Lucas 17
17
ꞌUchati rabanan bërúanracati bana
(Mt 18.6-7, 21-22; Mr 9.42)
1Jesusan ca aín ꞌunánmicë unicama cacëxa:
—Camabi nëtënu ca an uni itsi ꞌatima ñu ꞌanun quixun sinánmicë uni ꞌiti ꞌicën. Usa ꞌaínbi ca an sinánmiquin bëtsi uni ꞌatima ñu ꞌamicë, ax ꞌuchañuira ꞌaish ꞌaisamaira oquin castícancë ꞌiti ꞌicën. 2An ꞌënan ꞌaíshbia ꞌëmi cushiiracëma pain ꞌicën, a uni ꞌuchamicë uni ax ca ꞌuchañuira ꞌicën. A unix ca anun ñu rënti maxax ami tëtëcërëcatancëxuan parúnpapa nëbë́tsi nicë́xa nanë́cësamaira oi ꞌatimaira ocë ꞌiti ꞌicën. 3Usaquin uni ꞌuchamiti rabanan camina bërúancati ꞌain.
Axa mix ꞌicësaribiti Nucën Papa Diosmi sináncë uníxa mimi ꞌuchaia camina —ësai camina ꞌëmi ꞌucha —quixun caquin sinanamiti ꞌain. Usocëxa sinanatia camina mimia ꞌuchacë a abë mëníonanquin manumiti ꞌain. 4Achúshi nëtën, mëcën achúshi ꞌimainun rabë́ oi, mimi ꞌuchatancëxbi minu cuanxuan —cana mimi ꞌuchatëcënima —quixun a unin cacëxun camina abë mëníonanquin a manumiti ꞌain.
Axa ami catamëcë uni ca Jesusan ꞌaquinia quicë bana
5Aín ꞌunánmicë unicaman ca Nucën ꞌIbu Jesús cacëxa:
—Nux Nucën Papa Diosmi catamëti ꞌicëbi camina asérabi, upitiira ami catamënun nu ꞌaquinti ꞌain.
6Cacëxun ca Jesusan cacëxa:
—Mostaza bëru ax ca chamaratsu ꞌicën. Asaribi ꞌaish ꞌitsamaratsushi Nucën Papa Diosmi sináncë ꞌixun, ënë ñu cana ꞌatima ꞌai quixun sináncëbëtanbi ca mitsúnmi a ñucácëxun mitsu ꞌaxunti ꞌicën. Mitsux ami ꞌitsamashi catamëcë ꞌixunbimi ënë i, ënuax ca ëchiquit, parunpapanu ca tacut, cacëx ca usai ꞌiti ꞌicën.
Aín unían Nucën Papa Dios ñu ꞌaxunti bana
7Jesusan ca ësaquinribi aín ꞌunánmicë unicama cacëxa:
—Ësa ca. Uinu ꞌicë unin cara an a ñu mëëxuncë uni naënuxun ñu mëëanan ꞌaracacë ñuina bërúanbaiti xubunu aia, nëri uax ca mesanu pi tsót, quixun caimá. 8Usaquin caquinma ca ësaquin caia: ꞌËn piti ꞌaruanan a xëati ñuribi mëníotancëxun ca pinun ꞌë bëxun. ꞌËn pain pian camina minribi pianan xëati ꞌain. Usaquin ca caia. 9An mi ñu mëëxuncë unían min cacësabi oquin ꞌaiabimi ꞌaisamaira oquin —asábi ca —quixun catima ca asábi ꞌicën. 10Usaribi oquin Nucën Papa Diosan a ꞌanun mitsu cacë ñu ꞌatancëx camina mitsux raíribë ësai cananti ꞌain: “Cananuna an nu ꞌamicëxun ꞌati ñucamaishi ꞌan. Usa ꞌaían Nucën Papa Diosan ꞌaisamaira oquin nu rabitima ca asábi ꞌicën”.
Mëcën rabë axa an aín nami chëquímicë ꞌinsínñu unia Jesusan pëxcüa
11Jerusalénu cuani ca Samaria me ꞌimainun Galilea meribi nëtábiani Jesús cuancëxa. 12Cuanx achúshi ëmanu bëbaia ca axa an aín nami chëquímicë ꞌinsínñu uni mëcën rabë́, an Jesús aia bëñai cuaníbi ꞌura sëtëracëacëxa. 13Usai sëtëracëquin ca munuma banaquin cacëxa:
—Jesús, nu ca ꞌaquin.
14Cacëxun isquin ca Jesusan cacëxa:
—Ca cuantan. Cuanxun ca judíos sacerdote usaími ꞌicë ismianan mitsun nami ismitan.
Usoquin cacëx cuaníbi ca atun nami chëquicëcama pëxcúacëxa. 15Usaquian pëxcucë isi cuëënquin ca acama achúshinën Jesúsnu cuantëcënquin Nucën Papa Dios munuma banaquin rabiacëxa. 16Rabiquin ca a tanáin rantin puruni tsóbuti bëúnpucuquin —ca asábi ꞌicë —quixun Jesús cacëxa. An usoquin cacë uni ax ca Samarianu ꞌicë uni ꞌiacëxa. 17Usaquin isi ca Jesús quiacëxa:
—Mëcën rabë́ unicama cana pëxcüan. ¿Acama achúshinëxëshia —asábi ca —quixun ꞌë cai uánbi cara uinu raíri ꞌic? 18¿Judíos unima, Samaritano, ënë́xëshi cara Nucën Papa Dios rabiquin —ca asábi ꞌicë —quixun ꞌë cai uax?
19Usai quitancëxun ca Jesusan Samarianu ꞌicë uni cacëxa:
—ꞌËn mi pëxcuti sinani ꞌëmi catamëti camina pëxcúan. Niruquiani ca cuantan.
—Axa ꞌëmi catamëcë unicama Nucën Papa Diosan ainan ꞌimiti ca ësa ꞌiti ꞌicë —quiáxa Jesús quicë bana
(Mt 24.23-28, 36-41)
20—¿Uínsarainra cara anúan Nucën Papa Dios aín unicaman ꞌapu ꞌiti nëtë ꞌiti ꞌic? —quixun fariseo unicaman ñucácëxun ca ësoquin Jesusan cacëxa:
—Nucën Papa Diosan, uni ainan ꞌimia ca unin aín bërúnbi istima ꞌicën. 21Usa ꞌain ca uni quitima ꞌicën, —ca is, ënu ca Nucën Papa Dios ꞌicën, unu ca —quiax. Nucën Papa Dios, ax aín ꞌApu ꞌaish ca axa ꞌëmi catamëcë unicamabë ꞌicën.
22Usoquin atu catancëxun ca Jesusan aín ꞌunánmicë unicamaribishi cacëxa:
—Uni ꞌinux uá ꞌaish ꞌëx Nucën Papa Diosnu cuantancëx utëcëncëma pan ꞌain, camina ꞌëx anun mitsubë ꞌitëcënti nëtë istisa tanti ꞌain. A nëtëcama achúshinën ꞌë istisaira tanquinbi camina mitsun ꞌë istima pan ꞌain. 23Unin ca ꞌë ñuiquin mitsu cati ꞌicën, —ca unu ꞌicë —canan —ca ënu ꞌicë —quixun. Cacëxbi camina isí abë cuantima ꞌain. 24Mëríquin ca canacan camabi naicamëꞌëo pëcaia. Usaribi ca uni ꞌinux Nucën Papa Diosnuax uá ꞌaish, ꞌëx utëcënti ꞌiti ꞌicën. 25ꞌËn Papanu cuancëma pan ꞌixun cana unían bëtsi bëtsi ocëxun paë tanti ꞌain. ꞌImainun ca ënë nëtënua bucucë unicaman ꞌë timaquin ꞌën bana cuaisama tanti ꞌicën. 26Bëráma Noé ꞌiá nëtë usaribiti ca uni ꞌinux Nucën Papa Diosnuax uá ꞌaish, ꞌëx utëcënti nëtën ꞌiti ꞌicën. 27Anúan aín nuntinu ꞌiruti nëtë utámainun Noénën anun ië́ti nunti cha ꞌamainun ca unicaman pianan xëanan xanu bianan aín bëchicë bënumianan an ꞌacësabi oquin cuëënquin ñu ꞌacëxa. Usaquian ꞌamainun anúan Noé aín nuntinu ꞌiruti nëtë sënë́ncëbë ca ꞌaisamaira ꞌuí ꞌibúcëbë, baca ꞌaisamaira ꞌëi nuntaruquin ñucamacëñunbi unicama cëñuacëxa. 28Noé ꞌaían ꞌiá usaribiti ca anun Lot ꞌiá nëtë ꞌiacëxa. Anu Lot ꞌicë ëma, Sodoma cacë, anu ꞌicë unicaman ca pianan xëanan ñu maruanan, atun naënuxun ñu ꞌapánan xubucama ꞌacëxa. 29Usaquian ꞌamainun ca anúan Lot anuax cuanti nëtë ꞌicëbëtan, Nucën Papa Diosan tsi ꞌimainun azufre rëquirucë ꞌibúmiquin acama cëñuacëxa. 30Lot ꞌaían ꞌiá usaribiti ca uni ꞌinux Nucën Papa Diosnuax uá ꞌaish, ꞌëx anun utëcënti nëtë, anúan camabi unin ꞌë isti, ax ꞌiti ꞌicën.
31A nëtë ꞌicëbë ca axa aín xubu ëman tsócë unicamax aín ñucama aín xubunu ꞌaínbi a bitsi cuantëcëntima ꞌicën. Aín naënuxuan ñu mëëcë unicamaxribi ca aín xubunu cuantëcëntima ꞌicën. 32Caxu bësuquin isi cara Lotnën xanu uisai ꞌiacëxa quixun camina manuquinma sinánti ꞌain. 33Uix cara aín cuëëncësa oquin ꞌai ënë nëtënu upitax tsótishi sinania ax ca Nucën Papa Diosnan ꞌitima ꞌicën. Usa ꞌaínbi ca uinu ꞌicë unin cara ënë nëtënushi upitax tsóti sinánquinma ꞌëx quicësabi oquin ꞌaia ax ainan ꞌaish Nucën Papa Diosan nëtënu abë ꞌiti ꞌicën.
34ꞌËn cana mitsu cain, ꞌëx ucëbë ca ësai ꞌiti ꞌicën: a imë́a rabë́ uni anu ꞌuxtinu racácë, achúshi ꞌëbëa ꞌinun bicë ca achúshi anubi ëncë ꞌiti ꞌicën. 35Usaribiti ca rabë́ xanúxa ñu rëni tsócë, achúshi ꞌëbëa ꞌinun bimainun achúshi anubi ëncë ꞌiti ꞌicën. 36ꞌImainun ca rabë́ unían aín naënuxun ñu mëëia achúshi ꞌëbëa ꞌinun bimainun ca achúshi anubi ëncë ꞌiti ꞌicën.
37Cacëxun ca aín ꞌunánmicë unicaman Jesús ñucáquin cacëxa:
—¿Uinuax cara usai ꞌiti ꞌic?
Quia ca Jesusan cacëxa:
—Unix ca quia, uinu cara ñuina bamacë ꞌicë anu ca xëtë cëñúbuti ꞌicën. Usai ca ꞌiti ꞌicën.
Okuqokiwe okwamanje:
Lucas 17: cbrPB
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 1978, 1995, 2008, 2022 Wycliffe Bible Translators, Inc. All rights reserved.