If you have would like a copy of this version please contact info@davarpartners.org

Text: Otuho New Testament 2003, Bible Society in South Sudan Audio: Otuho New Testament Audio Bible 2023, Davar Partners International

Otuho New Testament

Ihalu erre hunia, ette Yesu illaŋan afohor tole ono atafar enne ittokon ono Galilea (anna anya buo fe Tiberias). Buo eluluŋ waati enne ittok ette ijifaru inyi nyio, igonyuni nyia isi eduariti hunyia itaŋidariere inyi aŋuak. Odok nyia Yesu jio obo adoŋe ollo odiha, ette itoŋo diya iko lejifak honyi. Iliaha nyia neyom ono Allaŋan. Attati Yesu ifiala, ette igonyuna eluluŋ waati enne ittok ottu ajihonyi, ania, ette inyi ifiyo Filipo jio, “Enyiaŋu adi aŋiyo tai onno oremik itaŋiyere arriai tulo ania 'daŋ?” (Ikiana nyia inyi ihuo nyia, ikemiere Filipo, nyio, omijak nyia inyi, ariŋ onno olo inyi ihan.)
Itarraŋ nyia Filipo inyi ojio, “Obeŋi arobiyaa esiha arrihai oremihini inyiaŋuna emunio hunno oremehini, duadi bu epipenyak jihosi kai, kai.”
Attati obo olo lejifak honyi alla anya Andrea illa Simone jiaran jihonyi, “Obo leto olo dini, ollo owon iko emunio ometi miyet buo aham arrihai. Ati ittallihini isi iremehina eluluŋ tulo ania 'daŋ.”
Attati Yesu jiaran jihosi, “Ititoŋonia aati hulia.” (Owon nyia amiyaŋ arriai diya.) Ania, ette aati 'daŋ itoŋo diya. Arai nyia isi ihuo alif miyet. Attati Yesu iduhuna emunio hua, ette isio ahumo jio Hollum, ette ihiharana jio aati hinyia ititoŋoni. Ette inyi buo fe ihiharana aham hua ihuo nyia, buo isi 'daŋ ette inya ihuo awahi isi. Ninyia ifoŋi isi 'daŋ ette inyi jiaran jio lejifak honyi, “Iddudduhuna ofitot, hèlaha orrohojari.” Ania, ette isi iddudduhuna ofitot imunio hunia 'daŋ jio emunio ometi huna miyet hunyia oŋiye aati, ette itafutana ifejin 'tomon harrihai.
Ninyia igonyuni aati eduarit enne ihan Yesu ania ette isi jiaran, “Hode, Ekianani Hollum olo linyia ojiori jio ottu adi ifau.” Buo ninyia lamijak Yesu jio awahi nyia isi inefuna inyi ihananiere inyi ahobu ta agolon, ania ette inyiak leten attua doŋe ollo odiha inyi hama.


Ninyia ara akekai, ette lejifak Yesu iluara attany atafar enne ittokon, ette idahina itogol, ette ifuatan afohor tafar enne ittokon tole attany Kapernaum. Ninyia iriok, hobeŋ nyia Yesu 'daŋ ottu jihosi. Jio asaa ania, ohut nyia noyyami onno orroho bebe many ipipuaŋari atafar ania. Oyiroroi nyia lejifak Yesu atogol ania ihuo amaili hunihoi kuyya aŋuan, ette isi igonyuna Yesu orieuno ta ahide hari attany atogol ania, ette isi 'daŋ ibaŋi bebe. Ati ojio nyia Yesu jihosi, “Hèbaŋata, nani alia.” Buo isi ette itadahina inyi itua togol, ta amuno, ania teya ette atogol ania ifanyan ilotifor hari jio amaji ninyia ofuarik isi.

Nyia motie, omijani nyia aati hunyia arasai 'to afohor tafar tole jio, arasaru ŋole atogol abotie ijiai. Omijani nyia isi jio, obeŋ nyia Yesu adak itogol iko lejifak honyi nyio, ofuoi nyia lejifak honyi isi hama. Ofuonni nyia omuk atogoli to Tiberias ilotifor tafar iger maji ninyia oŋiyerek eluluŋ waati emunio, ninyia isiarak Lamonye ahumo jio Hollum. Buo ninyia igonyuni aati hulia jio obeŋ Yesu teya, ara duadi lejifak honyi, ette isi idahina atogoli hunia, ette ifuatan Kapernaum ittifiari inyi.

Ninyia arumani isi Yesu ifohor tafar tole, ette isi jiaran jihonyi jio, “Hettiyanani, nyia baya ittu iyye dini?”
Buo Yesu ette itarraŋ isi ojio, “Hode hode, eramak ni itai jio, ittifiati itai nani nyio, te eram ono emunio hoŋole inyete itai many ifuaŋata, buo obiaŋara jio imijana itai awoyo hiram ono eduariti hoŋ. Hèpuloti te eram ŋiyo onno oremik 'to imuyahi; ati opuloti te eram ŋiyo ono nesu 'tulaŋ. Aŋiyo onno olo Lonyi Tulo isiarana jihatai nyio, isihok nyia Hollum Monye emoi honyi jihonyi.”
Attati isi ifiyo inyi jiojio, “Ehan attadi hohoi anyio, ihaniere ihuo awak Hollum?”
Itarraŋ nyia Yesu isi ojio, “Ariŋ anna awak Hollum itai ihanata, inyi eruk jio lia linyia ifahu inyi.”
Itarraŋi nyia isi inyi ojio. “Anyio eduarit enne ilo iyye ihan oŋida hohoi egonyu, ette iruk iyye? Ilo adi iyye ihan anyio? Oŋiye nyia hohonyiok hohoi aŋiyo anna anya manaa ihidiofo, ihuo igioroni ibuk Hollum jio, ‘Isio nyia Hollum jihosi emune ettedou iŋiyere.’ ”
Attati Yesu jiaran jihosi, “Hode, hode ajio ni jihatai jio, obiaŋara nyia Mose isio jihatai emune etteedou, Monyoŋ nyia isiarak jihatai emune ahode hode ettedou. Emune Hollum, inyi ollo ottu 'to tedou ette iyaŋuno nesu jio aati hutta fau.” Buo isi ette jiaran jihonyi, “Lettok, oduloi isiorio jihohoi emune ania.”
Attati Yesu iramana isi jio, “Nani emune ono nesu. Lia, ollo ottu 'to jihoŋ obeŋ adi inyi inyiak iniama; buo fe lia, elle iruk 'to jihoŋ, obeŋ adi inyiak ibuoto. Ati eramak ni itai jio, igonyuna itai nani ati ibiaŋata itai iruhoto. Ofuonni adi hia 'daŋ, hulle isio monyoŋ jihoŋ. Ettallik adi ni ifuhara addi, lia, ollo ottu 'to jihoŋ. Nyio, abeŋ ni attu tedou ihaniere ariŋ anna awak ni, ati ihaniere ariŋ anna awak lia, elle ifahu 'to nani. Awak lia, elle ifahu 'to nani, jio hèlaha nani etalitohi obo jio hia hulle isio inyi jihoŋ. Ati oŋida nani etubuhu isi 'daŋ toye iholoŋ ono esidi fau. Awak Monyoŋ jio oŋida hia 'daŋ hulle igonyuni 'to Lonyi buo fe iruhi jihonyi, owoni iko nesu 'tulaŋ. Buo fe ni etubuhu adi isi toye iholoŋ ono esidi fau.”
Ati itterie nyia aati ahahaya ta ajiaran honyi jio, “Ani emune onno ottu 'to ifau tedou.” Ojiori nyia isi jio, “Obiaŋara soho Yesu alia, lonyi Yosefu? Emijak hohoi monyonyi iko honyonyi. Aŋai ati ojio inyi jio attu inyi ifau tedou?”
Itarraŋ nyia Yesu ojio, “Idehina eŋuŋunita hatai ania. Ittallik obo ittuna jihoŋ arari fe elle iyaŋuno Monyoŋ linyia ifahu 'to nani inyi jihoŋ, buo ni adi ette itubuhuna inyi toye iholoŋ ono esidi fau.
“Igioroni ekianak Hollum jio, ‘Ittiyenio adi Hollum aati 'daŋ ababo.’ Lia, elle itaniŋio 'to eram Monye buo fe ittiyenu jihonyi, ottu adi inyi jihoŋ. Obiaŋara jio igonyuni aati 'daŋ Monye. Ati lia ollo ottu 'to jio Hollum inyi nyia hama igonyu Monye. Eramak ni itai hode hode jio, lia elle iruk 'to owon inyi iko nesu onno osio 'to 'tulaŋ. Nani emune ono nesu. Oŋiye nyia hohonyiok hatai aŋiria anna anya 'to manaa ihidiofo, ati aye isi. Buo alla anya obo atulo emune onno ottu 'to tedou, ittallik adi inyi iyye. Nani emune ono nesu ninyia ottu 'to tedou ifau. Lia, alla anya 'to emune ania, amanya adi inyi 'tulaŋ. Emune anna alo ni isiarana, inyi nahuan hoŋ, enne isiarak ni jio oŋida bati aati 'daŋ isui.”
Attati olorisa onno orroho bebe idioto ihiji Yudei, ette isi ifiyo jiojio, “Aŋai oremik atulo olo itahonyio hohoi ahuan honyi?”
Buo Yesu ette jiaran jihosi, “Eramak ni itai hode hode, elle ibiaŋata itai ihonyata ahuan Lonyi Tulo buo fe ibiaŋata imatata nooto honyi, obeŋ adi nesu jihatai. Lia, ollo ohonya 'to eriŋo huan hoŋ buo fe amata nooto hoŋ, owon adi inyi iko nesu onno osio 'to 'tulaŋ. Etubuhu adi ni inyi toye iholoŋ ono esidi fau. Nyio ara ahuan hoŋ luŋa aŋiyo hode hode, buo fe nooto hoŋ ara luŋa ariŋ anna amatai hode. Lia, ollo ohonya 'to eriŋo huan hoŋ buo fe amat nooto hoŋ, amanya inyi jihoŋ buo fe ni, amanya jihonyi. Ihuo enne ifahuniere Monye elle isu 'to nani buo fe ni esu tenyi, ihuo nyia buo fe, lia, ollo ohony 'to eriŋo huan hoŋ, isu adi inyi toni. Emune ania onno ottu 'to tedou ifau. Obeŋ inyi ara ihuo emune ninyia oŋiye hohonyiok hatai. Aye nyia isi. Ati amanya adi 'tulaŋ atulo alla anya 'to emune ana.”
Ikiana nyia inyi erre hunia to ninyia ittiyeniere inyi itua haji emojit, ibore gala Kapernaum.

Ninyia itaniŋuni lejifak honyi arriai eram ana, ette isi iŋuŋunita jiojio, “Ogol ettiyenio ania bebe. Ŋai 'tadi oremik itaniŋuna inyi?”
Ati omijak nyia Yesu ta ahuan honyi jio, iŋuŋunitai nyia isi te eram ania, ette inyi jiaran jihosi, “Itilafuk ettiyenio ania itai? Oso duo inyi aŋai, elle igonyuna duo itai Lonyi Tulo acaharu ahide jio amaji ninyia awanari inyi? Oloholio Hollum inyi iyaŋuno nesu, buo agolon tulo ittallik ihan obo ariŋ. Ati iyaŋunie ekenita hunne eramak ni itai hunia, Oloholio Hollum ono nesu. Ati hobeŋi omuk hulatai iruhi.” (Omijak nyia Yesu many tetteri ba ŋai hullo obeŋi 'to iruhi inyi, buo fe ŋai ollo olo 'to itinyiaŋara inyi.) Attati inyi jiaran, “Inyi ania eram ninyia eramaniere ni itai jio, ittallik obo atulo ittuna jihoŋ arari fe alla aŋatak Monye inyi ittuniere jihoŋ.”
Ania, ette aati arriai hunyia ijifatie 'to inyi ihara ejifatio inyi. Attati inyi ifiyo lejifak honyi hula 'tomon harrihai jio, “Buo itai hulo…iwahata buo fe itai ifuatan addi?”
Itarraŋ nyia Simone Petro inyi jio, “Lamonye, efuo attadi hohoi jio ŋai? Iwon iyye iko ekenita hunne iyaŋunie 'to nesu onno osio 'to 'tulaŋ. Eruk hohoi buo fe emijak jio, iyye Ololibo Olobotie olo Hollum.”
Itarraŋ nyia Yesu jio, “Obiaŋara nyia soho nani anyimu itai hula 'tomon harrihai? Ati ara obo alatai a Sittan!” Ikiana nyia Yesu te eram Yuda, lonyi Simone Iskariot. Ara nyia inyi obo olo lejifak hula 'tomon harrihai linyia ottu 'to itinyiaŋara Yesu.

Luister na Yoane 6