JHN 9
9
फुट्टीनकेल गुड्योड उंडीनोनकी दृष्टी दान
1येशुड आंदुकेल मुंदारकी फोयेताप्पुड फुट्टीनकेल गुड्योड उंडीने वगा मनशीन वाड सुशा. 2आप्पुड वान शिष्यल वान आडगीर, “रब्बी, यवार पापला इचांग इड इल्ला गुड्योड फुट्टीनाड? वान का वान आम्मा-आब्बान?” 3येशुड उत्तर इच्या, “इड लेकाते इन आम्मा-आब्बाड पाप शेशीर इल्ला लेद, तर वान तीकेल परमेश्वरी फनुल प्रगट कावाला आंकेन इड इल्ला फुट्टीनाड. 4यवाड नन्नु आंपीनाड वानी फनुल दिनमु उंडी नंताक मनाक शेयाबेक. मोब्बु वच्चेद उंडाद. दांटल्या यवारकीच फनुल शेयादाक फोई. 5निन दुन्यामला उंडान आड नंताक निन दुन्याम इचांग यलगु उंडान.”
6इल्ला माटलाडी येशुड भुमी मिंदा उंच्या यंगीलता वाड बुडदा शेशा, आदी बुडदा वान कंडलाक आंच्या. 7इंगा वान आन्या, “फो, शिलोह तळ्याला कडको,” (दिंदी अर्थ आंपीनोड) दिनिचांग वाड फोई कडकुन्या इंगा वाड कंडलाता सुशेदेंक आंट्या.
8दिनिचांग वान शेजारील इंगा यवार वान भिक आडगेताप्पुड पहिला सुशीनीर वार आनीर, “वाड यवाड कुसनी भिक आडगुदु वाड इडे उंडाड कनी?” 9यवार तरी आनीर, “इड वाडे उंडाड.” इंगोगोड आन्या, “लेद, इड वान लेका उंडाड.” पण वाड आन्या, “निन वाडे उंडान.” 10दिनिचांग वार वान आनीर, “मंग नी कंडलु यल्ला उघडाशा?” 11वाड उत्तर इच्या, “येशु फेरोड मनशी बुडदा शेशी ना कंडलाक आंच्या इंगा वाड नन्नु आन्या, ‘शिलोहलोंग फोईगास कडको.’ निन फोईगास कडकुंटीन तर नाक कमशेदेंक आंट्या.” 12आप्पुड वार आनीर, “वाड यंदु उंडाड?” वाड आन्या, “नाक यरका लेद.”
परुशी मंदीद प्रश्न
13वाड यवाड पहिला गुड्योड उंड्या वान मंदी परुशी मंदी तीकुड येका फोईर, 14यबद येशुड बुडदा शेशी वानी कंडलु उघडाशीन्या आदी शब्बाथ दिनमु उंड्या. 15आंका परुशी मंदी वान वापस आडगीर. “निक यल्ला कमशेदेंक आंट्या?” इंगा वाड वारनी आन्या, “वाड ना कंडलाक बुडदा आंच्या, आदी निन कडकुंटीन, नाक कमशेदेंक आंट्या.” 16आप्पुड परुशी मंदीलोन यंता तरी मंदी आनीर, “इ मनशी परमेश्वर तीकेल लेड, येनटीक की वाड शब्बाथ दिनमु पाळायाड.” पण इंगोगोर आनीर, “या मनशी पापी उंडाड वाड इल्लोनी चिन्हल यल्ला शेशी?” 17दिनिचांग, वार आ गुड्ड्योन वापस आनीर, “वाड जर नी कंडलु उघडाशा तर नु वान बद्दल येम आंटाव?” वाड आन्या, “वाड वगा संदेष्टा उंडाड.”
18दिनिचांग यहुदी अधिकारील यवानकी कमशेदेंक वान बद्दल वान आम्मा-आब्बान फिल्ची वान बद्दल आडगी नंताक, वाड पहिला गुड्योड उंड्या इंगा इप्पुड सुशेदेंक आंटीनाड, इ माटा मिंदा विश्वास फेट्टालेद. 19वार वारनी आडगीर, “मी यवाड कोडकु गुड्योड फुट्या आंकेन मीर आंटार वाड इडे उंडाड येम? मंग इप्पुड वानकी यल्ला कमस्ताद?”
20वान आम्मा-आब्बाड उत्तर इच्चीर, “इड मा कोडकु उंडाड; इंगा इड गुड्योड फुट्टीन्या इदी माक यरका उंडाद. 21तरी इप्पुड वानकी यल्ला कमशेदेंक आंट्या इदी माक यरका लेद इंगा वानी कंडलु यवाड उघडाशा इदी पण माक यरका लेद. वाड समजदार उंडाड, वाने आडगुना, वाड स्वता बद्दल शप्पी.” 22वान आम्मा-आब्बानकी यहुदी अधिकारीलाद यरपु उंड्या आंका वार इल्ला आनीर, येनटीक की, वाड ख्रिस्त उंडाड इल्ला यवार आनीर वान सभास्थानलेल तिस्काडाला, आंका यहुदी मंदी पहिलाने एकमत आयनीर. 23दिनिचांग वान आम्मा-आब्बाड आनीर, “वाड समजदार उंडाड वाने आडगुना.”
24आप्पुड या मनशी गुड्योड उंड्या वान वार वापस फिल्चीर इंगा वार वान आडगीर, “परमेश्वरदी गौरव शेय; इ मनशी पापी उंडाड इदी माक यरका उंडाद.” 25दिन मिंदा वाड उत्तर इच्या, “वाड पापी उंडाड का लेद इदी नाक यरका लेद. नाक वगा माटा यरका उंडाद की; निन पहिला गुड्योड उंटीन इंगा इप्पुड नाक कमस्ताद.” 26दिनिचांग वार वान आनीर, “वाड निक येम शेशा? नी कंडलु यल्ला उघडाशा?” 27वाड वारकी उत्तर इच्या, “निन मिक इप्पुडे शपतीन, तरी मीर इना लेद; आदी वापस इनेद इच्छा येनटीक शेस्तार? मीर पण वान शिष्य आय्येदेंक सुस्तार येम?” 28आप्पुड वार वानदी निंदा शेस्केन वान आनीर, “नु वान शिष्य उंडाव; मिम मोशेन शिष्यल उंडाम. 29परमेश्वर मोशेन जताक माटलाड्या इदी माक यरका उंडाद. पण इ यंदुटोड उंडाड इदी माक यरका लेद.” 30आ मनशी वारकी उत्तर इच्या “इद्दे तर फेद्दाद आश्चर्य उंडाद की, वाड यंदुटोड उंडाड इदी मिक यरका लेद; इंगा तरी वाड नाय कंडलु उघडाशा. 31मनाक इदी यरका उंडाद की, परमेश्वर पापी मंदीद इनाड, तर या मनशी परमेश्वर भक्त उंडाड इंगा यवाड वान इच्छा लेका शेस्ताड वानदी वाड इंटाड. 32फुट्टीननोट गुड्योड उंडीनोनी कंडलु उघडाशा इल्ला युग सुरवातकेल यप्पुडुच यवार इना लेद. 33इड जर परमेश्वर तीकेल लेकुंटे तर इनकी येमीच शेया दाकुंटुन्या.” 34वार वान आनीर, “नु पुर्ण पापला फुट्टीनाव इंगा नु माक नेरपुताव येम?” इंगा वार वान सभास्थान लोन्केल बैटीक तिस्काडीर.
आत्मिक गुड्योड
35यप्पुड येशुड इन्या की यहुदी मंदी अधिकारील वान यहुदी सभास्थान लोन्केल बैटीक तिस्काडीनार; मंग येशुनकी वाड शिक्कीनेंका वाड वान आन्या, “नु मनशी कोडकु मिंदा विश्वास फेटताव येम?” 36वाड उत्तर इच्या, “प्रभु, निन वान मिंदा विश्वास फेट्टाला इल्ला वाड यवाड उंडाड?” 37येशुड वान आन्या, “नु वान सुशीनाव इंगा नी जताक इप्पुड माटलाडेतोड वाडे उंडाड.” 38वाड आन्या, “प्रभु, निन विश्वास फेटतान.” इंगा वाड वानकी नमन शेशा. 39आप्पुड येशुड आन्या, “निन न्याय शेशेदेंक इ दुन्यामलोंग वच्चीनान; दिनिचांग की, यवारकी कमसाद वारकी कमसाला इंगा यवारकी कमस्ताद वार गुड्योर कावाला.” 40आप्पुड परुशीला लोन्केल यवार वान जताक उंडीर वार इ माटलु इनीर; इंगा वार वान आनीर, “मिम पण गुड्योर उंडाम येम?”
41येशुड वारनी आन्या, “मीर गुड्योर उंटे तर पापी लेकुंटुटीर, पण मीर आंटार की, ‘माक इप्पुड कमस्ताद’, दिनिचांग मी पापलु आल्ले निलस्ताय.”
Okuqokiwe okwamanje:
JHN 9: WNT
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume