
من دونیایا اود یاغدیرماغا گلمئشم: و نجه ائستردئم کی، او، آرتیق آلیشیب یانایدی! لاکئن منئم آلاجاغیم بئر تعمئد وار و بو تعمئد یرئنه یتئشنه کئمی نه قدر سیخینتی چکئرم! گومان ادئرسئنئز کی، من دونیایا صولح گتئرمه‌یه گلمئشم؟! یوخ، دیئرم سئزه، عکسئنه آیریلیق گتئرمه‌یه گلمئشم. چونکی بوندان سونرا، بئر اِوده یاشایان بش نفردن، اوچو ائکئسئنه و ائکئسی اوچونه ضئدّ اولاجاق. آتا اوغلونا و اوغول آتاسینا، آنا قیزینا و قیز آناسینا، قاینانا گلئنه، و گلئن قاینانایا ضئدّ اولاجاق.»
و جاماعاتا ددی: «قربدن بئر بولودون قالخدیغینی گؤرنده او آندا دیئرسئنئز؛ ”یاغیش یاغاجاق!“ و اِله ده اولور. و جنوب کوله‌یی اَسَنده، دیئرسئنئز کی، ”یامان ائستی اولاجاق!“ و اِله ده اولور. ای رئیاکارلار! یر اوزونون، گؤی اوزونون گؤرونوشونو سچه بئلئرسئنئز، آمّا نجه اولور کی، ائندئکی زامانی سچه بئلمئرسئنئز؟! نه اوچون اؤز-اؤزونوزدن دوغرو اولانی آییرد اتمئرسئنئز؟!
شئکایت ادن آداملا حاکئمئن یانینا گدن واخت، حله یولدا ائکن چالیش کی، اوندان یاخانی قورتاراسان. یوخسا سنی حاکئمئن یانینا سوره‌جک. حاکئم ده محکمه ائجراچیسینین اَلئنه وره‌جک، و او دا سنی زئندانا آتاجاق. سنه دیئرم کی، آخیر قارا پولونو دا ورمه‌یئنجه اورادان چیخمایاجاقسان!»

Lalela لوقا 12