Manu - WBT (Mark,John) Non Drama

Manu - WBT (Mark,John) Drama

Bǎ lṳmṳ̌shî̌ lṳmṳ̌htò̌ akhanu, pwa̤shû̌gǎ ikǒlǒkòdû̌ tokhlǒ, Yǔdaphû̌ ikǒlǒkòdû̌ tokhlǒ, pwa̤sû̌ǐ ta̤sû̌ta̤tòwò asara tokhlǒ, kû̌ kòyò htû ikǒlǒkòdû̌ tokhlǒ ô̌hî̌bǎplǒcu lû̌û dě asî hî̌phlǔ nî̤dû bò lû̌û yô̤̌ kû̌ Yeshǔ awe̤akè. Asî coměhto Yeshǔ dě a cî̌cû̌kè lû̌û dǒ Khwǐpǐlǎ a acǔdekû.
Khwǐpǐlǎ gwè̌ Yeshǔ kû̌, “Na mî̌ Yǔdaphû̌ akhwǐ tôpwa̤ mè̤̌mî̌ca ya?”
Dě a hî̌shěshu khwǐ kû̌, “O, a mè̤̌mî̌ca pô̤̌ na hî̌nu hǒ.”
Dě pwa̤shû̌gǎ ikǒlǒkòdû̌ tokhlǒ hèbè̌ jûgrû ta̤sǔ dǒ Yeshǔ alô̤. Pô̤̌nudě Khwǐpǐlǎ gwè̌ pô̤̌ Yeshǔ kû̌, “Na hî̌shěshǔ kû̌ kòyò tôcǒ tô̤̌ ma̤titè? Na kè̌mò̌, asî hè bè̌lṳ̌htò̌ jûgrû na ta̤sǔ.”
Bǎbǎkǎlè Yeshǔ hî̌shěshǔ lû̌û tôcǒ tô̤̌ akhû̌akhî Khwǐpǐlǎ ǒò̌ kiti̤kaa jî̌꤮ kè yǎ.


Khwǐpǐlǎ alǎ̤klô ô̌ kû̌ pṳ̂̌tôně ta̤cû̌bò̌tûlû̌pwè kè̌ bǎ hǒnu, kòyò kè̌ kwi lû̌û kû̌ a gǔ plûhǎhtò̌ bǎ kòyòkhuhe dǒ kòyò dǒlò̤tě̤ alô̌khô dǒ pô̤kû bǎtè꤮ tôpwa̤nu bǎbǎ, a plûhǎhtò̌ bǎ kòyò. Bǎnuakha kòyò dǒ a ma̤shěpě̤shěshǔ lô̌khô khwǐ dě a ma̤si kòyò tokhlǒnu, kòyò dǒtě̤ô̌ lô̌khô asî dǒ pô̤kû. Kòyò lò̤tě̤ dǒ pô̤kû tokhlǒ aklanu a mi̤ kû̌ Khûbarabǎ tôpwa̤ nî̌ a ô̌plǒ bǎ asîklanu. Dě kòyò saprṳ̂saphǎ hè lô̌khô dǒ Khwǐpǐlǎ a ô̌ dě hèkwi khwǐ pô̤̌ a lǎ̤bû̌lǎ̤klô ma̤bǎ asî nu.
Dě Khwǐpǐlǎ gwè̌shěshǔ asî kû̌, “He plûhǎhtò̌ bǎ sî Yǔdaphû̌ akhwǐdû̌ hǒtôpwa̤ mî̌ sî sǎphlǒ ô̌ ya?” Ma̤titèhî̌dě Khwǐpǐlǎ sî̌ganǎ̤ kû̌ pwa̤shû̌gǎ ikǒlǒkòdû̌ tokhlǒnu, a sû̌khěsò̌khě Yeshǔ dě asî hèǐlò̤kè Yeshǔ dǒ a ô̌ pwǎ. Bǎbǎkǎlè pwa̤shû̌gǎ ikǒlǒkòdû̌ tokhlǒnu a cû̌no htû̌sò̌bǎ kòyò saprṳ̂saphǎ kû̌ glè̌ kwihtò̌ khwǐ dǒ a glè̌ plûhǎhtò̌ bǎ asî Khûbarabǎ, plûhǎhtò̌ tǎ̤ bǎ pa Yeshǔ tǎ̤mǎ̤, a cû̌hî̌ bò kòyò pô̤̌nu.
Khwǐpǐlǎ gwè̌ pô̤̌ kòyò saprṳ̂saphǎ tokhlǒ kû̌, “Kè̌ ma̤pô̤̌nudě kòyò dǒ sî kaǎ a kû̌ Yǔdaphû̌ tokhlǒ akhwǐ tôpwa̤ nulè he tôbǎ ma̤ yǎ hî̌tè?”
Dě asî yî̤̌gǔhtò̌ pô̤̌ lô̌khô kû̌, “Htǎsihtò̌kè a dǒ nò̌dò̌htǔlô̤ nu!”
Dě Khwǐpǐlǎ gwè̌ asî kû̌, “Cû̌ htǎsihtò̌kè a ma̤titè? A cû̌ ma̤sǔma̤plě kwè̌꤮ titè?” A gwè̌ asî pô̤̌nu bǎbǎkǎlè asî yî̤̌kǒhtò̌ khlo pô̤̌ kû̌, “Htǎsihtò̌kè a dǒ nò̌dò̌htǔlô̤nu!”
Dě Khwǐpǐlǎ sǎyṳ gû̌ma̤ pô̤̌ kòyò saprṳ̂saphǎ a ta̤sǎyṳ nu dě a plûhǎhtò̌kè bǎ asî Khûbarabǎ, dě Khwǐpǐlǎ no kliphû̌ tokhlǒ glè̌ jî̌pwǐ̤plè lô̌khô Yeshǔ kû̌ sǒpli̤nò̌plè, htodě a ǐlò̤kè Yeshǔ dǒ kliphû̌ tokhlǒ a cǔdekû dǒ asî gǔ cû̌ htǎsihtò̌kè lû̌û dǒ nò̌dò̌htǔlô̤.


Kliphû̌ tokhlǒ kaǎhǎhtò̌cû̌ Yeshǔ dǒ Khwǐpǐlǎ hôkû ta̤lǎ̤ tûkû. (ta̤lǎ̤ hǒtûkû mî̌ pwa̤pǒta̤ lǎ̤ô̌ gûlǎ̤) Htodě asî kaǎhèplǒ bò pô̤̌ kliphû̌ dǒ ashǔshawa̤ tokhlǒ. Asî ma̤yǒma̤lè pî̤jî̌ lô̌khô Yeshǔ dě sô̌htò̌ bǎ lû̌û jejû alî̤lǒso tôpṳ. Htodě asî hte te̤we̤ ta̤shî̌shô̌mṳ̌ sô̌sô̌kû̌ khû̌glû̌ nudě a glû̌htò̌ bǎ lû̌û. Htodě asî ma̤ lû̌û pô̤̌ a bè̌dubè̌nǎ̤ǐ lû̌û a hî̌takǎ lû̌û kû̌, “Ǒ꤮ Yǔdaphû̌ akhwǐdû̌, ô̌htûpwa̤ nědû̌lǎhtû pû nî̌꤮!” Asî po̤ lû̌ ikǒ kû̌ nò̌htô̌, htǔplî̌ lû̌û, hè dô̌gînî̤lò̤ dǒ alômô̤̌ tôpwa̤ hto tôpwa̤, dě a ma̤takǎ lû̌û pô̤̌ a bè̌dubè̌nǎ̤ lû̌û nu dě a nè̤̌ hè dô̌gîni̤lò̤ caba lû̌û tôpwa̤ hto tôpwa̤. Bǎ kliphû̌ tokhlǒ ma̤yǒma̤lè pî̤jî̌hto lû̌û dě asî plû̌tě̤kè tîkhîsô̌ jejû alî̤lǒso nutôpṳ dě a sô̌htò̌ tèplè̌ bǎ sô̌ lû̌û kû̌ aje nutôpṳ. Htodě asî kaǎhǎhtò̌cû̌kè lû̌û dě a glè̌ cû̌ htǎsihtò̌kè lû̌û dǒ nò̌dò̌htǔlô̤.


Wî̤̌kurenephû̌ dǒ ami̤ kû̌ Khûshǐmṳ̂ nu a ô̌ tôpwa̤, dě Khûshǐmṳ̂ nî̌ a phû̌ô̌ sò̌ginǐ̤, tôpwa̤ dě ami̤ kû̌ Khûalè̌sadru, tôpwa̤pe dě ami̤ kû̌ Khûrǔphǔ. Bǎnuakha a ô̌ dǒ adoashô̌ dě a glè̌ hènṳ̌ dǒ Wî̤̌kû akha, a hè glǎ kû̌ kliphû̌ tokhlǒ dě asî noò̌ lû̌û kû̌ Yeshǔ nò̌dò̌htǔ. Asî kaǎcû̌ Yeshǔ dǒ kòyò kaǎ kû̌ Gòlǎgòtǎ nutûkû (Gòlǎgòtǎ yô̤̌mûyô̤̌sǎ mî̌ ikǒkhwǐ agûlǎ̤). Bǎnu akhanu, asî dǐô Yeshǔ shisî̌yô̤̌ dǒ a toklo sadakû̌ ta̤khû̌ ma̤hǎmǎ ta̤shata̤htò nu bǎbǎkǎlè Yeshǔ ô tô̤̌. Dě asî htǎsihtò̌kè hto Yeshǔ dǒ nò̌dò̌htǔlô̤ dě asî phî̌ Yeshǔ aje tokhlǒ dě mòpè tôpwa̤ tôphî̌ bǎtè tôkhônu, abǒ lô̌khô ta̤bèbwǐ.
Bǎ lṳmṳ̌plè̤̌htò̌ lǐ̤sô̌tanarî akhanu, asî htǎsihtò̌kè Yeshǔ dǒ nò̌dò̌htǔlô̤. Dě kòyò wě̤nǎ ta̤sǔlî̤khû̌cô Yeshǔ kû̌, “Yǔdaphû̌ tokhlǒ akhwǐ” pô̤̌nu, Dě asî htǎsihtò̌kè kû̌ pwa̤phî̌sigwǐ yǒsaphǎ kòyò sò̌ginǐ̤. Asî htǎsihtò̌kè lû̌û dǒ Yeshǔ cǔtômû tôkhô tôpwa̤ dǒ cǔcôcî̌ tôkhô tôpwa̤. (Pô̤̌ lî̤plò̌shǐkû hî̌ kû̌, “Kòyò bè̌yǎ a pô̤̌ pwa̤ma̤sǔphû̌ nupwǎ,” ta̤hî̌bǎ nu a lǒhtò̌behtò̌ hǒ) Kòyò dǒ a cû̌gephǔ lô̌khô bǎ akòshî̌ nutokhlǒ nǒlò̤ lô̌khô aikǒ, pîjî̌ǐsho dě a hî̌ lô̌khô lû̌û kû̌, “O꤮ na hî̌ kû̌ na gǔ ma̤lò̤tě̤pro̤kè ta̤lṳhtò̌hô dě suni̤ akûnu na bô̌htò̌ htobò tîkhîsô̌ na hî̌ta. Pô̤̌nudě ô̌ dǒ nò̌dò̌htǔlô̤ nudě hǎtě̤ mò̌ ta꤮ dě ma̤hǎplǎge tûû̌mò̌ nanǎ̤ ta꤮.”
Htodě, pwa̤shû̌gǎ ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ pî̤jî̌ sô̌ Yeshǔ pô̤̌nu dě asî hî̌ lô̌khô kû̌, “A ma̤hǎplǎge jò kòyò yôla htûpwa̤ bǎbǎkǎlè a ma̤hǎplǎge jò tûû̌ anǎ̤tô̤̌. Na hî̌ tûû̌ nanǎ̤ kû̌ na mî̌ Yǔda akhwǐ dǒ a ma̤hǎplǎge kòyò nutôpwa̤ yahî̌. Pa kè̌ kè̌shǐ na hǎtě̤ jò dǒ nò̌dò̌htǔlô̤ khònò̤̌ kè̌hî̌dě pa yṳ̌ǎ na,” a hî̌hto pô̤̌nudě, kòyò dǒ a htǎsihtò̌ kû̌ Yeshǔ sò̌ginǐ̤nu a pîjî̌ǐsho gû̌ Yeshǔ pô̤̌nuhǒ.


Sahtò̌ bǎ lṳmṳ̌htǔ tò̌nò̌dè̌ nu tǒ̤dǒ lṳmṳ̌gwî̌lò̤ sunarî akûnu gǎ khǐsiwi̤ bòkè tôgǎ. Bǎ lṳmṳ̌gwî̌lò̤ sunarî behto akhanu, Yeshǔ jî̌pwǐ̤ yî̤̌gǔhtò̌ kû̌, “Ělě, Ělě, Lamǎ Sabakhǎ tenǐ,” amûasǎ mî̌ “He Cǒmara, he Cǒmara, na wîkè he ma̤titè?”
Kòyò ihtǒô̌ bǎnu tokhlǒ ganǎ̤de lô̌khô Yeshǔ yî̤̌kǒhtò̌ pô̤̌o dě asî hî̌ lô̌khô kû̌, “Gana̤de lô̌khô, a kaǎhtò̌ piwi̤pèshè Khûělǐya.”
Dě dǒ asîklanu kòyò ô̌ tôpwa̤ dě a khlè̌cû̌phî̌ ta̤tocǒ dǒ asô̌sô̌kû̌ sèphè̌ dě a cû̌junṳ̌ dǒ shisî̌yô̤̌shî̌ sokû dě a comě dǒ nò̌pôlôkhi dě a ǐhtò̌ nocî̌ô kû̌ Běcǎ Yeshǔ dě a hî̌ lô̌khô kû̌, “Pa ô̌pǒ̤kè̌kè̌ kûmṳ̂̌ pô̤̌ tòshò̌phû̌ mî̌ pa kè̌shǐ pû piwi̤pèshè Khûělǐya glè̌ hèphî̌lò̤tě̤kè a dǒ nò̌dò̌htǔlô̤ nupě ya.”
Dě Yeshǔ yî̤̌gǔhtò̌shû̌ htodě asǎlò̤tě̤kè.
Dě hugò̌pwǐpṳdû̌ dǒ kòyò jolò̤tě̤bǐ dǒ ta̤lṳhtò̌hôkû nutôpṳ hǎyè̌ gehtò̌gelò̤bò ginǐ̤khô. Bǎ Rṳ̂̌me̤ klitôya̤ aikǒdû̌ tôpwa̤ ihtǒô̌ bǎ nò̌dò̌htǔ lô̤mô̤̌ akhanu, a kè̌shǐ Yeshǔ si ma̤pô̤̌nu dě a hî̌ kû̌, “Kòyò hǒtôpwa̤ mî̌ Cǒmara aphû̌khû mè̤̌mî̌ca hǒ.” A hî̌ pô̤̌nu.
Pwa̤mǒ̤ dǒ a ihtǒô̌ kè̌cû̌ tûcû dǒ ayî̤ tokhlǒ aklanu, Magadalǎ dokûphû̌ Mǒ̤ma̤rǐ kû̌ Mǒ̤salû kû̌ Khûyûse kû̌ apṳ̌ Khûya̤kû amǒ̤ Mǒ̤ma̤rǐ sî ô̌plǒ lû̌û bǎnu. Pwa̤mǒ̤ hǒtokhlǒ mî̌ bǎ Yeshǔ ô̌ dǒ Galilè̤̌gǎ akhanu, a gû̌ Yeshǔ akò dě a ma̤jè̌ bǎ ta̤ dǒ Yeshǔ lǎ̤lṳ̂ tokhlǒ. Pwa̤mǒ̤ ashǔshawa̤ dǒ agû̌hè kû̌ Yeshǔ akò bǎ Wî̤̌yarǔshôle nu a ô̌pa dû̌wî̤ pe.


Htodě mô̤yè̤̌ni̤ lṳmṳ̌hǎlò̤hǒ. Mô̤yè̤̌ni̤ nutini̤ mî̌ Yǔdaphû̌ tokhlǒ tîwî̌tòwò shǎǎshǎô dǒ asî lṳmṳ̌dǔ bǎ khôtô̤̌ nutini̤. Bǎnu akhanu, Wî̤̌arǐmatè̌phû̌ Khûyṳ̂tǎ tôpwa̤ a bè̌khu asǎphlǒ dě a cû̌kwi Yeshǔ alṳ̌tṳ̂̌nu dǒ Khwǐpǐlǎ a ô̌. A mî̌ a ô̌pa kû̌ kòyò dû̌htû aprṳ̂aphǎ dǒ kòyò bè̌dubè̌nǎ̤ǐ nutôprṳ̂ akla tôpwa̤. A mî̌ kòyò dǒ a ô̌pǒ̤kè̌shuǐ gû̌ Cǒmara ashiagǎ tôpwa̤. Yeshǔ sihǒ, Khwǐpǐlǎ ganǎ̤de pô̤̌nu dě a ǒò̌ kiti̤kaa dě a kaǎ klitôya̤ aikǒdû̌ tôpwa̤ dǒ a ô̌ dě “Mî̌ Yeshǔ sihtoyî̤̌kèhǒ ya?” A gwè̌ lû̌û pô̤̌nu. Klitôya̤ aikǒdû̌ tôpwa̤ shôbǐǐlṳ̌ Khwǐpǐlǎ kû̌ Yeshǔ sihtohǒ dě Khwǐpǐlǎ ǐ Khûyṳ̂tǎ akhwè dǒ aglè̌ cû̌phî̌lò̤tě̤kè Yeshǔ alṳ̌. Khûyṳ̂tǎ cû̌ pwî̤nǐ̤ hugò̌pwǐ pwî̤dû̌ tôpṳ dě a cû̌phî̌tě̤kè Yeshǔ dǒ nò̌dò̌htǔlô̤. A bô̌bǐ lû̌û kû̌ hugò̌pwǐ plî pwî̤dû̌ nutôpṳ dě a cû̌ bè̌nṳ̌ lû̌û dǒ kòyò khǔ nǎ hto lṳ̌kû tôkû akû. Lṳ̌kû numî̌ lǒ̤kû dǒ a ô̌ dǒ shǒpa̤lô̤ dě a htû̌toklo bǐkè lṳ̌kû nu kû̌ lǒ̤bědû̌ tômè. Magadalǎ dokûphû̌ Mǒ̤ma̤rǐ kû̌ Khûyûse amǒ̤ Mǒ̤ma̤rǐ kè̌mǎnǎǐ kòyò lǎ̤bè̌nṳ̌ Yeshǔ agûlǎ̤ nutûkû.

Lalela Makǔ 15