Gewilde Bybelverse vanaf Jeremia 23

Deel

“Niemand kan wegkruip waar Ek hom nie sien nie. Julle moet dit weet: Ek is oral in die hemel en op die aarde.” Dit het die Here gesê.

Die Here sê: “Julle moet dit weet, Ek sal eendag iemand kies en aanstel wat die regte koning sal wees van die nageslag van Dawid. Hy sal 'n wyse koning wees wat reg sal regeer en reg sal doen aan almal in die land. In die tyd wanneer hierdie koning regeer, sal die mense van Juda weer vry word, en die mense van Israel sal veilig woon. Die naam van die koning sal wees: Die Here doen reg aan ons.”

Die Here sê: “Dit sal sleg gaan met die herders van die skape wat aan My behoort. Hierdie herders het die skape laat wegraak en hulle het die skape na al die kante toe gejaag.

Ek het my skape na ander lande laat gaan, maar Ek sal self my skape wat nog lewe, bymekaarmaak uit daardie lande. Ek sal hulle terugbring na hulle eie veld waar hulle gewei het. Hulle sal vrugbaar wees en baie word. Ek sal herders kies en aanstel om oor hulle te regeer. Hulle sal nie weer bang word en wegraak nie.” Dit sê die Here.

Die Here wat oor alles regeer, sê: “Julle moenie doen wat die profete vir julle sê nie. Hulle laat julle glo in wind, in dinge wat niks beteken nie. Hulle sê Ek het vir hulle gewys wat sal gebeur, maar hulle vertel hulle eie stories, hulle het dit nie by My gehoor nie.