ACT 4
4
न्यायसभा मुंदार पेत्र इंगा योहान
1पेत्र इंगा योहान मंदीन माटलाडेताप्पुड, याजकलु, परमेश्वर भवनदी रखवाली शेशेतोर सरदारलु इंगा सदुकी मंदी वार देगार वच्चीर. 2वार शेंगेम कोफाम वच्चीन्या येनटीक की पेत्र इंगा योहान मंदीक नेरपुदुर, इंगा शपदुर येशुन तीकेल सच्चीने मंदीक पुनरुत्थान उंडाद. 3आप्पुड वार वारनी फट्टीर इंगा फद्दु मुनगीन्या आंका फद्दु फुट्टी नंताक वारनी जेलला फेट्टीर. 4तरी पण वचन इनेतोर लोन्केल शेंगेम मंदी विश्वास फेट्टीर; इंगा विश्वासी मंदीद संख्या पाच हजार नंताक आय्या.
5मंग इंगोगो नाड इल्ला आय्या, की वार अधिकारील, आब्बागार इंगा नियमशास्त्र शिक्षकलु इर यरुशलेम शहरला वगातळा जमा आय्यीर. 6दांटल्या महायाजक हन्ना इंगा कैफा, योहान, आलेक्सांद्र मुख्य याजक सिकंदर इंगा बाकीचे आंदार महायाजक नातेवाईकलु उंडीर. 7वार पेत्रन इंगा योहाननी नडमा नीला फडामती आडगीर, “इदी मीर या सामर्थ्यता, लेकाते या फेरता शेस्तीर?” 8आप्पुड पेत्रड पवित्र आत्माता परिपुर्ण आय्यी, वारनी आन्या, “हे मंदी अधिकारीलाला, इंगा आब्बागारलाला, 9वगा बिमार मनशी मिंदा उपकार आय्या आंटे वाड येनटीता बागा आय्या दिन बद्दल जर माद इबद चौकशी आयतुनाद? 10तर मी आंदारकी इंगा इस्राएल मंदीक इदी यरका उंडाला, की यवान मीर क्रुस मिंदा खिळास्तार, यवान परमेश्वर सच्चीनोर लोन्केल लेप्या, आ नासोरी येशु ख्रिस्त फेरता, इ मनशी शिंगार आय्यी मी मुंदार नीला फडीनाड. 11याद राय मीर कट्टेतोर नाकारीस्तीर आदी कोनशीला आय्या आदी इद्दे उंडाद.#स्तोत्रसंहिता 118:22-23; दानिएल 2:35. 12इंगा इंगोगोन यवारुच तीकेल तारण लेद येनटीक की मोडाम किंदा मनसुलाला इंगोगोट यादुच फेर इच्चेदेंक दालेद, यादान तीकेल मनाक तारण शिक्की.” 13आप्पुड पेत्रद इंगा योहानदी हिम्मत सुशी, इंगा अडानी इंगा साधारण मन्सुल उंडार, इदी ओळखाशी वारकी आश्चर्य आय्या इंगा इर येशुन जताक उंडीर इल्ला वार ओळखाशीर. 14आप्पुड आंदु बागा आयने मनशीन वार देगार नीला फडीनोड सुशी, वारकी पेत्र इंगा योहान विरुद्ध येमीच माटलाडा दाक फो. 15मंग वारनी सभास्थान लोन्केल बैटीक फोयेद आज्ञा इच्ची वार वगामेगारला चर्चा शेशेदेंक आंटीर. 16वार आनीर, “इ मनसुलाद मनाम येम शेयाला? येनटीक की खरेमे वार शेयता प्रसिद्ध चमत्कार आयनाद; इंगा यरुशलेम शहरला निलचेतोर आंदारकी यरका उंडाद; इंगा इदी मनाम नाकारीच्ची शकायाम. 17पण इदी मंदीक जास्त यरका कावाराद, आंका मनाम वारकी इल्ला धमकी इयाला की, दिन मुंदारकी मीर इ फेरता यवारनीच माटलाडाकुंडा.” 18मंग वार पेत्रन इंगा योहाननी वापस फिल्ची आज्ञा इच्चीर की मीर येशुन फेरता येमीच माटलाडाकुंडा इंगा नेरपाकुंडा. 19पण पेत्रड इंगा योहान वारकी उत्तर इच्ची आनीर, “परमेश्वर काना मिद इनेद इदी परमेश्वर कंडलाला बरोबर उंडाद का चुक, इदी मिरे ठराय मतना. 20येनटीक की याय माटलु मिम सुशीनाम इंगा इनीनाम आय मिम शप्पेद बंद शेय्याम.” 21आप्पुड वार वारकी धमकी इच्ची इडस्काडीर, येनटीक की मंदी इचांग वारकी शिक्षा यल्ला इयाला. इदी वारकी येम तेल्वाकुंदु, येनटीक की याय माटलु आंदु आयन्या आटला इचांग आंता मंदी परमेश्वरदी गौरव शेयदुर. 22येनटीक की या मनशी जताक बागा आयनेद चमत्कार घडाशीन्या, वानदी वय चाळीस वर्ष काना जास्त उंड्या.
विश्वासी मंदीद प्रार्थना
23पेत्र इंगा योहान इडीनेंका, वार विश्वासी मंदी तीकुड वच्चीर इंगा मुख्य याजकलु इंगा आब्बागार येम पण आनीनीर, आदी आंदारकी शप्पीर. 24आदी इनी वार आंदार वगामनता परमेश्वरनी फेद्दा आवाजता आनीर, “हे प्रभु, मोडाम, पृथ्वी, समुद्र इंगा दांटल्योनी आन्नीच यवाड बनायमत्या वाड नुये उंडाव.#निर्गम 20:11. 25नी सेवक, मा पुर्वज दाविद इन नोरता पवित्र आत्माता नु आंटी, ‘यहुदी लेनोर येनटीक चिडाशीर इंगा मंदी व्यर्थ विचारलु येनटीक शेशीर?
26प्रभुन विरुद्ध इंगा वान ख्रिस्तन विरुद्ध पृथ्वी मिंदुड राजाल युद्ध इचांग तैयार आय्यीर इंगा अधिकारील वगातळा जमा आय्यीर.’#स्तोत्रसंहिता 102.
27येनटीक की खरेखरेमे यवान नु अभिषेक शेस्ती वाड नी पवित्र सेवक, येशुड इन विरुद्धला इ नगरला यहुदी लेनोर इंगा इस्राएल मंदी जताक हेरोद इंगा पंतय पिलात वगातळा जमा आय्यीर.#यशया. 28दिनिचांग की येम पण कावाला आंका नु नी सामर्थ्य इंगा इच्छा लेका पहिलाने योजना शेशीन्टी आल्ले वार शेयाला. 29तर हे प्रभु, इप्पुड नु वार धमकी तीकुड सुड इंगा नी दासलाक नी वचनलु शेंगेम हिम्मतता माटलाडेदेंक सामर्थ्य इ. 30नु नीद शेय मंदीन बागा शेशेदेंक मुंदार शेशेताप्पुड इल्ला कानी की नी पवित्र सेवक येशुन फेरता चमत्कारलु इंगा अद्भुत चिन्हल घडाशी.” 31इंगा वार प्रार्थना शेशीनेंका यंदु वार जमा आयनीर आदी हालाशी फोया, इंगा वार आंदार पवित्र आत्माता निंडी परमेश्वरदी वचन हिम्मतता माटलाडेदेंक आंटीर.
विश्वास फेटेतोरदी सामाईक जीवन
32आप्पुड विश्वासी मंदी वगामन इंगा वगाजेमटोर उंडीर: इड नंताक की यवारुच स्वताद धन स्वताद आंका समजायाकुंदुर. पण आंताच भागेदारीला उंड्या. 33इंगा प्रेषितलु फेद्दा सामर्थ्यता, प्रभु येशुन पुनरुत्थान बद्दल साक्ष इद्दुर, इंगा वार आंदार मिंदा फेद्दाद कृपा उंड्या. 34वार दिंटल्योन्केल यवारुच लेकुंडीर, येनटीक की यवार देगार भुमी इंगा इंडलु उंड्या, वार आटलान आम्मी आटलाय दुडलु यकोची. 35प्रेषितला काळा देगार फेटदुर, इंगा यल्ला-यल्ला यवारकी गरज फडदु, आला-आला वार प्रत्येक मनशीक फंची इद्दुर.
36इंगा कुप्र बेट मिंदा निलचेतोड लेवी योसेफ, यवान प्रेषितलु बर्णबा, आंटे उत्तेजन कोडकु इल्ला फेर इच्चीनीर. 37वानदी भुमी उंड्या, आदी वाड आम्मी दानी दुडलु यकोची प्रेषितला काळा देगार फेट्या.
Okuqokiwe okwamanje:
ACT 4: WNT
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume