If you would like a copy of this version please contact info@davaraudiobibles.org

Wagri New Testament

ईसुई जेरे ये मुटी पीढ़ जुजी ते वी एक मगरा माते सढ़ी गियो। विय वी बेहीं गियो नी विने सेला वणा पाहे आजा। तेरे ईसुई वणय उपदेस आलतो थकण केजू,


“दन्य हे व जी मन ने दीन हे,
हरग ने राज वणने हारूस हे।
दन्य हे व जी रूई रेजअ हे,
केमके परमेसवर वणय सानती आलहीं।
दन्य हे व जी नरम मन ने हे,
केमके व तरती ने हकदार थाहीं।
दन्य हे व जी दरम ने काम करवा ने हारू उतावळअ हे,
केमके परमेसवर वणने मरजी पुरी करहीं।
दन्य हे व जी दयालु हे,
केमके वणअ माते दया किदी जाहीं।
दन्य हे व जणने मन पवितर हे,
केमके व परमेसवर जुहीं।
दन्य हे वा जी मेल मिलाप ने काम करे हे,
केमके व परमेसवर ने सुरा केवाहीं।
दन्य हे व जी दरम ने वजहू हू हतापजअ जय हे,
केमके हरग ने राज वणनेस हे।
“दन्य हो तमो, केमके मनका मारे वजहू तमारे अपमान करहीं नी तमय विताड़हीं नी मारे हारू तमारे विरोद मा जुटी वाती केहीं। तेरे तमो राजी थाईनी कईक आनन्द मनावजो, केमके हरग मा तमय इनु फल मलहीं। यू इमुस थाजू हे के, जेम तमय हू पेले परमेसवर ने हाड़े हू बुलवा वाले मनकय विताड़जा ता।


“तमो तरती ने हरेक मनका ने हारू लुण हो, पण अगर लुण ने हवादुस वगड़ी जाए, ते पसे वणाय पासू हवाद मा केम करीनी लावहो? पसे वु कणा काम नु नीं रेजू पण वणाय बान्णे दड़जू जाए नी मनका ने पोग बुदे खदेड़जू जाए।
“तमो दनिया ने हारू उजाळू हो। एक एवू गाम जी मगरा ने फुगी माते वसेलू हे वु हापी नीं हके हे। मनका दिवो लगाड़ीनी कणा ठाबडा ने बुदे नीं राके, पण वणाय टुल्ला माते मेले हे नी वी घेर ने हेतय मनकय उजाळू आले हे। वणीस तरह हू तमारे उजाळू मनका ने हामे एवू समके के, व तमारे हाऊ कामा ने जुईनी तमारे बाप जी हरग मा हे वणाने बड़ाई करे।

“यू नकी हमजो के, मुँ मुसा ने नियम या परमेसवर ने हाड़े हू बुलवा वालअ ने सोपड़ी मटावणा आजो हूँ, पण मुँ ते वणजी पुरी करवा आजो हूँ।” मुँ तमय हू हासु कऊँ हूँ के, आकास नी तरती टली हके हे, पण मुसा ने नियम ने एक एक सबद नी अकसर तेरे लगण बणजू रेहीं, जेरे लगण यू पुरू नीं थाई जाए।
“तणी जी अणअ हुकम मा हू कणाक नाना मा हू नानाए तुडे़ नी मनका बी एवूस करवू हिकाड़े हे, वी हरग ने राज मा कई कदर नीं पाहे। पण जी वणअ माते हिड़े नी बिजे बी वणअ माते हिड़वा ने उपदेस आले हे, वी हरग ने राज मा मुटो हमजो जाहीं। मुँ तमय हू हासु कऊँ हूँ के, अगर तमारे दारमीकता मुसा ने नियम हिकाड़वा वालअ नी फरीसीयो ने दारमीकता हू बड़ीनी नीं वे, ते तमो किरे बी हरग ने राज मा नीं जाई हकहो।

“तमो जाणो हो के, अमारे पुरकाय हू केजू तु के ‘अतया नकी करो नी अगर कणुक अतया करे हे, ते वणाय कोट मा दोसी ठेहरावजो जाहीं।’ पण मुँ तमय हू कऊँ हूँ के, जी मनक आपड़े पड़ोसी पाई माते री करे हे ते वणाय कोट मा विनो जबाव आलवो पड़हीं। नी जी कणु आपड़े पाई ने बुराई करहीं वी महासबा मा दण ने लायक थाहीं। नी अगर कणुक आपड़े पाजय हराप आले हे वी नरक ने आग ने लायक थाहीं।
“तणी अगर तु आपड़े परमेसवर ने हारू वेदी माते भेट सडावती वला तय यू हुते आवी जाए के, मारे पड़ोसी पाई ने मन मा मारे हारू थुड़ोक विरोद हे, ते तु आपड़े भेट वेदी ने हामे सुड़ी दे नी जाईनी पेले आपड़े पड़ोसी पाई हू मेल करी दे, तेरे पसे आवीनी आपड़े भेट सडाव।
“जेरे लगण तु आपड़े विरोदी ने हाते कोट मा जातो वे ते वाट मास, वणा हू जट जट मेल करी ले कियेक इम नीं थाई जाए के, विरोदी तय न्याव करवा वाला हुपे नी न्याव करवा वालो तय सपाजी हुपी दिए नी तु जेळ मा दड़ी दिदो जाए। मुँ तय हू हासु कऊँ हूँ के, जेरे लगण तु पाई पाई परी नीं दई तेरे लगण तु विय हू सुटी नीं हकी।

“तमो जाणो हो के, यू केजू तु के, ‘सिनाली नीं करवान।’ पण मुँ तमय हू कऊँ हूँ के, अगर कणुक कणीक बयीरी माते बुरी नजर हू जुए ते वी आपड़े मन मा पेले हूस वणी हाते सिनाली करी सुको हे। तणी अगर तारे जमणी आक तय पाप ने वजअ बणावे ते, वणजी काडीनी सीटी दड़ी दे। केमके तय हारू यू पलू हे के, तारे सरीर मा हू एक अंग नास थाई जाए नी तारे पुरू सरीर नरक मा नीं दड़जू जाए। नी अगर तारे जमणो आत तय ठोकर ने वजअ बणावे ते वणाय कापीनी सीटी दड़ी दे, केमके तय हारू यू पलू हे के, तारे एक अंग नास थाई जाए नी तारे पुरू सरीर नरक मा नीं दड़जू जाए।


“यू बी केजू हे के, ‘जी आपड़े बयीरजी सुड़वा साहे, वी सेड़ो फाड़वा ने कागद लकीनी आली दिए।’ पण मुँ तमय हू कऊँ हूँ के, हर वी मनक जी आपड़े बयीरजी सिनाली ने अलावा कणी बिजी वात ने वजहू सुड़ी दिए हे नी वे बयीरी कणा बिजा ने हाती रे हे ते विने सिनाली करवा ने जिमेवार विने पेलको आदमी हे। जी कणु वणी सुड़जी थकण ने हाते विवा करे ते वी बी सिनाली करे हे।

“तमो हबली सुका हो के, अमारे पुरखा हू केजू तु के, ‘जुटा होगन नकी खावान, पण परबू ने हारू आपड़े होगन पुरो करवान।’ पण मुँ तमय हू कऊँ हूँ के, किरे बी होगन ते खाए नकी, नीते हरग ने, केमके वे परमेसवर ने बेहवा ने आसन हे। नीते तरती ने, केमके ये विने पोग मेलवा ने जगा हे। नीते यरूसलेम ने, केमके वु महाराजा ने नगर हे। नी आपड़े मुड़का ने होगन नकी खावान केमके तु एक वाल बी नीते काळो करी हके नी नीते तोळो करी हके हे। पण तमारे वात ‘हा ने हा,’ या ‘ना ने ना’ थाए, केमके जी कई अणा हू वदार थाए हे वु बुराई ने हाड़े हू थाए हे।


“पेले केजू तु नी तमो हबली सुका हो, ‘आक ने बदला मा आक नी दात ने बदला मा दात।’ पण मुँ तमय हू कऊँ हूँ के, कणाक बुराई करवा वाला ने हाते बुराई नकी कर। पण अगर कणुक तारे जमणा गालजा माते एक थापेट वाए ते डावो गालजो बी वणा ने हाड़े करी दे। अगर कणु तय माते दावो करे नी तारे जब्बो उतारवा साहे ते तु वणाय आपड़े सादरो तक आली दे। अगर कणुक तय जबरजसती आपड़े सामन हवाडीनी एक मील हिडाडे़ ते तु वणा हाते बे मील हिड़ी जा। अगर कणुक तय हू कई मागे ते वणाय वु आली दे। जी कणु तय हू उदार लिवा साहे, वणाय ना नकी के।


“तमो हबली सुका हो नी केजू हे के, ‘तमो आपड़े पड़ोसी हू परेम करो नी वेरी हू वेर।’ पण मुँ तमय हू कऊँ हूँ के, आपड़े दुसमणा हू बी परेम करो, जी तमय विताड़े हे वणने हारू परातना करो, ताकि तमो हरग मा रेवा वाला आपड़े बाप ने सुरअ बणी हको। केमके वी बुरा नी हाऊ हेता माते सूरज ने उजाळू समकावे हे। दरमी नी अदरमी बेजणअ माते साटा पाड़े हे। यू मुँ तणी कऊँ हूँ के, अगर तमो आपड़े परेम करवा वालअ हूस परेम करो हो, ते अणा मा तारे हूं फायदो हे? हूं एवू कर लिवा वाला नीं करी हे? अगर तु बस आपड़े पाजो नेस नमसकार करे हे, ते तु कियू मुटू काम करी रेजो हे। हूं एवू ते परमेसवर ने नीं जाणवा वाला करी हे? तणी तमो पुरा पाका बणो, जेवो तमारे हरग बाप पुरो पाको हे।”

Luister na मती 5