पेन्‍तिकोस चाडकामनेम थो़रलु़पामिम खोत्‍लेङा कोदेप खोम्‍सिम्‍डिम बाइडा। मेकोतिलोङा कोचोत्ति पाह्रीलामका डोक्‍पु ब्‍लोजु़ फुट्‌पा होङ्‍ङा र्‍वाक्‍पा कोङ लो़लाम थो़म्‍डी, मा मेर्मिम बाम्‍डिम नेम ङा मेरामका र्‍वाप्‍डा कुर्रु़। लेममिम होप्‍माम मुकु भुल्‍मु मेर्मिमकाडा रेम्‍बेम्‍सिम्‍डी, मा दो़सिक्‍साका मेर्मिम खोत्‍लेडला झुम्‍डी। मेकोतिमा मेर्मिम खोत्‍ले माम्‍चु़नी-पेलका लु़न्‍सिम्‍डी, मा माम्‍चु़नी-पेलका ग्‍वाम्‍डिमिम जेसी होम्‍साका मेर्मिम वाङसामामिमकु ल्‍वाडा जेम्‍डी।
मेकोतिलो सुबुडाम खोत्‍ले किब्‍दीलामका माम्‍चु़नीकु ङिम जु़ल्‍पा खोत्‍ले यहूदीमिम यरूशलेमडा रोम्‍डिम बाइडा। थो़रलु़पामिम जेम्‍डिम थो़म्‍डिमा मेसिन्‍डा छो़म सेर्पा मु़चु़मिम खोम्‍सिम्‍डी। मे थो़रलु़पामिमका सेर्पा मु़चु़मिमकु उनी ल्‍वाडा जेम्‍डिम थो़म्डिमका मेर्मिम ङाङाया दु़म्‍मिडी। मेर्मिम छो़म ङाङाया दु़म्‍तो र्‍वाम्‍डी, “हाम, ओ जेपामिम खोत्‍ले गालीलडा बाट्‌पामिम ङा मेएँ मा? मा हेसाका ओर्मिमका इकी त्‍वाकु ल्‍वाडा जेमिमिम गुइ थो़त्तोङा बिइ? गुइ आसिन्‍डा पार्थीमिम, मादीमिम, एलामीमिम, मा मेसोपोटामियाडाम, यहूदियाडाम, कापाडोकियाडाम, पोन्‍टसडाम नुङ एशियाडा बाट्‌पा बुइ। फ्रिगिया, पामफिलिया, मिश्र नुङ कुरेनीडाम लिबियाकु याङ-याङ देललाम नुङ रोमलामका रोक्‍तिम यहूदी नुङ यहूदीदु़म्‍पामिम खोत्‍लेङा बुइ। क्रेट नुङ अरबडा बाट्‌पामिम वो बुइ, मा हेसाका गुइ इकी त्‍वा-त्‍वाहोम ल्‍वाडा मेर्मिमका माम्‍चु़नीकु छो़म डोक्‍पु यु़मखारीकु दुथाम सो़मिम बुमिमिम गुइ थो़सीमिम बुइ!” जो़होमका थेसिमेथेट्‌मिवामका मेर्मिम खोत्‍ले ङाङाया दु़म्‍मिडिमा हाम र्‍वामु-र्‍वामु दु़म्‍तो त्‍वाप-त्‍वापडाङा आरे र्‍वा बेम्‍डी, “ओर्मिमका हाम डे र्‍वामिमिम?”
लावो वाङमिमका मेर्मिम छो़म डु़का सेड्‌डु़मिम बु र्‍वाक्‍तो रिम्‍साम्‍डिमी।

पत्रुस मे को-कोले (११) थु़र्मामिमनुङ येम्‍स्‍तामा डोक्‍पु लो़लामका र्‍वाक्‍ता, “यहूदिया नुङ यरूशलेमडा बाट्‌पा खोत्‍ले वा-ल्‍वाकनी, गानी ओराम ल्‍वा चनी, मा गो र्‍वाङुमिम ल्‍वा जो़होमका थो़नी। गानी मिम्‍निमिम होङ्‍ङा ओर्मिम छो़म डु़का सेड्‌डु़मिम मिबु, हेङालोने ओम्‍लो मालो नेमछेमुकु गु (९) कोङङा जेस्‍ताम बु। लावो माम्‍चु़नीलाम-जेपा योएलका आरेसाका र्‍वाक्‍ताम बु:
‘हुक्‍पाथारी बिलि आरेप्‍माम दु़म र्‍वाक्‍साका माम्‍चु़नीका र्‍वामी,
गो खोत्‍ले मु़चु़मिमडला आमा पेल थु़रु़,
इनी जाउमो तारापाचो़मिमका माम्‍चु़नीलाम-जेमी,
स्‍वाला इनी चो़मिमका मिक्‍सीलाम ल्‍वामी,
इनी ङाउमिमका ङिमा म्‍वामी।
मेम्‍लोका गो आमा डु़ल्‍चो़ डु़ल्‍चु़मेमिमडला आमा पेल थु़रु़,
मा मेर्मिमका माम्‍चु़नीलाम-जेमी।
गो उगेले धामुडा यु़मखारीमिम रेम्‍बेउ,
उधाली सुबुडा सिसि, मु नुङ मुसिक्‍पा कुयु़कुमिमकु छेखोपमिम रेम्‍बेउ।
माम्‍चु़नीकु छो़म डोक्‍पु यु़म-झ्‍वाक्‍सी रोमु थारी ङादो नेप्‍सुङ केकेया दु़म,
ख्‍लो़मु सिसि होप्‍माम लालाया दु़म।
लावो उहेमका माम्‍चु़नीकु नङ रङु़,
मेराम सेल्‍सिमु ल्‍वासु़।’
“इस्राएलडाम मु़चु़नी थो़नी, माम्‍चु़नीका नासरतडाम येशूलामका यु़मखारीमिम, हेल्‍लो वो मेल्‍वाम्‍मा खारीमिम मा छेखोपमिमलाम इनीमा थेतेडा बेम्‍डिम गानी चनिमिम ङा बु। ओर्मिम खारीलामका गुमीलाई इनीमाडा माम्‍चु़नीका थु़र्मिडिम र्‍वाक्‍पा रेम्‍बेम्‍डिम बु। येशू गानीलाई ग्‍वामु माम्‍चु़नीकाम ङादो आथाममिम उनी मुलु़ नुङ न बाइडा। मेम्‍मिमका गानी गुमीलाई मेजो़पा मु़चु़मिमलाई ग्‍वाक्‍साका क्रूसडा चेसाका सेन्‍बेट्‌नी। लावो गुमीलाई माम्‍चु़नीका सिमुकु दु़खालामका फ्‍वाक्‍साका फम्‍खेम्‍डी। हेङालोने सिमुका गुमीलाई बन्‍थामु मेचाप्‍सु़वा। दाऊदका येशूकु दुथाम आरे र्‍वाक्‍ताम बु,
‘माम्‍चु़नीलाई हेल्‍लो लोवो आमा ङादोडा गो ल्‍वाउतोमी,
हेङालोने गो आमा ङिमुका मेरुङिनु़ र्‍वाक्‍साका गुमी आमा जो़पलाम बुमी।
मेम्‍मिमका आमा न गेर्सिक्‍पा बु,
आमा लेम थो़र्सी द्‌वाक्‍ता,
आमा मिरो़म वो गुमीडा ङा बु।
हेङालोने गानी गोलाई
सु़लु़मगोनो मेर्पाजो़ल्‍ङिनी,
गानी इनीमा नङका साट्‌माकु मिरो़म झिम्‍मु मेग्‍वानी,
गानी गोलाई त्‍वारो़मकु लाम्‍दी रेम्‍बेट्‌ङिडिनिम बु,
गानी गोनुङ दु़म्‍निमा छो़म गेर्सी बेन्‍ङिनी।’
“वा-ल्‍वाकनी, इकी ङाउ-खुउ दाऊदकु दुथाम गो मेङिसाका गानीनुङ र्‍वाङु, गु सिडामा क्‍लु़म्‍मिडी, मा उ सु़लु़म ओम्‍लो वो आसिङा बु। लावो दाऊद माम्‍चु़नीलाम-जेपा कोले मु़चु़ बाइडा। मेम्‍मिमका उ चो़-चु़सु़मिमगोडाम ङा कोलेलाई हप गन्पा उमा गन्‍खोपडा आच्‍छाङा गट्‌पु र्‍वाक्‍साका ङादो ङा माम्‍चु़नीका र्‍वाम्‍डिम ल्‍वा गुका चडु़म बाइडा। ओ ख्रीष्‍ट सिमुलाम बम्‍गेमुकु दुथाम ङादो ङा दाऊदका ल्‍वास्‍तु़। मेम्‍मिमका गुमीलाई सु़लु़मगोनो मेपार्जो़ल्‍मिवा, मा उनी मिरो़म वो मेझिप्‍सावा र्‍वाक्‍साका र्‍वाक्‍ता। ओराम येशूलाई ङा माम्‍चु़नीका सिमुलाम फम्‍डी, मेराम गुकु खोत्‍लेका ल्‍वात्तोकोम बु। माम्‍चु़नीका येशूलाई कोम्‍डिमा उनी जो़पलाम जु़ल्‍मिडी, मा ङादोङा माम्‍चु़नीका र्‍वाम्‍डिम होम्‍साका येशूका माम्‍चु़नी-पेल रम्‍डी। मेराम पेल अम्‍डिम ङा ओम्‍लो गानी ल्‍वानिमिम थो़निमिम सो़। हेङालोने दाऊद उ त्‍वाप ने पाह्री मेलक्‍सावा, लावो उ त्‍वाका ङा आरे र्‍वा,
‘मिप्रङमा माम्‍चु़नीका आमा माम्‍चु़नीनुङ र्‍वाम्‍डी,
गो इमा स्वाक्‍चिमोमिमलाई इमा फेमखेलगोयु़ मेबेथु़मसम्‍म
गाना आमा जो़पलाम बाया’।”
“मेम्‍मिमका इस्राएलडाम खोत्‍ले मु़चु़मिमका जो़होमका चमिनु़, गानी क्रूसडा चेट्‌निम येशूलाई माम्‍चु़नीका ङाचो़ नुङ ख्रीष्‍ट बनेबेम्‍डी।”
ओराम ल्‍वा थो़म्‍डिमा मेर्मिमकु न-गो ख्राप्‍डा, मा मेर्मिमका पत्रुस नुङ वाङमिम थु़र्मामिमलाई, “ए वा-ल्‍वाकनी, गुकु हाम बोमु बासी?” र्‍वाक्‍साका हिलाबेम्‍डी।
पत्रुसका मेर्मिमनुङ र्‍वाक्‍ता, “इनी छु़लमिम इनी नगोलामका ङा मिम्‍सिट्‌निमा ख्‍लोन्‍सिट्‌नी, मा इनी छु़ल हेम्‍मु येशू ख्रीष्‍टकु नङडा गानी खोत्‍लेका कु-रु़दु़म रनी। मेकोतिमा गानी राप्लावा ल्‍वानी, मेराम ने माम्‍चु़नी-पेल सो़। हेङालोने ओराम इनीमा लागि, इनी चो़-चु़सु़मिमकाम लागि, मा माम्‍चु़नीका येन्‍मिमिम वाङथो़ बाट्‌पामिम खोत्‍लेकाम लागि गुमीका ग्‍वानिनी र्‍वाम्‍डिम बु।”
पत्रुसका वाङमिम वो हापा ल्‍वामिमलामका उनी न छ्‌याक्‍सात्तो आरे बु़डु़मी, “छु़लचो़मिमका ल्‍वापा देन्‍देडाम वाङ बासाका सेल्‍सिट्‌नी।” उहेम-उहेमका पत्रुसकु सिजेम उनी नडा रम्‍डी, मेर्मिमका कु-रु़दु़म रम्‍डी, मा मेनेम सु धु़मसङ (३,०००) कोति मु़चु़मिम मेर्मिमनुङ काम्‍सिम्‍डी।

मे थो़रलु़पामिम थु़र्मामिमकु सीसिडा, सामा घ्रो़म्‍सीडा, येशूकु ग्रुलाडा नुङ सो़म्‍दी बेप्‍डा कोयो दु़म्‍थाल्‍मिडी। मे थु़र्मामिमका यु़मखारीमिम नुङ छेखोपमिम रेम्‍बेम्‍डिमका मेर्मिम खोत्‍ले माम्‍चु़नीनुङ ङिम्‍डी। थो़रलु़पामिम खोत्‍ले कोयो घ्रो़म्‍थाल्‍मिडी, मा मेर्मिमनुङ बाट्‌पा खोत्‍ले सोजाम बोम्‍थाम दु़स्‍थाल्‍ला, मा खोत्‍लेका खोत्‍लेङा मोमु ल्‍वाम्‍थाल्‍मिडी। मेर्मिमका उनी त्‍वाकु ये-द, खाप्‍चीमिम खोत्‍लेङा भ्रेट्‌मिडी। मेकोतिमा उहेम-उहेमलाई हा-हाङको चाहेदु़स्‍ताम मेराम होम्‍साका दो़म्‍थाल्‍मिडी। मेर्मिम खोत्‍ले कोले नकाम दु़म्‍साका सो़रनेमडा कोयो-कोयो घ्रो़म्‍थाल्‍मिडी, मा मेर्मिमका उनी नेम-नेमडा जो़पा न-गो नुङ गेर्सिद्‌वाक्‍तो ग्रुला पेम्‍थाल्‍मिडी, मा माम्‍चु़नीकु नङ कोक्‍तो खोत्‍लेनुङ द्‌वादीबुङकाम दु़म्‍साका बाम्‍थाल्‍मिडी। माम्‍चु़नीका सेल्‍सिक्‍पामिम खोत्‍लेलाई हेल्‍लो लोवो मेर्मिमनुङ काप्‍मिडिम बाम्‍डी।

Lalela थु़र्मा 2