यहुन्ना 20
20
ठारलो बीड़ो
(मत्ती 28:1-8; मरकुस 16:1-8; लूका 24:1-12)
1हापतान पेहले दाहड़े मरियम मगदलीनी भोळ भाका क आँधरोत होतो ची बीड़ान चाँ आवी, आरू दगड़ा क बीङा पर छे अथो होयलो देखी। 2तव ची दवड़ीन आवी आरू शमौन पतरस काजे आरू तीना दिसरा चाकरीयान जु आवीन कयी जिना ईशु मोंग राखतो होतो, “त्या पोरबु क मोड़वाट्याम रईन नीकाळ ली गया; आरू हामु नी मालम होय, कि हेको काँ मेल दिदा।”
3तव पतरस आरू दिसरो चाकरीयो निकळीन तीना बीङा हेर आया। 4आरू दूय जन साथ मा दौवङया। बाकी दिसरो चाकरीयो पतरस रईन मोळवट्याम जु पेहेल पुग्या। 5आरू नेचो भाळीन छिंदरा पड़ रहवला देख्यो; ते भी त्यो माहयतो नी गयो। 6तव शमौन पतरस हेको पोछळ–पोछळ गयो आरू भीतङान बनला बीङा न माहय गयो आरू छिंदरा पड़ रहवला देखियो। 7आरू त्यो फेटको जो हेका मुनका पर बांधलो होतो, छिंदरान पुठी नी पर एक धरती पर एखटो होयलो देखियो। 8तव दिसरो चाकरीयो भी जो बीङा पर पेहल गयो होतो, माहतो गयो आरू विश्वास करियो। 9त्या ते हाय तक चुखलो शास्त्रन ची वात नी समझिया हुता, कि हेको मरला माईन जीवतो होयनो पड़से। 10तव या चेला आखा आपसे–आपसे घर गया।
मरियम मगदलीनी क दर्शन देना
(मत्ती 28:9-10; मरकुस 16:9-11)
11पुन मरियम रोङती जाईन बीङा न साते बाहर ऊबी रयी आरू रङती जाईन बीङा वोखे नेची होईन, 12दूय सोरगदूत क जुगाळा छिंदरा पेहरला एक क सिरहाने आरू दिसरा क पैताने पर बठलो देखी, वा ईशु न धोङ पड़लो होतो। 13चाँ हेका से कयो, “ओ बाई, तु काँ रङ रया?” ची हेनको कयी,
“त्या म्हारा पोरबु क ली गया आरू हाव नी जानो कि हेकेक काँ सारी मेल दिया।”
14यो कहीन ची पछी फिरी आरू ईशु क उबरयलो देखी आरू नी ओळखी कि यो ईशु छे। 15ईशु हेके कयो, “ओ बाई जात तु काँ रोङे? कुनीक हेरे?”
“ची राखवाळिया समझीन कयी, ए दादा, कदाम तु हेके हाकली ली गयो होय ती मेखे कय दे कि हेकेक काँ सारी मेकलो छे आरू हाव ओको ली जाईस।”
16ईशु हेके कयो, “मरियम!”
ची पछी फिरीन हेका से इब्रानी मा कयी, “रब्बूनी!” हेरो आर्थो छे “ए गुरू।”
17ईशु हेके कयो, मेखे मा छिमे काहकि हाव हाल तक बासोन त्या ऊपर नी गयो, बाकुन म्हारा भाईस्यो न पास मा जाईन कय दे, कि हाव म्हारा बास, आरू तुमरा बास, आरू आपसा यहोवा–भगवान न पास ऊपर पास जाम।
18“मरियम मगदलीनी जाईन चाकरीयो जाईन यी वात कयी, हाव भी पोरबु क देखी आरू त्यो म्हार से वात करियो।”
चाकरीयो न वीच मा ईशु क देखाय पड़नो
19तीने दाहड़े जो हापता क पेहलो दाहड़ो हतो, शान्तो हुयने न टेम पर जव चाहे वाळा झोपला वा चाकरीयो हुता, यहूदिया से बीहिन माहायता बंद हुता, तव ईशु आयो आरू वीच मा ऊबो हुयो आरू हेनको कयो, “तुमूक शांती जोड़े।” 20आरू यो कहवीन त्यो आपसो हात आरू पंजो हेनको देखड़ियो: तव चाकरीयो पोरबु देखीन खुश होय गया। 21“ईशु ओळी हेनको कयो तुमूक शांती जोड़े; जोसो बास मेखे मुकलियो, ओसोत् हाव भी तुमूक मुकलो।” 22यो कहवीन त्यो हेन्दरे पर फूँकियो आरू हेनको कयो, चुखलो आत्मा लेय। 23#मत्ती 16:19; 18:18जिना पाप माफ करो त्या हेन्दरे जुगे माफ होय गया; जिना तुमू राखो, त्या राखला छे।
थोमा पर प्रगट होयनु
24पर बारा माईन एक चाकरीयो थोमा जो दिदुमुस कवाये, जव ईशु आयो तव ओको साते नी होतो। 25जव त्या चाकरीयो यो कयनो लागिया हेके कि “हामु पोरबु देखिया” तव त्यो हेनको कयो,
“जव तक हाव हेका हात मा खिळान डुचा नी देख लोम, आरू खिळान डुचा मा म्हारीआँगळी नी डालो तव तक हाव विश्वास नी करो।”
26बाकुन आगठा दाहड़ा न बाद मा हेका चाकरीयो ओळी घरन माहयता हुता, आरू थोमा ओको सात मा होतो, आरू झोपलो बंद होतो, तव ईशु आवीन आरू वीच ऊबो होईन कयो, “तुमूक शांती जोड़े।” 27“तव त्यो थोमा क कयो, तारी आँगळी या लावीन म्हारा हातोन क देखा आरू तारो हात लावीन म्हार पंजा मा डाल आरू विनभुरसीया नी पर भुरसा वाळो होय।”
28यो सोमळीन थोमा जोवाब आपियो, “ए म्हारा पोरबु, ए म्हारा यहोवा–भगवान!”
29ईशु हेके कयो, “तु ते मेखे देखीन विश्वास करियो पर सयालो छे त्यो जो वीन देखे म्हार पर विश्वास करिया।”
इन किताबन उद्देश
30ईशु आरू भी घण सचटी सोहलाहनी चाकरीयो न क सामने देखड़ियो, जो इनी किताब लिखली नी होय। 31पर यो एरेन करिन लिखी छान्डीयो कि तुमू विश्वास करो, कि ईशु ही यहोवा–भगवान न पोर्यो छे: आरू विश्वास करिन हेका नाव से विश्वास करिन जीवन जुड़से।
Okuqokiwe okwamanje:
यहुन्ना 20: NTDii20
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
The New Testament in Dhankavi Language © The Word for the World International and Dhankavi Mandli, Khargon, Raykhed, Nandurbar, Maharashtra 2020