Ды вана ве чистэ, зярдо Иисус тонавтсь Пазонь кудонь пирявксонть потсо ды ёвтнесь Кенярксов Куля, Сонзэ перька пурнавсть попонь покштнэ, Койс тонавтыцятне, прявтнэ ды кевкстизь: «Ёвтак миненек, кодамо азорксчисэ теят Тон неть тевтнень ды кие максызе Теть те азорксчинть?» Иисус тень каршо мерсь: «Монгак максан тенк вейке кевкстема. Ёвтадо Монень, Иоаннонь нававтомась менельстэ ульнесь эли ломантнень пельде?» Сынь эсь ютковаст кармасть кортнеме: «Бути мертяно: “Менельстэ”, сестэ Сон кевкстьсамизь: “Мекс эно эзиде кеме тензэ?” Бути мертяно: “Ломантнень пельде”, сестэ весе ломантне кармить лангозонок ёртнеме кевсэ, эдь сынь весе превсэ-седейсэ Иоаннонь ловить пазмарицякс». Секскак мерсть Иисусонь каршо: «А содатано, косто». Сестэ Иисус сынст каршо мерсь: «Монгак а ёвтан тенк, кодамо азорксчисэ теян неть тевтнень».

Теде мейле Иисус ёвтнесь ломантненень истямо валвелявкс: «Вейке ломань озавтсь винаумарькс пире ды сиведсь пиренть мельга якицят. Сонсь тусь куватень шкас лия масторов. Ды вана сась умарень пурнамо шкась. Азорось кучизе важонзо винаумарь пирень мельга якицятнень кедьстэ саемс эсензэ таликанзо. Пиренть мельга якицятне важонть кундызь, чавизь ды чавонь кедть кучизь мекев. Азорось таго кучсь тенст лия важо. Ансяк сынь сеньгак чавизь ды визьксчамасо панизь чавонь кедть. Азорось кучсь колмоце важо. Сынь теньгак верьс чавизь ды вырновтызь винаумарь пирестэнть. Сестэ азорось арсезевсь: “Мезе монень теемс? Кучса тов эсень вечкема цёрам. Паряк, сонзэ неезь, эйстэнзэ визделгадыть”. Зярдо винаумарь пирень мельга якицятне неизь цёранть, сынь мерсть эсь ютковаст: “Те – буень поладыцязо. Адядо маштсынек сонзэ, сестэ сонензэ кадовикс ули-парось ули минек”. Сынь тулкадизь сонзэ пирестэнть ды маштызь.
Мезе ней теи мартост пирень азорось? Сон сы, маштсынзе неть винаумарькс мельга якицятнень ды пиренть макссы лиянень». Кунсолыцятне серьгедсть: «Арась! Арась! А улемс тенень!» Иисус пштистэ варштась лангозост ды мерсь: «Мезде эно кортыть неть Пазонь Сёрмадовксонь валтнэ:
“Се кевесь, конань ёртызь кудонь теицятне,
теевсь ужонь-уголонь кирдиця юр кевекс”?
Эрьвась, кие пры те кевенть лангс, порксави, ды кинь лангс кевесь пры, сень лепштясы». Койс тонавтыцятне ды попонь покштнэ чарькодсть: те валвелявксонть Иисус ёвтнизе сындест. Секскак сынь нейке арсесть каподемс Сонзэ, ансяк пельсть ломантнеде.

Секскак сынь кармасть Иисусонь мельга салава ваномо ды кучнесть Сонензэ таго-зяро ломанть, конат пряст невтсть ванькс седеекс, алкуксокс жо арсесть кундамс Иисусонь вал лангсо ды теде мейле максомс Сонзэ римень прявтонть кедензэ ды судямонзо алов. Неть ломантне кевкстизь Иисусонь: «Тонавтыця, минь содатано: Тон кортат ды тонавтат видестэ, кодамояк ломань а яват, Пазонь кинтень тонавтат видестэ. Ёвтак, эряви-арась миненек Римень кесарнень каявкс пандомс?» Сынст зыянов мелест чарькодезь, Иисус мерсь каршост: «Мекс варчавтнетядо-терявтнетядо Эйсэнь? Невтеде Монень динар ярмак. Те кинь чамась ды кинь лемесь ярмаконть лангсо?» Сынь мерсть Тензэ: «Кесаренть». Иисус каршост мерсь: «Сестэ макснедеяк кесарнень кесаренсенть, Пазонтень – Пазонсенть». Иисус сыненст ломантнень икеле вал лангсо эзь кундаво. Сынь дивазевсть Сонзэ каршо валонтень ды каштмольсть.

Иисуснэнь састь зярыя саддукейть, конат кулозьстэ вельмемантень а кемильть, ды кевкстизь Сонзэ: «Тонавтыця, Моисей сёрмадсь тенек Койсэнть: “Бути урьвакстозь ломанесь кулы эйкакштомо ды кадови низэ, сестэ кулозенть ялаксозо саезэ эстензэ те нинть полакс, ды сынь чачтост эйкакш. Истя те эйкакшось ули ловозь кулозь лелянть эйкакшокс”. Ды вана эрясть-аштесть сисем лелят-ялакст. Васенцесь урьвакстсь ды кулось, эйкакш эзь кадо. Нинть саизе омбоцесь. Омбоцеськак кулось эйкакштомо. Мейле колмоцесь саизе никс теке аванть. Ды седе тов истя лиснесь меельце ялакстнэнь мартояк. Весе сисемнест кулость эйкакшонь апак кадо. Меельцекс кулось ниськак. Сестэ, зярдо сынь кулозьстэ вельмить, конанень эйстэст ули сон никс? Эдь сон весе сисемнест туртов ульнесь никс». Иисус тень каршо ёвтась: «Те шкань эрямосонть ломантне урьвакстнить ды лиснить мирденень. Ансяк сетне, конатненень Пазось кази кулозьстэ вельмема, сыця шкань эрямосонть а кармить урьвакстнеме ды мирденень лиснеме. Ды сынь зярдояк а кулыть, улить ангелэнь кондямокс. Сынь Пазонь эйкакшт, эдь Пазось вельмевтинзе кулозьстэ. Кулозтнень вельмемаст алкукскак ули, теде кортась сонсь Моисейгак палыця куракшто ёвтнемасонть. Тосо сон кортась: Азорось – те Авраамонь Пазозо, Исаконь Пазозо ды Яковонь Пазозо. Пазось аволь кулозтнень Пазост, Сон эрицятнень Пазост. Сонзэ туртов кулозтнеяк, эрицятнеяк – эрицят». Койс тонавтыцятнестэ конат-конат каршонзо мерсть: «Тон вадрясто ёвтыть, тонавтыця!» Теде мейле сынь пелезевсть максомс Иисуснэнь лия кевкстемат.

Мейле Иисус кевкстсь: «Мекс ломантне истя кортыть: Пазонь кучовт Идицясь – Давидэнь цёра? Эдь сонсь Давид корты Псалтирьсэ:
“Азорось мерсь монь Азоронтень:
озак Монь вить кедь ёнов,
зярс Мон а тейсынь Тонь душманот
пильгеть путома таркакс”.
Теньсэ неяви: Давид мери Сонензэ Азоро. Кода эно Сон ули Давиднэнь цёракс?»
Весе кунсолость Иисусонь, ды Сон кортась тонавтницянзо туртов: «Ванстодо прянк Койс тонавтыцятнеде: сынь вечксызь кувака оршамосо якамонть ды ошкужосо мартост шумбракстнеманть. Сынь вечксызь синагогасо икеле таркатнесэ озадо аштеманть, каванямо кудосо – васенце таркатнес озамонть. Сынь нельгить доватнень кудост ды пряст невтемань кисэ кувать озныть. Истятнэ седеяк стакасто судязь улить».

Lalela Лука 20