MAT 17
17
येशुनदी रुपांतर
1यंकसार आर नाळा बाद येशुड पेत्रन, याकोबनी इंगा वान शिन्ना तम्मुन योहाननी वान जताक तिस्कुन्या इंगा वारनी एकांतला वगा फेद्दा कोंडा मिंदीक येका फोया. 2आप्पुड वार मुंदार येशुनदी रूप बदलाशा. वानदी मुती सुर्यलेका चमकाशा इंगा वानी बट्टाल येलगु लेका तेल्लांग आय फोया. 3आप्पुड सुडना, मोशेड इंगा एलीयाड वान जताक माटलाडेताप्पुड वारकी कमशीर. 4आप्पुड पेत्र येशुन आन्या, “हे प्रभु, इंदु उंडेद मा इचांग बागा उंडाद. नीद इच्छा उंटे तर निन इंदु मुड मंडपलु शेस्तान, वगाट नी इचांग वगाट मोशेन इचांग इंगा वगाट एलीयान इचांग.” 5वाड माटलाडदु, इंताटला, सुडना, वगाट फेद्दा यलगुद मोडाम वार मिंदा साट शेशा इंगा आ मोडाम लोन्केल इल्ला आवाज वच्या की, “इड ना प्रिय कोडकु उंडाड, इन बद्दल निन संतुष्ट उंडान, इनदी मीर इनना.” 6इदी आवाज इनी शिष्यल भुमी मिंदा बोरकाला फडीर येनटीक की वार शेंगेम येरस्कुनीर. 7आप्पुड येशुड वार देगार वच्ची वारनी मुट्टी आन्या, “लेयना! यरस्कुनाकुंडा.” 8आप्पुड वार कंडलु तेरशीर इंगा मिंदीक सुशीर आप्पुड वारकी येशुन इडशी इंगा यवारुच कमसा लेद.
9यप्पुड वार कोंडा मिंदकेल किंदीक दिगदुर, येशुड वारकी आज्ञा इच्या की, “मनशी कोडकु सच्चीनोर लोन्केल लेशी नंताक कोंडा मिंदा येम पण मीर सुस्तीर आदी यवारकीच शप्पाकुंडा.” 10मंग वान शिष्यल आनीर, “नियमशास्त्रटोर शिक्षकलु इल्ला येनटीक आंटार की, एलीयाड पहिला दावाबेक?” 11आप्पुड येशुड उत्तर इच्या, “एलीयाड वच्ची आंताच शिंगार शेशी इदी खरेम, 12पण निन मिक शपतान की, एलीयाड वच्चीनाडच इंगा वार वान गुरतु फट्टालेद, पण वारकी वाटाशा आल्ले वार वान जताक शेशीर. मनशी कोडकु पण वार शेयता दुःख भोगाशी.” 13आप्पुड शिष्यलाक तेलच्या की वाड मना जताक बाप्तिस्मा इच्चेतोन योहान बद्दल माटलाड्या.
दैयाम फट्टीने मोगाबिडान बागा शेशेद
14यंकसार येशुड इंगा शिष्यल मंदी गर्दी देगार वच्ची नेंका, वगा मनशी वान देगार वच्या इंगा वान मुंदार मोकाळलु टेकाशी आन्या, 15“हे प्रभु, ना कोडकु मिंदा दया शेय. वानकी मिरगी झटकाल वस्ताय इंगा वानी शेंगेम येल्याल आयताय येनटीक की वाड घडी-घडीक आग्गीला इंगा नेळाला फडताड. 16निन वान नी शिष्यल तीकुड यकोस्तीन पण वारकी वान बागा शेय्या दालेद.” 17येशुड उत्तर इच्या, “अरे अविश्वासी इंगा कुटील पिढीटोर मंदी, निन मी जताक इंगा यन्नी नाळ निलदुन? निन मिद यंता सहन शेयदुन? मोगाबिडान ना देगार येका दांडा.” 18आप्पुड आ मोगाबिडान येशुन देगार यकोचीनेंका येशुड आ दैयामनी बेद्रीच्या, आप्पुड आदी दैयाम वान लोन्केल यल्ली फोया इंगा आद्दे वेळला आ मोगाबिडा बागा आय फोया.
19यंकसार शिष्यल वगातळा येशुन देगार वच्ची आडगीर, “हे गुरुजी, माक आदी येनटीक तिया दालेद?” 20आप्पुड येशुड वारनी आन्या, “मिद विश्वास कमी उंड्या आंका. निन मिक खरेम शपतान, मी लोना जर मोहरी दाना इंता विश्वास उंटे तर मीर इ कोंडान इंदुकेल यल्ली आंदुक फो, इल्ला मीर आंटीर तर आदी कोंडा फोई. मी इचांग येमीच अशक्य काक फोई.” 21तरी पण प्रार्थना इंगा उपवास शेशीनशे इल्लोन जाती दैयाल यल्लाव.
सच्चेद इंगा पुनरुत्थानदी दुसराद भविष्यवाणी
22यप्पुड आंदार शिष्यल वगातळा गालील प्रांतकी वच्चीर आप्पुड येशुड वारनी आन्या, “मनशी कोडकुन मंदी शेतल्या फट्टी इच्चेदेंक वच्ची. 23वार वान जेमफडा मतेशार इंगा मुड नाळाक वाड वापस जित्ता आय्यी.” इदी इनी शिष्यलाक शेंगेम दु:ख आय्या.
परमेश्वर भवनदी कर तिस्कुनेद
24येशुड इंगा वान शिष्यल कफर्णहुम नगरकी वच्चीर आप्पुड परमेश्वर भवनदी कर वसुली शेशेतोर वच्चीर, वार पेत्रन देगार वच्ची आनीर, “मी गुरु कर इयाड येम?” 25वाड आन्या, “हुं इस्ताड.” यंकसार वाड इंटल्योंग वच्चीन नग्रेम वाड माटलाडा काना मुंची येशुड आडग्या, “शिमोन, निक येम वाटास्ताद? पृथ्वी मिंदुड राजाल जकात इंगा कर यवार तीकेल तिस्कुंटार, मना कोडकु तीकेल का इंगोगार तीकेल?” 26यप्पुड वाड आन्या, “इंगोगार तीकेल.” आप्पुड येशुड वान आन्या, “तर मंग बिळ्ळु मोकळा उंडार. 27तरी मनाम वारकी अडखळन येका दावाराद, दिनिचांग सरोवर तीकुड फोई नेळाला गळ येय इंगा पहिला निक शिक्की आदी मीन फट्टी दानदी नोर तेरु निक यंडीद वगा कलदार शिक्की. आदी तिस्केन ना बद्दल इंगा नी बद्दल वारकी इ.”
Okuqokiwe okwamanje:
MAT 17: WNT
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume