Currently NT is Published. OT is in progress

Bagheli

जब यीसु नासरत गाँव माहीं रहत रहे हँय, तबहिनय यूहन्ना बपतिस्मा देंइ बाले आइके, यहूदिया प्रदेस के सुनसान जघा माहीं इआ प्रचार करँइ लागें, कि “पाप करब छोंड़िके परमातिमा के लघे आबा, काहेकि स्वरग के राज लघेन आइगा हय।” ईं उँइन यूहन्ना आहीं जेखर चरचा परमातिमा के सँदेस बतामँइ बाले यसायाह के व्दारा कीनगे ही, कि
“सुनसान जघा माहीं एक जने के गोहरामँइ के बोल सुनात हय कि, प्रभू के गइल तइआर करा, अउर उनखे खातिर सड़कँय सऊँ करा।” अउर यूहन्ना ऊँट के बार से बना ओन्हा पहिरे रहे हँय, अउर अपने करिहाँ माहीं चमड़ा के पट्टा बाँधे रहे हँय, अउर ऊँ चिड्डन काहीं अउर जंगल के महिपर खात रहे हँय।
जब ऊँ प्रचार करत रहे हँय, तब यरूसलेम सहर, अउर सगले यहूदिया प्रदेस के मनई, अउर यरदन नदी के लघे-लघे के सगले मनई उनखे लघे आइके एकट्ठा होइगें। अउर अपने-अपने पापन काहीं सोइकार कइके यरदन नदी माहीं उनसे बपतिस्मा लिहिन। जब यूहन्ना बपतिस्मा देंइ बाले खुब फरीसी लोगन काहीं अउर सदूकी लोगन काहीं बपतिस्मा लेंइ के खातिर अपने लघे आबत देखिन, त उनसे कहिन, कि “हे साँप के बच्चन कि नाईं बुरे मनइव, तोंहईं को चेताय दिहिस, कि परमातिमा के आमँइ बाले सजा से बचा?” अउर तूँ पंचे अपने जीबन से इआ देखाय द्या, कि तूँ पंचे बास्तव माहीं पाप करब छोंड़ दिहा हय, अउर परमातिमा के बातन काहीं मनते हया। तूँ पंचे अपने-अपने मन माहीं इआ न सोचा, कि हम अब्राहम के सन्तान आहेन एसे परमातिमा हमहीं सजा न देइहँय; काहेकि हम तोंहसे सही कहित हएन, कि परमातिमा ईं पथरन से अब्राहम के खातिर बंस पइदा कइ सकत हें। अउर अब परमातिमा के क्रोध रूपी कुल्हारा बिरबन के जर माहीं धरा हय, एसे जउन-जउन बिरबा निकहा फर न फरी, उआ काटिके आगी माहीं झोंक दीन जई। तूँ पंचे अपने-अपने पापन से पस्चाताप किहे हया, इआ देखामँइ के खातिर हम तोंहईं पंचन काहीं पानी से बपतिस्मा देइत हएन, पय जउन हमरे बाद आमँइ बाले हें, ऊँ हमसे एतना महान हें; कि हम त उनखर पनहीं तक उठामँइ के काबिल नहिं आहेन, ऊँ तोंहईं पबित्र आत्मा अउर आगी से बपतिस्मा देइहँय। उनखर न्याय रूपी सूपा उनखे हाँथेन माहीं हय; अउर ऊँ संसार रूपी राहा काहीं निकहा से साफ करिहँय; अउर गोहूँ काहीं अपने बखारी माहीं रखिहँय; पय बूसा काहीं कबहूँ न बुझाँय बाली आगी माहीं डार देइहँय।

जब यूहन्ना बपतिस्मा देत रहे हँय, उहय समय यीसु गलील प्रदेस से यरदन नदी के किनारे यूहन्ना बपतिस्मा देंइ बाले के लघे बपतिस्मा लेंइ आएँ। पय यूहन्ना बपतिस्मा देंइ बाले इआ कहिके उनहीं रोंकँइ लागें कि, “हमहीं त अपना के हाँथे से बपतिस्मा लेंइ के जरूरत ही, अउर अपना हमरे लघे आएन हय?” तब यीसु उनहीं इआ जबाब दिहिन, कि “अब त अइसय होंइ द्या, काहेकि हमहीं पंचन काहीं इहइमेर से सगली धारमिकता काहीं पूर करब उचित हय।” तब यूहन्ना बपतिस्मा देंइ बाले उनखर बात मान लिहिन। अउर यीसु बपतिस्मा लइके जइसय पानी से बहिरे निकरें, त देखा, उनखे खातिर अकास खुलिगा; अउर ऊँ परमातिमा के आत्मा काहीं परेबा के रूप म उतरत, अउर अपने ऊपर आबत देखिन। अउर देखा, इआ अकासबानी भय, “ईं हमार पियार लड़िका आहीं, जिनसे हम खुब प्रसन्न हएन।”

Lalela मत्ती 3