LUK 18
18
विधवाद इंगा पापी न्यायाधीश
1शिष्यल नेहमी प्रार्थना शेयाला इंगा निराश कावाराद, आंका येशुड वारकी वगा दाखला शप्या. 2वाड आन्या, “वगा नगरला वगा न्यायाधीश उंड्या. वाड परमेश्वरकी यरस्कुनाकुंदु इंगा मंदीद परवा शेयाकुंदु. 3आ नगरला वगा विधवाद उंड्या. आदी धीन्नाम वान तीकुड वच्ची न्यायाधीशकी विनंती शेयदु, ‘ना मिंदा आयने अन्याय बद्दल नाद न्याय शेय!’ 4काही वेळ नंताक तर वाड इनाक फोया; पण आखरीक वाड मनला विचार शेशी आन्या, 'निन जरी परमेश्वरकी यरस्कुनान इंगा मंदीद परवा शेयान, 5तरी इदी विधवा नाक त्रास इस्ताद आंका निन दिनदी न्याय शेशान, लेकाते आदी नेहमी वच्ची नाद जेम तिनी.” 6मंग प्रभुड आन्या, “अन्यायी न्यायाधीश येम आंटाड आदी इनना. 7तर मंग यवारनी परमेश्वर निवडाशीनाड आ मंदी जर मोब्बुफगुल वान मदत आडगुतार, वारदी वाड न्याय शेयाक फोई येम? वाड वारकी मदत शेशेदेंक वेळ आंची? 8निन मिक शपतान, वाड वारदी न्याय लग्गान शेशी, तरी यप्पुड मनशी कोडकु वच्ची, आप्पुड वानकी पृथ्वी मिंदा विश्वास शिक्की येम?”
परुशी इंगा जकातदार
9मनाम नितीमान उंडाम इल्ला स्वता मिंदा भरोसा फेट्टी यवार इंगोगोर तुच्छ समजास्तुनीर वारकी पण वाड दाखला शप्या, आदी इल्ला, 10“इद्दार मन्सुल प्रार्थना शेशेदेंक परमेश्वर भवनलोंग फोईर. वगाड परुशी उंड्या इंगा इंगोगोड जकातदार उंड्या. 11परुशी मनशी नीला फड्या इंगा वाड इल्ला प्रार्थना शेशा, ‘हे परमेश्वर, निन निक धन्यवाद इस्तान येनटीक की, निन बाकी मंदी लेका दोंगा, अन्यायी, व्यभिचारी इंगा इ जकातदार लेका पण लेन. 12निन हफ्ताला रोंड तुकुल उपवास शेस्तान इंगा ना आंता उत्पन्नद दहावा भाग इस्तान.’ 13पण जकातदार धुराम नीला फडी स्वर्ग तीकुड सुडांदे वान यदाल कोटकेन आन्या, ‘हे परमेश्वर निन पापी उंडान, ना मिंदा दया शेय.’#स्तोत्रसंहिता 51:1. 14निन मिक शपतान, आ परुशी मनशी काना इड जकातदार नितीमान ठराशी वान इल्लुक फोया; येनटीक की यवार स्वतान फेद्दावोड शेस्ताड वान शिन्नावोड शेशेदेंक वच्ची इंगा यवाड स्वतान शिन्नावोड शेस्ताड वान फेद्दावोड शेशेदेंक वच्ची.”
शिन्ना बिळ्ळाक येशुनदी आशिर्वाद
15मंग काही मंदी वार बिळ्ळान पण येशुन देगार येकेन वच्चेदेंक आंटीर, दिनिचांग की वाड वार मिंदा शेय फेट्टाला; पण इदी सुशी शिष्यल वारनी बेद्रीच्चीर. 16पण येशुड बिळ्ळान वान देगार फिल्ची आन्या, “बिळ्ळान ना देगार दानिंडा. वारनी लेद आनाकुंडा; येनटीक की परमेश्वरदी राज्य वार लेकोन्टोरदे उंडाद. 17निन मिक खरेम शपतान, यवार पण बिडा लेका परमेश्वर राज्यद स्वीकार शेयाक फोई, वानदी स्वर्गला प्रवेश काके फोई.”
धनवान अधिकारी इंगा सार्वकालिक जीवन
मत्तय 19:16-22; मार्क 10:17-22
18वगा यहुदी अधिकाऱ्याड येशुन आडग्या, “हे उत्तम गुरुजी, सार्वकालिक जीवन शिक्काला आंका निन येम शेयदुन?” 19येशुड वान आन्या, “नन्नु उत्तम येनटीक आंटाव? वगान इडशी आंटे परमेश्वरनी इडशी यवाडुच उत्तम लेड. 20निक तर आज्ञाल यरका उंडाय ‘व्यभिचार शेयाक, खुन शेयाक, दोंगा शेयाक, खोटा साक्ष इयाक, नी आम्मा आब्बानदी मान फेट.’” 21वाड अधिकारी आन्या, “इ आन्नी आज्ञाल निन जवान उंटीन आप्पुडनोट पाळास्केन वच्चीनान.” 22इदी इनी येशुड वान आन्या, “तरी नी लोना वगा माटाद कमी उंडाद. नीद आंता आम्मी आदी गरीबोरकी इचकाड, आंटे निक स्वर्गला संपत्ती शिक्की. इंगा ना यंका नडशेदेंक आंट.” 23पण यप्पुड आ अधिकाऱ्याड इदी इन्या आप्पुड वाड शेंगेम दुखी आय्या, येनटीक की वाड शेंगेम श्रीमंत उंड्या. 24वाड दुखी आय फोया इदी यप्पुड येशुड सुशा आप्पुड वाड मंदीन आन्या, “यवार देगार संपत्ती उंडाद, आ मंदीद परमेश्वर राज्यला प्रवेश आय्येद यंता कठीण उंडाद! 25श्रीमंत मनशीद परमेश्वर राज्यला प्रवेश आय्येद दिन काना वंट्याद सुदीद मुक्कु लोन्केल फोयेद सोपा उंडाद.” 26या मंदी इदी इनीर, वार आडगीर, “तर मंग यवारदी तारण आय्यी शकास्ताद?” 27वाड आन्या, “या माटलु मनशी इचांग अशक्य उंडाय, आय परमेश्वरकी शक्य उंडाय.” 28आप्पुड पेत्र आन्या, “सुड, मिम माद इल्लु इडपु इडशी नी यंका वच्चीनाम.” 29येशुड वारनी आन्या, “निन मिक खरेम शपतान, परमेश्वर राज्य इचांग यवाड वानदी इल्लु, वडती, तम्मुड, आम्मा आब्बान इंगा बिळ्ळान इडशीनार 30वारकी इ युगला शेंगेम पटीता इंगा वच्चे युगला सार्वकालिक जीवन शिक्की.”
पुनरुत्थानदी भविष्यवाणी
मत्तय 20:17-19; मार्क 10:32-34
31येशुड बारा शिष्यलान बाजुक तिस्केन वारनी आन्या, “इनना! मनाम फैनिक यरुशलेम शहरकी फोयतुनाम. आंदु मनशी कोडकु बद्दल संदेष्ट्याल तीकेल राशीनेय आन्नी माटलु पुर्ण आय्यी. 32वान यहुदी लेनोर मंदी शेतल्या इच्चेदेंक वच्ची, वानदी मजाक यगरा मत्यार, वानदी निंदा शेशार, वान मिंदा उंचार 33वानकी देब्बाल मत्यार, वानदी जेम तिस्कुन्यार इंगा वाड मुड नाळाक वापस लेशी.” 34वाड आनीनेद येमीच शिष्यलाक तेल्वाक फो; येनटीक की इदी वचन वार देगाटेल दाशी फेट्टेदेंक वच्चीन्या दिनिचांग वारकी शप्पीनेय माटलु वारकी तेल्वालेद.
गुड्ड्योनकी कंडलु इच्चेद
मत्तय 20:29-34; मार्क 10:46-52
35येशुड यरीहो देगार वच्या आप्पुड वगा गुड्योड दावा मिंदा कुसनीगास भिक आडगुतन्या. 36यप्पुड वाड वान देगाटेल फोये समुदायदी आवाज इन्या, आप्पुड वाड आडग्या, इदी येम नडशीनाद. 37मंदी वानकी शप्पीर, “नासरेथकर येशुड इंदुकेल फोयतुनाड.” 38वाड कीरलीगास आन्या, “हे येशु, दाविदान कोडका ना मिंदा दया शेय.” 39यवार मुंदारकी नडस्तुनीर वार वान बेद्रीच्चेदेंक आंटीर. पण वाड इंगा बेग्गे कीरली आन्या, “दाविदान कोडका ना मिंदा दया शेय!” 40येशुड थांबाशा इंगा वाड गुड्ड्योन वान तीकुड येकोचेद आज्ञा इच्या, वाड गुड्योड वान देगार वच्ची नेंका येशुड वान आडग्या, 41“निन नी इचांग येम शेयाला आंका नीद इच्छा उंडाद?” वाड आन्या, “प्रभु नाक सुशेद उंडाद.” 42येशुड वान आन्या, “सुशेदेंक आंट, नीद विश्वास निन्नु बागा शेशीनाद.” 43लगेच वानकी कमशेदेंक आंट्या इंगा वाड परमेश्वरदी गौरव शेस्केन येशुन यंका नडशेदेंक आंट्या, आप्पुड आंता मंदी इदी सुशीर इंगा परमेश्वरदी स्तुती शेशीर.
Okuqokiwe okwamanje:
LUK 18: WNT
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume