MRK 2
2
येशुड वगा लकवा आंटीने मनशीन शिंगार शेस्ताड
1काही नाळा बाद येशुड कफर्णहुम नगरकी वापस वच्या आप्पुड वाड इल्काडा उंडाड इल्ला मंदी गुम्मा मिंदा फड्या. 2आप्पुड इंता मंदी जमा आय्यीर की इंटल्या वारकी जागा मिलगाल्या, इंते लेद तर दरवाजा बैट्या पण जागा लेकुंड्या. आप्पुड वाड वारकी वचन शपदु. 3मंग काही मंदी वान देगार लकवा आंटीने मनशीन यकोचीर. वान नलगुर मोस्का वच्चीर. 4पण गर्दी इचांग वारकी आ मनशीन येशुन देगार येका फोवा दाकुंदु, मंग येशुड येंदू नीला फडीन्या वान मिंदुडदी कौल्याल वार तिशीर इंगा या मंचाम मिंदा आ मनशी उंड्या, आदी मंचाम वार कौल्याल तिशीगास किंदा वान देगार इडशीर. 5वारदी विश्वास सुशी येशुड लकवा आंटीने मनशीन आन्या, “कोडका, नी पापलाद क्षमा आयनाद.” 6आंदु काही नियमशास्त्र शिक्षकलु कुशींडीर. वार स्वता मनला आनेदेंक आंटीर की, 7“इ मनशी इल्ला येनटीक माटलाडताड? इड तर परमेश्वरदी निंदा शेस्तुनाड! परमेश्वरनी इडशी यवाड पाप क्षमा शेशी शकास्ताड?” 8इंगा आप्पुड वार स्वताने विचार शेस्तुनार, इदी येशुड आप्पुडे मना आत्माला ओळखाशी वारनी आन्या, “मीर मी अंतकरणला इल्ला विचार येनटीक शेस्तार? 9नी पापलाद क्षमा आयनाद, इल्ला इ लकवा आंटीने मनशीन आनेद लेकाते लेय इंगा नीद मंचाम यतकेन नडु; दिंटल्या याद सोपा उंडाद?” 10पण मनशी कोडकुक पृथ्वी मिंदा पापलु क्षमा शेशेद अधिकार उंडाद वारकी तेल्वाला आंका, वाड लकवा आंटीने मनशीन आन्या, 11“निन नीक शपतान, लेय, नीद मंचाम यतकेन नी इल्लुक फो.” 12मंग वाड लगेच लेशा. वाड वानदी मंचाम यतकेन आंदार मुंदार वाड इल्लु बैटीक फोया; दिनिचांग वार आंदार आश्चर्य चकीत आय्यीर इंगा परमेश्वरदी गौरव शेस्का आनीर, “मिम इल्ला यप्पुडुच सुडा लेकुंटीम.”
लेवीद पाचारण
13येशुड वापस गालील सरोवर तीकुड फोया इंगा शेंगेम मंदी वान देगार वच्चीर इंगा वाड वारकी शिक्षण इच्या. 14यंकसार वाड फोयेताप्पुड अल्फीन कोडकु लेवीन जकात नाका मिंदा कुसनीनोन सुशा. इंगा येशुड लेवीन आन्या, “ना यंका दा.” आप्पुड लेवीड लेशा इंगा येशुन यंका फोया.
15मंग इल्ला आय्या की येशुड लेवीन इंटल्या तिनेदेंक कुसन्या; आंदु जकातदारलु इंगा पापी मन्सुल येशुड इंगा वान शिष्यल जताक तिनदुर येनटीक की वार शेंगेम मंदी उंडी वान यंका वच्चीनीर. 16तिनेताप्पुड काही नियमशास्त्र शिक्षकलु यवार परुशील उंडीर वार येशुन पापी मंदी इंगा जकातदारला जताक तिनेताप्पुड सुशीर. वार वान शिष्यलान आडगीर, “इड पापी इंगा जकातदारला जताक येनटीक तिंटाड?” 17इदी इनी येशुड वारनी आन्या, “शिंगार मंदीक वैद्यद गरज लेकुंटाद, बिमारोरकी उंडाद. निन नितीमान मंदीन लेद, पण पापी मंदीन फिल्चेदेंक वच्चीनान.”
उपवास बद्दल प्रश्न
18यप्पुड योहान शिष्यल इंगा परुशील उपवास शेयदुर आप्पुड काही मंदी येशुन तीकुड वच्चीर इंगा वान आनीर, “योहान शिष्यल इंगा परुशी मंदी उपवास शेस्तार पण नी शिष्यल येनटीक उपवास शेयार?” 19येशुड वारनी आन्या, “वर्हाड जताक फेंडली कोडकु उंडाड आड नंताक उपवास शेशेद शक्य उंडाद येम? फेंडली कोडकु जताक उंडाड आड नंताक वारकी उपवास शेशेद शक्य लेद. 20पण इल्ला वेळ वच्ची की, फेंडली कोडकु वार देगाटेल तिस्कुनेदेंक वच्ची इंगा मंग वार दिनमुला उपवास शेशार. 21यवाडुच कोत्ता बट्टाद तुकडा फाता बट्टाक आंचाड, जर वाड इल्ला शेस्ताड तर कोत्ता बट्टा फाता बट्टान शिंचेस्ताद इंगा आदी पहिला काना जास्त शिंगी फोई. 22आल्ले कोत्ता अंगुरला रसनी यवार पण फाता तोल थैलीला येय्यार. जर वाड इल्ला शेस्ताड तर अंगुरला रस तोल थैलीन शिंचेशी इंगा अंगुर रस वाईट आय्यी इंगा अंगुरला रस तोल थैलीद नाश आय्यी. दिनिचांग कोत्ता अंगुरला रस कोत्ता तोल थैलीला येस्तार.”
येशुड शब्बाथ प्रभुड
23मंग इल्ला आय्या की, शब्बाथ दिनमुनाड शेल्लोन्केल फोयेताप्पुड, वान शिष्यल उंब्याल तेम्पुदुर. 24आप्पुड परुशील येशुन आनीर, “सुड, शब्बाथ दिनमुनाड येम शेयाराद आदी इर येनटीक शेस्तार?” 25येशुड वारनी आन्या, “यप्पुड दाविद इंगा वान जताक उंडीने मन्सुलाक आकाल आयन्या इंगा वारकी तिनेदेंक बेकुंड्या. आप्पुड वार येम शेशीर दिन बद्दल मीर वाचायालेद येम? 26अब्याथार महायाजक उंडीनाप्पुड, वाड परमेश्वर भवनला यल्ला फोया इंगा परमेश्वरकी यक्पीचीने रोट्याल, याय नियमशास्त्रला राशीनेलेका याजक शिवाय यवारुच तिनाराद आय यल्ला तिन्या इंगा यवार वान जताक उंडीर वारकी पण यल्ला इच्या?” 27वाड वारनी आन्या, “शब्बाथ दिनमु मंदी इचांग बनाशीनाद. मनशीन शब्बाथ दिनमु इचांग बनाया मतालेद. 28दिनिचांग मनशी कोडकु शब्बाथ दिनमुक पण प्रभुड उंडाड.”
Okuqokiwe okwamanje:
MRK 2: WNT
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume