لوقا 21
21
دول آروادین هدئیّه‌سی
(مرقوس 12:41-44)
1عئسا یوخاری باخیب، وارلی آداملاری گؤردو کی، ائعانه قوتوسونا هدئیّه‌لرئنی آتیردیلار. 2و کاسیب بئر دول آروادی دا گؤردو کی، اورایا ائکی قارا پول قویور. 3و ددی: «دوغروسونو سئزه دیئرم؛ بو یوخسول دول آرواد هامیدان چوخ پول آتدی. 4چونکی اونلارین هامیسی اؤز وارلارینین آرتیقلیغیندان هدئیّه وردئلر، لاکئن بو آرواد کاسیبلیغینا باخماییب، کچئنمک اوچون الئنده نه وار ائدی، وردی.»
آخیر زامانین علامتلری
(متّا 24:1-35، مرقوس 13:1-31)
5بعضی آداملار معبدئن گؤزل داشلاریندان و هدئیّه‌لر‌له بزنمئش اولدوغوندان سؤز ادن واخت، عئسا ددی: 6«اِله گونلر گله‌جک کی، بورادا گؤردویونوز شیلردن داش، داش اوسته قالمایاجاق، هر شی محو اولاجاق.»
7اونلار اوندان سوروشدولار: «اوستاد! بو ددئکلرئن نه زامان اولاجاق؟ و بو شیلرئن باش ورمه‌سی واختینین علامتی نه‌دئر؟»
8عئسا ددی: «دئقّتلی اولون کی، سئزی آلداتماسینلار. چونکی بئر چوخلاری منئم آدیملا گلئب دئیه‌جکلر ”منم“ و ”واخت یاخیندیر.“ اونلارین دالینجا گتمه‌یئن. 9موحارئبه‌لر و ائغتئشاش باره‌ده اشئتدئیئنئز زامان اوره‌یئنئز اوزولمه‌سئن. چونکی بونلارین قاباقجا باش ورمه‌سی گرکدئر، آنجاق آخیر تزلئکله گلمز.»
10سونرا اونلارا ددی: «خالق خالقین، دؤولت دؤولتئن ضئدّئنه قالخاجاق؛ 11گوجلو زلزله‌لر، موختلئف یرلرده قیتلیقلار و بلالار، دهشتلی حادئثه‌لر و گؤیدن بؤیوک علامتلر اولاجاق. 12آمّا بونلارین هامیسیندان قاباق، منئم آدیما گؤره سئزه ال آتاجاقلار، سئزی توتوب عذاب وره‌جکلر، کنئسه‌لره و زئندانلارا تسلئم اده‌جکلر، پادشاهلار و والئلر قاباغینا آپاراجاقلار. 13و بو، سئزه شهادت اوچون بئر فورصت اولاجاق. 14بونا گؤره اوره‌یئنئزده بونا قرار ورئن کی، نجه جاواب ورمه‌یئنئز اوچون قاباقجادان فئکئرلی اولمایاسینیز. 15چونکی من اؤزوم سئزه اله بئر نئطق و حئکمت وره‌جه‌یم کی، سئزه ضئدّ دورانلارین هچ بئری نه اونا ائراد توتا بئلسئنلر، نه ده اونا ضئدّ دورا بئلسئنلر. 16حتّا والئدینلرئنئز، قارداشلارینیز، قوحوملارینیز، و دوستلارینیز طرفئندن تسلئم اولوناجاقسینیز و سئزلردن بعضئسئنی اؤلدورده‌جکلر. 17و منئم آدیما گؤره هامی سئزدن نئفرت اده‌جک. 18لاکئن باشینیزدان بئر توک بله دوشمه‌یه‌جک. 19دؤزوب دایانماقلا جانینیزی خئلاص اده‌جکسئنئز.
20قوشونلارین اورشلئمی موحاصئره اتدئیئنی گؤرن زامان بئلئن کی، اونون وئرانلیغینین واختی یاخینلاشیبدیر. 21او واخت، یهودئیه‌ده اولانلار داغلارا قاچسینلار؛ شهرده اولانلار اورادان چیخسینلار و اطرافدا اولانلار اورایا گئرمه‌سئنلر. 22چونکی بو گونلر قئصاص گونلری‌دئر کی، بوتون یازیلار یرئنه یتئشسئن. 23وای او گونلرده بویلو اولانلارین و اوشاق اَمئزدئرن آروادلارین حالینا! چونکی بو اؤلکه‌ده بؤیوک فلاکت و بو خالقین ضئدّئنه قضب اولاجاقدیر. 24قیلینج آغزینا دوشه‌جکلر، بوتون خالقلار آراسینا اسئر آپاریلاجاقلار و قیری‌یهودئلرئن واختی تامام اولانا کئمی، اورشلئم قیری‌یهودئلر طرفئندن پایمال اولاجاقدیر. 25گونشده، آیدا، و اولدوزلاردا علامتلر اولاجاقدیر، یر اوزونده مئلّتلر دهنزئن و شپه‌لرئن گورولتوسوندن ائضطئراب ائچئنده اولاجاقلار. 26ائنسانلار قورخودان و دونیانین باشینا گلنلری گؤزلمکدن هوشدان گده‌جکلر. چونکی گؤیلرئن قودرتی اسه‌جک. 27او زامان اونلار ائنسان اوغلونون بولودلار ائچئنده قودرت و بؤیوک عئزّتله گلدئیئنی گؤره‌جکلر. 28بو ائشلر یرئنه یتئشمه‌یه باشلایان واخت، یوخاری باخین و باشینیزی قالدیرین چونکی خئلاصینیز یاخیندیر.»
29و اونلارا بئر مثل چکدی: «انجئره و بوتون آغاجلارا باخین. 30یارپاق آچاندا بونو گؤرورسونوز و اؤزونوزدن بئلئرسئنئز کی، یای آرتیق یاخیندیر. 31اِله‌جه ده، سئز بو شیلرئن باش وردئیئنی گؤرنده، بئلئن کی، تارینین پادشاهلیغی یاخیندیر. 32دوغروسونو سئزه دیئرم؛ بو شیلرئن هامیسی واقع اولمایینجا بو نسئل#21:32 و یا بو «خالق» کچئب گتمیه‌جکدئر. 33گؤی و یر کچئب گده‌جک، لاکئن منئم سؤزلرئم اصلا کچئب گتمیه‌جکدئر.
34دئقّتلی اولون کی، اوره‌یئنئز قارینقولولوق و کفلئلئکله، بو حیاتین اوموراتی ائله آغیرلاشماسین و او گون، سئزه تله کئمی قفلتن گلمه‌سئن. 35چونکی او گون، یر اوزونده یاشایانلارین هامیسینین اوستونه گله‌جکدئر. 36بونا گؤره ده همئشه آییق اولون و دوعا ادئن کی، بوتون باش وره‌جک بو شیلردن خئلاص اولماغا و ائنسان اوغلونون حوضورونا چیخماغا قودرتئنئز اولسون.»
37عئسا گوندوزلر معبدده تعلئم ورئردی، لاکئن گجه‌لری اورادان چیخیب زیتون داغیندا کچئردئردی. 38و بوتون خالق سحر تزدن اونون سؤزلرئنی اشئتمک اوچون اونون یانینا، معبده گلئردئلر.
Okuqokiwe okwamanje:
لوقا 21: موقدس کتاب
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Elam Ministries 2013. All rights reserved.