Me mo bim n’ídekireh ba balóku M'ayéjuhne Gúloku Díino. M'ayéjuhne Gúloku Díino, úmár ummo bim ingi Díino káriman fam. Faka úmár agune Díino fankánam. Úmár aguyguy káriman fam ingi Díino, fo Díino atoŋne kayabhu duniyaŋo guliguliiho. Hoŋon hoŋon ho Díino ayabne, úmár ummo na. Yikireŋ ho Díino ayab ni úmár tohároŋ. Kanjébo mees imbi úmár gafúruntne ki kanjébo kámár atohundutor mintor jiyaaŋo. Jiyaaŋo jímár gawúnnohne gumurulo, te gumurulo gúmár gara apireneh gufaŋununku jiyaaŋo.
Angu ayikyik údiigeen úduk mu Díino abúuñor m'aretuh Yaya. Úmár Yaya, ajellihinne jiyaaŋo j'ílobne ki ki jamaŋo nip ampiren anfiyum. Aséediyaseediya ki jamaŋo nip ampiren anfiyum jiyaaŋo jímár a gubaarhu h’alóbohne. Yaya faŋo guyroŋ jiyaaŋo. Úmár afútfut k'aguy séed n'atéekinkinehne jamaŋo nip a gubaarhu jiyaaŋo jímár. Jiyaaŋo jímár, jímár agune ji marigeno, j'adékirne a duniyaŋo inno ba buyaaŋurindiku jamaŋo nip.
M'ayéjuhne Gúloku Díino aguyguy a duniyaŋo káriman fam, kanda haman maŋ nim jamanku duniyaŋo yitárom. Agida úmár ingi Díino anyabne honjoroŋo nip. Adékridek ba a didiirahánam di Israyel, kanda haani jamankánam faŋo lahudom. Haman maŋ nim, índukoŋo anlahuremlahur k’anfak anfiyumem. Kanda m’anlahuremne nip, úmár anéereeniŋneer binaal k’anguy imberenku Díino. Te imberenku Díino, immereŋ bosaaraŋaŋ iniman ni jamaŋo ambosaane. Bosaaraŋaŋ a básunku uraagofo. Bosaaraŋaŋ maŋ ni índiigeeno antíbehne buboshu jaraaho. Jaraku Díino, jámár ambosaabos maro Díino alahne bukankánin imberenkinem.
Angu, M'ayéjuhne Gúloku Díino abosaabos adék aguy uraagof imbi mint. A binaanam ífegmiŋfeg bafuku Báábám b'ayikne ni úmár agune úbárám úmánduko. Mint ñantaalibehinem ífegmiŋfeg maro gabonkerumebonkerum. Gayaafuŋayaafuŋ. Gajellihinejellihin mintor marigeno imbi Díino. Jikoŋo ámáráŋ nip arumunrumun tip a binaanam.
Fo M'ayéjuhne Gúloku Díino apúturne a duniyaŋo inno, údiigeeno m’ayéjuhne Yaya afúror k’alób kabaŋ, ayéjeh jamaŋo:
- Ninkinan! Ningeŋ baŋ! F’éyejerne ayikhineh m'adékekinehne a duniyaŋo inno, te afankunum, a gubaarhu úmár gílobumohne. Angu, aji úfegi n’íyejne afankunum, maro úmár aguyguy bim káriman faliiho, ni me fanti bibosaa sah!
Nim Yaya aséediyane a nintiku M'ayéjuhne Gúloku Díino.
Angu, n'ayikne bankabaŋo dáde akankaan bajóon balabahi a binentor, ba yikireŋ k'amuk. Fégeŋ baŋ, Díino anéneer mint Luwaŋankánam a gubaarhu Musa. Kanda imbi Yensa, Umaasaŋo mu Díino Acaabenne, gafaŋumne n'ajellihin mintor marigeno ingi bankabaŋo b’ayikne a binentor. Wúur fégahadaŋ Díino, kanda Úbárám úmánduko, atéejahemteeja k'afak aguy Díino. Fo úmár afútne, úmár ajellihinjellihin mintor ni Díino amíirne.

Ñanlaameku Ñanyahudo m’angune a bukooro b’aretuhne Jerusalem ansíibáásiib búpájul a nintiku Yaya. Angu, ambúuñbuuñ ñanlaameku alimaamaŋo impinam ingi m'anyéjuhne Ñanleefi ba a binaanam. Bampút ammiihem anyéjem:
- Fi nuko, fi ugune hantaŋ?
Angu f'ammiihemne nim, Yaya foyuroŋ búteekinkinin. Inini galóbne arenn a sígihu jamaŋo nip ayéjeeniŋ:
- Me guyri Umaasaŋo Mu Díino Acaabenne. Me gireŋ de!
Anfak ammiihem anyéjem:
- Karo fi f’ugune taala Anabila Eli?
Yaya afak añop ayéj:
- Wówo, me gireŋ.
Anfak anyéjem:
- Karo fi ugune Anabiyoŋo n'anyéjne adék adékekineh?
Yaya afak añop. Anyéjem:
- Inini nuko, fi a búpájihen fi ugune hantaŋ? Maro iñantamiŋ iŋoolinmiŋ ingi gúlob ba imbi m’ambúuñurne mint. Neeraŋ gunuk úlobhunehne gunankan?
Fam Yaya ayéjeeniŋne:
- Me ingine wúuro mu taala Anabila Esay ayéjne adék adékekineh. Ayéjeriyej wúuro adékekineh k’aguy a kanaŋaŋo kanlaalinno k'ayoofun síngiirhinem ayéjeh jamaŋo: «Ingah! Umuyhintor ummo bim n'adékireh deh! Jóoninditeŋ Umuyhintor binaal. Jóoninditemeŋ binaal bíwuuhi k'apiren adékum na.»
Nim Yaya ayéjne mi ñanlaameku Ñanyahudo ambúuñne ba a binaanam. Agida ayik a binanin índiigeen m’antoh a dayra adúk n’ayéjuh ñanfarasiyaŋo. Immi ammiih Yaya anyéj:
- Fi, f'úyejne fi guyro Umaasaŋo Mu Díino Acaabenne, guyro Anabila Eli, guyro Anabiyoŋo n'adék adékekinehne, angu horaŋ akanne k'uyiceh jamaŋo?
Yaya aŋoyindeeniŋ ayéjeeniŋ:
- Me, ii, baaruŋo bademmo giyicinkoonuŋne. Kanda ingah! Úduk umomiye nanka mu ninkinan pájiiroŋ. Úmár fanti batoŋ dohohunom. Me, bádi buyicikinem sapataŋ. Ititiir fanfaŋ!
Nim Yaya alóbne.
Inho nip bi gúbidhu Betani gayikne. Na Yaya gayicehne jamaŋo a gúbido gúduko gu jakaamo n’aretuhne Joodan, bi bísibaŋo afúruntohne.

Afúrumi na, gucunkunom Yaya aŋanden Yensa n'adékirehne. Ayéj jamaŋo:
- Ninkinan! Ningeŋ baŋ leeyaŋo no Díino akucundutne mintor k'apiren akafari jínubonku duniyaŋo inno. Ingah! A gubaarhu úmár gílobunkoonuŋne. Íyejyej maro ayikhineh wúur m'adékekinehne, te afankáneh me. Angu, aji úfegeŋ n’íyejne afankunum, maro aguyriguy bim káriman faliiho ni fanti bibosaa. Me faŋo pájiiriyer mu Díino acaabenne. H’épájulne bareŋ, hómár ingine Díino abúuñureemne ba buyichu jamaŋo a baaruŋo, te a gukaano nim ipiren ijellihin jamanku Israyel wúuro úmár.
Afúrumi na, Yaya atifur jamaŋo h'afégne f'aŋane buyichu Yensa. Inini gatifne ayéj:
- Ífefeg Jamméejhu Díino Jarenninno n'akucorohne biriman a raafo. Akucrikuc k’adék anot imbi Yensa. Maŋ ni kofenkereer akucurohne, maŋ nim Jamméejhu Díino Jarenninno akucurne dam.
Nim Yaya aséediyane a nintiku h'afégne d'ayicne Yensa. Afak ayéjeeniŋ:
- Úpájuleŋ, me fankum pájiiremer, kanda Díino n'abúuñureemne ba buyichu jamaŋo ingi baaruŋo ayéjeemyejer: «Fi úfekineh Jamméejhum Jarenninno n'akucorohne k'adék anot arinku wúur. Úfegdir hómár, úpájihineh maro wúuro úmár gadékehne buyichu jamaŋo ingi Jamméejhum Jarenninno.» Nim Díino alóbeemne fam.
Saŋ abocin ayéj:
Kanda inini ífefeg hómár imbi Yensa. Kanda iñantay íseediya maro úmár agune Úbáku Díino.
Angu, inho Yaya atifurne jamaŋo.

Gucunkunom Yaya n'afak anguy na ingi taalibenkinem anakaŋ. Fo Yensa aŋane guwusunaŋo Yaya ayéjeeniŋ:
- Ningeŋ baŋ leeyaŋo no Díino akucundutne mintor.
Angu ñantaalibehu Yaya banyennehini hómár aŋŋay butifilinku Yensa. Yensa baningilay, afég ñantaalibeŋo n’aŋŋayemne butifo. Ayéjeeniŋ:
- Ninkinan, horaŋ gútibheŋne?
Immereŋ aŋŋoyindem anyéjem:
- Rabahi, beeraŋ gugune?
Agida «Rabahi» agune «Arafaŋ» ingi gúlokánin.
Banyéjem nim, úmár aŋoyindeeniŋ:
- Dókuloŋ, úfekineŋ k'egune.
K'andék f'andék ampút imbi Yensa a waathu rayiibo. Angu annooh na ingi úmár baman fítiro. Índiigeeno immereŋ inako m’anyennehinne ho Yaya alóbne k'antifilin Yensa, údinem gurethinem Andáre. Andáre agune údonku Simon Piyer. Angu dam Andáre, f'afúruntne imbi Yensa, awúuh ba imbi údoonom Simon Piyer. Bapút, ayéj údoonom:
- Ingah! Idaŋunmiŋdaŋun Umaasaŋo Mu Díino Acaabenne!
(Hómár ingine ingi gugáreko inini «Idaŋunmiŋdaŋun Úkáristo.» )
Angu, Andáre f'alóbne nim, adooh Simon ba imbi Yensa. Bampút, Yensa akorosom hóbun k’ayéjem:
- F’ugune Simon úbáku Jonas. Kanda afúrumi gub, urethunuh Sefas.
Nim Yensa ayéjemne. Agida Sefas, gureto gúmár ingine buwaalo imbi immereŋ.

Gucunkunom, Yensa alah guŋoolin ba didiirahu Galile. Bapúti, alahun na údiigeeno m’aretuhne Filip. Ayéjem:
- Tifireem k'uguy utaalibehum.
Agida, Filip Betsayida gagune, saariŋo no Piyer angune ingi Andáre.
Afúrumi na, Filip adék afég údiigeeno m'aretuhne Nataneyel k'ayéjem:
- Mint ii, ífegmiŋfeg údiigeeno mu Anabila Musa añaañne a Tawrato. Anabiyoŋoŋo mees aññaañemñaañ. Úmár agune Yensa, úbáku Isuf mu Nasaret.
F'alóbne nim, Nataneyel aŋoyindem ayéjem:
- Hom? Nasaret?! Hóge honj hajóon apiren afúrumor na?
Filip aŋoyindem ayéjem:
- Índek índokoŋ, úfekineh ingi sígihen.
Baŋŋay hadéko, bantéejari Yensa, Yensa aning Nataneyel k’ayéj jamaŋo m’ankokayehne:
- Ingah! Ummu Israyel m'apút ummooŋe n'adékireh. Úmár úwuuhi.
Balóbi nim, Nataneyel n’ayennehin ayéjem:
- Neeraŋ gúpájulorumeemne?
Yensa aŋoyindem ayéjem:
- Ífegenfeg jandiŋ Filip bahuyunto, f’onoone a sifigo.
Agida Yensa dékereŋ na. Angu, fo Yensa alóbemne nim Nataneyel ayéjem:
- Arafaŋ, fi ugune Úbáku Díino, fi ugune Umaasahu Israyel!
Balóbi nim, Yensa ayéjem:
- Fi, a gubaarhu n'ílobenne bareŋ a sifigo gífegenne guhar ufiyumeemne? Úduk úfekineh h'afankunehne hómár dáde. Janteneŋ baŋ k'íteekinoonuŋ marigeno. Ninkinan úfekineŋ bísiba ni hakubo akimbulaane ki maleekaŋaŋo aŋŋafah, ankucuroh imbi Údiigeeno M'acaabenaane.

Lalela Saŋ 1