Иоан 19
19
1Сэк Пилатыс тшӧктіс Исуссӧ виззьыны-шулявны. 2Воиннэс кыйисӧ желля шатись юркытш, кышалісӧ сійӧ Исусыслӧ юр вылас, пасьтӧтісӧ пемыт-гӧрд паськӧмӧ. 3Нія шувлісӧ: «Дыр Тэныт юравны#19:3 Грек кыв вылын «Гажӧтчы!» (Роч Синодальнӧй Библияын «Радуйся») ─ эта кывсӧ висьтавлісӧ ӧксулӧ отир одзӧ петӧм коста. Коми отир висьталісӧ бы «Дыр тэныт юравны!», Иудейезлӧн Ӧксу!» Асьныс сӧталісӧ Сылӧ чужӧмас.
4Пилатыс бӧра петіс да шуис: «Ме петкӧта Сійӧ тіян одзӧ. Тійӧ тӧдӧ: ме ог адззы Сы сайын некытшӧм умӧль керӧм». 5Сэк Исусыс петіс желля шатись кыйӧм юркытша да пемыт-гӧрд ӧксу паськӧма. Пилатыс нылӧ шуис: «То Сія Мортыс!» 6Аркирейес да Вежа Керку сьӧрын видзӧтіссес казялісӧ Исуссӧ да пондісӧ горӧтны: «Дор Сійӧ крест вылӧ, дор!» Пилатыс нылӧ шуис: «Асьныт босьтӧ Сійӧ да дорӧ. А ме эг адззы Сы сайын умӧль керӧмсӧ».
7Иудейес сылӧ висьталісӧ: «Миян эм Туйдӧт. Туйдӧтным сьӧрті Сылӧ колӧ кувны, мыля Сія Асьсӧ пуктіс Ен Зонӧ».
8Сійӧ кылӧмсянь Пилатыс ӧддьӧнжык повзис. 9Сія пырис да Исусыслісь юаліс: «Кытісь Тэ?» Исусыс сэтчӧ шы эз сет. 10Пилатыс шуис Сылӧ: «Мекӧт он мӧд баитны? Он разь тӧд: ме верма Тэнӧ дорны крест вылӧ, верма и лэдзны?» 11Исусыс шуис: «Тэ Мекӧт нем бы эн вермы керны, эз кӧбы вӧв тэныт сетӧм вылісянь. Сійӧн унажык умӧль керӧмыс Менӧ тэныт вузалісь вылын».
12Сія кадсянь Пилатыс мӧдіс лэдзны Исуссӧ. Иудейес тай горӧтлісӧ: «Лэдзан кӧ Сійӧ, сэк Римись ӧксулӧ тэ абу ёрт. Кин сувтӧтӧ асьсӧ ӧксуӧн, сія Римись ӧксулӧ умӧльсӧ керӧ».
13Сійӧ кылӧм бӧрын Пилатыс Исуссӧ петкӧтіс. Ачыс пуксис судитісьлӧн пукалан вылӧ. Сійӧ судитанінсӧ шуисӧ Лифострот#19:13 Лифострот ─ грек кыв вылын сідз шуисӧ судитанін, кӧда сулаліс вӧвдӧм иззэз вылын, а еврей кыв вылын сійӧ шуисӧ Гаввафа. 14Эта вӧлі Ыджыт лун одзын луншӧр гӧгӧрас. Пилатыс иудейеслӧ висьталіс: «То тіян Ӧксуныт!» 15Мӧддэс горӧтісӧ: «Вий Сійӧ, вий! Дор крест вылӧ!» Пилатыс нылісь юаліс: «Тіянлісь Ӧксунытӧ дора?» Аркирейес висьталісӧ: «Римись ӧксуся миян абу мӧдік ӧксу».
Исуссӧ крест вылӧ дорӧм
(Мт. 27:32-44; Мк. 15:21-32; Лк. 23:26-43)
16Сэк Пилатыс Исуссӧ сетіс нылӧ дорны крест вылӧ. Нія Сійӧ кутісӧ да нуӧтісӧ. 17Исусыс Ачыс нуӧтіс крестсӧ. Сія локтіс Юр лы#19:17 юр лы ─ череп нима керӧс вылӧ. Юр лы ─ еврей кыв вылын лоӧ Голгофа. 18Сэтчин дорисӧ Сійӧ крест вылӧ. Сыкӧт ӧтлаын дорисӧ кык мортӧс. Ӧтсӧ ─ ӧт ладорас, мӧдсӧ ─ мӧд ладорас. Ны шӧрын вӧлі Исусыс. 19Пилатыс тшӧктіс гижны: «Назаретісь Исус, иудейезлӧн Ӧксу». Сійӧ гижӧтсӧ ӧшӧтісӧ крест вылас. 20Сійӧ гижӧмсӧ лыддьӧтісӧ ӧддьӧн уна иудейез. Исусыс эд вӧлі дорӧм кар дынас матын. Гижӧмыс вӧлі еврей, грек да латин кыввез вылын. 21Аркирейес висьталісӧ Пилатыслӧ: «Эн гиж "Иудейезлӧн Ӧксу", гиж сідз: "Сія висьталіс, Ме пӧ иудейезлӧн Ӧксу"». 22Пилатыс шуис: «Мый гижи, сійӧ и гижи».
23Исуссӧ крест вылӧ дорӧм бӧрын воиннэс босьтісӧ Сылісь паськӧмсӧ да торйӧтісӧ нёль морт коласын. Сылӧн йӧрнӧсыс эз вӧв вурӧм, вӧлі вылісянь улӧдз кыйӧм. 24Сійӧн ӧтамӧдныслӧ висьталісӧ: «Йӧрнӧссӧ огӧ пондӧ косявлыны, а босьтам кыскӧм сьӧрті#19:24 кыскӧм сьӧрті ─ по жребию, кинлӧ дӧнзяс». Аркмис Вежа Гижӧтын висьталӧм сьӧрті:
─ Торйӧтісӧ Менчим паськӧмӧс ас коласаныс.
Менчим паськӧмӧс янсӧтісӧ кыскӧм сьӧрті.
Воиннэс сідз и керисӧ.
25Крестыс дынын сулалісӧ Исуслӧн Мамыс, Мамыслӧн сойыс, Клеоплӧн Мария иньыс да Магдала Мария. 26Исусыс казяліс Мамсӧ да велӧтчисьсӧ, кӧдӧ Сія радейтіс. Сія Мамыслӧ шуис: «Мортіньӧй, сія Тэнат зон!» 27Сэсся висьталіс велӧтчисьыслӧ: «Сія тэнат Мам!» Сія кадсянь велӧтчисьыс босьтіс Исуслісь Мамсӧ дынас.
Исуслӧн кулӧм
(Мт. 27:45-56; Мк. 15:33-41; Лк. 23:44-49)
28Исусыс тӧдіс, быдӧс ни керсис. Сія шуис: «Горшӧ косьмӧ». Сідз быдӧс и керсис, кыдз вӧлі висьталӧм Вежа Гижӧтын. 29Матын сэтӧн сулаліс шӧма винаӧн доз. Воиннэс юанас боссьӧтісӧ губка#19:29 губка ─ саридз пыдӧсын быдмас кодь олісь, сійӧ косьтывлісӧ да видзисӧ, кытчӧ колӧ, кышалісӧ иссоп за бердӧ да вайӧтісӧ Исуслӧ ӧм дынас. 30Исусыс тырпыштіс юансӧ да шуис: «Аркмис!» Сэсся ӧшӧтіс юрсӧ да лэдзис ловсӧ.
31Сэк вӧлі шоччисян лун одзын рыт. Иудейез сьӧрті шойесӧ эз туй кольны кресттэз вылын шоччисян лунӧ, а локтан шоччисян лунӧ вӧлі Ыджыт лун. Сійӧн Иудейес корисӧ, медбы Пилатыс лэдзис крест вылӧ дорӧммеслісь чеглавны кокгумаэзнысӧ#19:31 кокгума ─ голень да лэдзны нійӧ кресттэс вылісь. 32Воиннэс локтісӧ. Нія чеглалісӧ кокгумаэзнысӧ Исускӧт кыкнан дорӧмыслісь. 33Сибӧтчисӧ Исусыс дынӧ да казялісӧ, Сія кулӧм ни. Сылісь кокгумаэсӧ эзӧ пондӧ чеглавны. 34Ӧтікыс ны коласісь шысӧ#19:34 шы ─ копьё мӧртіс Исусыслӧ ордлыэс коласӧ. Сэтісь петіс вир да ва. 35Этӧ висьтасьӧ быдӧс адззылісьыс, медбы и тійӧ веритіт. Сія тӧдӧ, сылӧн висьтасьӧмыс быль. 36Лоис Вежа Гижӧтын висьталӧм сьӧрті: «Сылӧн лыыс оз ло чегӧм». 37Вежа Гижӧтас и мӧдіклаын висьталӧм: «Пондасӧ видзӧтны Сы вылӧ, Кӧдӧ бытшкисӧ».
Исусӧс дзебӧм
(Мт. 27:57-61; Мк. 15:42-47; Лк. 23:50-56)
38Аримафея карись Ӧсип вӧлі Исуслӧн велӧтчись. Сія поліс иудейезісь, сійӧн вовлывліс Исусыс дынӧ гусьӧн. Быдӧс лоӧм бӧрын Ӧсипыс локтіс Пилат дынӧ да корис лэдзны крест вывсис Исуслісь шойсӧ. Пилатыс тшӧктіс лэдзны. Ӧсипыс муніс да босьтіс Исуслісь шойсӧ. 39Сэтчӧ локтіс и Никодим. Сія вовлӧм вӧлі Исусыс дынӧ ойнас. Никодимыс вайис куимдас кило алойӧн сорлалӧм смирна#19:39 смирна ─ пуись вийӧтӧм дона ви. 40Сія чӧскыт руа мавтасӧн нія кӧтӧтісӧ дӧраэз да каттисӧ Исуслісь шойсӧ. Сідз иудейес дзеблісӧ кулӧммесӧ. 41Кытӧн Исуссӧ дорисӧ крест вылӧ, сэтӧн вӧлі пуйӧр. А пуйӧрас вӧлі виль дзебсянін. Сэтчӧ абу на дзебсьылӧмась. 42Шоччисян лун локтӧм кузя Исуслісь шойсӧ пуктісӧ сэтчӧ, сія вӧлі матын да.
Исуслӧн ловзьӧм
(Мт. 28:1-8; Мк. 16:1-8; Лк. 24:1-12)
Okuqokiwe okwamanje:
Иоан 19: БЮ19
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume