Kodaku

हेरोदेस राजा राजे तोलोग अहूदिया जिला राः बयतुलम गाँव रे ईसु राः जनम होया एना, तहाँ ञेंल पे, पुरूब देस हनवरी केय झन ज्योतिसिकू एरुसलेम रे मेजकेन तेकू होंबोर तेडा, “एहूदिकू रेनिय राजा जनम केन हेंय करेया? कहेकि हेंय राः बारे ते लायेअय इपिल, अले पुरूब हँडे ले ञेंलकेडिया, अवुर अले हेंय जोहार वय लगड ले मेजकेना।” नआँ अँजोम केते हेरोदेस राजा अवुर एरुसलेम रेनकू सूकुड़दुम यनकू। अवुर हेंय होड़कू रेनकू सींड़ बड बडे आजककू अवुर एहूदी नियम चेचेडकू जवर केडकू तेय होंबोर तेडकुआ, “मसीहा करेय जनामुआँ?” हेना वरी हेंकू हेरोदेस थरे कू कहनी तेडा, “अहूदिया जिला राः बयतुलम गाँव रेय जनामुआँ, कहेकि भविस्यवक्‍ता नआँ घयतेय लिखो केडा।”
“ओ बयतुलम, अम अहूदिया परदेस रेमा, अम कनर याःते एहूदा रेनकू अधिकारिकू मेंडे सींड़कू वरी होडिंञ कोवा मिआँ; कहेकि अम वरी मियाँहोड़ बडेअय राजा उडूंगुआ, हेंय, जेयसे चरवाह भेड़ीकुय डगरोआ, हेन घयते ईंञाःकू इसराएलिकुय डगरोआ।” तहाँ हेरोदेस राजा ज्योतिसिकू कलेकल ते राःकेड कुते इपिल ठीक तीमिन जुवर पे ञेंलवाडिया, मेनतेय होंबोर तेडकुआ, अवुर हेंय न याःते कहनी केते बयतुलम गाँव हनतेय कुलतेड कुआ, “जू, हेंय चोंडिज राः बिसेय ते बढ़ियाँ तेपे पतायू, अवुर पे ञँमेय रेदो, इंञ होपे लाय वञूँ, ताकि इंञ हो सेनकोः तेंञ जोहार वयू।”
हेंकू राजा राः टेबोः अँजोम केतेकू चलो यनु, अवुर जे इपिल हेंकू पुरूब हँडे कू ञेंलवाडिया, हेंय हेंकू मड़ंग मड़ंग तेय सेनतेडा; अवुर जे जघा रे चोंडिज दोहो एना, हेन थव रे तयाः केतेय चड़ाँ यनु। हेंय इपिल ञेंलकेते हेंकू अखीर कू खुसी एना। हेंकू हेना ओड़ाः तयाः केते बले इंगत मरियोम सुदा कू ञेंलतेडिया, अवुर हेंकू लोजोर केनते बलेकू जोहार वडिया, अवुर अपन अपन बटू वरी हेंय लगड अखीर किमती चीज सोना, लोबान अवुर गन्धरस राः भेंट कू रकब तेडा। तहाँ हेरोदेस थरे अलोपे मिड़ाः मेनते, हेंकू सपन रे चेतोनी ञँमेना, हेना वरी हेंकू एटाः होर ते अनाकू राः देस हनतेकू मिड़ाः चलो एना।

हेंकू चलोयन राः बाद रे उसुफ थरे परभु रेनिय मियाँटंग सरगदूत सपन रे मेजकेन तेय कहनी वडियू, “रिमुःमी, नेय बले अवुर इंगत सुदा अम मिसरी देस हनतेम ञींरू; अवुर इंञ अनायीनिंञ कहनी वम मेन दिन हें-डेम दोहोनू, कहेकि हेरोदेस राजा नेय बले छपा ञँम केयतेय ञेंड गोजेय मेनते।”

तहाँ हेंय ञीनिंद रिमकेनते बले अवुर इंगत सुदा मिसरी देस हनतेय चलो यनु। अवुर हेरोदेस अनायिन गोजुः मेन दिन हेन हँडेय दोहो एना। हेनाते परभु, भविस्यवक्‍ता राः दोवारा तेय कहनी तड हेना टेबोः पूरा होया एना। हेना टेबोः नआँ घयतेआ, “इंञ होपोनिंञ मिसरी देस वरिंञ राःकेडिया।”
हेरोदेस राजा ज्योतिसिकू इंञ कू छरो केडा मेनाआँ ञेंल तेय धको यनु। अवुर सिपाहिकू कुलकेते, ज्योतिसिकू लाय तडा सही सही समय राः अनुसार ते बयतुलम अवुर आस पास रेनकू कोड़ा चोंडिजकू भर दोय एर ञेंड गोजतेड कू दोहो एनु। अवुर नेंकू दूदुय साल तेनकू अवुर हेना वरी हो होड होडिंञकू दोहो एना। तहाँ जे टेबोः ईरिमयाह भविस्यवक्‍ता राः दोवारा तेय कहनी तड हेना पूरा होया एना, हेना टेबोः नआँ याःतेआ, “रामाह गाँव रे ईयाम अवुर अखीर दुख राः मियाँटंग आवाज अँजोम एना;
राहेल चोंडिज कुतय लगाडिय ईयाम दोहो एनु,
अवुर मेने असेन गिसन गडिया, कहेकि हेंकू अब कोवा कुआ।”

हेरोदेस गोजकेन रे, परभु रेनिय सरगदूत मिसरी देस रे उसुफ थरे सपन रे मेजकेन तेय कहनी तेडा, “रिमुःमी, बले अवुर इंगत सुदा अम इसराएलिकू देस हनतेम चलोऊ, कहेकि बले ञेंड गोज मेनते कू उनेहतन हेंकू, गोजियानकू।” हेंय रिमकेनते, बले तेकींञ इंगा होन सुदा इसराएलिकू देस हनतेय चलो एना। लेकिन हेंय अरखिलाउस अनेज अपत हेरोदेस राः जघा अहूदिया रेय राज यडा मेनाअय अँजोम तेडा, तहाँ हेना सेनुः लगाडिय बोरो एना। हेना वरी फेर सपन रे चेतोनी ञँमकेते, गलील परदेस हनतेय चलो एना, अवुर नसरेत मेनते कू ञुमू तडा हेना गाँव रे सेनकेन तेय बसो एना, ताकि भविस्यवक्‍ताकू राः दोवारा ते न याःते कहनी तड हेना टेबोः पूरा होयाऊ, “हेंय नासरी मेनतेय कू कहनी वया।”

Lalela मत्ती 2