If you have would like a copy of this version please contact info@davaraudiobibles.org

Chol Old Testament

Biblia de Estudio en Ch´ol de Tumbalá, Chiapas, México © Sociedad Bíblica de México A.C. Active Translation in Process 

Che' ti' cajibal, Dios tsi' mele panchan yic'ot pañimil. Jiñi pañimil mach chajpʌbilic, ma'añic i c'ʌjñibal, ic'yoch'an jax ti' pam jiñi tam bʌ mar. Jiñi yEspíritu Dios tsa' ñumi i ñijcan jiñi ja' che' bajche' ic'.
Dios tsi' yʌlʌ: “La' tsictiyic i sʌclel pañimil.” Tsa' tsictiyi i sʌclel pañimil. Dios tsi' q'uele uts'at i sʌclel pañimil. Dios tsi' t'oxo i sʌclel ti yi'ic'lel pañimil. Dios tsi' yotsʌbe i c'aba' i sʌclel jiñʌch “q'uiñil.” Tsi' yotsʌbe i c'aba' i yi'ic'lel pañimil jiñʌch “ac'ʌlel.” Tsa' ic'a, tsa' sʌc'a, jiñʌch jiñi ñaxan bʌ q'uiñ.
Dios tsi' cha' alʌ: “La' tsictiyic panchan xinlʌpʌl bʌ ti ja'. La' ajñic tocal ti' pam yic'ot ja' ti ye'bal jiñi panchan.” Dios tsi' mele jiñi panchan. Tsi' t'oxo tac jiñi ja'. Tsa' ajñi ja' ti ye'bal jiñi panchan yic'ot ti' pam. Che'ʌch tsa' ujti. Dios tsi' yotsʌbe i c'aba' jiñi tsa' bʌ i mele jiñʌch “panchan”. Tsa' ic'a, tsa' sʌc'a, jiñʌch i cha'p'ejlel q'uiñ.
Dios tsi' yʌlʌ ja'el: “La' tempʌyic jiñi ja' am bʌ ti ye'bal panchan ti mar tac, cha'añ mi' tsictiyel i tiquiñal.” Che'ʌch tsa' ujti. Dios tsi' yotsʌbe i c'aba' i tiquiñal, jiñʌch “lum.” Tsi' yotsʌbe i c'aba' jiñi tempʌbil bʌ ja', jiñʌch “mar tac.” Dios tsi' q'uele cha'añ uts'atʌch.
Ti wi'il Dios tsi' yʌlʌ: “La' pasic ti lum yʌx bʌ pimel tac mu' bʌ i yʌc' i wut. La' colic te' ti pañimil ti' chajp ti' chajp yujil bʌ wut cha'añ pac'.” Che'ʌch tsa' ujti. Tsa' pasi ti lum yʌx bʌ pimel tac mu' bʌ i yʌc' i wut ti jujunchajp yic'ot te' ti' chajp ti' chajp yujil bʌ wut cha'añ pac'. Dios tsi' q'uele cha'añ uts'atʌch. Tsa' ic'a, tsa' sʌc'a, jiñʌch i yuxp'ejlel q'uiñ.
Dios tsi' yʌlʌ: “La' tsictiyic q'uiñ yic'ot uw yic'ot ec' tac ti panchan cha'añ mi' pʌs q'uiñil yic'ot ac'ʌlel yic'ot cha'añ mi' pʌs i yorajlel jajmel yic'ot ja'lel yic'ot q'uiñil yic'ot ja'bil tac. La' i yʌc' i c'ʌc'al ti panchan cha'añ mi' yʌc' i sʌclel ti pañimil.” Che'ʌch tsa' ujti. Dios tsi' mele q'uiñ yic'ot uw: jiñi ñuc bʌ cha'añ mi' pʌs i c'ʌc'al ti q'uiñil, jiñi ch'och'oc bʌ cha'añ mi' pʌs i c'ʌc'al ti ac'ʌlel; yic'ot ja'el tsi' mele ec' tac. Dios tsi' yʌc'ʌ ti panchan cha'añ mi' yʌc' i c'ʌc'al ti pañimil, cha'añ mi' pʌs i c'ʌc'al ti q'uiñil yic'ot ti ac'ʌlel. Che' jiñi mi' q'uexob i bʌ i sʌclel pañimil yic'ot ic'yoch'an bʌ pañimil. Dios tsi' q'uele cha'añ uts'atʌch. Tsa' ic'a, tsa' sʌc'a, jiñʌch i chʌmp'ejlel q'uiñ.
Dios tsi' yʌlʌ: “La' ajñic i chʌñil ja', yic'ot la' wejlic te'lemut tac ti pañimil, ti' ye'bal panchan.” Che'ʌch tsi' mele Dios ñuc tac bʌ i chʌñil jiñi mar yic'ot pejtelel i chʌñil ja' ti jujunchajp. Ca'bʌl tsa' p'ojli, yic'ot tsi' mele pejtelel mut tac ti' chajp ti' chajp am bʌ i wich'. Dios tsi' q'uele cha'añ uts'atʌch. Dios tsi' yʌc'ʌ i yutslel i t'añ ti' tojlelob, tsi' yʌlʌ: “La' tilic la' p'olbal, la' p'ojliquetla, la' bujt'ic ti i chʌñil jiñi ja' am bʌ ti mar tac, la' p'ojlic te'lemut tac ti pañimil.” Tsa' ic'a, tsa' sʌc'a, jiñʌch i jo'p'ejlel q'uiñ.
Dios tsi' yʌlʌ: “La' ajñic i chʌñil pañimil ti jujunchajp. La' ajñic alʌc'ʌl yic'ot lucum yic'ot bʌte'el tac ti' chajp ti' chajp.”
Che'ʌch tsa' ujti. Dios tsi' mele bʌte'el yic'ot alʌc'ʌl yic'ot pejtelel jiñi jʌlʌcña bʌ mi' majlel ti lum ti' chajp ti' chajp. Dios tsi' q'uele cha'añ uts'atʌch.
Jiñi cha'añ Dios tsi' yʌlʌ: “La' lac mel wiñic ti la quejtal, lajal bʌ bajche' joñonla; am bʌ i p'ʌtʌlel cha'añ mi' yuman jiñi chʌy tac am bʌ ti mar, jiñi mut tac mu' bʌ ti wejlel ñumel, jiñi alʌc'ʌl tac am bʌ ti pejtelel pañimil, yic'ot pejtelel jiñi jʌlʌcña bʌ mi' majlel ti lum.”

Che' jiñi Dios tsi' mele wiñic ti yejtal,
ti yejtal Dios tsi' mele wiñic;
tsi' mele wiñic yic'ot x'ixic.

Dios tsi' yʌq'ueyob i yutslel i t'añ, tsi' su'beyob: “La' tilic la' p'olbal, la' p'ojliquetla yic'ot but'ula jiñi pañimil, c'ʌñʌla; la' i yumañetla jiñi chʌy tac am bʌ ti mar yic'ot jiñi xwejlel mut tac am bʌ ti panchan yic'ot pejtelel cuxul tac bʌ mu' bʌ ti xʌmbal ti pañimil.”
Dios tsi' yʌlʌ ja'el: “Awilan, tsa' cʌq'ueyetla pejtelel pʌc'ʌbʌl yujil bʌ wut am bʌ ti pejtelel pañimil, yic'ot pejtelel te' am bʌ i wut yic'ot i bʌc'. La' cha'añʌch cha'añ i bʌl la' ñʌc'. Pero pejtelel bʌte'el yic'ot pejtelel mut mu' bʌ ti wejlel ñumel yic'ot pejtelel am bʌ i cuxtʌlel yic'ot jʌlʌcña bʌ ti lum, mi cʌq'ueñob yʌx bʌ pimel cha'añ mi' c'uxob.”
Che'ʌch tsa' ujti. Dios tsi' q'uele ti wen uts'at pejtelel tsa' bʌ i mele. Tsa' ic'a, tsa' sʌc'a, jiñʌch i wʌcp'ejlel q'uiñ.

Lalela Génesis 1