MAT 19
19
येशु ख्रिस्तद यहूदा प्रांतलोनदी सेवा — 19:1—20:34
फारकती बद्दल प्रश्न
1येशुड इ आन्नी माटलु शप्पीनेंका गालील प्रांत लोन्केल यल्ली फोया इंगा यार्देन वंका आतुक यहुदीया प्रांतलोंग वच्या. 2आप्पुड फेद्दाद मंदीद गर्दी वान यंका फोया इंगा आंदुड शेंगेम बिमार मंदीन येशुड बागा शेशा.
3आप्पुड परुशी मंदी वानदी परीक्षा तिस्कुना वान देगार वच्चीर. वार येशुन आनीर, यादाना कारण इचांग वगा मनशी वान वडतीक सोडचिट्ठी इयाला इदी बरोबर उंडाद येम? 4येशुड उत्तर इच्या, “पवित्र शास्त्रला इल्ला राशीनेद उंडाद मीर वाचायालेद येम, की, यप्पुड परमेश्वर दुन्याम बनायमत्या, सुरुवातकेल वारनी मोगोड इंगा आंडीद इल्ला बनायमत्या. 5इंगा परमेश्वर आन्या, ‘दिनिचांग मोगुड मना आम्मा-आब्बान इडशी इंगा मना वडती जताक उंडी. वार इद्दार वगा शरीर आय्यार.’#उत्पत्ती 2:24. 6दिनिचांग वार इप्पुड इद्दार लेर, पण वगा शरीर उंडार येम परमेश्वर जोडशीनाड दान मनशी तेम्पाराद” 7इदी इनी परुशी मंदी येशुन आडगीर, “तर मोशेन नियमशास्त्रला इल्ला येनटीक उंडाद की सोडचिट्ठी इच्ची वडतीन इडवाला?” 8येशुड उत्तर इच्या, “मी अंतकरण कठोरपणा इचांग मोशेड मिक मी वडतीन इडशेद सुट इच्या. पण सुरवातकेल फारकती इच्चेद सुट लेकुंड्या. 9इंगा निन मिक शपतान, की यवाड पण व्यभिचार इडशी इंगोगो यादाना कारण इचांग मना वडतीन इडशी इंगोगो दान जताक फेंडली शेस्कुंटाड वाड व्यभिचार शेस्ताड. इंगा यवाड आ इडशीने आंडीदान जताक फेंडली शेस्कुंटाड, वाड पण व्यभीचार शेस्ताड.” 10मंग येशुन शिष्यल वान आनीर, “जर वडती-वडालला इल्ला परीस्थीती उंटे तर मंग फेंडली शेस्कुनेद बागा लेद.” 11पण येशुड उत्तर इच्ची आन्या, “आंदार इदी वचन स्वीकार शेशी शकायार. पण यवारकी इदी वचन स्वीकार शेशेदेंक सुट इच्चीनेद उंडाद वारे शेशार 12येनटीक की आम्मा कडपु लोन्केल जन्मक वच्चीनार इल्ला नपुसंक उंडार इंगा मन्सुल शेशीर इल्ला नपुसंक उंडार इंगा स्वर्ग राज्य शिक्के इचांग काही मंदी फेंडली शेस्कुनालेद इल्ला पण नपुंसक उंडार. यवाड इदी स्वीकार शेस्ताड वाडे, स्वीकार शेय्याला.”
बिळ्ळाक आशिर्वाद
13आप्पुड मंदी शिन्ना बिळ्ळान येशुन देगार यकोचीर, दिनिचांग की वाड वार मिंदा शेय फेट्टाला इंगा प्रार्थना शेयाला; पण शिष्यल वारनी बेद्रीचीर. 14आप्पुड येशुड आन्या, “शिन्ना बिळ्ळान ना देगार दानिंडा, वारनी थांबाय मताकुंडा, येनटीक की स्वर्गद राज्य इल्लोन्टोरदे उंडाद.” 15शिन्ना बिळ्ळाक आशिर्वाद इच्चीनेंका येशुड आंदुकेल यल्ली फोया.
श्रीमंत जवान मोगाबिडाद महत्वपुर्ण प्रश्न
16वगा नाड, वगा मनशी येशुन तीकुड वच्ची वान आडग्या, “गुरुजी सार्वकालिक जीवन शिक्काला आंका निन याय शिंगार माटलु शेयाबेक?” 17येशुड आन्या, “येम शिंगार उंडाद इल्ला नु नन्नु येनटीक आडगुताव? फक्त परमेश्वरे शिंगार उंडाड पण जर निक सार्वकालिक जीवन बेक तर आन्नी आज्ञाल पाळाय.” 18वाड आडग्या, “याय आज्ञाल?” येशुड उत्तर इच्या, “खुन शेयाक, व्यभिचार शेयाक, दोन्गा शेयाक, खोटा साक्ष इयाक. 19नी आम्मा-आब्बानदी मान फेट इंगा यल्ला स्वता मिंदा प्रेम शेस्ताव आल्ले इंगोगोर मिंदा प्रेम शेय.” 20वाड जवान मोगाबिडा आन्या, “इ आन्नी आज्ञाल निन जवानीकेल पाळास्केन वचीनान. निन इंगा येम शेयदुन?” 21येशुड उत्तर इच्या, “निक जर परिपुर्ण आय्येद उंटे तर फो इंगा नी देगार येम पण उंडाद आदी आम्मेस्काड इंगा आय दुडलु गरीब मंदीक फंचकाड. आंटे स्वर्गला निक फेद्दाद धन शिक्की इंगा नडु ना यंका दा.” 22पण यप्पुड वाड जवान मनशी इदी इन्या, आप्पुड वानकी शेंगेम दु:ख आय्या येनटीक की वाड शेंगेम श्रीमंत उंड्या, आंका वाड येशुन इडशी फोया.
दुडला इचांग अडथळा
23आप्पुड येशुड वान शिष्यलान आन्या, “निन मिक खरेम शपतान, धनवान मनशीद स्वर्ग राज्यला प्रवेश आय्येद शेंगेम कठीण उंडाद. 24निन मिक शपतान की, धनवान मनशीद स्वर्ग राज्यला प्रवेश आय्येद दिन काना वंट्याक सुदी मुक्कु लोन्केल फोयेद जास्त सोपा आय्यी.” 25यप्पुड शिष्यल इदी इनीर आप्पुड वार शेंगेम आश्चर्य चकीत आय्यीर. वार येशुन आडगीर, “मंग यवारदी तारण आय्यी?” 26येशुड वान शिष्यल तिकुड सुशी आन्या, “मनशीक इदी अशक्य उंडाद, पण परमेश्वरकी आन्नी माटलु शक्य उंडाय.” 27इदी इनी पेत्र येशुन आन्या, “सुड, मिम तर आंताच इडस्तीम इंगा नी यंका वच्चीनाम; पण माक येम शिक्की?” 28येशुड आन्या, “निन मिक खरेम शपतान, कोत्ता युगला यप्पुड मनशी कोडकु वान गौरवी सिंहासन मिंदा कुसनी आप्पुड मीर यवार आंदार ना यंका वस्तीर वार आंदार बारा सिहासन मिंदा कुसन्यार इंगा इस्त्राएललोन बारा वंशला मिंदा अधिकार नडपीच्यार. 29यवार-यवार ना यंका वच्चेदेंक मना इल्लु, तम्मुड, शेल्याल, आम्मा-आब्बान, बिळ्ळान, शेन-शट्टु ना फेर इचांग इडस्काडनार वारकी शंभरपट शिक्की इंगा वारकी सार्वकालिक जीवन शिक्की. 30पण शेंगेम मंदी यवार इप्पुड पहिला उंडार वार आखरीक आय्यार इंगा यवार आखरीक उंडार वार पहिला आय्यार.”
Okuqokiwe okwamanje:
MAT 19: WNT
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume