यूहन्ना 7
7
येशूडला थो़र मेलु़पा उनीमा ल्वाकमिम
1ओराम चङडा, येशू गालील क्षेत्रबाडे खोत्लेथो़ खिर्सिम्डी। गुमीका यहूदिया क्षेत्रडाम वाङथो़ङा बाट्पा न बेम्डी। हेङालोने मेसिन्डा यहूदीमिमका गुमीलाई सेन्मु माल्तोङा लेट्मिडी। 2लावो गोठाडा बाखोप यहूदीमिमकु चाड रोक्फाड्डाम बाइडा,#लेवी २३:३४; व्य १६:१३ 3येशूकु ल्वाकमिमका गुमीलाई र्वाम्डी, “ओलामका लुक्नीमा यहूदिया क्षेत्रथो़ लक्नी, मेम्मा गानी बोनिमिम यु़म-खारीमिम इनी सीसिपामिमका ल्वामिनु़। 4जो़पा नङ फोन्सिमु द्वाक्पा सु़का वो मेल्वाखोपडा खारी मेबु़। गानी ओर्मिम खारी बोनी माला सु़म्दिसेरडाम मु़चु़काडा इनी त्वापङा रेम्बेन्सिट्नी।” 5हेङालोने येशूकु ल्वाकमिमका वो गुमीडला थो़र मेलु़म्थाल्मिवा।
6येशूका मेर्मिमलाई र्वाम्डी, “आमा लागि जो़पा थारी आथावो रोक्ताम मिबु, इनीमा लागि ने उहेम थारी लोवो जो़पाङा बु। 7गानीलाई मेद्वाक्पा मु़चु़ सु़म्दिसेरडा सु़वो मेबुमी। लावो सु़म्दिसेरडाम मु़चु़मिमका गोलाई ने मेद्वाङिमी, हेङालोने मेर्मिमकु खारी बेसी मेजो़पा बु र्वाक्साका गो सो़उ। 8गानी ओराम चाड मानेबेप्डा लक्नी। गो ने ओराम चाडडा मेलङु, हेङालोने आमा थारी आथावो रोक्ताम मिबु।” 9मेर्मिमलाई आरे र्वाम्डिमा गुमी गालीलथो़ङा बाम्ल्याम्डी।
10लावो येशूकु ल्वाकमिम चाड मानेबेप्डा लम्डिम चङडा सु़का वो मेल्वापा बेसाका गुमी वो लम्डी। 11मे चाडडा यहूदीमिमका गुमीलाई माल्तो “मेराम मु़चु़ बान्ते बु?” र्वाक्तो हिलाबेबेम्डी।
12सेर्पा मु़चु़का सु़पील्वाका उनी दुथाम छो़म जेत्तोङा लेट्मिडी। कोङनिमका र्वाम्डी, “मेराम मु़चु़ जो़पा बु।” वाङमिमका र्वाम्डी, “मेएँ, गुका ने मु़चु़मिमलाई लु-फेले बु़मिम बु।” 13लावो यहूदीमिमकु ङिमका सु़का वो उनीमा दुथाम खोत्लेकु ङादोडा हाम वो मेर्वाम्वा।
चाडकाम थारीका येशूका सो़रनेम गोडा सीट्मिडिम
14चाडकु थेते बानो येशू सो़रनेम गोडा लम्डिमा सीमु चो़म्मिडी। 15यहूदीमिमका ङाङाया दु़म्मिडिमा आरे र्वाम्डी, “हाम वो मेसीसिसाका हेसाका ओराम आकोम छो़म थेट्पा दु़स्ता?”
16मेम्मा येशूका मेर्मिमलाई र्वाम्डी, “आमा सीसि आ त्वाकाम मेएँ, गोलाई थु़र्पा माम्चु़नीलाम रोक्पा सो़। 17कोङनिम मु़चु़का माम्चु़नीकु न होङङा बोमु न बु़ माला आमा सीसि माम्चु़नीलाम रोक्पा डे आ त्वाकाङा जेङुमिम डे मेराम गुका च। 18उ त्वापङा जेपा मु़चु़का उ त्वापलाई डोक्पु बेला सो़म्सिमु न बु़, लावो उहेमका गुलाई थु़र्पालाई डोक्पु बोमु खारी बु़, मेराम ने आच्छाङाकाम ल्वा जेपा सो़, मा मेरामनुङ हाम वो लिमा ल्वा मेदु़म। 19हाम मोशाका गानीलाई डु़म्ला ग्वाक्निमी मेएँ मा? मावो गानी सु़वो मेराम डु़म्ला होम्साका मेदोनी। हेङा गानी गोलाई सेन्मु माल्ङिनी?”
20सेर्पा मु़चु़का र्वाम्डी, “गानालाई मुनाङका हुप्नाम बु। गानालाई सु़का सेन्मु माल्तोङा बु़?”
21येशूका मेर्मिमनुङ र्वाम्डी, “हेल्लो वो मेल्वाम्मा कोले खारी गो बेउतोमा गानी खोत्ले ङाङाया दु़म्निम बु। 22मोशाका गानीलाई कोक्ते खिरिरि-क्रिपा डु़म्ला ग्वाक्निमिम बाइडा। (लावो मोशालामका ओराम रोक्ताम मेएँ, इकीमा बेब-पापलामका ओराम रोक्ताम।) मेम्मा वो ङेम्सिमुनेम गानी चो़च्चो़कु कोक्ते खिरिरि क्रिम्सानी।#उत १७:१०; लेवी १२:३ 23कोङ चो़च्चो़कु खिरिरि-क्रिप्सी ङेम्सिमुनेम बोनिमिम ने मोशाकु डु़म्लाकु कोर्थो़लाम मेदु़म माला ङेम्सिमुनेम कोले मु़चु़लाई खोत्ले उ मिरो़म सबेट्पुमिमडा हेङा गोनुङ छोक्चो बोनी?#यूह ५:९ 24ङाली रेप्साका मेएँ, जो़होमका निया बेनी।”
हाम येशूङा ख्रीष्ट?
25यरूशलेमडाम कोङनिम मु़चु़का आरे र्वाबोमु चो़म्मिडी, “डोक्पु मु़चु़मिमका सेन्मु माल्मिमिम ओराम मु़चु़ङा मेडे? 26रेप्नी, गुका ने खोत्लेकु ङादोडा जेत्तोङा लेडु़, ङाउमिमका गुलाई हाम वो मेर्वामी। गुमीङा ख्रीष्ट र्वाक्पा हाम मेर्मिमका मुलु़दुङकु बेम्डी? 27लावो ओराम मु़चु़ बालामका रोक्ताम मेराम गुइ च। ख्रीष्ट रोमिलो ने गुमी बालामका रोम्डिम मेराम सु़कावो मेच।”
28येशूका सो़रनेम गोनो सीट्मिडिलो डोक्पु लो़लामका र्वाम्डी, “गानी गोलाई छेङिनी, मा गो बालामका रोङडोम मेराम वो चनी। लावो गो आ त्वाकु नका योङडोम मेएँ, उहेमका गोलाई थु़र्ङिडिमी गुमी आच्छाङाकाम बुमी मा गानी गुमीलाई मेछेनी। 29लावो गो ने गुमीलाई छेपु, हेङालोने गो गुमीलामकाङा योङडोम सो़। मेम्मा गुमीका गोलाई इनीमाडा थु़र्ङिडिमिम सो़।”
30मेम्मा ङाउमिमका गुमीलाई चु़म्मु माल्मिडी, लावो सु़का वो गुमीडला ल्वा मेफिक्मिवा, हेङालोने उनीमा थारी आथावो रोक्ताम मेबायावा। 31आथावो सेर्पा मु़चु़मिमगोडाम हापा मु़चु़मिमका गुमीडला थो़रलु़म्डी। मेम्मा मेर्मिमका र्वाम्डी, “ख्रीष्ट योमिलो ओराम मु़चु़का बु़डु़मडाम वो हाम हापा डोक्पु यु़मखारीमिम बोमी मा?”
32सेर्पा मु़चु़का सु़पील्वाका ओराम ल्वा जेम्डिम बाम्डिम फरिसीमिमका थो़म्डी। मेम्मा फरिसी नुङ ङाउ डु़म्लाचो़मिमका येशूलाई चु़म्मु लागि सो़रनेम लपा मु़चु़मिमलाई थु़र्मिडी।
33येशूका मेर्मिमलाई र्वाम्डी, “गानीनुङ गो किचो़ कोङङा बुङु, मेम्मा गोलाई थु़र्पाकाडा लङु। 34गानी गोलाई माल्ङिनी, लावो मेल्वाङिनी, मा गो बान्ते दु़म्ङु मेसिन्डा गानी रोमु मेचाम्नी।”
35यहूदीमिम उनी त्वाप-त्वापडा र्वाबेम्डी, “ओराम मु़चु़ बान्ते लमु खाप्डु़, मा गुइ ओरामलाई ल्वामु मेचाप्सी? हाम ओराम मु़चु़ ग्रीक मु़चु़मिम गोडा फोन्सिक्पा यहूदीमिमकाडा लमा ग्रीक मु़चु़मिमलाई सीडु़मिमिम? 36गुका, ‘गानी गोलाई माल्ङिनी लावो मेल्वाङिनी, मा गो बान्ते दु़म्ङु, गानी रोमु मेचाम्नी’ आरे र्वाक्ताम हाम र्वाक्ताम?”
येशूका माम्चु़नी-पेलकु दुथाम र्वाम्डिम
37चाड हुक्पानेम, मेराम ने चाडकु डोक्पु थारीनेम येशू येम्सिम्डिमा डोक्पु लो़लामका र्वाम्डी, “कोङनिम मु़चु़ कोरा सिपा बु माला आमाडा रोनु़, मा डुङ्नु़।#लेवी २३:३६ 38उहेम मु़चु़का गोडला थो़र बु़, माम्चु़नीकु सिजेमका र्वामिम होङङा मेसिपा त्वारो़म ग्वाक्पा कोर्कु मेरामकु गोलामका पु़डु़।”#इज १४:८ 39गुमीका ओराम ल्वा माम्चु़नी-पेलकु दुथाम सो़म्डिम बाइडा। मे माम्चु़नी-पेल गुमीडा थो़र लु़पा मु़चु़मिमका ल्वामु खाप्मिमिम बाइडा। ओम्लोसम्म वो माम्चु़नीका मेर्मिमडला पेल थु़र्मीडिम मेबायावा, हेङालोने आथावो येशूकु यु़म मेझ्वासिक्थेङा बाइडा।
40येशूकु सिजेम थो़पा कोङनिम मु़चु़का र्वाम्डी, “ओराम मु़चु़ ने आच्छाङा माम्चु़नीलाम-जेपाङा सो़।”
41याङका र्वाम्डी, “गु ख्रीष्ट।” आथावो कोङ-कोङका र्वाम्डी, “हाम ख्रीष्ट गालीललामका रोमी मा? 42माम्चु़नीकु सिजेमका जो़होमका र्वाक्ताम बु, दाऊद हप गस्ताम देल बेथलेहेमडा, दाऊद हपकु चो़-चु़सु़मिमलामका ख्रीष्ट गमी।”#२ शमू ७:१२; मीका ५:२ 43मेम्मिमका येशूकु दुथाम मु़चु़मिम गो-फ दु़म्मिडी। 44कोङनिमका ने गुमीलाई चु़म्मु वो माल्मिडी, लावो सु़का वो गुमीडला ल्वा मेफिक्मिवा।
यहूदी ङाउमिमका येशूडा थो़र मेलु़मिवाम
45सो़रनेम लपा मु़चु़मिम येशूलाई मेचु़म्साकाङा ख्लोम्सीम्डिमा फरिसी नुङ ङाउ डु़म्लाचो़मिमका हिलाबेम्डी, “मेरामलाई गानी हेङा मेरेट्निवाम?”
46सो़रनेम लपा मु़चु़मिमका र्वाम्डी, “मेराम मु़चु़का जेस्ताम होङङा सु़का वो जेम्डिम थो़त्तोकोम मिबु।”
47फरिसीमिमका मेर्मिमलाई नालेडात्तो र्वाम्डी, “गानी वो ताङताहेरथो़ लक्नी डे हाम ने? 48हाम ङाउमिमका डे फरिसीमिमगोडाम कोङनिमका डे गुडला थो़र लु़म्डिम बु? 49लावो डु़म्ला मेथेट्पा ओर्मिम सेर्पा मु़चु़, मेर्मिमका वाइतो ल्वामी।”
50मेकोतिमा मेर्मिमगोडाम कोले ङाउ, ङादो येशूलाई क्रो़म्पा निकोदेमसका र्वाक्ता, 51“मु़चु़का हाम बु़डु़म, मेराम डार्मु लागि गुका र्वामिम ल्वा ङादो मेथो़साकाङा हाम इकी डु़म्लाका कोङनिमलाई मुमा बेडु़?”
52मेर्मिमका गुलाई र्वाम्डी, “हाम गाना वो गालील क्षेत्रडामङा? माम्चु़नीकु सिजेमडा रेप्डा, मा माम्चु़नीलाम-जेपा मु़चु़ गालीलामका मेरो र्वाक्पा गाना डार्ना।” 53मेकोतिमा खोत्ले मु़चु़मिम उनी नेम-नेम लम्डी।
Okuqokiwe okwamanje:
यूहन्ना 7: THUL
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Wycliffe Bible Translators, Inc. All rights reserved.
यूहन्ना 7
7
येशूडला थो़र मेलु़पा उनीमा ल्वाकमिम
1ओराम चङडा, येशू गालील क्षेत्रबाडे खोत्लेथो़ खिर्सिम्डी। गुमीका यहूदिया क्षेत्रडाम वाङथो़ङा बाट्पा न बेम्डी। हेङालोने मेसिन्डा यहूदीमिमका गुमीलाई सेन्मु माल्तोङा लेट्मिडी। 2लावो गोठाडा बाखोप यहूदीमिमकु चाड रोक्फाड्डाम बाइडा,#लेवी २३:३४; व्य १६:१३ 3येशूकु ल्वाकमिमका गुमीलाई र्वाम्डी, “ओलामका लुक्नीमा यहूदिया क्षेत्रथो़ लक्नी, मेम्मा गानी बोनिमिम यु़म-खारीमिम इनी सीसिपामिमका ल्वामिनु़। 4जो़पा नङ फोन्सिमु द्वाक्पा सु़का वो मेल्वाखोपडा खारी मेबु़। गानी ओर्मिम खारी बोनी माला सु़म्दिसेरडाम मु़चु़काडा इनी त्वापङा रेम्बेन्सिट्नी।” 5हेङालोने येशूकु ल्वाकमिमका वो गुमीडला थो़र मेलु़म्थाल्मिवा।
6येशूका मेर्मिमलाई र्वाम्डी, “आमा लागि जो़पा थारी आथावो रोक्ताम मिबु, इनीमा लागि ने उहेम थारी लोवो जो़पाङा बु। 7गानीलाई मेद्वाक्पा मु़चु़ सु़म्दिसेरडा सु़वो मेबुमी। लावो सु़म्दिसेरडाम मु़चु़मिमका गोलाई ने मेद्वाङिमी, हेङालोने मेर्मिमकु खारी बेसी मेजो़पा बु र्वाक्साका गो सो़उ। 8गानी ओराम चाड मानेबेप्डा लक्नी। गो ने ओराम चाडडा मेलङु, हेङालोने आमा थारी आथावो रोक्ताम मिबु।” 9मेर्मिमलाई आरे र्वाम्डिमा गुमी गालीलथो़ङा बाम्ल्याम्डी।
10लावो येशूकु ल्वाकमिम चाड मानेबेप्डा लम्डिम चङडा सु़का वो मेल्वापा बेसाका गुमी वो लम्डी। 11मे चाडडा यहूदीमिमका गुमीलाई माल्तो “मेराम मु़चु़ बान्ते बु?” र्वाक्तो हिलाबेबेम्डी।
12सेर्पा मु़चु़का सु़पील्वाका उनी दुथाम छो़म जेत्तोङा लेट्मिडी। कोङनिमका र्वाम्डी, “मेराम मु़चु़ जो़पा बु।” वाङमिमका र्वाम्डी, “मेएँ, गुका ने मु़चु़मिमलाई लु-फेले बु़मिम बु।” 13लावो यहूदीमिमकु ङिमका सु़का वो उनीमा दुथाम खोत्लेकु ङादोडा हाम वो मेर्वाम्वा।
चाडकाम थारीका येशूका सो़रनेम गोडा सीट्मिडिम
14चाडकु थेते बानो येशू सो़रनेम गोडा लम्डिमा सीमु चो़म्मिडी। 15यहूदीमिमका ङाङाया दु़म्मिडिमा आरे र्वाम्डी, “हाम वो मेसीसिसाका हेसाका ओराम आकोम छो़म थेट्पा दु़स्ता?”
16मेम्मा येशूका मेर्मिमलाई र्वाम्डी, “आमा सीसि आ त्वाकाम मेएँ, गोलाई थु़र्पा माम्चु़नीलाम रोक्पा सो़। 17कोङनिम मु़चु़का माम्चु़नीकु न होङङा बोमु न बु़ माला आमा सीसि माम्चु़नीलाम रोक्पा डे आ त्वाकाङा जेङुमिम डे मेराम गुका च। 18उ त्वापङा जेपा मु़चु़का उ त्वापलाई डोक्पु बेला सो़म्सिमु न बु़, लावो उहेमका गुलाई थु़र्पालाई डोक्पु बोमु खारी बु़, मेराम ने आच्छाङाकाम ल्वा जेपा सो़, मा मेरामनुङ हाम वो लिमा ल्वा मेदु़म। 19हाम मोशाका गानीलाई डु़म्ला ग्वाक्निमी मेएँ मा? मावो गानी सु़वो मेराम डु़म्ला होम्साका मेदोनी। हेङा गानी गोलाई सेन्मु माल्ङिनी?”
20सेर्पा मु़चु़का र्वाम्डी, “गानालाई मुनाङका हुप्नाम बु। गानालाई सु़का सेन्मु माल्तोङा बु़?”
21येशूका मेर्मिमनुङ र्वाम्डी, “हेल्लो वो मेल्वाम्मा कोले खारी गो बेउतोमा गानी खोत्ले ङाङाया दु़म्निम बु। 22मोशाका गानीलाई कोक्ते खिरिरि-क्रिपा डु़म्ला ग्वाक्निमिम बाइडा। (लावो मोशालामका ओराम रोक्ताम मेएँ, इकीमा बेब-पापलामका ओराम रोक्ताम।) मेम्मा वो ङेम्सिमुनेम गानी चो़च्चो़कु कोक्ते खिरिरि क्रिम्सानी।#उत १७:१०; लेवी १२:३ 23कोङ चो़च्चो़कु खिरिरि-क्रिप्सी ङेम्सिमुनेम बोनिमिम ने मोशाकु डु़म्लाकु कोर्थो़लाम मेदु़म माला ङेम्सिमुनेम कोले मु़चु़लाई खोत्ले उ मिरो़म सबेट्पुमिमडा हेङा गोनुङ छोक्चो बोनी?#यूह ५:९ 24ङाली रेप्साका मेएँ, जो़होमका निया बेनी।”
हाम येशूङा ख्रीष्ट?
25यरूशलेमडाम कोङनिम मु़चु़का आरे र्वाबोमु चो़म्मिडी, “डोक्पु मु़चु़मिमका सेन्मु माल्मिमिम ओराम मु़चु़ङा मेडे? 26रेप्नी, गुका ने खोत्लेकु ङादोडा जेत्तोङा लेडु़, ङाउमिमका गुलाई हाम वो मेर्वामी। गुमीङा ख्रीष्ट र्वाक्पा हाम मेर्मिमका मुलु़दुङकु बेम्डी? 27लावो ओराम मु़चु़ बालामका रोक्ताम मेराम गुइ च। ख्रीष्ट रोमिलो ने गुमी बालामका रोम्डिम मेराम सु़कावो मेच।”
28येशूका सो़रनेम गोनो सीट्मिडिलो डोक्पु लो़लामका र्वाम्डी, “गानी गोलाई छेङिनी, मा गो बालामका रोङडोम मेराम वो चनी। लावो गो आ त्वाकु नका योङडोम मेएँ, उहेमका गोलाई थु़र्ङिडिमी गुमी आच्छाङाकाम बुमी मा गानी गुमीलाई मेछेनी। 29लावो गो ने गुमीलाई छेपु, हेङालोने गो गुमीलामकाङा योङडोम सो़। मेम्मा गुमीका गोलाई इनीमाडा थु़र्ङिडिमिम सो़।”
30मेम्मा ङाउमिमका गुमीलाई चु़म्मु माल्मिडी, लावो सु़का वो गुमीडला ल्वा मेफिक्मिवा, हेङालोने उनीमा थारी आथावो रोक्ताम मेबायावा। 31आथावो सेर्पा मु़चु़मिमगोडाम हापा मु़चु़मिमका गुमीडला थो़रलु़म्डी। मेम्मा मेर्मिमका र्वाम्डी, “ख्रीष्ट योमिलो ओराम मु़चु़का बु़डु़मडाम वो हाम हापा डोक्पु यु़मखारीमिम बोमी मा?”
32सेर्पा मु़चु़का सु़पील्वाका ओराम ल्वा जेम्डिम बाम्डिम फरिसीमिमका थो़म्डी। मेम्मा फरिसी नुङ ङाउ डु़म्लाचो़मिमका येशूलाई चु़म्मु लागि सो़रनेम लपा मु़चु़मिमलाई थु़र्मिडी।
33येशूका मेर्मिमलाई र्वाम्डी, “गानीनुङ गो किचो़ कोङङा बुङु, मेम्मा गोलाई थु़र्पाकाडा लङु। 34गानी गोलाई माल्ङिनी, लावो मेल्वाङिनी, मा गो बान्ते दु़म्ङु मेसिन्डा गानी रोमु मेचाम्नी।”
35यहूदीमिम उनी त्वाप-त्वापडा र्वाबेम्डी, “ओराम मु़चु़ बान्ते लमु खाप्डु़, मा गुइ ओरामलाई ल्वामु मेचाप्सी? हाम ओराम मु़चु़ ग्रीक मु़चु़मिम गोडा फोन्सिक्पा यहूदीमिमकाडा लमा ग्रीक मु़चु़मिमलाई सीडु़मिमिम? 36गुका, ‘गानी गोलाई माल्ङिनी लावो मेल्वाङिनी, मा गो बान्ते दु़म्ङु, गानी रोमु मेचाम्नी’ आरे र्वाक्ताम हाम र्वाक्ताम?”
येशूका माम्चु़नी-पेलकु दुथाम र्वाम्डिम
37चाड हुक्पानेम, मेराम ने चाडकु डोक्पु थारीनेम येशू येम्सिम्डिमा डोक्पु लो़लामका र्वाम्डी, “कोङनिम मु़चु़ कोरा सिपा बु माला आमाडा रोनु़, मा डुङ्नु़।#लेवी २३:३६ 38उहेम मु़चु़का गोडला थो़र बु़, माम्चु़नीकु सिजेमका र्वामिम होङङा मेसिपा त्वारो़म ग्वाक्पा कोर्कु मेरामकु गोलामका पु़डु़।”#इज १४:८ 39गुमीका ओराम ल्वा माम्चु़नी-पेलकु दुथाम सो़म्डिम बाइडा। मे माम्चु़नी-पेल गुमीडा थो़र लु़पा मु़चु़मिमका ल्वामु खाप्मिमिम बाइडा। ओम्लोसम्म वो माम्चु़नीका मेर्मिमडला पेल थु़र्मीडिम मेबायावा, हेङालोने आथावो येशूकु यु़म मेझ्वासिक्थेङा बाइडा।
40येशूकु सिजेम थो़पा कोङनिम मु़चु़का र्वाम्डी, “ओराम मु़चु़ ने आच्छाङा माम्चु़नीलाम-जेपाङा सो़।”
41याङका र्वाम्डी, “गु ख्रीष्ट।” आथावो कोङ-कोङका र्वाम्डी, “हाम ख्रीष्ट गालीललामका रोमी मा? 42माम्चु़नीकु सिजेमका जो़होमका र्वाक्ताम बु, दाऊद हप गस्ताम देल बेथलेहेमडा, दाऊद हपकु चो़-चु़सु़मिमलामका ख्रीष्ट गमी।”#२ शमू ७:१२; मीका ५:२ 43मेम्मिमका येशूकु दुथाम मु़चु़मिम गो-फ दु़म्मिडी। 44कोङनिमका ने गुमीलाई चु़म्मु वो माल्मिडी, लावो सु़का वो गुमीडला ल्वा मेफिक्मिवा।
यहूदी ङाउमिमका येशूडा थो़र मेलु़मिवाम
45सो़रनेम लपा मु़चु़मिम येशूलाई मेचु़म्साकाङा ख्लोम्सीम्डिमा फरिसी नुङ ङाउ डु़म्लाचो़मिमका हिलाबेम्डी, “मेरामलाई गानी हेङा मेरेट्निवाम?”
46सो़रनेम लपा मु़चु़मिमका र्वाम्डी, “मेराम मु़चु़का जेस्ताम होङङा सु़का वो जेम्डिम थो़त्तोकोम मिबु।”
47फरिसीमिमका मेर्मिमलाई नालेडात्तो र्वाम्डी, “गानी वो ताङताहेरथो़ लक्नी डे हाम ने? 48हाम ङाउमिमका डे फरिसीमिमगोडाम कोङनिमका डे गुडला थो़र लु़म्डिम बु? 49लावो डु़म्ला मेथेट्पा ओर्मिम सेर्पा मु़चु़, मेर्मिमका वाइतो ल्वामी।”
50मेकोतिमा मेर्मिमगोडाम कोले ङाउ, ङादो येशूलाई क्रो़म्पा निकोदेमसका र्वाक्ता, 51“मु़चु़का हाम बु़डु़म, मेराम डार्मु लागि गुका र्वामिम ल्वा ङादो मेथो़साकाङा हाम इकी डु़म्लाका कोङनिमलाई मुमा बेडु़?”
52मेर्मिमका गुलाई र्वाम्डी, “हाम गाना वो गालील क्षेत्रडामङा? माम्चु़नीकु सिजेमडा रेप्डा, मा माम्चु़नीलाम-जेपा मु़चु़ गालीलामका मेरो र्वाक्पा गाना डार्ना।” 53मेकोतिमा खोत्ले मु़चु़मिम उनी नेम-नेम लम्डी।
Okuqokiwe okwamanje:
:
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Wycliffe Bible Translators, Inc. All rights reserved.