If you would like a copy of this version please contact info@davaraudiobibles.org

Wagri New Testament

तणी वला आराम ने दाड़े ईसु खेतर मा हू थाईनी जाई रेजो तो, ते विने सेला पुक लागी नी वा गऊँ ने कटी तुड़ी-तुड़ीनी खावा लागा। फरीसी यू जुईनी वणा हू कय हे, “जू, तारे सेला वु काम करी रेजा हे जियू मुसा ने नियम ने वजूने आराम ने दाड़े करवू हाऊ नीं हे।”
अणी वात माते ईसुई वणा हू केजू, “हूं तमय नीं पणजू के, दाऊद नी विने हातजी पुक लागे ते वणय हूं किदू? वी हूं लिवा परमेसवर ने पवितर तम्बू मा गियो नी परमेसवर सडावजा थकण पवितर रूटा खादा? जियू खावू नीते वणाय नी नीते विने हातजी खावू मुसा ने नियम ने विरोद मा तु। बस वणाय याजकुस खाई हके हे। नी हूं तमय मुसा ने नियम मा यू नीं पणजू के, याजकुस मनदिर मा जाईनी आराम ने दाड़े नियम तुडे़ हे, तेबी वी वगर गलती ने ठेहरे हे? पण मुँ तमय हू कऊँ हूँ के, निय वी हे जी मनदिर हू बी मुटो हे। अगर तमो इने मतलब जाणता के, ‘मुँ दयाहू राजी हूँ, बलिदान हू नीं’ ते तमो वणय दोसी नीं ठेहरावता जी वगर दोस ने हे। केमके, मुँ मनक ने सुरो आराम ने दाड़ा ने बी परबू हूँ।”


पसे ईसु विय हू हिड़ीनी यहुदि परातना घेर मा आजो। नी जुओ, विय एक मनक तो, जिनो आत हुकाणो थकण तो। नी मनका ईसु माते दोस लगाड़वा ने हारू वणा हू पुसयू के, “हूं आराम ने दाड़े कणाक बिमारे बिमारी हू होज करवू नियम ने वजूनी हाऊ हे या नीं?”
ईसुई वणहू केजू, “मानो, अगर तमय मा हू कणाक कनी एकुस गायरी वे नी वे गायरी आराम ने दाड़े कणाक खाड़ा मा पड़ी जाए ते, हूं तमो वणजी हाईनी बान्णे नीं काड़हो? पलू यू हे के, मनक ने किमत गायरी हू कतरी बड़ीनी हे। तणी आराम ने दाड़े पलाई करवी नियम ने वजूने हाऊ हे।” तेरे ईसुई वणा हुका आत वाला मनक हू केजू, “आपड़ो आत लाबो कर।”
नी वणाय आपड़े आत लाबो किदो नी विने आत पुरी तरह हू बिजा आत हरको बड़ीया थाई गियो। पसे फरीसी विय हू बान्णे जाईनी वणाय मारवा ने हारू मोको जुवा लागा के, वणाय कणी तरह हू मारी दड़अ।

ईसु यू जाणी गियो नी विय हू जातो रेजो। नी मुटी पीढ़ वणा वाहे थाई गई नी ईसुई वणय कईक बिमारी हू होज किदअ। नी वणाय सेताड़ीनी केजू के, अणा बारामा मनका हू कईस नकी केवान। यू तणी थाजू के, जी वसन परमेसवर ने हाड़े हू बुलवा वाला यसायाय केजू तु, वु पुरू थाए,
जुओ, “यो मारो दास हे,
जीयो मारो अलगो किदो थकण हे।
यो मारो लाड़ळो हे,
मुँ अणाहुस राजी हूँ।
मुँ मारी ‘आतमा’ अणा माते राकी,
नी वी हेता मनका ने न्याव करहीं।
वी नीते जगड़ो करहीं, नीते गलजअ मा डाडी करहीं।
नी नीते बजारो मा कणु विने हबलही।
वी खदेड़जा थका बरूई नीं तुड़हीं,
नी वी नीते अगेड आलता थका दिवाय ओलवहीं,
नी जेरे लगण न्याव जीती नीं लिए।
नी हेता मनका विने नाम माते आस राकहीं।”


पसे ईसु कनी मनका एक एवो आदलो नी बुबड़ो लाजअ जणामा बुरी आतमा ती। ईसुई वो होज किदो, नी वी बुबड़ो बुलवा नी जुवा लागो। अणा माते हेता मनका कईक सकित थाजअ नी केवा लागअ, “हूं यो दाऊद ने सन्तान हे?”
पण फरीसी यू हबलीनी केजू, “यो ते बुरी आतमा ने हरदार बेलजाबुल ने मदत हू बुरी आतमा काड़े हे।”
ईसुई वणने मन ने वाती जाणीनी वणअ हू केजू, “जणा जणा राज मा फुट वे ते वु वकराई जाए हे। इमुस कणाक नगर या घेर जणामा फुट पड़ी जाए ते वु बणजू नीं रेहे। अगर सेतानुस सेतान ने बान्णे काड़े ते, वी आपड़े पोता ने विरोद मा थाई जाए ते। विने राज केम करीनी बणजू रेहे? पलू थातु, अगर यू हासु हे के, मुँ बुरी आतमा ने हरदार बेलजाबुल ने मदत हू बुरी आतमा ने काडु हूँ, ते तमारे सन्तान किने मदत हू काड़े हे? तणी तमारे न्याव वअस करहीं। पण अगर मुँ परमेसवर ने आतमा ने मदत हू बुरी आतमाओ ने काडु हूँ, ते परमेसवर ने राज तमारे कनी आवी पुगू हे।
“अगर कणुक कणाक तागतवर ने घेर मा पेहिनी विने माल ने सुरी करवा साहे हे, ते पेले वणा ताकतवरे बादी लिए, तेरे पसे वी वणा घेर ने सुरी करी हके हे।
“जी मय हाते नीं हे, वी मारे विरोद मा हे। नी जी मय हाते विणतो नीं हे वी वकेरी रेजो हे। तणी मुँ तमय हू कऊँ हूँ के, मनका ने हर परकार ने पाप नी बुराई माप किदा जाहीं, पण पवितर आतमा ने बुराई माप नीं किदी जाहीं। जी कणु मय मनक ने सुरा ने विरोद मा कई वात केहीं, विने पाप माप किदा जाहीं। पण जी कणु पवितर आतमा ने विरोद मा कई के हे, विने पाप नीते अणा जुग मा नी नीते आवणा वाला जुग मा माप किदा जाहीं।


“तमो जाणो हो के, हाऊ फल लिवा ने हारू तमय हाऊ रूकडूस लगाड़वू जुजे। नी खराप रूकड़ा हू खराबुस फल मले हे। केमके रूकडू आपड़े फल हूस ओळकेजू जाए हे। हे हाप ने सुरे, तमो बुरअ थाईनी हाऊ वाती केम करीनी केई हको हो? केमके जी दिल मा पराईलु हे, वुस मुड़े हू निकले हे। हाऊ मनक आपड़े दिल माहू हाऊ वाती काड़े हे, नी बुरू मनक आपड़े दिल मा हू बुरी वाती काड़े हे।
“तणी मुँ तमय हू कऊँ हूँ के, जी जी बुरी वाती मनक के हे न्याव ने दाड़े हरेक वात ने हिसाब आलवो पड़हीं। केमके तु आपड़े पोता ने वातअ ने वजहू वगर पाप ने नी पोता ने बुरी वातअ ने वजहू दोसी ठेहरावजो जाई।”


पसे थुड़ाक मुसा ने नियम हिकाड़वा वाला नी फरीसी ईसु हू कय हे, “हे गरू, अमअ तय हू एक समतकार ने हेलण जुवा साहअ ह।”
उतर मा ईसुई केजू, “अणा जुग ने बुरअ नी सिनाली करवा वालअ मनका समतकार ने हेलण जुवा साही हे। पण परमेसवर ने हाड़े हू बुलवा वाला योना ने समतकार ने हेलण सुड़ीनी बिजो कई समतकार ने हेलण नीं आलजो जाहीं। नी जेम योना तीन रात दाड़ो मातली ने पेट मा रेजो तो, इमुस मुँ मनक ने सुरो बी तीन रात दाड़ो जमी माय रेई। नीनवे ने मनका न्याव ने दाड़े अणा जुग ने मनका ने हाते उटीनी तमय दोसी ठेहरावहीं। केमके वणय योना ने परसार हबलीनी मन बदलजू तु। नी जुओ, निय वी हे जी योना हू बी मुटो हे। न्याव ने दाड़े आतमणी ने राणी अणा जुग ने मनका ने हाते ऊबी थाईनी तमय दोसी ठेहरावहीं। केमके वे तरती ने कनारी हू सुलेमान ने उपदेस हबलवा आजी ती नी जुओ, निय वी हे जी सुलेमान हू बी मुटो हे।


“जेरे असुद बुरी आतमा मनक मा हू निकली जाए हे ते वे हुकी जगा मा आराम हुजे हे, पण वणजी मले नीं हे। तेरे पसे वे के हे के, ‘जी घेर मय सुड़जू तु मुँ वणा मास पासी जाई।’ तणी वे पासी आवे हे ते वणजी साफ सुतरू नी हबावजू थकण मले हे। पसे वे पासी आवे हे नी आपड़े हाते फेर हात बुरी आतमा ने लावे हे जी वणी हू बी वदार वगड़जी वय। पसे वी हेती आवीनी विय रेवा लागी हे नी वणा मनक ने दसा पेले हू बी वदार डरावणी थाई जाए हे। आज ने अणी बुरी पीढ़ी ने मनको ने दसा बी एवीस थाहीं।”


ईसु पीढ़ हू वाती करीस रेजो तो, नी जुओ, विने आई नी पाई बान्णे ऊबअ त नी व वणा हू वाती करवा साहतअ त। कणायेक वणाहू केजू, “तारे आई नी पाई बान्णे ऊबअ हे नी व तयहू वाती करवा साहे हे।”
उतर मा ईसुई वणहू केजू, “कुण मारे आई हे नी कुण मारे पाई हे?” पसे ईसुई आपड़े आत हू सेलो ने हाड़े इसारो करतो थकण केजू, “यस हे मारे आई नी मारे पाई। केमके जी कणु मारे हरग बाप ने मरजी माते हिड़े हे, वस मारे सगा पाई बेन नी आई हे।”

Luister na मती 12