MAT 6
6
दान बद्दल शिक्षण
1येशुड नेरपेद चालु फेट्या इंगा आन्या मंदी मी शिंगार फनुल सुडाला आंका मीर मी शिंगार फनुल वार मुंदार शेयाकुंडा, सावध उंडना, लेकाते मिक मी स्वर्गलोन परमेश्वर आब्बान तीकेल प्रतिफळ शिक्काक फोई.
2 दिनिचांग यप्पुड नु दानधर्म शेस्ताव, आप्पुड मंदी मनाद स्तुती शेयाला आंका ढोंगी मंदी यल्ला सभास्थानला इंगा दावाल मिंदा मंदीक शपका तिरगुतार आल्ला शेय्याक. निन मिक खरेम शपतान वारकी वारदी प्रतिफळ शिक्कीनादच. 3पण यप्पुड मीर दान शेस्तार, आप्पुड आदी यवारकी यरका कावांदे शेयना. मिद तिने शेय येम शेस्ताद आदी मी रोड्डा शेईक पण यरका कानियाकुंडा. 4आंटे मिद दान इच्चेद यवारकी यरका कावांदे कावाला, येनटीक की मी स्वर्गीय परमेश्वर आब्बाड यवाड कमसाड, वाड दानदी प्रतिफळ मिक इच्ची.
प्रार्थना बद्दल शिक्षण
5येशुड मुंदारकी आन्या, यप्पुड मीर प्रार्थना शेस्तार आप्पुड ढोंगी मंदी लेका शेयाकुंडा येनटीक की मंदीक कमसाला आंका सभास्थानला इंगा दावा कंटामकी नीला फडीगास प्रार्थना शेशेदेंक ढोंगी मंदीक आवडास्ताद. निन मिक खरेम शपतान की, वारकी वारदी प्रतिफळ शिक्कीनेद उंडाद. 6पण मीर यप्पुड प्रार्थना शेस्तार आप्पुड मी खोलीलोंग फोंडा इंगा कवाड आंची मी स्वर्गीय आब्बान देगार यवाड कमसाड वान देगार प्रार्थना शेयना. आप्पुड मी स्वर्गीय परमेश्वर आब्बाड यवाड कमसाड वाड मिक प्रतिफळ इच्ची. 7इंगा यप्पुड मीर प्रार्थना शेस्तार आप्पुड यहुदी लेनोर मंदी लेका उत्तेंगाने बडबड शेयाकुंडा येनटीक की मनाम शेंगेम माटलाडतीम आंटे मनाद इनेदेंक वच्ची इल्ला वारकी वाटास्ताद. 8दिनिचांग मीर वार लेका काकुंडा येनटीक की मिक येनटीद गरज उंडाद इदी मी परमेश्वर आब्बानकी मीर आडगाकाना पहिलाने यरका उंडाद.
प्रभुड नेरपीनेद प्रार्थना
9 दिनिचांग मीर प्रार्थना शेस्तार आप्पुड मीर इल्ला प्रार्थना शेयना:
हे मा स्वर्गलोन यब्बा,
नीद फेर पवित्र मानाशेदेंक दावाला.
10 नीद राज्य दावाला,
यल्ला स्वर्गला
आल्ले पृथ्वी मिंदा पण नीद इच्छा पुर्ण कावाला.
11 माद इबदोडदी आन्नाम इबद माक इ.
12 यल्ला मिम इंगोगोरी अपराधलु क्षमा शेस्तीम,
आले नु मा अपराधलाद क्षमा शेय.
13 इंगा मोमलान परीक्षाला येका दाक
तर माद आ शैतान तीकेल रक्षा शेय. (येनटीक की राज्य, सामर्थ इंगा गौरव नेहमी नीदे उंडाद.)
14 जर मीर इंगोगारी अपराधलु क्षमा शेशार तर मी स्वर्गलोन परमेश्वर आब्बाड पण मी अपराधलु क्षमा शेशी; 15पण जर मीर इंगोगार अपराधलाद क्षमा शेयाक फोयार, तर मी परमेश्वर आब्बाड पण मी अपराधलाद क्षमा शेयाक फोई.
उपवास बद्दल शिक्षण
16येशुड मुंदारकी आन्या, यप्पुड मीर उपवास शेस्तार आप्पुड मीर ढोंगी मंदी लेका मुती उदास सुपीयाक उंडा येनटीक की मनाम उपवास शेस्तुनाम इदी मंदीक कमसाला आंका वार मना मुतुल उदास सुपीस्तार. निन मिक खरेम शपतान वारकी वारदी प्रतिफळ शिक्कीनाद. 17पण नु यप्पुड उपवास शेस्ताव आप्पुड नी नत्तीक नु नुन्या आंच इंगा नी मुती कडगु. 18दिनिचांग की, नु उपवास शेस्ताव इदी मंदीक कमसा राद तर नी परमेश्वर आब्बानकी यवाड गुप्त उंडाड वानकी कमसाला. इंगा नी परमेश्वर आब्बाड यवाड कमसाड मिक आंदार मुंदार प्रतिफळ इच्ची.
स्वर्गीय संपती बद्दल शिक्षण
19येशुड मुंदारकी आन्या, मीर पृथ्वी मिंदा मी इचांग धन जमा शेयाकुंडा येनटीक की इंदु फुल्गुल फडी इंगा जंग आंटीगास दांदी नाश आय्यी इंगा दोंगाल इल्लु फगला मती आदी दोंगा शेस्का फोयार. 20पण मंची फनुल शेशी स्वर्गला मी इचांग धन जमा शेयना. यंदु फुल्गुल फडांदे इंगा जंग आंटांदे दानदी नाश काक फोई इंगा दोंगाल इल्लु फगला मती दान दोंगा शेयाक फोयार 21येनटीक की यंदु मिद धन उंडाद आंदु मिद मन पण आंटी.
फय दिव्वा बद्दल शिक्षण
22येशुड मुंदारकी आन्या, कंडलु फय इचांग दिव्वा लेका उंडाय. दिनिचांग जर मी कंडलु निर्दोष उंटे तर मिद आंता फय प्रकाशमय आय्यी. 23पण जर मी कंडलु दोषी उंटे, तर मिद आंता शरीर अंधकारमय आय्यी. जर मी देगार उंडीनेद येलगु इदी खरेमे मोब्बु उंडाद, तर खरेखरेम मोब्बु यंता उंडी!
परमेश्वर इंगा धन
24येशुड मुंदारकी आन्या, यवाड पण इद्दार मालकुलाद सेवा वगा दमुक शेशी शकायाड. शेस्ते वाड वगानदी कोफाम शेशी इंगा इंगोगोन मिंदा प्रेम शेशी लेकाते वाड वगा मालकुन जताक इमानदार उंडी इंगा इंगोगोन कमी समजाशी. आल्ले मीर पण परमेश्वरदी इंगा दुडलाद सेवा वगा दमुके शेशी शकायार.
चिंता इंगा परमेश्वर मिंदा भरोसा फेट्टेद
25येशुड मुंदारकी आन्या, दिनिचांग निन मिक शपतान की, मीर धीन्नाम मी जेम इचांग चिंता शेयाकुंडा की मिम येम तिनाला इंगा येम तागाला इंगा फयला येम फेटकुनाला. जेम आन्नाम काना इंगा फय बट्टाल काना महत्त्वद उंडाद का लेद? 26मोडामलोन गुवालनी सुडना! आय पेरायाव, सोंगायाव इंगा जमा शेशी फेट्टाव, तरी मी स्वर्गलोन आब्बाड आटलाक तिनेदेंक इस्ताड. मीर आटला काना जास्त मौल्यवान उंडार का लेद?
27 इंगा चिंता शेशीगास मना आयुष्यलोन दिनमुल हितभर वाढाय मतेद मी लोन्केल यवारकी आना शक्य उंडाद येम? 28इंगा मीर बट्टाल बद्दल येनटीक काळजी शेस्तार? शेल्लोन फुवुला बद्दल विचार शेयना, आय यल्ला वाढास्ताय? आय कष्ट शेयाव इंगा बट्टाल कुरवाव, 29तरी पण निन मिक शपतान की, शलमोन राजा पण वान पुर्ण वैभव काळला आटलालोन वगादान लेका पण सजाया लेकुंड्या. 30तर हे अल्पविश्वासी मंदीलाला, याद मैदान लोनदी गड्डी इबद उंडाद इंगा रेप जर भट्टीला येशेदेंक वस्ताद दानकी जर परमेश्वर इल्ला बट्टाल फेटताड तर दान काना पण मंची इल्ला बट्टाल वाड मिक फेट्टाक फोई येम? 31दिनिचांग ‘मिम येम तिनाला’ ‘येम तागाला’, इंगा ‘मिम येम फेटकुनाला’ आंका चिंता शेयाकुंडा.
32 येनटीक की इ आन्नी माटलु शिक्काबेक आंका यहुदी लेनोर मंदी धडपड सेस्तार, येनटीक की मी स्वर्गलोन परमेश्वर आब्बानकी यरका उंडाद की मिक इ माटलाद गरज उंडाद आंका चिंता शेयाकुंडा. 33तर मीर पहिला परमेश्वरदी राज्य इंगा इमानदारीता जीवन जगाशेद प्रयत्न शेयना आंटे दान जताक इ आन्नी माटलु मिक शिक्की.
34 दिनिचांग रेपकाडदी चिंता शेयाकुंडा येनटीक की रेपकाडदी दिनमु दान जताक स्वताद चिंता यकोस्ताद. इबदोडदी चिंता इबदोड इचांग शेंगेम उंडाद.
Okuqokiwe okwamanje:
MAT 6: WNT
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume