ሉቃሳ 22
22
ኪሪስቶሳ ዎናው ማቄቴዲኖ
(ማት 26፡1-5፤ ማር 14፡1-2፤ ዮህ 11፡45-53)
1ፓሲጋ ጌቴቲያ ማጋጌ ኡኪ ሚያ ባላይ ማቴዳ። #ኬስ 12፡1-27 2ቄሳቱዋ ካፓቱኔ ሙሴ ሂጊያ ፃፊያዋንቱ ዬሱሳ ዎቲ ዎኔንቶ፥ ዎያ ኦጊያ ጌማን ኮዪኖ፤ ሺን ኣሳው ያዪኖ። 3ፃላሂካ ታማኔ ላዑ ካሊያዋንቱፔ ኢቱዋ ጊዴዳ ኣስቆሮቱ ዪሁዳን ጌሌዳ። 4ኢካ ቢዴ፥ ዬሱሳ ዎቲ ኣ ኢማኔንቶ ቄሳቱዋ ካፓቱዋናኔ ጌሻ ጎሊያ ናጊያዋንቱ ካፓቱዋና ኢቲፔ ሃሳዬዳ። 5ኡንቱንቱካ ናሼቲዴ፥ ሚሻካ ዪሁዳው ኢማናው ዉሌቴዲኖ። 6ኢካ ኤኖ ጌዳ፤ ኣሳይ ባይና ሳን ዬሱሳ ኣ ኢማናው ኢንጄቲያ ዎዲያ ኮዬ።
ዬሱሲ ኣዪሁዳቱዋ ፓሲጋ ማናው ጊጌቴዳ
(ማት 26፡17-25፤ ማር 14፡12-21፤ ዮህ 13፡21-30)
7ማጋጌ ኡኪ ሚያ ባላ ቦንቺያ ዎዲ ጋኬዳ፤ ሄ ዎዲካ ፓሲጋው ዶርሳ ሹካናው ቤሲያ ዎዲያ። 8ዬሱሲ ጴፂሮሳኔ ዮሃኒሳ፥ «ፓሲጋ ቁማ ኑኒ ማናዳን ቢዴ ጊጊሲቴ» ጊዴ ኪቴዳ።
9ኡንቱንቱካ ዛሪዴ፥ «ሃቃን ጊጊሳናዳን ኮያይ?» ያጊ ኦቼዲኖ። 10ኢካ፥ «ሂንቴንቱ፥ ካታማ ጌሊያ ዎዴ ኦቱዋና ሃ ቶኬዳ ቢታኒ #22፡10 ሃ ቶኬዳ ቢታኒ፡ ሄ ዎዴ ሄ ጋዴን ኣሳ ጎሌን ኪቴቲያ ኣቱማ ቆማይ ሃ ቶኮፔ፥ ሄ ጎሊ ዱሬ ጊዲያዋ ቤሴ። ሂንቴንቱና ጋኬታናዋ፤ ኢ ጌሊያ ጎሊያ ኣ ካሊዴ ጌሊቴ፤ 11ሄ ጎሊያዋካ፥ ‹ታማሪሲያዌ ኔና፥ «ታኒ፥ ታና ካሊያዋንቱና ኢቲፔ ፓሲጋ ቁማ ሚያ ኢማ ኪፊሊ ሃቃ ባጋና ዴዒ?» ያጌ› ጊቴ። 12ሄ ቢታኒካ ፖቂያ ቦላን ዴዒያ ሂፄቲ ኡቴዳ ኣኮ ኪፊሊያ ሂንቴንታ ቤሳናዋ፤ ሄዋኒካ ሳዓ ጊጊሲቴ» ያጌዳ።
13ኡንቱንቱ ቢዴ፥ ዬሱሲ ጎዋዳንካ ቢታኒያ ዴሚዴ ፓሲጋ ቁማ ጊጊሴዲኖ። 14ፓሲጋ ቁማይ ሜቴቲያ ሳቲ ጋኮ ዎዴ፥ ታማኔ ላዑ ኪቴቶዋንቱና ኢቲፔ ቁማ ማናው ኡቴዳ። 15ኢካ፥ «ታና ሜቱ ጋካናፔ ካሲያን ሂንቴንቱና ሃ ፓሲጋ ቁማ ማናው ዳሮ ኣሞታዴ ዴዓይ። 16ኣዪሲ ጎፔ፥ ታ ሂንቴው ኦዲያዌ፥ ሃዌ ፆሳ ካዉቴን ፖሌታና ጋካናው፥ ታኒ ላዔዋ ሃዋፔ ሚኬ» ያጌዳ።
17ፁዓ ኣኪዴ፥ ፆሳ ጋላቲዴ፥ «ሃዋ ሄይቴ፥ ሂንቴንቱ ጊዱዋን ጊሼቲ ኡሺቴ። 18ኣዪሲ ጎፔ፥ ታ ሂንቴንቶ ያጋይ፥ ፆሳ ካዉቴይ ያና ጋካናው፥ ሃቼፔ ዶማዴ ዎዪኒያ ኤሳ ኡሺኬ» ያጌዳ።
19ቃሲ ማጋጌ ኡኪ ኣኪዴ፥ ፆሳ ጋላቴዳ፤ ሄ ኡኪ ሜን ኡንቱንቶ ኢሚዴ፥ «ሃዌ ሂንቴንቶ ኢሜቲያዌ ታ ኣሹዋ፤ ሃዋን ታና ቆፓና ማላ ሃዋ ሚቴ» ያጌዳ። 20ካዉዋ ሞዋፔ ጉዪያን፥ ካሴዋዳን ፁዓ ዴን ኡንቱንቶ ኢሚዴ፥ ሃዋዳን ያጌዳ፡ «ሃ ፁዓይ፥ ታ ሂንቴንቱ ዲራው ጉሲያ ታ ሱ ቆፔያ ኦራ ጫቁዋ። #ማት 26፡26-28፤ ማር 14፡22-24፤ 1ቆር 11፡23-25 21ሺን ቤዒቴ፥ ታና ኣ ኢማናው ዴዒያ ቢታኒ ጋዪታን ታናና ኢቲፔ ሜ። 22ኣያው ጎፔ፥ ታኒ ኣሳ ናዓይ ፆሳይ ጎዋዳን ባይ፤ ሺን ታና ኣዴ ኢሚያ ኡራው ኣው ኣዬ» ያጌዳ። 23ኡንቱንቱ ጊዶፔ ሄዋ ኦናው ዴዒያዌ ኦና ጊዳኔንቶ፥ ባሬንቱ ጊዶን ኦሻ ዶሜዲኖ።
ኡባፔ ኣያዌ ኦኔ? ያጊያ ኦሻ
24ቃሲ ባሬንቱ ጊዶፔ ኦኒ ኣንቶ ያጌቲያ ፓሉማይ ኡንቱንቱ ጊዶን ኬሴዳ። 25ዬሱሲ ኡንቱንታ ያጌዳ፡ «ሃ ኣላሚያ ሞዲያዋንቱ ባሬንቱ ኣሳ ቦላ ጎዳቲኖ፤ ኡንቱንታ ሞዲያዋንቱ ኬካቱዋ ጌቴቲኖ። 26ሺን ሂንቴንቱ ሃዋዳን ሃኖፒቴ፤ ዬዉዋን ቃሲ ሂንቴንቱፔ ቃ ጊዴዳዌ ሂንቴ ኡባፔ ጉፂያዋ፤ ሂንቴንታ ሞዲያዌካ፥ ሂንቴንቶ ቆማዳን ሃኖ። #ማት 23፡11፤ ማር 9፡35
27«ቁማ ማናው ኡቴዳዋፔኔ ቁማ ኣሳው ኣያዋፔኔ ኦኒ ቦንቼቲ? ቁማ ማናው ኡቴዳዋ ጊዴኔ? ታኒ ቃሲ ሂንቴንቱ ጊዶን ቁማ ኣያ ቆማ ማላ። 28ቃሲ ታኒ ፓጬቲያ ዎዲያን ሂንቴንቱ ታናና ኢቲፔ ሚኒ ኤቄዳዋንታ። 29-30ኣ ካዉቴ ኦይዲያን ኡታና ማላ ታ ኣቡ ታና ሱንዋዳን፥ ታኒ ቃሲ ታ ካዉቴን ታ ጋይታፔ ማናዳኒኔ ኡሻናዳን፥ ታማኔ ላዑ ኢስራዔሊያ ያራቱዋ ቦላ ፒርዲዴ፥ ካዉቴ ኦይዲያን ኡታና ማላ ሂንቴንታ ሱንዲ» ያጌዳ።
ጴፂሮሲ ካዳናዋ ዬሱሲ ካሴቲዴ ኦዴዳ
(ማት 26፡31-35፤ ማር 14፡27-31፤ ዮህ 13፡36-38)
31ጎዳይ፥ «ሲሞና፥ ሲሞና፥ ታኒ ኦዲያዋ ሲሳ፤ ፃላሂ ሂንቴንታ ኣሳይ ዛርጋ ሃልዒያዋዳን፥ ሃልዓናው ፆሳ ዎሴዳ። 32ሺን ታኒ ኔ ኣማኑ ባዬናዳን ኔ ዲራው ጋናታዲ። ኔኒ ታኮ ሲሚያ ዎዴ ኔ ኢሻቱዋ ሚኒሳ» ያጌዳ። 33ሲሞኒ ዛሪዴ፥ «ጎዳው፥ ታኒ ኔናና ቃሼታናዉኔ ኔናና ኢቲፔ ሃይቃናው ጊጋ ኡታዲ» ያጌዳ።
34ዬሱሲ ቃሲ፥ «ጴፂሮሳ፥ ታኒ ኔው ያጋይ፤ ሃቼ ቢላሂያን፥ ኩቱ ዋሳናሲ ሄዙ ጌዴ ታና ኔኒ፥ ‹ኣ ታኒ ኤሪኬ› ጋዴ ካዳናሳ» ያጌዳ። 35ዬሱሲ ባሬና ካሊያዋንቶ፥ «ኮሮጁ፥ ቃርጪቲኔ ጫማይ ባንታን ታኒ ሂንቴንታ ኪቶ ዎዴ፥ ሂንቴንቶ ኢቲባይ ፓጮዌ ዴዒ?» ያጌዳ።
ኡንቱንቱካ፥ «ኢቲ ባይኔ ኑሲ ፓጪ ቤና» ያጌዲኖ።#ማት 10፡9፣ 10፤ ማር 6፡8፣ 9፤ ሉቅ 9፡3፤ 10፡4
36ኢካ ዛሪዴ፥ «ሃዒ ቃሲ ኮሮጁ ዴዒያዌ ኣኪ ቦ፤ ቃርጪቲ ዴዒያዌካ ሄዋዳን ኡዶ፤ ባይናዌ ቃይ ባሬ ማዩዋ ዛሊዒዴ ማሻ ሻሞ። 37ኣያው ጎፔ ታ ሂንቴው ያጋይ፥ ‹ሃዌ ማካላንቻቱና ኢቲፔ ፓይዴቴዳ› ያጌቲ ፆሳ ማፃፋን ፃፌቴዳዌ፥ ታናን ፖሌቴናን ኣቴና። ኤ፥ ታው ጌቴቴዳዌ ሃዒ ፖሌታናዋ» ያጌዳ። #ኢሳ 53፡12
38ኣ ካሊያዋንቱ፥ «ጎዳው፥ ሃዋን ላዑ ማሻይ ዴዔ» ያጊና ኢካ፥ «ሄዌ ጊዳናዋ» ያጌዳ።
ዬሱሲ ዴብሬ ዛይቴ ዴሪያን ዎሴዳ
(ማት 26፡36-40፤ ማር 14፡32-42)
39ዬሱሲ ካታማፔ ኬሲዴ፥ ሃራ ጋላሲ ቢያዋዳንካ ዴብሬ ዛይቴ ቤዳ። ቃሲ ኣ ካሊያዋንቱካ ኣ ጌዱዋ ቤዲኖ። 40ሄ ሳዓ ጋኪዴ፥ «ፓጪያን ሂንቴንቱ ጌሌናን ኣታና ማላ፥ ዎሲቴ» ያጌዳ። 41ሹቻ ኦሊና ጋኪያሳ ኬና ኡንቱንቱፔ ሃኪ ቤዳ። ጉልባቲዴ፥ 42«ታ ኣቦ፥ ኔኒ ኮዪያዋ ጊዶፔ፥ ሃ ሜቱዋ ፁዓ ታፔ ዲጋ፤ ሺን ታ ሼኔ ጊዶፖ፤ ኔ ሼኔ ጊዶፔ ኣቲን» ያጊዴ ዎሴዳ። 43ሳሉዋፔ ዪዴ ሚኒሲያ ኪታንቻይ ኣው ቤቴዳ። 44ባሬ ዎዛና ጊዶን ሴሌቲዴ፥ ዳሪ ዎሴዳ። ኢ ጫዎቲያ ጫዉካ ሳዓ ቦላን ፆኪያ ሱ ማላቴዳ።
45ዎሳፔ ዴንዲዴ፥ ባሬና ካሊያዋንቱኮ ጉዬ ቢዴ፥ ኡንቱንቱ ዳሮፔ ቃሬቴዳ ዲራው፥ ዳቡሪዴ ጌሚዒሾዋንታ ፄሊዴ፥ 46«ኣያው ጌሚዒሺቴ? ፓጪያን ጌሌናዳን ዴንዲ ዎሲቴ» ያጌዳ።
ዬሱሲ ባሬ ሞርኬቱዋ ኩሺያን ኦይቄቴዳ
(ማት 26፡47-56፤ ማር 14፡43-50፤ ዮህ 18፡3-11)
47ዬሱሲ ሄዋ ሃሳይ ዴዒሺን፥ ጮራ ኣሳይ ዬዲኖ። ታማኔ ላዑ ኣ ካሊያዋንቱፔ ኢቱዋ ጊዴዳ ዪሁዳ ጌቴቲያዌ ሄ ኣሳ ካሌዴ ዬራናው ዬሱሳኮ ሺቄዳ። 48ዬሱሲ ቃይ፥ «ዪሁዳው፥ ኔኒ ታና ኣሳ ናዓ ዬራዴ ኣ ኢማይ?» ያጌዳ።
49ኣ ዩሹዋን ዴዒያ ኣ ካሊያዋንቱ ሃኔቲያ ዬዉዋ ቤዖ ዎዴ ኣ፥ «ጎዳው፥ ሃ ኣሳ ኑኒ ማሻን ቃንፃኔ?» ያጌዲኖ። 50ኡንቱንቱፔ ኢቱ፥ ቄሳቱዋ ኡባቱዋ ካፑዋ ቆማ ሾጪዴ፥ ኣ ኡሼቻ ሃይ ቃንፂ ኦሌዳ።
51ዬሱሲ ቃይ ዛሪዴ፥ «ኣጊቴ፥ ባሺቴ» ያጌዳ። ቢታኒያ ሃይካ ቦቺዴ ፓዳ። 52ዬሱሲካ ባሬኮ ዬዳ ቄሳቱዋ ካፓቶ፥ ጌሻ ጎሊያ ናጊያዋንቶ፥ ሱንቱዋሲኔ ጋዲያ ጪማቶ፥ «ፓኑዋ ኦይቂያዋዳን ማሻኔ ፃምዓ ኦይቂዴ ዪቴ? 53ጌሻ ጎሊያን ታኒ ጋላሳን፥ ጋላሳን ሂንቴንቱና ዴዒያ ዎዴ፥ ታና ኦይቂቤይኪታ፤ ሺን ሃዒ ሃዌ ሂንቴንቱ ዎዴኔ ማ ዎልቃ ዎዴ» ያጌዳ።
ጴፂሮሲ ዬሱሳ ካዴዳ
(ማት 26፡57-58፣ 69-72፤ ማር 14፡53-54፣ 66-72፤ ዮህ 18፡12-18፣ 25-27)
54ዬሱሳ ኦይቂ ቃቺዴ፥ ቄሳቱዋ ኡባ ካፑዋ ጎሌ ኣፊዴ ጌሊሴዲኖ። ጴፂሮሲካ ኡንቱንቱፔ ጉዬ ሃኩዋን ኡንቱንቱ ጌዱዋ ካሌ። 55ዲርሳ ጊዶን ታማ ኤዴ፥ ኢቲፔ ኡቲ ዴዒሺን፥ ጴፂሮሲ ኡንቱንቱ ጊዶን ዪዴ ኡቲ ኣጌዳ። 56ታማይ ፖዒያ ባጋና ጴፂሮሲ ኡቲዴ ዴዒሺን፥ ኢቲ ኣሺካራታ ሎይ ፄላዴ፥ «ሃዌካ ኣናና ኢቲፔ ዴዔ» ያጋዱ።
57ጴፂሮሲ ቃይ፥ «ሃኔ ሚሺራቴ፥ ታኒ ኣ ኤሪኬ» ያጊ ካዴዳ። 58ጉ ዎዲያፔ ጉዪያን፥ ሃራ ቢታኒ ጴፂሮሳ ቤዒዴ፥ «ኔኒ ኡንቱንቱና ጋ ዴዓ» ያጊና፤
ጴፂሮሲ ቃሲ፥ «ሃዎ ቢታኔው፥ ታኒ ኣናና ጋ ዴዒኬ» ያጌዳ።
59ኢቲ ሳቴ ጊዲያዋ ጋሚዒዴ ሃራ ቢታኒ ቆንጪሲዴ፥ «ኢ ጋሊላ ጋዴ ኣሳ ጊዲያ ዲራው፥ ሃ ቢታኒ ኣናና ኢቲፔ ዴዒያዌ ቱማ» ያጌዳ። 60ጴፂሮሲ ቃሲ፥ «ሃ ቢታኔው፥ ኔኒ ጊያዌ ኣዬንቶ ታኒ ኤሪኬ» ያጌዳ። ሄ ዎዲያን ኢ ቢሮካ ሃሳይ ዴዒሺን፥ ኤሌካ ኩቱ ዋሲ ኣጌዳ። 61ጎዳይ ጉዬ ሲሚዴ፥ ጴፂሮሳ ፄሌዳ። ጴፂሮሲ ጎዳይ ባሬና፥ «ሃቼ ኩቱ ዋሳና ጋካናው፥ ሄዙ ጌዴ ታና ካዳናሳ» ጌዳ ጎዳ ቃላይ ኣው ቆፌቲ ኣጌዳ። 62ጴፂሮሲ ዲርሳፔ ካሬ ኬሲዴ፥ ሴሌቲዴ ዬኬዳ።
63ዬሱሳ ኦይቄዳ ኣሳይ ቂሊጪኖኔ ሾጪኖ። 64ኣ ኣይፊያ ጎዚ ባቂዴ፥ «ኔና ባቄዳዌ ኦኔ? ናቢያ ጊዶፔ ኔና ዴቻዋ ኣኔ ኦዳ» ያጊዴ ኣ ኦቼዲኖ። 65ቃሲ ኣ ሃራ ጮራ ቦሪያ ቦሬዲኖ።
ዬሱሳ ፒርዳው ኣፌዲኖ
(ማት 26፡59-66፤ ማር 14፡55-64፤ ዮህ 18፡19-24)
66ሳዓይ ዎንቲና ጋዲያ ጪማ ኣሳቱ፥ ቄሳቱዋ ካፓቱኔ ሙሴ ሂጊያ ታማሪሲያዋንቱ፥ ዬሱሳ ባሬንቱ ሺቄዳሳ ኣፊዴ፥ 67«ኪሪስቶሲ ኔኔ? ኣኔ ኑ ኦዳ» ያጌዲኖ።
ሺን ኢ፥ «ታኒ ሂንቴንቶ ኦዶፔ ታና ኣማኒኪታ፤ 68ቃሲ ሂንቴንታ ታኒ ኦቾፔ ኦዲኪታ፤ ዎይ ቃሹዋፔ ታና ቢሊኪታ። 69ሺን ሃ ሳቲያፔ ዶሚን ታኒ ኣሳ ናዓይ፥ ሃዒፔ ዶማዴ፥ ዎልቃማ ፆሳ ኡሼቻ ባጋና ኡታና» ያጌዳ።
70ኡንቱንቱ ኡባይ ዬሱሳ፥ «ያቲና ኔኒ ፆሳ ናዔ?» ያጌዲኖ።
ኢካ ዛሪዴ፥ «ታኒ ፆሳ ናዓ ጊዶዋ ሂንቴንቱ ሃሳዬዲታ» ያጌዳ። 71ኡንቱንቱካ፥ «ኑኒ ኑ ሁጴው ኣ ዶናፔ ሲሴዶ፤ ሃዋፔ ሲንው ኣይ ማርካ ኮሺ?» ያጌዲኖ።
Okuqokiwe okwamanje:
ሉቃሳ 22: dwrENT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2011, Wycliffe Bible Translators, Inc. All rights reserved.
Funda kabanzi mayelana ne Ooratha Caaquwaa